ភ្នំពេញៈ ក្រុមអាជីវករផ្សារស៊ិនជូរីផ្លាហ្សា នៅតាមបណ្ដោយមហាវិថីសហព័ន្ធរុស្ស៊ី ស្ថិតនៅខណ្ឌពោធិ៍សែនជ័យ បាននិងកំពុងតែប្រមូលស្នាមមេដៃ ដើម្បីធ្វើលិខិតដាក់ជូនលោកនាយករដ្ឋមន្ត្រី ហ៊ុន សែន ដើម្បីសុំជួយអន្តរាគមន៍កុំឲ្យមានការរុះរើផ្សារនេះ បន្ទាប់ពីពួកគេបានទទួលព័ត៌មានពីគម្រោងអភិវឌ្ឍផ្សារឲ្យទៅជាផ្សារទំនើបក្នុងរយៈពេល ២ ឆ្នាំខាងមុខ។
ការប្រមូលស្នាមមេដៃនេះត្រូវបានធ្វើឡើង ក្រោយពេលក្រុមអាជីវករផ្សារនេះប្រមាណ ១០០ នាក់ បានផ្ទុះការតវ៉ានៅមុខផ្សារស៊ិនជូរីផ្លាហ្សាស្ថិតនៅសង្កាត់កាកាប ១ ខណ្ឌពោធិ៍សែនជ័យ រាជធានីភ្នំពេញកាលពីសប្តាហ៍មុន។
លោក សុខ វណ្ណៈ ដែលជាអាជីវករលក់មាន់ទានៅក្នុងផ្សារនេះជិត ១៣ ឆ្នាំ មកហើយនោះបានប្រាប់ភ្នំពេញប៉ុស្តិ៍ពីថ្ងៃចន្ទថា នៅពេលនេះ អាជីវករបាននិងកំពុងប្រមូលស្នាមមេដៃ ដើម្បីធ្វើលិខិតដាក់ជូនទៅអាជ្ញាធរឲ្យជួយដោះស្រាយ។ តែបើនៅតែគ្មានដំណោះស្រាយទេ ពួកគេនឹងបន្តដាក់ជូនលោកនាយករដ្ឋមន្ត្រី ហ៊ុន សែន បន្តទៀត។
លោកបន្តថា យ៉ាងយូរ ២ ថ្ងៃទៀត ការប្រមូលស្នាមមេដៃ នឹងត្រូវបញ្ចប់ ព្រោះមានអាជីវករប្រមាណជា ៤០ ភាគរយហើយ ដែលបានផ្តល់ស្នាមមេដៃរបស់ពួកគេ។
លោកបញ្ជាក់ថា៖ «នេះជាសំណើស្នើសុំទៅសម្តេចនាយក [រដ្ឋមន្ត្រី] ដើម្បីជួយឲ្យក្រុមហ៊ុនឲ្យយើងលក់ដូរដូចដើម។ អាជីវករចង់បាន គឺមានតែមួយចំណុចទេ គឺចង់លក់នៅទីតាំងដដែល។ ពួកគាត់មិនមានតូបមានអីច្បាស់លាស់ទេ គឺមានតែមួយកញ្រែ្ចង ហើយអ្នកខ្លះទៅខ្ចីលុយអង្គការគេទិញកន្លែងចិញ្ចើមថ្នល់ពីមួយទៅមួយ។ បើទៅជាផ្សារទំនើបទៅឲ្យពួកគាត់រកអី?»។
អាជីវករផ្សារម្នាក់ទៀត ដែលជាអ្នកលក់អង្ករក្នុងផ្សារ ដោយសុំមិនបញ្ចេញឈ្មោះ បានប្រាប់ថា ភាគច្រើនអាជីវករនៅក្នុងផ្សារនេះ គឺសុទ្ធតែជាពលរដ្ឋក្រីក្រ។ ដូច្នេះនៅពេលមានការរុះរើផ្សារ ឲ្យទៅជាផ្សារទំនើប នោះនឹងធ្វើឲ្យពួកគាត់ គ្មានលទ្ធភាពក្នុងការលក់ដូរនៅក្នុងផ្សារទំនើបថ្មីនោះទេ។
លោកបញ្ជាក់ថា៖ «ខ្ញុំមិនជំទាស់អ្វីទេ ក្នុងការរុះរើធ្វើជាផ្សារទំនើបហ្នឹង។ យើងមិនចង់ប្រើរបស់ចាស់ទេ តែងចង់ប្រើរបស់ថ្មី។ តែកាលណារុះរើទៅ គឺត្រូវបាត់បង់ចំណូល។ តើអ្នកណាជាអ្នកជួយដោះស្រាយបញ្ហាប្រឈមរបស់ពួកយើង ដូច្នេះមានតែសំណូមពរកុំឲ្យមានការរុះរើ»។
នៅក្នុងផ្សារស៊ិនជូរីផ្លាហ្សាមានតូបចំនួន ៣៤១ និងមានអ្នកលក់ដូរនៅខាងក្រៅជុំវិញផ្សារច្រើនជាងអ្នកលក់ដូរក្នុងតូប ៣ ដង។ អាជ្ញាធរបានទុករយៈពេល ៣ ខែ ឲ្យអាជីវករទាំងអស់រើចេញ ដែលនឹងផុតកំណត់ក្នុងអំឡុងខែតុលាខាងមុខ។ នេះបើយោងតាមអាជីវករ។
ភ្នំពេញប៉ុស្តិ៍មិនអាចទាក់ទងប្រធានផ្សារនេះបានទេម្សិលមិញ ព្រោះលេខទូរស័ព្ទដែលទទួលបានមិនអាចទាក់ទងបាន។
លោក ហែម ដារិទ្ធិ អភិបាលខណ្ឌពោធិ៍សែនជ័យ ថ្លែងថា ការអភិវឌ្ឍផ្សារទំនើប នឹងដើរទៅមុខ បើទោះជាមានការតវ៉ាពីអាជីវករផ្សារមួយចំនួនក៏ដោយ។ លោកថា ជាមួយនឹងការតវ៉ានេះ អាជ្ញាធរ មានគោលនយោបាយដោះស្រាយជូនម្ចាស់តូបទាំងជាង ៣០០ តូប។ ប៉ុន្តែ អាជ្ញាធរនឹងមិនមានគោលការណ៍ទទួលខុសត្រូវចំពោះអាជីវករដែលលក់នៅតាមផ្លូវជុំវិញផ្សារដោយខុសច្បាប់នោះទេ។
លោកបញ្ជាក់ថា៖ «យើងរើតែអ្នកលក់នៅក្នុងផ្សារ ដោយឲ្យពួកគាត់មកលក់នៅផ្សារថ្មីសិន។ ពេលហើយ ឲ្យគាត់មកលក់នៅកន្លែងដើមវិញ ដោយគេមិនមានយកលុយថ្លៃសំណងថ្លៃអ្វីទាំងអស់។ យើងដោះស្រាយតែនៅក្នុងផ្សារស៊ិនជូរីផ្លាហ្សាហ្នឹងទេ»។
លោកអះអាងថា៖ «ការតវ៉ានេះ មានមនុស្សតែប៉ុន្មាននាក់ប៉ុណ្ណោះ ព្រោះពួកគេចេះតែបំបះបំបោរ។ នរណាដែលគេធ្វើផ្សារថ្មីឲ្យលក់ហើយ មកតវ៉ាម៉េច? គេធ្វើផ្សារថ្មីឲ្យហើយ អត់មានទៅយកលុយអីណា។ ៥ ទៅ ៦ ឆ្នាំ ក្រោយបានគេយកលុយ ហើយគេយក ១ ខែតែ ១០ ដុល្លារហ្នឹង»។
លោក ហែម ដារិទ្ធិ បានបញ្ជាក់ថា នៅពេលសាងសង់ផ្សារនេះ ឲ្យក្លាយទៅជាផ្សារទំនើប តូបទាំងអស់ក្នុងផ្សារនឹងមានតម្លៃ ហើយការលក់ដូររបស់អាជីវករក៏ល្អទៅតាមហ្នឹងដែរ។ លោកថា ក្នុងអំឡុងពេលនៃការអភិវឌ្ឍផ្សាររយៈពេល ២ ឆ្នាំ អាជីវករទាំងអស់ នឹងត្រូវបានផ្លាស់ប្តូរទៅទីតាំងថ្មី ដែលនៅលើសួនសាធារណៈមួយរបស់រដ្ឋ ក្បែរផ្សារស៊ិនជូរីនេះបណ្តោះអាសន្នសិន៕