កំពង់ស្ពឺ៖ ក្រុមអ្នកជំនាញបាននិងកំពុងដំឡើងឡទំនើបស្វ័យប្រវត្តិកម្មចំនួន ៥ នៅលើផ្ទៃដី ១០ ហិកតា នៅក្នុងឃុំតាសាល ស្រុក ១០ ហិកតា ស្ថិតក្នុងឃុំតាសាល ស្រុកឱរ៉ាល់ សម្រាប់បូជាសពអ្នកស្លាប់ដោយសារជំងឺកូវីដ ១៩។ នេះបើតាមលោក វ៉ី សំណាង អភិបាលខេត្តកំពង់ស្ពឺ ប្រាប់ ភ្នំពេញ ប៉ុស្តិ៍ នៅព្រឹកថ្ងៃទី ១៩ ខែ មេសា ឆ្នាំ ២០២១ នេះ។
លោកបានថ្លែងថា ៖«ក្រុមជំនាញការបច្ចេកទេស កំពុងរៀបចំផ្គុំគ្រឿងឧបករណ៍សម្ភារ ដើម្បីដំឡើងឡទំនើបស្វ័យប្រវត្តិកម្មចំនួន ៥ លើគ្រឹះបេតុងដែលជាជើងទម្រ ដើម្បីភ្ជាប់បណ្ដាញអគ្គិសនី ដែលកិច្ចការនេះ ត្រូវចំណាយពេលយ៉ាងយូរ ១ សប្ដាហ៍ទៀត នឹងត្រូវរួចរាល់ជាស្ថាពរ»។
លោក ឃួង ស្រេង អភិបាលរាជធានីភ្នំពេញ បានបញ្ជាទិញគ្រឿងឧបករណ៍ និងសម្ភារទាំងនោះពីប្រទេសថៃ កាលពីដើមខែមីនា បន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសអំពីហានិភ័យកាន់តែខ្លាំងឡើង នៃការឆ្លងរីករាលដាលនៃជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ ដោយតម្រូវឲ្យគ្រប់អាជ្ញាធររាជធានី-ខេត្ត ដែលមានការឆ្លងរីករាលដាលនៃជំងឺនេះធ្ងន់ធ្ងរ ត្រូវរៀបចំឈាបនដ្ឋាន និងកន្លែងបញ្ចុះសព អ្នកដែលស្លាប់ដោយជំងឺកូវីដ។
យោងតាមសេចក្ដីប្រកាសព័ត៌មានរបស់ក្រសួងសុខាភិបាលបានឲ្យដឹងថា អ្នកស្លាប់ដោយសារជំងឺកូវីដ ១៩ គិតត្រឹមល្ងាចថ្ងៃទី ១៨ ខែ មីនា ឆ្នាំ ២០២១ មានចំនួន ៤៥ នាក់៕