The Phnom Penh Post Search

Search form




Logo of Phnom Penh Post newspaper Phnom Penh Post - ក្រុម​អ្នកជំនាញ​រកឃើញ​សម្បុក​សត្វ​អណ្តើក​ហ្លួង​ ៣ ​សម្បុក​ ស្មើនឹង​ ៥១ ​ពង




ក្រុម​អ្នកជំនាញ​រកឃើញ​សម្បុក​សត្វ​អណ្តើក​ហ្លួង​ ៣ ​សម្បុក​ ស្មើនឹង​ ៥១ ​ពង

Content image - Phnom Penh Post
អ្នកជំនាញ ពិនិត្យមើល​ពងអណ្ដើក​ហ្លួង​។ រូបថត WCS

ក្រុម​អ្នកជំនាញ​រកឃើញ​សម្បុក​សត្វ​អណ្តើក​ហ្លួង​ ៣ ​សម្បុក​ ស្មើនឹង​ ៥១ ​ពង

កោះកុងៈ អង្គការ​សមាគម​អភិរក្ស​សត្វព្រៃ​ (WCS) ក្រុម​អ្នក​អភិរក្ស​មកពី​សហគមន៍​មូលដ្ឋាន និង​មន្ត្រីរដ្ឋបាល​ជលផល​បាន​រកឃើញ​សម្បុក​សត្វ​អណ្តើក ហ្លួង ឬ​ហៅ​អណ្តើក​សរសៃ​ចំនួន​ ៣ ​សម្បុក​សរុប​ស្មើនឹង​ ៥១ ​ពង ​នៅ​ព្រែក​ស្រែអំបិល ស្រុកស្រែ​អំបិល​ដែល​ក្រុម​អ្នកជំនាញ​កំពុង​តាមដាន​សុខភាព និង​សុវត្ថិភាព​។ មន្ត្រី និង​សង្គម​ស៊ីវិល​ក៏​បាន​អំពាវនាវ​ឲ្យ​មាន​ការចូលរួម​ថែរក្សា​សត្វ​អណ្ដើក​ហ្លួង​ទាំងនេះ​។

លោក​ កែន សិរីរដ្ឋា ប្រធាន​អង្គការ​សមាគម​អភិរក្ស​សត្វព្រៃ​នៅ​កម្ពុជា​ថ្លែង​ពី​ម្សិលមិញ​ថា កាលពី​សប្ដាហ៍​មុន​ប្រជានេសាទ​នៅ​តំបន់​នោះ​ឃើញ​ដានជើង​អណ្ដើក​ហ្លួង​នេះ​ចេញចូល​សម្បុក​របស់​វា ក្រោយ​មក​ក៏បាន​រាយការណ៍​ប្រាប់​មន្ត្រី​ជំនាញ​ខាង​ជលផល និង​អង្គការ WCS ដើម្បី​ចុះ​ពិនិត្យ និង​ស្រាវជ្រាវ​។ ខណៈ​នេះ​មន្ត្រី​ជំនាញ​កំពុង​ធ្វើការ​ថែទាំ​ពងអណ្ដើក​ទាំងនោះ​មួយរយៈ​សិន ដើម្បី​តាមដាន​ពី​សុខភាព និង​រក្សា​សុវត្ថិភាព ថា​តើ​ពង​ទាំងនេះ​មាន​លទ្ធភាព​ញាស់​ខ្លួនឯង ឬ​ត្រូវការ​ជំនួយ​តាម​បច្ចេកទេស​។ បន្ទាប់ពី​ញាស់​រួច គេ​នៅ​រង់ចាំ​ឲ្យ​វា​ចាប់​ចំណី​ខ្លួនឯង ទើប​យក​វា​ទៅ​លែង​តាម​ព្រែក​ស្រែអំបិល​វិញ​។

លោក​បន្ថែមថា ក្រោយពី​មាន​សារាចរ និង​សេចក្តី​ប្រកាស​កាលពី​ថ្ងៃទី​ ១០ កក្កដា ឆ្នាំ​ ២០១៧ របស់​ក្រសួង​រ៉ែ និង​ថាមពល​បញ្ឈប់​រាល់​សកម្មភាព​បូម​ខ្សាច់​នៅ​តាម​ប្រព័ន្ធ​ព្រែក​ស្រែអំបិល និង​ប្រកាស​របស់​ក្រសួងកសិកម្ម រុក្ខាប្រមាញ់ និង​នេសាទ​ស្តីពី​ការដាក់​ប្រព័ន្ធ​ព្រែក​ស្រែអំបិល​ជា​តំបន់​គ្រប់គ្រង អភិរក្ស​អណ្តើក​ហ្លួង និង​ក្រពើ​ត្រី​នោះ គេ​សង្កេត​ឃើញ​ថា​ត្រឹម​ខែមករា ឆ្នាំ​ ២០២០ ​ចំនួន​សម្បុក​អណ្ដើក​មាន​ការកើនឡើង​បើ​ធៀប​នឹង​ ៤ ​ឆ្នាំ​កន្លងមក​ដែលមាន​តែ​ ១ ​សម្បុក​ក្នុង​ ១ ​ឆ្នាំ​ប៉ុណ្ណោះ​។

លោក​បញ្ជាក់ថា​៖ «​សព្វថ្ងៃនេះ​យើង​អត់​មាន​ឧបសគ្គ​បច្ចេកទេស​ទេ ប៉ុន្ដែ​យើង​ជួប​បញ្ហា​រឿង​អភិវឌ្ឍន៍​គឺ​មានន័យ​ថា​ការអភិវឌ្ឍ​ដោយ​ការបូម​ខ្សាច់​អ៊ីចឹង​ធ្វើឲ្យ​អណ្ដើក និង​សត្វ​កម្រ​មួយចំនួន​ទៀត​ប្រឈម​ការបាត់បង់​។ តែ​ឥឡូវនេះ អាជីវកម្ម​បូម​ខ្សាច់​ត្រូវបាន​ហាម​បូម​នៅ​តំបន់​នេះ អ៊ីចឹង​អណ្ដើក​មាន​លទ្ធភាព​បង្ក​កំណើត​។ ខ្ញុំ​ចង់​ឲ្យ​យើង​ទាំងអស់​គ្នា​គិតគូរ​ពី​បញ្ហា​អភិវឌ្ឍន៍ និង​អភិរក្ស​ឲ្យ​ដើរ​ទន្ទឹមគ្នា​។ ព្រោះ​វា​សំខាន់​ដូចគ្នា គឺ​ខ្ញុំ​មិន​ជំទាស់​ការអភិវឌ្ឍ​ទេ តែ​សូម​ឲ្យ​គិត​រឿង​អភិរក្ស​ផង​»​។

លោក​ អ៊ិន ហ៊ុល អនុប្រធាននាយកដ្ឋាន​អភិរក្ស​ជលផល​នៃ​រដ្ឋបាល​ជលផល​ថ្លែងថា ក្រុមការងារ​លោក​សហការ​ជាមួយ​ WCS ចាប់តាំងពី​ឆ្នាំ​ ២០០០ ​ដល់​បច្ចុប្បន្ន​។ កន្លងមក​នេះ​ពងអណ្ដើក​ហ្លួង​ត្រូវ​បាន​រកឃើញ​ជា​បន្តបន្ទាប់ ប៉ុន្ដែ​មាន​ចំនួន​ត្រឹមតែ​ ១ ​សម្បុក​ ឬ​ ២ ​សម្បុក​ប៉ុណ្ណោះ​។ ឆ្នាំ​ ២០២០ ​នេះ​ក្រុមការងារ​បាន​រកឃើញ​ចំនួន​ ៣ ​សម្បុក​តែម្ដង​។

ការរកឃើញ​ពងអណ្ដើក​ហ្លួង​ទាំង​ ៣ ​សម្បុក​នេះ​អាច​បញ្ជាក់ថា ចំនួន​សត្វ​អណ្ដើក​នៅក្នុង​ព្រែក​ស្រែអំបិល​មាន​ការកើនឡើង ហើយ​មន្ត្រី​ជំនាញ​កំពុង​យកចិត្ត​ទុកដាក់​ចំពោះ​ការអភិរក្ស​ធនធាន​ធម្មជាតិ​ទាំងអស់​នេះ​។

លោក​ថា កន្លងមក​សកម្មភាព​បូម​ខ្សាច់​មាន​ច្រើន​កន្លែង​ដែលជា ហេតុ​ធ្វើឲ្យ​សត្វព្រៃ​កម្រ​នេះ​មាន​ការថយចុះ និង​ប្រឈម​បញ្ហា​ច្រើន​ក្នុង​តំបន់​ព្រែក​ស្រែអំបិល​នេះ​។

លោក​ ហ៊ុល បញ្ជាក់ថា​៖ «​កន្លងមក​យើង​មិនសូវ​រកឃើញ​ពងអណ្ដើក​ហ្លួង​ទេ ព្រោះ​កាលពី​ឆ្នាំមុនៗ​នោះ​មាន​អាជីវកម្ម​បូម​ខ្សាច់ច្រើន អ៊ីចឹង​វា​ប៉ះពាល់​ការបង្ក​កំណើត​របស់​អណ្ដើក​នេះ​។ កាលពី​ឆ្នាំមុនៗ​យើង​រកឃើញ​ ១ ឬ​ ២ ​សម្បុក​ទេ​ក្នុង ១ ​ឆ្នាំ តែ​ពេល​គេ​ហាម​មិន​ឲ្យ​បូម​ខ្សាច់​នៅ​តំបន់​ព្រែក​ស្រែអំបិល​នេះ ស្រាប់តែ​យើង​ប្រទះឃើញ​ ៣ ​សម្បុក​តែម្ដង អ៊ីចឹង​ខ្ញុំ​គិតថា វា​កើនឡើង​ជាង​កាលពី​ឆ្នាំមុន​»​។

គួររំឭក​ថា សត្វ​អណ្ដើក​ហ្លួង ត្រូវ​បាន​ដាក់បញ្ចូល​ជា​ប្រភេទ​សត្វល្មូន​តំណាង​ឲ្យ​ប្រទេស​កម្ពុជា​កាលពី​ថ្ងៃទី​ ២១ ខែ​ មីនា ឆ្នាំ​ ២០០៥​។ សត្វ​នេះ​ធ្លាប់​ត្រូវ​បាន​គេ​គិតថា​បាន​ផុត​ពូជ​អស់​ទៅហើយ​ ប៉ុន្ដែ​នៅ​ឆ្នាំ​ ២០០០ រដ្ឋបាល​ជលផល​ខេត្ដ​កោះកុង និង WCS បាន​សិក្សា​ស្រាវជ្រាវ និង​រកឃើញ​សេសសល់​តិចតួច​បំផុត​រស់នៅ​តាម​ប្រព័ន្ធ​ព្រែក​ស្រែអំបិល ខេត្ដ​កោះកុង​។

ក្រោយ​ការរកឃើញ វត្ដមាន​នៅ​ឆ្នាំ​ ២០០១ រដ្ឋបាល​ជលផល និង​អង្គការ WCS បាន​រៀបចំ​កម្មវិធី​ការពារ​សម្បុក ដោយ​ជ្រើសរើស​យក​អតីត​អ្នកប្រមូល​ពង​កូន​សត្វ​អណ្ដើក​ហ្លួង​ឲ្យ​ចូលមក​បម្រើ​ការងារ​ជា​បុគ្គលិក​គម្រោង ដើម្បី​ស្វែងរក និង​ការពារ​សម្បុក​ជំនួស​ឲ្យ​ការប្រមូល​យក​ពង​កូន​ទៅ​លក់​៕

អត្ថបទគួរចាប់អារម្មណ៍

  • ភ្នំពេញ៖ រដ្ឋមន្ត្រី​ក្រសួង​យុត្តិធម៌​លោក​ កើត ​រិទ្ធ​ បាន​ប្រាប់​ឯកអគ្គ​រាជទូត​អូស្ត្រាលី​លោក ​Pablo​ Kang ​នៅ​ក្នុង​ជំនួប​កាល​ពី​ថ្ងៃ​អង្គារ នៅ​ក្រសួង​យុត្តិធម៌​ថា​ ការ​ចាប់​ខ្លួន​បុគ្គល​ណា​មួយ​ដោយ​សមត្ថកិច្ច គឺ​ធ្វើ​ទ្បើង​ដោយ​អនុលោម​តាម​ច្បាប់​​កម្ពុជា។​

  • ភ្នំពេញ៖ ដោយ​សង្កេត​ឃើញ​ពី​ការ​ប្រឈម​របស់​​ប្រជាកសិករ​កម្ពុជា​​មួយ​ចំនួន​ ជាពិសេស​អ្នក​នៅ​ទី​ដាច់​ស្រយាល​ ដែល​បាត់បង់​ទីផ្សារ​​​​ព្រោះ​តែ​វិបត្តិ​កូវីដ យុវជន ​១ ក្រុម ​បាន​រួមគ្នា​បង្កើត​គម្រោង​ COVID Farmer Hacker ដើម្បី​ជួយ​​អ្នក​ខិតខំ​ដាំដុះ​តែ​ត្រូវ​រងគ្រោះ​ពី​ការ​រំខាន​ដល់​​​សេដ្ឋកិច្ច​​បង្ក​ដោយ​វីរុស​កូរ៉ូណា។​

  • ភ្នំពេញ៖ គ្រឹះស្ថាន​មីក្រូហិរញ្ញវត្ថុ ប្រាសាក់ ​​ដែល​ចុះ​បញ្ជី​សញ្ញាប័ណ្ណ​សាជីវកម្ម​នៅ​ផ្សារ​មូលបត្រ​កម្ពុជា ​(CSX) បាន​រាយការណ៍​អំពី​ប្រតិបត្តិការ​អាជីវកម្ម​ដ៏​ល្អ​ប្រសើរ​នៅ​ត្រីមាស​ទី​២ ​ឆ្នាំ​នេះ ទោះបី​ជា​​ខ្លួន​ទទួល​រង​នូវ​សម្ពាធ​ខ្លះៗ​ពី​ការ​រីក​រាលដាល​ជំងឺ​កូវីដ ​១៩ ​ដែល​បណ្ដាល​ឱ្យ​សេដ្ឋកិច្ច​របស់​កម្ពុជា មាន​ការ​ធ្លាក់ចុះ​ក៏​ដោយ​។​

  • ភ្នំពេញ៖ ​លោកស្រី​ ​ភឿង​ សកុណា ​រដ្ឋមន្រ្តី​ក្រសួង​វប្បធម៌​ និង​វិចិត្រ​សិល្បៈ​បាន​ចេញ​សេចក្ដី​ណែនាំ​ដល់​គ្រប់​អង្គភាព​ពាក់ព័ន្ធ​ក្រោម​ឱវាទ​ក្រសួង​វប្បធម៌ ​និង​គ្រប់​រដ្ឋបាល​ថ្នាក់​ក្រោម​ជាតិ ​អនុវត្ត​នីតិវិធី​ និង​ទម្រង់​បែបបទ​នៃ​ការ​គ្រប់គ្រង​អាជីវកម្ម​កាត់សក់​ ​អ៊ុត​សក់​ និង​លម្អ​ក្រចក

  • ភ្នំពេញ៖ ​រដ្ឋមន្រ្តី​ក្រសួង​សុខាភិបាល​លោក ​ម៉ម​ ប៊ុន​ហេង បាន​ជំរុញ​ឱ្យ​គ្រប់​ភាគី​ពាក់ព័ន្ធ​ទាំង​អស់​ ដែល​ធ្វើ​ការ​ផ្នែក​គាំពារ​មាតា​ និង​ទារក​ ត្រូវ​​បង្កើន​យុទ្ធនាការ​អប់រំ​ផ្សព្វផ្សាយ​អំពី​សារៈសំខាន់​នៃ​ការ​បំបៅ​កូន​ដោយ​ទឹក​ដោះ​ម្តាយ​ និង​ហានិភ័យ​ពី​ការ​បំបៅ​កូន​ដោយ​ទឹក​ដោះ​គោ​ម្សៅ​ផ្សំ​តាម​រូបមន្ត​ទាំង​នៅ​ថ្នាក់​ជាតិ​ និង​ថ្នាក់​ក្រោម​ជាតិ។

  • មណ្ឌលគិរី៖ សាលា​ដំបូង​ខេត្ត​មណ្ឌលគិរី ពី​ម្សិលមិញ​បាន​សម្រេច​ឃុំ​ខ្លួន​ចាងហ្វាង​សារព័ត៌មាន​អនឡាញ​ម្នាក់​នៅ​ពន្ធនាគារ​​ខេត្ត​ក្រោម​បទ​ចោទ ​«ឈូស​ឆាយ​ដី​ព្រៃ​ដោយ​គ្មាន​ការ​អនុញ្ញាត​» បន្ទាប់​ពី​សមត្ថកិច្ច​ឃាត់​ខ្លួន​កាល​ពី​​ថ្ងៃទី ២២ កញ្ញា ​តាម​ដីកា​តុលាការ​ពាក់ព័ន្ធ​ការ​ឈូស​ឆាយ​ដី​ព្រៃ ​និង​ប្រើប្រាស់​សារធាតុ​ញៀន។