កោះកុងៈ ក្រុមអ្នកភូមិប្រមាណជាង ១០០ នាក់ ដែលបាននាំគ្នាទៅតវ៉ាមុខសាលាដំបូងខេត្តកោះកុងដើម្បីឲ្យដោះលែងលោក ទិត្យ ស៊ីថា ជាប្រជាការពារភូមិនោះ បានសម្រេចផ្អាកការតវ៉ារបស់ខ្លួន បន្ទាប់ពីមានមន្ត្រីសាលាខេត្តបានសន្យាថានឹងជួយសម្រួលឲ្យមានការដោះលែងនៅក្រៅឃុំករណីចោទថា លោកបាន «គំរាមកំហែងថានឹងសម្លាប់» អភិបាលរងខេត្តមួយរូប។
លោក រួត សុផល ជាអ្នកភូមិម្នាក់ក្នុងចំណោមជាង ១០០ នាក់ ដែលបានចូលរួមតវ៉ាកាលពីល្ងាចថ្ងៃទី ២៥ និង ២៦ ខែវិច្ឆិកា បាននិយាយកាលពីម្សិលមិញថា អ្នកភូមិជាង ១០០ នាក់ បានសម្រេចផ្អាកការតវ៉ា បន្ទាប់ពីមានមន្ត្រីតំណាងសាលាខេត្តបានសន្យាថានឹងជួយដោះស្រាយឲ្យលោក ទិត្យ ស៊ីថា បាននៅក្រៅឃុំ។
លោកបានថ្លែងថា៖ «យើងបានតវ៉ា ២ ថ្ងៃរួចមកហើយ ឥឡូវខាងមន្ត្រីគេថាគេនឹងដោះស្រាយឲ្យយើង ហើយគេថាគេនឹងជួយធ្វើយ៉ាងណាឲ្យមានការដោះលែង ហើយប្រាប់ឲ្យយើងផ្អាកការតវ៉ាសិន។ យើងសម្រេចចិត្តផ្អាកធ្វើការតវ៉ាសិន ដោយរង់ចាំលទ្ធផលពីខាងសាលាខេត្ត»។
លោក រួត សុផល បានបន្តថា ករណីចាប់ខ្លួននេះបានកើតឡើង បន្ទាប់ពីអភិបាលរងខេត្តកោះកុង លោក សុខ សុទ្ធី បានប្តឹងលោក ទិត្យ ស៊ីថា ថាបាន “គំរាមកំហែងថានឹងសម្លាប់” រូបលោក។ ករណីនេះដោយសារលោក ទិត្យ ស៊ីថា បានប្រឆាំងនឹងបទបញ្ជារបស់លោក សុខ សុទ្ធី ដែលបានឲ្យអាជ្ញាធរបញ្ឈប់ពលរដ្ឋកុំឲ្យយកគ្រឿងចក្រទៅឈូសឆាយផ្លូវសម្រាប់ប្រើប្រាស់ក្នុងភូមិដែលមានទីតាំងនៅតំបន់មានទំនាស់ជាមួយក្រុមហ៊ុនញូញៀន ឌឹវើឡុបមេនគ្រុប។
លោកបានបញ្ជាក់ថា៖ «លោក សុខ សុទ្ធី មិនឲ្យធ្វើហើយថា បើហ៊ានធ្វើគាត់នឹងយកប៉ូលិស និងកងរាជអាវុធហត្ថដកហូតគ្រឿងចក្រ។ ប៉ុន្តែលោក ទិត្យ ស៊ីថា គាំទ្រប្រជាជនដោយមិនឲ្យលោក សុខ សុទ្ធី បញ្ឈប់គ្រឿងចក្រនោះទេ»។
អ្នកនាំពាក្យសាលាដំបូងខេត្តកោះកុងលោក អ៊ុន សុវណ្ណធានី បានថ្លែងថា លោក ទិត្យ ស៊ីថា អាយុ ៤០ ឆ្នាំ រស់នៅភូមិសំរុងតាកែវ ឃុំព្រែកខ្សាច់ ស្រុកគិរីសាគរត្រូវបានសមត្ថកិច្ចចាប់ខ្លួនហើយត្រូវបានចៅក្រមស៊ើបសួរសម្រេចឃុំខ្លួនបណ្តោះអាសន្នកាលពីថ្ងៃទី ២៥ ខែវិច្ឆិកាពាក់ព័ន្ធការចោទប្រកាន់ពីបទ “គំរាមកំហែងថានឹងសម្លាប់” តាមមាត្រា ២៣៣ នៃក្រមព្រហ្មទណ្ឌ។
បើតាមដីកាសាលាដំបូងខេត្តកោះកុងបានស្រង់សំឡេងសាររបស់លោក ទិត្យ ស៊ីថា ដែលបាននិយាយសំដៅលោក សុខ សុទ្ធី ថា៖ «បងឯងនិយាយជាមួយមេឃុំ បងឯងគំរាមមេឃុំម៉េចខ្លះ។ ស្តាប់ពាក្យសម្តីបងឯងឲ្យច្បាស់ និយាយជាមួយមេឃុំ ហើយបងឯងគិតឧត្តមគតិខ្លួនឯងផង។ បងឯងនិយាយពីមុនយ៉ាងម៉េច និយាយក្រោយយ៉ាងម៉េច បងស្តាប់ឲ្យច្បាស់ ប្រយ័ត្នជាន់ដានខ្លួនឯងណាបងងាប់!
ខ្ញុំឲ្យបងឯងងាប់ថ្ងៃណាក៏បានដែរ អ្នកភូមិខ្ញុំ ខ្ញុំប្រាប់មិនយកបងឯងជាមុខទេបងឯងត្រៀមងាប់ទៅ។ បើបងឯងនិយាយខុសតែមួយម៉ាត់ អូខេបងប្អូនថា ចាំទទួលបង ស្វាគមន៍បងជានិច្ច»។
អភិបាលរងខេត្តកោះកុងលោក សុខ សុទ្ធី បានបញ្ជាក់កាលពីម្សិលមិញថា លោក ទិត្យ ស៊ីថា បានគំរាមសម្លាប់លោកកាលពីថ្ងៃទី ៨ ខែមេសាឆ្នាំ ២០១៩។ កន្លងមកលោកធ្លាប់ឲ្យលោក ទិត្យ ស៊ីថា សុំទោសជាសាធារណៈដើម្បីបញ្ចប់រឿងដែរ ប៉ុន្តែគាត់មិនព្រមទើបលោកប្ដឹងឲ្យតុលាការចាត់ការតាមផ្លូវច្បាប់។
យ៉ាងណាក្ដីលោក សុខ សុទ្ធី បានទទួលស្គាល់ថា ពិតជាមានមន្ត្រីខេត្តចូលរួមសម្របសម្រួលជុំវិញករណីនេះមែន ប៉ុន្តែការសម្រេចយ៉ាងណានោះអាស្រ័យលើតុលាការ ខណៈជំហររបស់លោកអាចពិចារណាពីការដកពាក្យបណ្ដឹង។
លោកបានបញ្ជាក់ថា៖ «អ្វីដែលសំខាន់ គឺគាត់ត្រូវទទួលនូវកំហុសរបស់គាត់ ហើយទី ២ សំណូមពរដល់ប្រជាពលរដ្ឋទាំងអស់មេត្តាឈប់នាំគ្នាមកធ្វើបាតុកម្មដើម្បីបុគ្គលដែលខិលខូច។ សម្រាប់ខ្ញុំអាចដកពាក្យបណ្តឹង តែវាជាឆន្ទានុសិទ្វិរបស់ចៅក្រមដែលជាអ្នកសម្រេចដោះលែង ឬមិនដោះលែង។ មានមន្ត្រីសម្របសម្រួលជាមួយខ្ញុំដូច្នេះហើយបានជាខ្ញុំនិយាយថា មិនអីទេ សម្រាប់ខ្ញុំតែអាស្រ័យទៅលើចៅក្រម»។
មន្ត្រីឃ្លាំមើលសិទ្ធិមនុស្សនៅអង្គការអាដហុកប្រចាំខេត្តកោះកុង លោក ថោង ច័ន្ទតារា បានថ្លែងថា វាជារឿងអយុតិ្តធម៌សម្រាប់លោក ទិត្យ ស៊ីថា ដោយសារតែរូបលោកគ្រាន់តែទៅជួយការពារផលប្រយោជន៍ពលរដ្ឋដែលពួកគាត់ធ្វើផ្លូវក្នុងភូមិ ហើយការដែលលោកគំរាមលោក សុខ សុទ្ធី ដោយសារការខឹងសម្បាតែប៉ុណ្ណោះ។
លោកបានបញ្ជាក់ថា៖ «ដោយសារតែការជជែកឈ្លោះគ្នាទៅវិញទៅមក។
លោកមិនហ៊ានទៅដល់ថ្នាក់ប៉ុនប៉ងធ្វើតាមការចោទប្រកាន់នោះទេ គាត់ខឹងទៅវិញទៅមកដែលនាំឲ្យវាយប្រហារពាក្យសម្ដីដាក់គ្នា»៕