.jpg)
ក្រុមអ្នករត់ម៉ូតូកង់ ៣ ប្រមូលផ្ដុំគ្នាតវ៉ាកាលពីម្សិលមិញ។ ហេង ជីវ័ន
ភ្នំពេញៈ អ្នករត់ម៉ូតូកង់បីជាង ១០០ នាក់ ដែលកំពុងប្រើប្រាស់សេវា Pass App របស់ក្រុមហ៊ុន PassApp Technology Co,Ltd បានប្រមូលផ្ដុំគ្នាកាលពីម្សិលមិញនៅលើផ្លូវធំ ៦០ ម៉ែត្រ ដើម្បីតវ៉ាទាមទាររក្សាតម្លៃដឹកជញ្ញូនអ្នកដំណើរឲ្យនៅដដែល ក្រោយពីក្រុមហ៊ុនបានបញ្ចុះតម្លៃសេវាទាបដែលធ្វើឲ្យប៉ះពាល់ដល់ចំណូលប្រចាំថ្ងៃរបស់ពួកគេ។
នេះជាលើកទី២ ហើយដែលអ្នករត់ម៉ូតូកង់បី បានប្រមូលផ្តុំគ្នា ដើម្បីបង្ហាញការមិនពេញចិត្តចំពោះការបញ្ចុះតម្លៃនេះ ដោយកាលពីថ្ងៃអង្គារ ពួកគេបានប្រមូលផ្តុំគ្នាម្តងរួចមកហើយនៅក្នុងតំបន់បឹងកក់ ប៉ុន្តែដោយមានការសម្របសម្រួលពីអាជ្ញាធរ ទើបពួកគេព្រមបំបែកគ្នា។
យោងតាមលិខិតស្នើសុំរបស់ក្រុមអ្នករត់ម៉ូតូកង់បីទាំងនោះបានព្រមានដល់ក្រុមហ៊ុននេះថា៖ «យើងខ្ញុំទាំង អស់គ្នានឹងធ្វើបាតុកម្មនៅមុខក្រុមហ៊ុន ឬក៏បាតុកម្មបិទក្រុមហ៊ុនមិនឲ្យធ្វើការតែម្ដង បើគ្មានដំណោះស្រាយទៀតយើងខ្ញុំទាំងអស់គ្នានឹងដាក់ញត្តិទៅសម្ដេចអគ្គមហាសេនាបតីតេជោ ហ៊ុន សែន»។
លិខិតដដែលនេះបានឲ្យដឹងថា ក្រុមអ្នកតវ៉ាទាំងនោះទាមទារឲ្យក្រុមហ៊ុនរក្សាតម្លៃសេវាដឹកអ្នកដំណើរនៅដដែលដែលបានកំណត់តម្លៃ ១ គីឡូម៉ែត្រដំបូង ៣ ០០០ រៀលនឹង ១ គីឡូម៉ែត្របន្ត ១ ២០០ រៀល រួមទាំងបញ្ចុះតម្លៃជើងសាពី ១៥ ភាគរយ មកនៅត្រឹម ១៣ ភាគរយ និងសុំឲ្យក្រុមហ៊ុនបង្កើតឲ្យមានធានារ៉ាប់រងអាយុជីវិតនឹងម៉ូតូកង់បី។
ស្ត្រីជាបុគ្គលិកក្រុមហ៊ុន Pass App ម្នាក់ដែលសុំមិនបញ្ចេញឈ្មោះ បានប្រាប់ភ្នំពេញប៉ុស្តិ៍ពីម្សិលមិញថា ក្រុមហ៊ុនទើបតែសម្រេចបញ្ចុះតម្លៃសេវានៅដើមខែនេះប៉ុណ្ណោះ ដើម្បីឆ្លើយតបនឹងការប្រកួតប្រជែងជាមួយនឹងបណ្តាក្រុមហ៊ុនដទៃ ព្រោះតែមើលឃើញថា តម្លៃសេវារបស់ខ្លួន ខ្ពស់ជាងក្រុមហ៊ុនដទៃ។
ព្រោះកន្លងមក ក្រុមហ៊ុនកំណត់តម្លៃ ដោយគិតដំបូង ១ គីឡូម៉ែត្រ ៣ ០០០ រៀល នឹង ១ គីឡូម៉ែត្របន្ទាប់គិត ១ ២០០ រៀល ប៉ុន្តែតម្លៃ ១ គីឡូម៉ែត្របន្ទាប់នេះ ត្រូវបានបញ្ចុះតម្លៃមកត្រឹម ១ ០០០ រៀលវិញ។ ទោះជាយ៉ាងណាក៏ដោយស្ត្រីដែលជាបុគ្គលិកក្រុមហ៊ុននេះ មិនបានបញ្ជាក់ពីដំណោះស្រាយឆ្លើយតបទៅនឹងការទាមទាររបស់ក្រុមអ្នករត់កង់បីទាំងនោះទេ ដោយអះអាងថា រង់ចាំការជជែកពិភាក្សាពីថ្នាក់លើ ហើយការទាមទាររបស់ពួកគាត់ ក្រុមហ៊ុន នឹងពិចារណា។
បុគ្គលិករូបនេះ បញ្ជាក់ថា៖ «អ្នកបើកបរកង់បីហ្នឹងគាត់តែងតែទាក់ទងមកខាងប្អូន ហើយយើងក៏បានប្រាប់ពួកគាត់ថា យើងនឹងធ្វើរបាយការណ៍មួយ ទៅខាងលើសិន ហើយខាងលើកំពុងពិភាក្សាបញ្ហាហ្នឹង ថា គេអាចដំឡើងវិញ ឬយ៉ាងណា?»។
លោក កែវ ណារី វ័យ ៣៣ ឆ្នាំ អ្នករត់ម៉ូតូកង់បី ដែលបានប្រើប្រាស់សេវាកម្ម Pass App នេះតាំងពីឆ្នាំ ២០១៦ បានប្រាប់ភ្នំពេញប៉ុស្តិ៍ពីម្សិលមិញថា ពួកគេជាង ១០០ នាក់ ដោយរួមមានអ្នកបើក Pass App និងអ្នករត់តាក់ស៊ីផងនោះ បានប្រមូលផ្តុំគ្នាជាថ្មី ដើម្បីប្រមូលស្នាមមេដៃ និងដាក់ញត្តិទៅក្រុមហ៊ុន ដើម្បីទាមទារឲ្យក្រុមហ៊ុន រក្សាតម្លៃសេវាឲ្យនៅដដែល។
លោក ណារី ថ្លែងថា៖ «ខ្ញុំចង់ឲ្យក្រុមហ៊ុនហ្នឹងទូទាត់ដូចតម្លៃដើមវិញ អត់ទាមទារលើស ឬក៏អត់ចង់បានខ្វះដែរ ព្រោះពីមុនយើងធ្លាប់ដឹកបាន ១០ គីឡូអីបាន ១ ម៉ឺន ២ ពាន់រៀល បូកនឹងគីឡូបន្ទាប់ បាន ១ ម៉ឺន ៥ ពាន់រៀល ដល់គាត់ទម្លាក់តម្លៃទៀត ១០ គីឡូអីបាន ៨ ពាន់រៀល ហើយកាត់ ១៥ ភាគរយ។ គិតមើលទៅ ៨ ពាន់រៀល ដឹក ១០ គីឡូដី វាសល់តិចតួចមែនទែន នឹងមិនទាន់គិតពីកម្លាំង និងថ្លៃហ្គាសផង»។
ក្រៅពីទាមទារឲ្យក្រុមហ៊ុន Pass App រក្សាតម្លៃដដែល ទន្ទឹមគ្នានេះដែរក្រុមអ្នករត់កង់បីទាំងនោះ ក៏ទាមទារ និងដាក់លិខិតទៅក្រុមហ៊ុន Grap ដែលជាក្រុមហ៊ុនប្រកួតប្រជែងមួយលើសេវាដឹកអ្នកដំណើរនេះ ឲ្យដំឡើងថ្លៃវាដូចគ្នាជាមួយក្រុមហ៊ុន Pass App ផងដែរ។
លោក ឡុង វុទ្ធី អគ្គលេខាធិការរងសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បាននិយាយថា វាមិនខុសនោះទេ បើគិតពីការប្រកួតប្រជែងក្នុងសេដ្ឋកិច្ចទីផ្សារសេរី ដែលក្រុមហ៊ុននេះ សម្រេចបញ្ចុះតម្លៃ ដើម្បីទាក់ទាញអតិថិជន ប៉ុន្តែនៅចំពោះមុខ បញ្ហានេះ ឃើញថា អ្នកដែលរងគ្រោះភាគច្រើន គឺអ្នករត់ម៉ូតូកង់បី ដែលកំពុងប្រើប្រាស់សេវាកម្មនេះ។ រាល់ថ្ងៃនេះ អ្នកបើកបរកង់បីនេះ សម្បូរណាស់ សូម្បីតែអ្នកធ្វើការក៏គាត់ឆ្លៀតរកស៊ីនេះដែរ អ៊ីចឹងសូមឲ្យគិតឡើងវិញ ចំពោះការចាប់យកអាជីពនេះ។
លោក វុទ្ធី ថ្លែងថា៖ «ការប្រកួតប្រជែងនេះ វាប៉ះពាល់អ្នកបើកបរនេះឯង ព្រោះបើក្រុមហ៊ុន ចង់ធ្វើការប្រកួតប្រជែង បញ្ចុះតម្លៃពី ១ ២០០ រៀល មក ១ ០០០ គត់ សូមមេត្តាកាត់ភាគរយកុំមីស្យុងដែលដឹក ១ ជើង ១៥ ឬ ១០ ភាគរយ ហ្នឹង សូមទម្លាក់តម្លៃហ្នឹងផង ដើម្បីឲ្យអ្នកបើកបរគាត់សល់លុយ សល់កាក់ខ្លះ។ បើសិនជាការប្រកួតប្រជែងបញ្ចុះតម្លៃសម្រាប់តែអតិថិជន ប៉ុន្តែការតម្លៃជើងសាកាត់ពីអ្នកបើកបរមិនចុះ ងាប់តែអ្នកបើកបរ »។
លោក វុទ្ធី អះអាងកន្លងទៅ របស់ក្រសួងសាធារណការ និងដឹកជញ្ជូន បានឲ្យដឹងថា បច្ចុប្បន្នម៉ូតូកង់បី ដែលគេនិយមហៅថា កង់បីឥណ្ឌា មានជាង ២ ម៉ឺនគ្រឿង ដែលកំពុងត្រូវបានចរាចរនៅលើដងផ្លូវសាធារណៈក្នុងប្រទេសកម្ពុជា ដោយពួកគេទាំងនោះ បានភ្ជាប់សេវាកម្មដឹកអ្នកដំណើរតាមប្រព័ន្ធបច្ចេកវិទ្យា ហៅថា App ដែលបង្កភាពងាយស្រួល និងកំណត់តម្លៃសេវាជាស្រេច សម្រាប់អតិថិជន។
លោក ម៉ុក ផល្លា អ្នករត់កង់បីម្នាក់ទៀតដែលបានភ្ជាប់សេវាកម្មជាច្រើនក្រុមហ៊ុន រួមទាំង Pass App ផងដែរនោះបានឲ្យដឹងថា៖ «ការទាមទារនេះដោយសារក្រុមហ៊ុនដទៃ មិនសូវមានអ្នកជិះដូចក្រុមហ៊ុន Pass Appនោះទេ ហេតុនេះហើយ ទើបខ្ញុំ នៅតែចង់បន្តប្រើប្រាស់សេវាកម្មរបស់ Pass App ដោយរំពឹងថា អាចនឹងរកចំណូលបានច្រើន ប៉ុន្តែនៅពេលក្រុមហ៊ុននេះ បញ្ចុះតម្លៃបែបនេះ ខ្ញុំបារម្ភ ពីប្រាក់កម្រៃ អាចនឹងធ្លាក់ចុះ និងរត់មិនរួចសម្រាប់ផ្គត់ផ្គង់ជីវភាព»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានប្រាប់ភ្នំពេញប៉ុស្តិ៍ថា ជាទូទៅប្រជាពលរដ្ឋ គឺមានសិទ្ធិក្នុងការស្នើសុំ ហើយក្នុងនាមជាភាគីម្ខាងទៀត គឺមានសិទ្ធិឆ្លើយតប ដូច្នេះ ក្នុងនាមអាជ្ញាធរ ទោះជាក្នុងរូបភាពណាក៏ដោយ គឺត្រូវចូលរួមសម្របសម្រួលដើម្បីឲ្យភាគីទាំង ២ បានជួបជជែកគ្នា។
លោកបញ្ជាក់ថា៖ «ជាក់ស្តែងក្នុងរឿងនេះ ល្ងាច (ម្សិលមិញ) ហ្នឹងយើងបានជួបជាមួយនឹងខាងពួកគាត់ ដើម្បីឲ្យដឹងពីកង្វល់ជាក់ស្តែងជាផ្លូវការ ហើយទើបតែបញ្ចប់ ដូច្នេះយើងនឹងប្រជុំជាមួយក្រុមការងារ ដើម្បីស្វែងរកដំណោះស្រាយរួម»៕
