ភ្នំពេញៈ ក្រុមអ្នកស្រាវជ្រាវបានរកឃើញថាដង្កូវប៉ារ៉ាស៊ីត strongyloides stercoralis ដែលបង្កឲ្យមាន «ជំងឺធ្ងន់ធ្ងរ» និងធ្វើឲ្យមានផលប៉ះពាល់ផ្សេងៗជាច្រើនទៀតនៅតាមជនបទកម្ពុជា ពិសេសទាក់ទងនឹងការមិនរីកលូតលាស់របស់កុមារ។
លោក Peter Odermatt សាស្ត្រាចារ្យនៅសាកលវិទ្យាល័យ Basel University ប្រទេសស្វ៊ីសដែលបានដឹកនាំការស្រាវជ្រាវបានថ្លែងថាក្រុមអ្នកស្រាវជ្រាវបានសិក្សាពីពពួកដង្កូវប៉ារ៉ាស៊ីតនៅកម្ពុជាតាំងពីឆ្នាំ ២០០៨ មកម្ល៉េះ ហើយបានរកឃើញថាពួកវាមាន «ការរីករាលដាលយ៉ាងខ្លាំង»។
លោកថា៖ «ប្រជាជនចន្លោះពី ២៥ ទៅ ៥០ ភាគរយនៅតំបន់ជនបទបានរងផលប៉ះពាល់ពីដង្កូវប៉ារ៉ាស៊ីតនេះ»។
ការសិក្សានោះបានបញ្ជាក់ថាប៉ារ៉ាស៊ីត Strongyloides stercoralis គឺជាប្រភេទដង្កូវម្យ៉ាងដែលចម្លងតាមរយៈវត្ថុផ្សេងៗដែលវារស់នៅជាមួយហើយនាំឱ្យមានប៉ះពាល់ធ្ងន់ធ្ងរ និងមានរយៈពេលយូរអង្វែង។
ការសិក្សាដែលបានចេញផ្សាយកាលពីសប្តាហ៍មុនក្នុងទស្សនាវដ្តី PLOS Neglected Tropical Diseases បានបង្ហាញថាការប៉ះពាល់រ៉ាំរ៉ៃពីប៉ារ៉ាស៊ីតប្រភេទនេះអាចបណ្តាលឱ្យមានរោគសញ្ញាមួយចំនួន ជាពិសេសលើក្រពះ ពោះវៀននិងបញ្ហារមាស់ស្បែកជាដើម។ ក្រៅពីនោះវាក៏បណ្តាលឱ្យមានផលប៉ះពាល់ដល់សុខភាពយូរអង្វែងផងដែរតាមរយៈកង្វះអាហារូបត្ថម្ភ។
ការសិក្សានេះក៏បានបង្ហាញដែរថាបន្ទុកនៃប៉ារ៉ាស៊ីតដែលឆ្លងទៅមនុស្សដោយការជ្រៀតចូលតាមស្បែកដែលដាច់រលាត់នេះក៏មានអត្រាខ្ពស់ដែរក្នុងតំបន់ដែលធ្លាប់មានជំងឺឆ្លងពីមុន។
អ្នកចូលរួមក្នុងការសិក្សានេះមាន ៣៣៧៧ នាក់មានទាំងអ្នកដែលបានឆ្លងដង្កូវប៉ារ៉ាស៊ីត និងអ្នកមិនបានឆ្លងដោយនៅខេត្តព្រះវិហារបានបញ្ចប់ការសម្ភាស និងការវាយតម្លៃលើការព្យាបាល។ ក្រុមអ្នកស្រាវជ្រាវវាយតម្លៃថារោគសញ្ញានឹងប្រសើរឡើងវិញតាមរយៈការលេបថ្នាំមួយប្រភេទដែលមានឈ្មោះថា «ivermectin»។
លោក Odermatt ថាក្រុមអ្នកស្រាវជ្រាវអាចបង្ហាញថាការព្យាបាលទៀងទាត់ដោយប្រើថ្នាំខាងលើដែលអាចបន្ថយប៉ារ៉ាស៊ីតក្នុងខ្លួនបាន។
លោកបានបន្ថែមថា៖ «ឥទ្ធិពលនៃការព្យាបាលគឺមានសារៈសំខាន់ណាស់ជាពិសេសប្រសិនបើរួមផ្សំជាមួយការប្រើប្រាស់ទឹកស្អាតការរស់នៅមានអនាម័យ និងទទួលការអប់រំផ្នែកសុខភាព។ ប៉ុន្តែឧបសគ្គដ៏ធំចំពោះការចែកចាយថ្នាំគឺត្រូវចំណាយខ្ពស់។
លោក Odermatt បញ្ជាក់ថាកម្មវិធីបរិច្ចាគសម្រាប់ព្យាបាលដង្កូវប៉ារ៉ាស៊ីតផ្សេងទៀតគឺមាន ប៉ុន្តែមិនមែនថ្នាំនេះទេ។ លោក Odermatt បានលើកឡើងថាក្រុមអ្នកវិទ្យាសាស្ត្រ និងមន្ត្រីសុខាភិបាលជាទូទៅមិនសូវជឿអំពីចំនួនអ្នកដែលរងផលប៉ះពាល់ទេ។
លោកថា៖ «តាមរយៈការបោះពុម្ពផ្សាយរបស់យើងៗអាចបង្ហាញថាជំងឺធ្ងន់ធ្ងរគឺវាផ្សារភ្ជាប់ជាមួយនឹងការឆ្លងពីដង្កូវប៉ារ៉ាស៊ីតនេះ»។
លោកបានថ្លែងថាកម្ពុជាធ្វើការនេះបានយ៉ាងល្អក្នុងការគ្រប់គ្រងការឆ្លងមេរោគពីដង្កូវប៉ារ៉ាស៊ីតនេះ។
លោកវេជ្ជបណ្ឌិត ខៀវ វីរៈ ប្រធានកម្មវិធី Cambodian National Helminth Control program បានថ្លែងថាក្រុមមន្ត្រីកំពុងដោះស្រាយបញ្ហានេះ។
លោកថា៖ «យើងកំពុងធ្វើកិច្ចការជាច្រើន»។ លោកបានបន្ថែមថាការអត្ថាធិប្បាយពីការធ្វើគោលនយោបាយគឺនៅក្រៅព្រំដែនរបស់លោក។
លោក Vicky Houssiere មន្ត្រីទំនាក់ទំនងនៃអង្គការសុខភាពពិភពលោកប្រចាំកម្ពុជាបានថ្លែងថាអង្គការនេះបានជួយរដ្ឋាភិបាលក្នុងការធ្វើសេចក្តីព្រាងផែនការសកម្មភាពរួមមានយុទ្ធសាស្ត្រគ្រប់គ្រងសម្រាប់ការឆ្លងមេរោគពីដង្កូវប៉ារ៉ាស៊ីតនេះផង៕NS
