.jpg)
កិច្ចប្រជុំតាមអនឡាញកាលពីថ្ងៃទី ៧ ខែមេសា។ រូបថត ក្រសួងយុត្តិធម៌
ភ្នំពេញៈ បន្ទាប់ពីបើកកិច្ចប្រជុំលើកទី១ រយៈពេល ២ ថ្ងៃ ក្រុមការងារឧត្តមមន្ត្រីច្បាប់អាស៊ានបានសម្រេចយល់ព្រមលើឯកសារយោងស្តីពីការរៀបចំសន្ធិសញ្ញាបត្យាប័នអាស៊ាន ដោយបានពិភាក្សាលើខ្លឹមសារបឋម នៃសេចក្តីព្រាង ហើយក្រុមការងារនឹងប្រើរយៈពេល ២ ឆ្នាំ ដើម្បីបញ្ចប់ការរៀបចំសន្ធិសញ្ញាបត្យាប័នអាស៊ាននេះ។
ក្រុមការងារឧត្តមមន្ត្រីច្បាប់អាស៊ានរបស់កម្ពុជាបានដឹកនាំកិច្ចប្រជុំតាមអនឡាញរយៈពេល ២ ថ្ងៃ គឺចាប់ពីថ្ងៃទី ៦ ដល់ ៧ ខែមេសា ជាមួយក្រុមការងារឧត្តមមន្ត្រីច្បាប់អាស៊ានទាំង ១០ ប្រទេស និងតំណាងផ្នែកច្បាប់នៃអគ្គលេខាធិការដ្ឋានអាស៊ានលើកទី១ ដើម្បីរៀបចំសន្ធិសញ្ញាបត្យាប័នអាស៊ានសម្រាប់ជាគំរូឱ្យយកទៅអនុវត្ដការងារ និងពង្រឹងកិច្ចសហប្រតិបត្ដិការលើវិស័យព្រហ្មទណ្ឌក្នុងការទប់ស្កាត់ និងបង្ក្រាបបទល្មើស និងឧក្រិដ្ឋកម្មឆ្លងដែន។
កិច្ចប្រជុំនេះត្រូវបានដឹកនាំដោយលោក តាន់ហ៊ាង ដាវ័ណ្ណ អគ្គនាយកនៃអគ្គនាយកដ្ឋានអភិវឌ្ឍន៍វិស័យយុត្តិធម៌នៃក្រសួងយុត្តិធម៌ និងជាប្រធានប្រតិភូនៃក្រុមការងារឧត្តមមន្ត្រីច្បាប់អាស៊ានកម្ពុជាស្តីពីសន្ធិសញ្ញាបត្យាប័នអាស៊ាន និងក្រុមការងារឧត្តមមន្ត្រីច្បាប់អាស៊ានស្តីពីសន្ធិសញ្ញាបត្យាប័នអាស៊ាន។
ក្រសួងយុត្ដិធម៌បញ្ជាក់ថា ជាលទ្ធផលកិច្ចប្រជុំនេះបានសម្រេចយល់ព្រមលើឯកសារយោងស្តីពីបែបបទនៃការបំពេញការងាររបស់ក្រុមការងារឧត្តមមន្ត្រីច្បាប់អាស៊ានកម្ពុជាស្តីពីសន្ធិសញ្ញាបត្យាប័នអាស៊ាន និងបានពិភាក្សាលើខ្លឹមសារបឋមនៃសេចក្តីព្រាង សន្ធិសញ្ញាបត្យាប័នអាស៊ានមានជាអាទិ៍ ចំណងជើង ការបរិយាយអំពីរាល់រដ្ឋជាសមាជិកអាស៊ាន និងបុព្វកថា។
លោក ជិន ម៉ាលីន អ្នកនាំពាក្យ ក្រសួងយុត្ដិធម៌ថ្លែងពីម្សិលមិញថា កិច្ចប្រជុំរបស់ក្រុមការងារឧត្តមមន្ត្រីច្បាប់អាស៊ានកម្ពុជានៃក្រសួងយុត្ដិធម៌ជាមួយក្រុមការងារឧត្តមមន្ត្រីច្បាប់អាស៊ានលើកទី ១ ស្តីពីសន្ធិសញ្ញាបត្យាប័នអាស៊ាននេះគឺធ្វើឡើងដើម្បីរៀបចំសន្ធិសញ្ញាបត្យាប័នអាស៊ាន។ លោកថ្លែងថា៖ «តាមរយៈកិច្ចប្រជុំ ក្រុមការងារនឹងប្រើប្រាស់រយៈពេល ២ ឆ្នាំបន្ទាប់ពីកិច្ចប្រជុំលើកទី ១ នេះទៅ ដើម្បីបញ្ចប់ការរៀបចំសន្ធិសញ្ញាបត្យាប័នអាស៊ាននេះ»។
បើតាមលោក ម៉ាលីន គោលបំណងនៃការរៀបចំសន្ធិសញ្ញាបត្យាប័នអាស៊ាននេះ មិនមែនជាការអនុវត្ដដើម្បីធ្វើបត្យាប័នក្នុងតំបន់អាស៊ាននេះទេ។ ប៉ុន្ដែវាជាគំរូនៃទម្រង់ច្បាប់ និងគំរូនៃសន្ធិសញ្ញាបត្យាប័នដែលរដ្ឋជាសមាជិកអាស៊ានអាចយកទៅប្រើប្រាស់ជាគំរូក្នុងការធ្វើកិច្ចព្រមព្រៀងបត្យាប័នជាមួយនឹងបណ្ដាប្រទេសដទៃទៀត។ ការរៀបចំសន្ធិសញ្ញាបត្យាប័នអាស៊ាននេះក៏ដើម្បីពង្រឹងកិច្ចសហប្រតិបត្ដិការលើវិស័យព្រហ្មទណ្ឌក្នុងការទប់ស្កាត់ និងបង្ក្រាបបទល្មើស និងឧក្រិដ្ឋកម្មឆ្លងដែន។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាថ្លែងថា បើសិនពិនិត្យមើលទៅលើប្រព័ន្ធច្បាប់ និងប្រព័ន្ធតុលាការនៃប្រទេសជាសមាជិកអាស៊ានគឺឃើញមានភាពចម្រុះ និងខុសប្លែកគ្នាច្រើន។
«កន្លងមកបើយើងនិយាយពីសន្ធិសញ្ញាបត្យាប័នក្នុងចំណោមសមាជិកអាស៊ានគឺមានលក្ខណៈជាទ្វេភាគីប៉ុន្ដែមិនទាន់មានលក្ខណៈជាតំបន់រួមទេ។ ភាគច្រើនប្រទេសអាស៊ានបានចុះសន្ធិសញ្ញាបត្យាប័នជាមួយគ្នាដូចជាកម្ពុជា ជាមួយឡាវ និងកម្ពុជាជាមួយប្រទេសវៀតណាមជាដើម»។
លោក ភា លើកឡើងថា សូម្បីតែច្បាប់ចរាចរណ៍តាមបណ្ដាប្រទេសអាស៊ាន ក៏មានប្រទេសខ្លះប្រកាន់ឆ្វេង ហើយប្រទេសខ្លះប្រកាន់ស្ដាំដែរ។ ដូច្នេះការរៀបចំឱ្យមានសន្ធិសញ្ញាបត្យាប័នរួមក្នុងក្របខ័ណ្ឌអាស៊ាននេះ គឺជាការល្អប្រសើរ និងមានអត្ថប្រយោជន៍សំខាន់ក្នុងការរួមគ្នាទប់ស្កាត់បទល្មើស និងឧក្រិដ្ឋកម្មឆ្លងដែនផ្សេងៗ៕
