The Phnom Penh Post Search

Search form

Logo of Phnom Penh Post newspaper Phnom Penh Post - ក្រុម​ឧទ្ទាម​ស្ទាក់​វាយ​ប្រហារ​ស្លាប់​កង​កម្លាំង​មួក​ខៀវ​កម្ពុជា​ម្នាក់ របួស​ម្នាក់​និង​បាត់​ខ្លួន ​៣ ​នាក់




ក្រុម​ឧទ្ទាម​ស្ទាក់​វាយ​ប្រហារ​ស្លាប់​កង​កម្លាំង​មួក​ខៀវ​កម្ពុជា​ម្នាក់ របួស​ម្នាក់​និង​បាត់​ខ្លួន ​៣ ​នាក់

Content image - Phnom Penh Post
កង​កម្លាំង​រក្សា​សន្ដិភាព​កម្ពុជា​ដែល​កំពុង​បំពេញ​បេសកកម្ម​នៅ​លីបង់ គោរ​ពវិញ្ញាណ​ក្ខន្ធ​លោក អ៊ឹម សំ ដែល​ពលី​ជីវិត​នៅ​អាហ្វ្រិក​កណ្ដាល។ រូបថត សហការី

ក្រុម​ឧទ្ទាម​ស្ទាក់​វាយ​ប្រហារ​ស្លាប់​កង​កម្លាំង​មួក​ខៀវ​កម្ពុជា​ម្នាក់ របួស​ម្នាក់​និង​បាត់​ខ្លួន ​៣ ​នាក់

ភ្នំពេញៈ រដ្ឋាភិបាល​កម្ពុជា​ប្រកាស​ឲ្យ​ដឹង​ថា កម្លាំង​រក្សា​សន្តិភាព​កម្ពុជា​ក្រោម​ឆត្រ​អង្គការ​សហ​ប្រជាជាតិ​ប្រចាំ​សាធារណរដ្ឋ​អាហ្វ្រិក​កណ្តាល​បាន​ស្លាប់​ម្នាក់ រងរបួស​ម្នាក់ និង​៣​នាក់​ផ្សេង​ទៀត​បាត់​ខ្លួន ខណៈ​កង​ទ័ព​ប្រទេស​ម៉ារ៉ុក​មួយ​ចំនួន​ក៏​មាន​គ្រោះថ្នាក់​ដែរ បន្ទាប់​ពី​មាន​ការ​ពួន​ស្ទាក់​វាយ​ប្រហារ​ពី​ក្រុម​ប្រដាប់​អាវុធ​មិន​ស្គាល់​អត្តសញ្ញាណ​មួយ ក្នុង​ពេល​មន្ត្រី​ទាំង​នោះ​ត្រឡប់​ពី​បំពេញ​ភារកិច្ច​វិញ​។

របាយ​ការណ៍​របស់​មជ្ឈ​មណ្ឌល​ជាតិ​គ្រប់គ្រង​កង​កម្លាំង​រក្សា​សន្តិភាព បោស​សម្អាត​មីន និង​កាក​សំណល់​សង្គ្រាម ដែល​ភ្នំពេញ ប៉ុស្តិ៍ ទទួល​បាន​កាល​ពី​ម្សិលមិញ បញ្ជាក់​ថា​លោក អ៊ឹម សំ មាន​ស្រុក​កំណើត​នៅ​ខេត្ត​សៀមរាប មាន​ឋាន​ន្តរស័ក្ដិ​ជា​អនុសេនីយ៍ទោ​ជា​អ្នក​បើក​ប៊ុលដូស៊ែរ​បាន​ស្លាប់​ក្នុង​ហេតុការណ៍​វាយ​ប្រហារ​នេះ​។

របាយ​ការណ៍​សរសេរ​ទៀត​ថា លោក អនុសេនីយ៍ឯក ធុច ធីម ជា​បុគ្គលិក​បើក​រថយន្ត​បែន​រង​របួស​ដៃ​ឆ្វេង លោក​ព្រិន្ទបាលទោ ស៊ាង នរិន្ទ អ្នក​ត្រួត​ពិនិត្យ​គុណភាព លោក ព្រិន្ទបាល មុំ តុលា ជំនួយ​ការ​បើក​បរ​អេស្កាវ៉ាទ័រ និង​លោក​អនុសេនីយ៍ឯក ម៉ៅ អេង បុគ្គលិក​ពេទ្យ កំពុង​បាត់​ខ្លួន​។

បើ​តាម​របាយ​ការណ៍​ដដែល កង​កម្លាំង​កម្ពុជា​ចំនួន​ ១២​ នាក់​បាន​វិល​ត្រឡប់​ពី​ការ​បំពេញ​ភារកិច្ច និង​ការពារ​ដោយ​កង​កម្លាំង​ប្រដាប់​អាវុធ​របស់​ប្រទេស​ម៉ារ៉ុក ​តែ​ពេល​ធ្វើ​ដំណើរ​ត្រឡប់​វិញ​មិន​ទាន់​ដល់​កន្លែង​ស្នាក់​នៅ​ផង​ក៏​មាន​ការ​ពួន​ស្ទាក់​វាយ​ពី​កម្លាំង​ប្រដាប់​អាវុធ​ដែល​មិន​ស្គាល់​អត្តសញ្ញាណ​នៅ​ម៉ោង​៨​យប់ ត្រូវ​នឹង​ម៉ោង​២​ទៀបភ្លឺ​នៅ​កម្ពុជា​នា​ថ្ងៃ​ម្សិលមិញ​។

ក្នុង​របាយការណ៍​នោះ ក៏បាន​បញ្ជាក់​ដែរ​ថា កម្លាំង​ទាហាន​ម៉ារ៉ុក​៥​នាក់ រង​របួស ក្នុង​នោះ​២​នាក់​មាន​របួស​ធ្ងន់ និង​ម្នាក់​ផ្សេង​ទៀត​បាត់​ខ្លួន​។

របាយការណ៍​សរសេរ​ទៀត​ថា​៖ «​កម្លាំង​សាធារណរដ្ឋ​អាហ្វ្រិក​កណ្តាល​កំពុង​ចេញ​ប្រតិបត្តិការ​តាម​ផែនការ​ដើម្បី​អន្តរាគមន៍​និង​រុក​រក​កម្លាំង​ដែល​បាត់​ខ្លួន​ដោយ​ថ្មើរ​ជើង​និង​ឧទ្ធម្ភាគចក្រ​...​ក្រុម​វាយ​ប្រហារ​នេះ​គឺជា​ក្រុម​ឧទ្ទាម​វាយ​ប្រហារ​រំដោះ​អ្នក​ទោស​នាំ​មក​ដោយ​កង​កម្លាំង​ម៉ារ៉ុក​»​។

Content image - Phnom Penh Post
សព​លោក​អនុសេនីយ៍​ទោ អ៊ឹម សំ ពេល​សែង​ពី​កន្លែង​គ្រោះ​ថ្នាក់។ រូបថត ហ្វេសប៊ុក

អនុប្រធាន​មជ្ឈមណ្ឌល​ជាតិ​គ្រប់គ្រង​កង​កម្លាំង​រក្សា​សន្តិភាព បោស​សម្អាត​មីន និង​កាក​សំណល់​សង្គ្រាម លោក ផល សាម៉ន ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា កង​កម្លាំង​របស់​កម្ពុជា​នៅ​អាហ្វ្រិក​កណ្តាល​នោះ​មិន​មាន​បំពាក់​អាវុធ​ទេ ហើយ​ថា កង​កម្លាំង​ម៉ារ៉ុក​ជា​អ្នក​ការពារ​អ្នក​ទាំង​នោះ​។

លោក​បាន​បន្ត​ថា​៖ «​គេ ​(​ពួក​ឧទ្ទាម​)​ ពួន​ស្ទាក់​បាញ់ ដើម្បី​រំដោះ​អ្នក​ទោស​ដែល​កម្លាំង​ម៉ារ៉ុក​ចាប់​...​កងទ័ព​យើង​ជំនាញ​ដោះមីន​ទេ ជា​កងទ័ព​វិស្វកម្ម​ទេ អត់​មាន​អាវុធ​ទេ​»​។

ចំណែក​អគ្គនាយក​មជ្ឈមណ្ឌល​ជាតិ​គ្រប់គ្រង​កង​កម្លាំង​រក្សា​សន្តិសុខ​បោស​សម្អាត​មីន និង​កាក​សំណល់​សង្គ្រាម​កម្ពុជា លោក សែម សុវណ្ណនី ថ្លែង​ប្រាប់​ភ្នំពេញ​ប៉ុស្តិ៍​ថា សាកសព​កង​កម្លាំង​រក្សា​សន្តិភាព​កម្ពុជា​អាច​នឹង​មក​ដល់​កម្ពុជា​នៅ​២​សប្តាហ៍​ទៀត​។

លោក​បន្ត​ថា​៖ «​យ៉ាង​ឆាប់​២​សប្តាហ៍​ទៀត​សព​នឹង​បញ្ជូន​មក​ដល់​កម្ពុជា​យូអិន​(UN)​ជា​អ្នក​ចំណាយ​ថ្លៃ​យន្តហោះ និង​មាន​ការ​រៀបចំ​ពិធី​គោរព​សព​នៅ​ទីនោះ​មុន​នឹង​បញ្ជូន​មក​ខ្មែរ​យើង​»​។

ទាក់ទង​នឹង​ការ​ស្លាប់​របស់​កង​កម្លាំង​រក្សា​សន្តិភាព​កម្ពុជា​នេះ កាលពី​ថ្ងៃ​ត្រង់​ម្សិលមិញ ឯកអគ្គ​រាជទូត​ខ្មែរ​ប្រចាំ​ប្រទេស​កូរ៉េ​ខាង​ត្បូង​បាន​សរសេរ​លើ​ទំព័រ​ហ្វេសប៊ុក​របស់​លោក​ដោយ​បាន​ចូល​រួម​សោក​ស្តាយ​ចំពោះ​មរណភាព​នេះ​ហើយ​លោក​បញ្ជាក់​ថា កង​កម្លាំង​កម្ពុជា​នេះ​ស្លាប់​ដោយ​ពួក​ឧទ្ទាម​កាត់​ក្បាល​។

ទោះ​យ៉ាង​ណា​ប្រហែល​មិន​ដល់​មួយ​ម៉ោង​ផង លោក​បាន​ដក​ពាក្យ​ពួក​ឧទ្ទាម​កាត់​ក្បាល​នេះ​ចេញ​វិញ​ដោយ​គ្រាន់​តែ​បាន​បញ្ជាក់​ថា​បាន​ស្លាប់​ប៉ុណ្ណោះ​។

លោក​សរសេរ​ថា​៖ «​សូម​ជម្រាប​ដំណឹង​រន្ធត់​និង​សោកសៅ​ស្តាយ​ស្រណោះ​ចំពោះ​យោធិន​កម្ពុជា​មួយ​រូប​ដែល​បាន​បាត់​បង់​ជីវិត​នៅ​អាហ្វ្រិក​កណ្តាល ពេល​បំពេញ​បេសកកម្ម​ក្នុង​ក្របខ័ណ្ឌ​ថែរក្សា​សន្តិភាព​របស់​អង្គការ​សហ​ប្រជាជាតិ​ដោយ​ពួក​ឧទ្ទាម​»​។

ទាក់ទង​នឹង​ការ​ស្លាប់​របស់​មន្ត្រី​កងទ័ព​កម្ពុជា​ថា​តើ​ពិត​ជា​មានការ​កាត់​ក្បាល​ដោយ​ពួក​ឧទ្ទាម​ឬ​យ៉ាង​ណា​នោះ មន្ត្រី​កម្ពុជា​មិន​ទាន់​អាច​បញ្ជាក់​បាន​ទេ​។

ចំណែក ប្រមុខ​រដ្ឋាភិបាល​កម្ពុជា​លោក​នាយក​រដ្ឋ​មន្ត្រី ហ៊ុន សែន ក្នុង​ពិធី​សម្ពោធ​អគារ​សាលា​ខេត្ត​ត្បូង​ឃ្មុំ​កាលពី​ម្សិលមិញ​បាន​ស្នើ​ដល់​អង្គការ​សហ​ប្រជាជាតិ​ឲ្យ​ទទួល​ខុស​ត្រូវ​ដោយ​យក​ចិត្ត​ទុក​ដាក់​ចំពោះ​អាយុ​ជីវិត​មន្ត្រី​កម្ពុជា និង​មន្ត្រី​ម៉ារ៉ុក​ដែល​បាន​បាត់​ខ្លួន​នោះ​។

លោក​បាន​ថ្លែង​ថា​៖ «​តែ​បើ​ជា​គេ​ចាប់​ដើម្បី​ជា​ថ្នូរ​នឹង​អ្វីមួយ ស្នើ​ឲ្យ​អង្គការ​សហ​ប្រជាជាតិ​ដែល​ជា​អ្នក​ទទួល​ខុស​ត្រូវ​យក​ចិត្ត​ទុក​ដាក់​ធានា​ការពារ​អាយុ​ជីវិត​ពលរដ្ឋ​កម្ពុជា​ក៏​ដូច​ជា​ពលរដ្ឋ​ម៉ារ៉ុក​ដែល​កំពុង​បាត់​ខ្លួន ព្រោះ​ថា គោល​ដៅ​វាយ​ប្រហារ​របស់​ក្រុម​ឧទ្ទាម​សំដៅ​រំដោះ​ឈ្លើយ​សឹក​ដែល​ចាប់​បាន ហើយ​វា​កៀក​នឹង​ទីកន្លែង​ដែល​កងទ័ព​យើង​ស្នាក់​នៅ អ៊ីចឹង​ប្រហែល​ជា​អាច ប៉ាន់ស្មាន​ទេ គេ​អាច​នឹង​ធ្វើ​ការ​ទាមទារ​ដោះដូរ ជា​ថ្នូរ​រវាង​ឈ្លើយ​សឹក​របស់​គេ​ជាមួយ​នឹង​ទាហាន​របស់​យើង​»​។

បើ​តាម​លោក​នាយក​រដ្ឋ​មន្ត្រី​ហ៊ុន សែន កម្ពុជា​បាន​បញ្ជូន​កង​កម្លាំង​រក្សា​សន្តិភាព​ទៅ​កាន់​ប្រទេស​មួយ​ចំនួន​ដូច​ជា​ប្រទេស​ម៉ាលី ស៊ូដង់​ខាង​ត្បូង ស៊ូដង់ និង​នៅ​លីបង់ ជាដើម​។

ដោយ​ឡែក​លោក​ផល សាម៉ន ឲ្យ​ដឹង​ដែរ​ថា កម្ពុជា​បាន​ចាប់​ផ្តើម​បញ្ជូន​កង​កម្លាំង​រក្សា​សន្តិភាព​ក្រោម​ក្របខ័ណ្ឌ​អង្គការ​សហ​ប្រជាជាតិ​នេះ តាំង​ពី​ឆ្នាំ​ ២០០៦​ មក ហើយ​ថា​ក្នុង​មួយ​ឆ្នាំៗ​កម្ពុជា​បាន​បញ្ជូន​ចេញ​ជិត​មួយ​ពាន់​នាក់​ដោយ​ផ្លាស់​ប្តូរ​ជាមួយ​អ្នក​ចាស់​។

លោក​បន្ត​ថា កន្លង​មក​មាន​មន្ត្រី​កង​រក្សា​សន្តិភាព​កម្ពុជា​ក្នុង​ក្រប​ខ័ណ្ឌ​អង្គការ​សហ​ប្រជាជាតិ​ចំនួន​៧​នាក់​បាន​ស្លាប់ និង​៧​នាក់​រងរបួស​ដោយ​សារ​ជំងឺ និង​គ្រោះថ្នាក់​ដោយ​ខ្យល់​ព្យុះ​ជា​ដើម តែ​មិន​រាប់​បញ្ចូល​ករណី​ថ្មី​នេះ​ទេ​៕

អត្ថបទគួរចាប់អារម្មណ៍