The Phnom Penh Post Search

Search form

Logo of Phnom Penh Post newspaper Phnom Penh Post - ក្រុម​បាតុករ​វាយ​បុរស​ម្នាក់​បន្លំ​ខ្លួន​ចូល​ក្នុង​ក្រុម​អ្នក​តវ៉ា

ក្រុម​បាតុករ​វាយ​បុរស​ម្នាក់​បន្លំ​ខ្លួន​ចូល​ក្នុង​ក្រុម​អ្នក​តវ៉ា

ក្រុម​បាតុករ​វាយ​បុរស​ម្នាក់​បន្លំ​ខ្លួន​ចូល​ក្នុង​ក្រុម​អ្នក​តវ៉ា

Content image - Phnom Penh Post

ភ្នំពេញៈ ការ​ប្រមូល​ផ្តុំ​ដោយ​សន្តិវិធី​មួយ​ដែល​ប្រារព្ធ​ធ្វើ​ឡើង​កាល​ពី​ម្សិលមិញ​ដើម្បី​គាំទ្រ​គ្រូ​បង្រៀន​ទាំង​ឡាយ​ក្នុង​ប្រទេស​កម្ពុជា ក្នុង​ពិធី​ប្រារព្ធ​ទិវា​គ្រូ​បង្រៀន​ពិភពលោក​នៅ​ទីលាន​ប្រជាធិបតេយ្យ មាន​ជន​ស៊ីវិល​ម្នាក់​ប្រដាប់​ដោយ​អាវុធ​តាម​ខ្លួន​បន្លំ​ចូល​ក្នុង​ក្រុម​អ្នក​តវ៉ា​អហិង្សា ដើម្បី​បង្ក​ចលាចល ត្រូវ​បាន​ក្រុម​អ្នក​តវ៉ា​វាយ​ឲ្យ​រង​របួស។

សមាគម​គ្រូ​បង្រៀន​កម្ពុជា ឯករាជ្យ បាន​ព្យាយាម​ប្រារព្ធ​ទិវា​គ្រូ​បង្រៀន​ពិភពលោក នៅ​ទីលាន​ប្រជាធិបតេយ្យ​បើ​ទោះ​បី​ជា​មាន​ការ​បដិសេធ​ពី​សាលា​រាជធានី​មិន​អនុញ្ញាត​ឲ្យ​ធ្វើ​បាតុកម្ម​នេះ​ក៏​ដោយ ក៏​មាន​មនុស្ស​ប្រមាណ ២០០ នាក់​បាន​ប្រមូល​ផ្តុំ​គ្នា ដើម្បី​ប្រារព្ធ​ទិវា​គ្រូ​បង្រៀន​ពិភពលោក​និង​ទាមទារ​ឲ្យ​រដ្ឋាភិបាល​ដំឡើង​ប្រាក់​ខែ​ដល់​គ្រូ​បង្រៀន​យ៉ាង​ហោច​ណាស់ ១ លាន​រៀល (២៥០ ដុល្លារ) ក្នុង​មួយ​ខែ។

លោក​ស្រី មូរ សុខហួរ តំណាង​រាស្រ្ត​គណបក្ស សង្គ្រោះ​ជាតិ ដែល​បាន​ថ្លែង​ថា គោល​បំណង​របស់​បុរស​ម្នាក់​ប្រដាប់​ដោយ​អាវុធ ដែល​បាន​ប្រជ្រៀត​ចូល​ទៅ​បង្ហាញ​អត្តសញ្ញាណ​គាត់​ថា​ជា​អ្នក​យក​ព័ត៌មាន​សម្រាប់​គេហទំព័រ MID PP និង​ជា​តំណាង​ផ្នែក​លក់​របស់​ក្រុមហ៊ុន​នាំ​ចូល‑នាំ​ចេញ មង្គល រិទ្ធ នៅ​តែ​មាន​លក្ខណៈ​គួរ​ឲ្យ​សង្ស័យ បន្ទាប់​ពី​មាន​ឧប្បត្តិហេតុ​នោះ។

លោក​ស្រី បាន​ថ្លែង​ឲ្យ​ដឹង​ទៀត​ថា លោក​ស្រី​បាន​សួរ​ទៅ​ឈ្មោះ ប៉ឹង ជឿន ដែល​ប្រដាប់​ដោយ​កាំភ្លើង​ថា ហេតុ​អ្វី​បាន​ជា​អ្នក​ចង់​មក​ចូល​រួម​ការ​ប្រមូល​ផ្តុំ​របស់​គ្រូ​បង្រៀន​ឯករាជ្យ​ដោយ​មាន​កាំភ្លើង​មក​ជាមួយ? នៅ​ពេល គាត់​កំពុង​ថត​រូប​ព្រះសង្ឃ​ដែល​ចូល​រួម​ការ​ប្រមូល​ផ្តុំ​នេះ បន្ទាប់​មក សមាជិក​ក្រុម​អ្នក​ប្រមូល​ផ្តុំ​បាន​ដណ្តើម​យក​អាវុធ​ពី​គាត់​និង​បាន ដោះ​សម្លៀក​បំពាក់​របស់​គាត់ និង​បាន​វាយ​គាត់។

បើ​តាម​ការ​អះអាង របស់​គ្រូ​ពេទ្យ​ម្នាក់​បម្រើការ​នៅ​មន្ទីរពេទ្យ កាល់ម៉ែត ដែល​សុំ​មិន​បញ្ចេញ ឈ្មោះ​បាន​ឲ្យ​ដឹង​ថា បន្ទាប់​ពី​នគរបាល​បំបែក​លោក ជឿន ពី​ក្រុម​អ្នក​ប្រមូល​ផ្តុំ គាត់​បាន​ទៅ​មន្ទីរពេទ្យ កាល់ម៉ែត ដើម្បី​ព្យាបាល​របួស​របស់​គាត់ ដែល​មាន​លក្ខណៈ​ស្រាល ហើយ​បន្ទាប់​ពី​សម្រាក អស់​រយៈ​ពេល​ប្រហែល​មួយ​ម៉ោង​នៅ​មន្ទីរពេទ្យ មេ​របស់​លោក ជឿន មក​ពី គេហទំព័រ MID PP បាន​ទៅ​ជួប​គាត់​នៅ​ទី​នោះ​និង​បាន​យក​គាត់​ចេញ​ពី​មន្ទីរពេទ្យ​ទៅ អង្គភាព​របស់​គាត់​វិញ។

131014_01
អាជ្ញាធរសែងបុរសដែលត្រូវបានអ្នកតវ៉ាជាច្រើននាក់វាយដោយសារកាន់កាំភ្លើងបន្លំខ្លួនចូលក្នុងក្រុមរបស់គេនៅឯសួនសេរីភាពពីថ្ងៃម្សិលមិញ

បុរស​ម្នាក់​ដែល​ឆ្លើយ​ទូរស័ព្ទ​នៅ​ក្រុមហ៊ុន​នាំ​ចូល‑នាំ​ចេញ មង្គលរិទ្ធ ប៉ុន្តែ​បាន​បដិសេធ​មិន​បាន​ប្រាប់​ឈ្មោះ​របស់​គាត់ បាន​ថ្លែង​ថា លោក ជឿន ធ្វើ​ការ​នៅ​ទី​នោះ ប៉ុន្តែ​គាត់​មិន​បាន​ឃើញ​លោក ជឿន ប៉ុន្មាន​សប្តាហ៍​មក​ហើយ។

ព្រះ​រាជអាជ្ញា​រង​សាលា​ដំបូង​រាជធានី ភ្នំពេញ លោក មាស ចាន់ពិសិដ្ឋ បាន​ទាមទារ​ជួប​អ្នក​ដែល​បាន​យក​កាំភ្លើង​ពី​លោក ជឿន បន្ទាប់​ពី​ឧប្បត្តិហេតុ​នោះ ប៉ុន្តែ​តំណាង​រាស្រ្ត​គណបក្ស​សង្គ្រោះ​ជាតិ លោក សុន ឆ័យ ដែល​បាន​ប្រគល់​កាំភ្លើង​ទៅ​នគរបាល បាន​ថ្លែង​ថា លោក​មិន​ប្រាកដ​ច្បាស់​ទេ​ថា​តើ​នរណា​ម្នាក់​ដែល​បាន​ទាញ​យក​កាំភ្លើង ពី​គាត់។

លោក ផូ ផែម គ្រូ​បង្រៀន​ម្នាក់​មក​ពី​ខេត្ត តាកែវ ដែល​បាន​ចូល​រួម​ការ​ប្រមូល​ផ្តុំ​នេះ បាន​ថ្លែង​ថា ប្រាក់​ខែ​គ្រូ​បង្រៀន​ខ្ពស់​ជាង​មុន​នឹង​លើក​កម្ពស់​ស្តង់ដារ​រស់​នៅ សម្រាប់​គ្រូ​បង្រៀន ហើយ​នឹង​ធ្វើ​ឲ្យ​ប្រព័ន្ធ​អប់រំ​ទាំង​មូល​ប្រសើរ​ផង​ដែរ​។ លោក​បន្ត​ថា៖ «ប្រសិន​បើ​ខ្ញុំ​ពឹង​ផ្អែក​តែ​ប្រាក់​ខែ ១០០ ដុល្លារ​របស់​ខ្ញុំ គ្រួសារ​របស់​ខ្ញុំ​នឹង​មិន​មាន​អាហារ​គ្រប់​គ្រាន់​ទទួល​ទាន​ទេ ខ្ញុំ​បង្រៀន​នៅ​ពេល​ព្រឹក និង​រត់​ម៉ូតូ​ឌុប​នៅ​ពេល​ល្ងាច»។

លោក នី ចរិយា ប្រធាន​ស៊ើប​អង្កេត​របស់​សមាគម​ការពារ​សិទ្ធិ​មនុស្ស អាដហុក បាន​ថ្លែង​ថា មុន​ឧប្បត្តិហេតុ​នៃ​ការ​ដណ្តើម​យក​កាំភ្លើង​នោះ មន្រ្តី​កង​រាជ​អាវុធហត្ថ​រាប់​រយ​នាក់​បាន​បិទ​ផ្លូវ​មួយ​ចំនួន​ទៅ ទីលាន​ប្រជាធិបតេយ្យ​រួច​ទៅ​ហើយ ដូច្នេះ​ក្រុម​បាតុករ​មិន​អាច​ដើរ​ហែ​ក្បួន​ពី​ទីលាន​ប្រជាធិបតេយ្យ​ទៅ ក្រសួង អប់រំ​ដើម្បី​ដាក់​ញត្តិ​ទាម​ទារ​ដំឡើង​ប្រាក់​ខែ​បាន​ទេ​។ លោក​បាន​ថ្លែង​ថា៖ «ការ​មិន​អនុញ្ញាត​ឲ្យ​ក្រុម​គ្រូ​បង្រៀន ធ្វើ​ការ​ប្រមូល​ផ្តុំ​ដោយ​សន្តិវិធី វា​បំពាន​ច្បាប់​ស្តី​ពី​ការ​ធ្វើ​បាតុកម្ម​សន្តិវិធី»។

លោក ជួន ណារិន្ទ ស្នងការ​រង​នគរបាល​រាជធានី​ភ្នំពេញ បាន​មាន​ប្រសាសន៍​ថា មូលហេតុ​ដែល​នគរបាល​មិន​ធ្វើ​ការ​ឃាត់​ខ្លួន​បុរស​ដែល​មាន​កាំភ្លើង​នោះ ដោយ​សារ​បុរស​នោះ​ជា​ប៉ូលិស​បង្កប់​ដែល​មាន​សិទ្ធិ​កាន់​កាំភ្លើង​និង​មាន ភារកិច្ច​ស៊ើប​នៅ​ក្នុង​ក្រុម​អ្នក​តវ៉ា​ខ្លាច​មាន​ជន​ខិលខូច​បន្លំ​ខ្លួន៕ PS

រាយការណ៍​បន្ថែមៈ ប៊ុត រស្មីគង្គា

អត្ថបទគួរចាប់អារម្មណ៍