ភ្នំពេញៈ មេដឹកនាំគណបក្សប្រឆាំងលោក សម រង្ស៊ី និងលោក កឹម សុខា បានដឹកនាំក្រុមអ្នកគាំទ្រពីរបីពាន់នាក់ហែក្បួននៅក្នុង ទីក្រុង កាលពីម្សិលមិញ ដោយមានអ្នកគាំទ្រស្រែកខ្លាំងៗទាមទារឲ្យលោកនាយករដ្ឋមន្រ្តី ហ៊ុន សែន ចុះចេញពីអំណាចខណៈការធ្វើបាតុកម្មចូលដល់ថ្ងៃ ទី៤។
បើទោះជាការហែក្បួនមានរ៉ឺម៉ក ម៉ូតូនិងថ្មើរជើង បានចេញមកតវ៉ាខ្លាំងក្លាជាថ្មី នាំឲ្យមានការស្ទះចរាចរណ៍ក៏ដោយ ក៏មិនឃើញមានវត្តមាននគរបាលច្រើនទេ ប៉ុន្តែ មន្ត្រីរដ្ឋាភិបាលបានថ្លែងព្រលយពីម្សិលមិញថា ការឆ្លើយតបខ្លាំងក្លាអាចនឹងកើតមាននាពេលខាងមុខ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានថ្លែងកាលពីម្សិលមិញថា៖ «រដ្ឋាភិបាលគឺបម្រើផលប្រយោជន៍សាធារណៈទាំងអស់គ្នា ហើយយើងនឹងធ្វើអ្វីគ្រប់យ៉ាង ដែលជាតម្រូវការសម្រាប់ប្រយោជន៍សាធារណៈ»។
លោកថ្លែងដែរថា៖ «ដូច្នេះ ឥឡូវនេះ យើងទុកឲ្យពួកគេ [គណបក្សសង្គ្រោះជាតិ] អប់រំខ្លួនឯង យើងគ្រាន់តែរំឭកពួកគេថា [ការតវ៉ានេះ] គឺជាការបំពានច្បាប់និងប្រយោជន៍សាធារណៈ។ ប៉ុន្តែនៅពេលដែលប្រយោជន៍សាធារណៈត្រូវបានបាត់បង់ យើងនឹងអាចប្រតិកម្ម»។
លោកថ្លែងបន្តថា៖ «យើងមានច្បាប់ស្តីពីបាតុកម្ម ហើយយើងមានស្តង់ដារ។ ប៉ុន្តែ សកម្មភាពនៅទីលានប្រជាធិបតេយ្យ គឺមានលក្ខណៈបង្ករឿង ដូចជាពួកគេដុតរូបលោកនាយករដ្ឋមន្រ្តី ហ៊ុន សែន។ វាហាក់ដូចជា ពួកគេរៀនពីពួកភេរវករនៅមជ្ឈិមបូព៌ា។ បាតុកម្មគួរតែខុសគ្នាពីការបះបោរឬភេរវកម្ម»។
ពាក្យបែបនេះ គឺជាការភ្ញាក់ផ្អើលចំពោះក្រុមអ្នកតវ៉ាភាគច្រើនបំផុតដែលធ្វើធម្មយាត្រាជាប្រចាំទៅទីលានប្រជាធិបតេយ្យតាំងពីការតវ៉ាបានចាប់ផ្តើមកាលពីថ្ងៃអាទិត្យ ហើយដែលកាលពីម្សិលមិញពួកគេបានចំណាយជិតមួយថ្ងៃកម្សាន្តជាមួយក្រុមអ្នកកំប្លែង អ្នកចម្រៀង និងក្រុមសៀក។
មនុស្សជាច្រើន ក៏បានឃើញផ្ទាល់អំពីលោក សម រង្ស៊ី បើកម៉ូតូរ៉ឺម៉កតាមមហាវិថីព្រះសីហនុ រួចបន្តទៅស្តាត អូឡាំពិក ក្នុងអំឡុងការហែកាលពីម្សិលមិញ។
ទោះយ៉ាងណា អនុប្រធានគណបក្សប្រឆាំង លោក កឹម សុខា បានអំពាវនាវឲ្យមានអ្នកគាំទ្រច្រើនបន្ថែមទៀតចូលរួមបាតុកម្មដើម្បីឲ្យគណបក្សនេះអាចពង្រីកការតវ៉ារបស់ខ្លួន ទូទាំងប្រទេស ហើយចាប់ផ្តើមបិទផ្លូវជាតិ ដែលវិធីសាស្រ្តនេះអាចជាការបង្កើនឲ្យមានការប្រឈមជាមួយ អាជ្ញាធរ។
លោកបានប្រាប់ក្រុមអ្នកតវ៉ានៅម៉ោងប្រហែល ៦ ល្ងាច បន្ទាប់ពីការហែក្បួនជុំវិញទីក្រុង ថា៖ «យើងត្រូវតែអំពាវនាវឲ្យមានយុត្តិធម៌ រហូតទាល់តែយើងជោគជ័យ។ ប្រសិនបើការអំពាវនាវរបស់យើងមិនជោគជ័យ យើងនឹងមិនដកថយទេ។ យើងសុខចិត្តបូជាជីវិតដើម្បីយុត្តិធម៌»។ចំនួនអ្នកតវ៉ានៅពេលល្ងាចមិញនៅទីលានប្រជាធិបតេយ្យបានកើនឡើងលើស ៥ ពាន់នាក់ ខណៈប្រជាជនក្នុងរាជធានីចេញពីធ្វើការងារនិងសាលារៀន។
លោកថ្លែងបន្តថា៖ «លោក ហ៊ុន សែន កំពុងឮយើង។ សូមទាំងអស់គ្នាស្រែកខ្លាំងៗថា «ហ៊ុន សែន ត្រូវតែចេញ»។
លោក គង់ សុវ៉ា គ្រូបង្រៀនអាយុ ៤៦ ឆ្នាំដែលចេញពីផ្ទះនៅផ្សារ កណ្តាល រាល់ថ្ងៃ បានចូលរួមជាមួយក្រុមអ្នកតវ៉ាជាច្រើនដោយបាននិយាយថា ការប្តេជ្ញាចិត្តរបស់គាត់ចំពោះបាតុកម្ម គឺមិនរលាយសាបសូន្យទេ។ គាត់បន្តថា៖ «ខ្ញុំនឹងបន្តមកទីនេះរហូតលោក ហ៊ុន សែន ចេញ ឬមានការអនុញ្ញាតឲ្យមានការបោះឆ្នោតជាថ្មី បើទោះជាខ្ញុំត្រូវមកទីនេះរយៈពេល ៣ ខែក៏ដោយ»។
ចំណែក លោក សម រង្ស៊ី បានពន្យល់ទៅក្រុមអ្នកតវ៉ាកាលពីម្សិលមិញថា យើងចង់ឲ្យមានការស៊ើបអង្កេតទៅលើភាពមិនប្រក្រតីជាង។
លោកបន្តថា៖ «យើងមានជម្រើសបី ទី១ គឺការស៊ើបអង្កេតដើម្បីបង្ហាញការពិតពាក់ព័ន្ធនឹងការបោះឆ្នោត លើកមុន ប៉ុន្តែ ដោយគណបក្សប្រជាជនកម្ពុជាមិនព្រមយើងត្រូវតែបន្តទៅជម្រើស ទីពីរ ការបោះឆ្នោតជាថ្មី.ហើយបើលោក ហ៊ុន សែន និងគណបក្សប្រជាជនកម្ពុជាបន្តបដិសេធចំពោះការបង្កើតការបោះឆ្នោតជាថ្មី នោះយើងនឹងសុំឲ្យគាត់ចុះចេញពីតំណែង»។
តែទោះជាយ៉ាងនេះក្តី អ្នកនាំពាក្យទីស្តីការគណៈរដ្ឋមន្រ្តី បានច្រានចោលជម្រើសទាំងអស់របស់គណបក្សសង្គ្រោះជាតិពីម្សិលមិញថា «គ្មានមូលដ្ឋាន» បើយោងទៅតាមរដ្ឋធម្មនុញ្ញនិងច្បាប់ស្តីពីការបោះឆ្នោត។
លោកថ្លែងថា៖ «យើងនឹងធ្វើកំណែទម្រង់សម្រាប់ការបោះឆ្នោតលើកក្រោយ។ យើងយល់ថា វាជាការសម្រេចចុងក្រោយរួចទៅហើយថា នឹងមានកំណែទម្រង់សម្រាប់ការបោះឆ្នោតលើកក្រោយ។ ប៉ុន្តែពួកគេចង់ធ្វើប្រឆាំងនឹងអ្វីដែលបានសម្រេចរួចហើយ [ការព្រមព្រៀងរវាងគណបក្សទាំងពីរកាលពីខែ កញ្ញា]។ ពួកគេប្រមាថព្រះមហាក្សត្រ ពួកគេប្រមាថរដ្ឋធម្មនុញ្ញ គណៈកម្មាធិការជាតិរៀបចំការបោះឆ្នោត គ.ជ.ប និងអ្វីៗទាំងអស់។ វាគឺដូចជាបដិវត្តន៍»។
ប៉ុន្តែ លោក សម រង្ស៊ី បានច្រានចោលការលើកឡើងនេះកាលពីម្សិលមិញ។
លោកថ្លែងថា៖ «វាគ្មានអ្វីពាក់ព័ន្ធនឹងការផ្តួលរំលំរដ្ឋាភិបាលទាល់តែសោះ។ ការស៊ើបអង្កេតឬការបោះឆ្នោតនឹងបញ្ជាក់ឲ្យដឹងថាតើគណបក្ស ប្រជាជនកម្ពុជាអាចនៅកាន់អំណាចឬអត់ឬទុកឲ្យប្រជាធិបតេយ្យផ្លាស់ប្តូរអំណាច។ ឥឡូវនេះអ្វីដែលយើងកំពុងធ្វើគឺមិនមែនជាការបង្កើតកុបកម្ម មិនមែនការកាន់កាប់អគារសាធារណៈ ឬបង្កើតនូវភាពឥតសណ្តាប់ធ្នាប់ទេ ...»។
នៅក្នុងសេចក្តីថ្លែងការណ៍មួយកាលពីម្សិលមិញ គ.ជ.ប បានតបទៅនឹងរបាយការណ៍មួយពីសម្ព័ន្ធអង្គការឃ្លាំមើលការបោះឆ្នោតឈ្មោះ Election Reform Alliance ដែលតំណាងរាស្រ្តគណបក្សសង្គ្រោះជាតិសំអាងថា អង្គការនេះផ្តល់ «ភ័ស្តុតាងយ៉ាងច្បាស់» អំពីការក្លែងបន្លំការបោះឆ្នោត និងសុំឲ្យបោះឆ្នោតជាថ្មី។
គ.ជ.ប អះអាងថា ខ្លួនបាន «បំពេញតួនាទីនិងកាតព្វកិច្ច» ទៅតាមច្បាប់បោះឆ្នោតនិងនីតិវិធី ត្រឹមត្រូវរួចហើយ ហើយគ្រាន់តែទទួលស្គាល់ថា «មន្រ្តីមួយចំនួនតូចនៅការិយាល័យ បោះឆ្នោតខ្លះមិនបានបំពេញកាតព្វកិច្ចខ្លួនពេញលេញ» ពាក់ព័ន្ធនឹងការបិទសៀលកញ្ចប់សន្លឹកឆ្នោត។
គ.ជ.ប បន្តថា៖ «គ.ជ.ប នៅតែស្វាគមន៍រាល់អនុសាសន៍ទាំងអស់ ហើយយើងនឹងរៀបចំ សិក្ខាសាលាថ្នាក់ជាតិនៅចុងខែ ធ្នូ ២០១៣ ឬខែ មករា ២០១៤»។
នៅថ្ងៃចន្ទជាថ្ងៃខួប ៣ ខែ នៃការបើកសម័យប្រជុំសភាដំបូង (ថ្ងៃ ២៣ កញ្ញា) ដោយគ្មានវត្តមានតំណាងរាស្រ្តគណបក្សប្រឆាំងទាំង ៥៥ រូប។ គណបក្សកាន់អំណាចធ្លាប់ព្រលយថា ខ្លួនអាចនឹងមានមូលដ្ឋានផ្លូវច្បាប់ដើម្បីបែងចែកអាសនៈរបស់គណបក្សប្រឆាំងឡើងវិញ ប៉ុន្តែ អ្នកនាំពាក្យគណបក្សកាន់អំណាចលោក ជាម យៀប ថ្លែងពីម្សិលមិញថា ប្រធានរដ្ឋសភាមិនទាន់សម្រេចយ៉ាងណាទេ៕PS
