The Phnom Penh Post Search

Search form




Logo of Phnom Penh Post newspaper Phnom Penh Post - ក្រុម​សហជីព​នឹង​បង្កើន​ការ​ទាមទារ​ប្រាក់​ឈ្នួល​កម្មករ​ដល់​១៧៧​ដុល្លារ

ក្រុម​សហជីព​នឹង​បង្កើន​ការ​ទាមទារ​ប្រាក់​ឈ្នួល​កម្មករ​ដល់​១៧៧​ដុល្លារ

កម្មករធ្វើ​កូដកម្ម​ទាម​ទារ​ប្រាក់​ខែ ១៦០ ​ដុល្លារ​ កាល​ពី​ខែមករា​​។
កម្មករធ្វើ​កូដកម្ម​ទាម​ទារ​ប្រាក់​ខែ ១៦០ ​ដុល្លារ​ កាល​ពី​ខែមករា​​។ ផា លីណា

ក្រុម​សហជីព​នឹង​បង្កើន​ការ​ទាមទារ​ប្រាក់​ឈ្នួល​កម្មករ​ដល់​១៧៧​ដុល្លារ

ភ្នំពេញៈ បើ​ទោះ​ជា​មិន​បាន​ខិត​ទៅ​ជិត​ការ​សម្រេច​គោល​ដៅ​របស់​ខ្លួន​ក្នុង​ការ​ទទួល​បាន​ប្រាក់​ឈ្នួល​អប្បបរមា​ ១៦០​ដុល្លារ​ក៏​ដោយ ក៏​ក្រុម​សហជីព​បាន​ប្រកាស​កាល​ពី​ថ្ងៃ​ចន្ទ​ថា​​ ពួក​គេ​នឹង​បង្កើន​ការ​ទាម​ទារ​បន្ថែម​ទៀត រហូត​ដល់​ទទួល​បាន​ប្រាក់​ឈ្នួល ១៧៧​ដុល្លារ​សម្រាប់​ឆ្នាំ ២០១៥​។

លោក​ស្រី​ កែន​ ​ឆេង​ឡុង​ ប្រធាន​ ស្តី​ទី​នៃ​សហព័ន្ធ​សហជីព​ជាតិ នៃ​ឧស្សាហកម្ម​វាយនភ័ណ្ឌ​កាត់​ដេរ​កម្ពុជា បាន​ថ្លែង​ថា តំណាង​សហជីព​ប្រមាណ​១០ នាក់ បាន​ព្រមព្រៀង​គ្នា​កាល​សប្តាហ៍​មុន ក្នុង​ការ​ជំរុញ​ឲ្យ​មាន​ការ​ទាមទារ​ប្រាក់​ឈ្នួល​អប្បបរមា​ចំនួន ១៧៧ ​ដុល្លារ​នេះ​នៅ​កិច្ច​ប្រជុំ​នា​ថ្ងៃ​សុក្រ​ខាង​មុខ​ជាមួយ​តំណាង​និយោជក។

លោក​ស្រី​បាន​ថ្លែង​បន្ត​ថា​៖«​ក្រុម​សហជីព​ បាន​ទទួល​លទ្ធ​ផល​វិជ្ជមាន តាម​រយៈ​ការ​ឯកភាព​គ្នា​ដាក់​សំណើ​ប្រាក់​ឈ្នួល​ ១៧៧​ ដុល្លារ​ទៅ​គណៈ​កម្មការ​ប្រឹក្សា​ការងារ​( LAC)​សម្រាប់​ការ​ចរចា​»។

លោក​ស្រី​យល់​ស្រប​ថា ការ​ទាមទារ​ប្រាក់​ឈ្នួល​អប្បបរមា​​ ក្នុង​ចំនួន​ថ្មី​នេះ មាន​លក្ខណៈ​មហិច្ឆតា ខណៈ​​ប្រាក់​ឈ្នួល​អប្បបរមា​ប្រចាំ​ខែ​បច្ចុប្បន្ន​មាន​ត្រឹម​១០០ ​ដុល្លារ និង​មាន​ការ​បង្ក្រាប​រហូត​ដល់​ស្លាប់​បាតុករ​ទាម​ទារ​ប្រាក់​ឈ្នួល​អប្បបរមា ១៦០​ដុល្លារ​កាល​ពី​ខែ​មករា​។ ​

លោក​ស្រី ឆេងឡុង​បន្ត​ថា​៖«​យើង​ដឹង​ថា​រដ្ឋាភិបាល​ដំឡើង​ប្រាក់​ឈ្នួល​អប្បបរមា​តិច​ណាស់​។ ខ្ញុំ​មិន​ដឹង​ទេ​ថា​តើ​រដ្ឋាភិបាល​មាន​ឆន្ទៈ​យ៉ាង​ម៉េច​រហូត​ទាល់​តែ​ដល់​កិច្ច​ប្រជុំ​ត្រី​ភាគី នៅ​ខែ​តុលា​រវាង​ក្រសួង​ សហជីព​និង​និយោជក»​។

លោក គង់ អាទិត្យ​ អនុ​ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា ហៅ​កាត់​ស៊ីខៅឌូ បាន​ថ្លែង​ថា ​សហជីព​អាច​នឹង​បន្ទាប​តិច​ជាង​នេះ​ ​ប៉ុន្តែ​​មិន​បាន​ថ្លែង​ថា​ តើ​ចំនួន​ប៉ុន្មាន​ដែល​ពួក​គេ​អាច​ទទួល​យក​បាន​នោះ​ទេ​។

លោក​បាន​ថ្លែង​បន្ត​ថា​៖ «​​យើង​មិន​ចង់​មាន​កូដកម្ម​តវ៉ា​ទេ​។ ​យើង​នឹង​ព្យាយាម​មិន​ឲ្យ​កើត​មាន​ម្តង​ទៀត​ទេ...ប៉ុន្តែ​យើង​នឹង​រង់​ចាំ​មើល​ស្ថាន​ភាព»។

តាម​លិខិត​ពី​សហជីព​បាន​ឲ្យ​ដឹង​ថា ប្រាក់​ឈ្នួល​អប្បបរមា​១៧៧ ​ដុល្លារ​​ គឺជា​ចំនួន​សម​ស្រប​មួយ ខណៈ​ដែល​ឧស្សាហកម្ម​នេះ​ ទទួល​បាន​ចំណូល​រាប់​ពាន់​លាន​ដុល្លារ​​ និង​បើ​ធ្វើ​ការ​ប្រៀប​ធៀប​​ទៅ​នឹង​​ប្រទេស​ជិត​ខាង​​។

លោក​​បន្ត​ថា​៖ «​ការ​ទាមទារ​នេះ គឺ​ផ្អែក​​ទៅ​លើ​ការ​ប្រៀប​ធៀប​​ប្រាក់​ឈ្នួល​របស់​កម្ពុជា​ ទៅ​នឹង​​ប្រទេស​ថៃ​មាន​ចំនួន​ ២៣៧ ​ដុល្លារ​ ​ឥណ្ឌូនេស៊ី​ចន្លោះ​ពី​​ ៧៤​ ទៅ​ ២១៩ ហ្វីលីពីន​ចន្លោះ​ពី​ ១៥២ ​ដល់​២៧៣ ​ដុល្លារ​ និង​ម៉ាឡេស៊ី​ចន្លោះ​ពី​ ២៤៥ ​​ដល់​ ២៧៥​ដុល្លារ​»។​

លោក ខេន លូ អគ្គ​លេខាធិការ​នៃ​សមាគម​រោង​ចក្រ​កាត់​ដេរ​នៅ​កម្ពុជា​ បាន​ថ្លែង​ថា តួលេខ​ ១៧៧ ​ដុល្លារ​នេះ​គឺជា​ការ​ទាម​ទារ​គ្មាន​លក្ខណៈ​ប្រាកដ​និយម​ទាំង​ស្រុង​។

លោក​ថ្លែងថា​៖ «​​នោះ​ហើយ​គឺ​ជា​ហេតុ​ផល​ដូច​កាល​ពី​មុន​ គឺ​ដូច​ពេល​ដែល​ពួក​គេ​ទាម​ទារ​ ១៦០ ​ដុល្លារ»។ ​

លោក​បាន​ថ្លែង​ដោយ​សំដៅ​ទៅ​​សេចក្តី​ប្រកាស​ព័ត៌​មាន ​របស់​សមាគម​រោង​ចក្រ​កាត់​ដេរ​នៅ​កម្ពុជា​​​កាល​ពេល​មុន​ដែល​ថា ​នេះ​គឺ​ជា​ការ​ដាក់​សម្ពាធ​ទៅ​លើ​ម្ចាស់​រោង​ចក្រ។ ​លោក​បន្ត​ថា​៖«​ការ​ទាម​ទារ​មិន​ត្រឹម​តែ​មិន​បន្ទាប​ទេ ប៉ុន្តែ​ថែមទាំង​កើន​ឡើង​​ថែម​ទៀត​»។

លោក ខេន លូ​ បន្ត​ទៀត​ថា វា​គួរ​និយាយ​ដែរ​ថា​ តើ​អ្វី​ទៅ​ជា​ការ​ដំឡើង​មាន​លក្ខណៈ​ប្រាកដ​និយម​ និង​សម​ស្រប? រាយការណ៍​បន្ថែម​ដោយ SHANE WORRELL

អត្ថបទគួរចាប់អារម្មណ៍