The Phnom Penh Post Search

Search form

Logo of Phnom Penh Post newspaper Phnom Penh Post - ក្រុម​ហ៊ុន Dayup Global បដិសេធ​ការ​ប្រើ​ហិង្សា​លើ​មន្ត្រី​សហជីព




ក្រុម​ហ៊ុន Dayup Global បដិសេធ​ការ​ប្រើ​ហិង្សា​លើ​មន្ត្រី​សហជីព

ក្រុម​ហ៊ុន Dayup Global បដិសេធ​ការ​ប្រើ​ហិង្សា​លើ​មន្ត្រី​សហជីព

ភ្នំពេញៈ នាយក​ក្រុមហ៊ុន​Dayup Global បាន​ចេញមុខ​ធ្វើការ​បដិសេធ​កាលពី​ថ្ងៃម្សិល​មិញ​នូវ​អ្វី​ដែល​ប្រធាន​សហព័ន្ធ​សហជីព​ដើម្បី​សិទ្ធិ​ការងារ​បាន​ចោទ​ពីការ​ប្រើហិង្សា​របស់​មន្រ្តី​​ និង​ជើង​កាង​របស់​ក្រុមហ៊ុន​មក​លើមន្រ្តី​សហ​ជីព​​ឲ្យមាន​របួស​ធ្ងន់​ពីរនាក់​កាល​ពី​ដើម​សប្តាហ៍​កន្លង​មក​នេះ។

លោក​ស្រី Younghee Ban នាយក​ចាត់ការ​ទូទៅ​របស់​ក្រុមហ៊ុន​Dayup Global​ បាន​មាន​ប្រសាសន៍​ដោយ​បដិសេធ​នូវ​ហេតុ​ការណ៍​ដែល​បាន​កើត​ឡើង​រវាង​មន្រ្តី​សហជីព​ និង​កម្មករ​នៅខាង​មុខរោង​ចក្រនេះ​កាល​ពី​ថ្ងៃ​ទី​២៦​ ខែសីហា​​ ដែល​ខាង​សហជីព​បាន​ចោទ​ថា ​ក្រុមហ៊ុន​នេះ​បាន​ជួលក្រុម​ជើងកាង​ប្រមាណ​ជា​៤០​នាក់​មក​វាយដំ​លើ​ក្រុម​សហជីព​ក្នុង​បំណង​វាយ​សម្លាប់​តែ​ម្តង​។ លោក​ស្រីបាន​ថ្លែង​ថា​៖ «ខ្ញុំសូមធ្វើ​ការបដិសេធ​ទាំង​ស្រុង​ទៅ​លើ​ការ​ចោទប្រកាន់​ទាំង​នេះ​។​ ប្រសិន​បើខាង​រោង​ចក្រ​យើង​ធ្វើ​សកម្មភាព​ទាំង​នេះ​មែន​វា​នឹង​ធ្វើ​ឲ្យ​ប៉ះពាល់​ខ្លាំង​ទៅ​លើ​រោងចក្រ​របស់​​យើង​។ យើង​មិន​អាច ឬ​គ្មាន​សិទ្ធិ​ក្នុង​ការ​បញ្ជា​ ឬជួល​មនុស្ស​ណា​ម្នាក់​ទៅ​វាយ​ដំលើ​មនុស្ស​មួយ​ផ្សេង​ទៀត​ទេ​»​។

លោក​ស្រី​និយាយ​ថា រឿង​នេះ​គឺ​វា​កើត​ឡើង​ដោយ​សារ​កម្មករ​ដែល​ចេញ​ពី​រោង​ចក្រ​ទៅ​ឃាត់​មន្រ្តី​សហជីព​ទាំង​នោះ​ដែល​មានបំណង​រំខាន​ដល់​ការងារ​របស់​គេ​។​  ករណី​នេះ​បាន​កើត​មាន​មុន​ពេល​ដែល​ប្រធាន​រដ្ឋបាល​របស់​រោងចក្រ​ចេញ​ទៅ​ធ្វើ​អន្តរាគមន៍។ ប្រធាន​រដ្ឋបាល លោក​យ៉ង​ រិទ្ធី​ និង​កម្មករ​មួយ​ចំនួន​ទៀត​បាន​ព្យាយាម​ទៅ​ធ្វើ​ការ​ពន្យល់​ពីចំណុច​ទាំង​១៩ដែល​កម្មករ​ទាម​ទារ តែ​មន្រ្តី​សហជីព​ទាំងនោះ​បាន​បង្កភាព​ចលា​ចល​មក​លើ​មន្ត្រី​រដ្ឋបាល និង​កម្មករ​ផ្សេង​ទៀត​ឲ្យ​រង​របួស​ផង​ដែរ​។

លោក​ស្រី​បន្ត​ថា ​ប្រសិន​បើខាង​រោង​ចក្រ​មាន​បំណង​ធ្វើការ​វាយ​ប្រហារ​ពួក​គាត់​មែន​ នោះរោង​ចក្រ​មិន​មែន​ធ្វើ​នៅ​កន្លែង​ដែល​មាន​មនុស្ស​អ៊ូអរ​ទេ គឺ​ប្រហែល​ជាធ្វើ​នៅទី​កន្លែង​ស្ងាត់​ទៅ​ហើយ​។

គួរ​បញ្ជាក់​ថា ហេតុ​ការណ៍​ផ្ទុះ​អំពើ​ហិង្សា​មួយ​បាន​កើត​មាន​ឡើង​កាល​ពី​ព្រឹក​ថ្ងៃចន្ទ​ទី២៦​ ខែសីហា​ នៅខាង​មុខ​រោងចក្រ​Dayup Global ដែល​ធ្វើ​ឲ្យ​មន្រ្តី​សហជីព​ចំនួន​៧​នាក់​រងរបួស​ដែល​ក្នុង​នោះ​មានពីរ​នាក់​រងរបួស​ធ្ងន់ ​និងកំ​ពុង​សម្រាក​ព្យាបាល​នៅ​ពេទ្យ​កាល់​ម៉ែត​។

លោក​ស្រី ​Younghee Ban​ បានធ្វើ​ការ​អំពាវនាវ​ដល់​រាជរដ្ឋាភិបាល​កម្ពុជា​ធ្វើការ​ពិនិត្យ​ទៅ​លើ​រោងចក្រ​ដែល​មាន​បញ្ហា​មួយ​ចំនួន​ ដើម្បី​ធ្វើឲ្យ​ស្ថានភាព​វិនិយោគ​នៅ​ក្នុង​ប្រទេស​កម្ពុជា​មាន​ភាព​រលូន ប្រសិន​បើ​បញ្ហា​កូដកម្ម​នៅ​តែ​មាន​ច្រើន​នោះអ្នក​វិនិយោគ​បរទេស​ដែល​គ្រោង​នឹង​មកធ្វើ​ការវិនិ​យោគ​នឹង​ធ្វើការ​ពិចារ​ណា​លើ​ចំណុច​នេះ​ ហើយ​ពួកគេ​អាច​នឹង​ដក​ឬបង្វែរ​ការ​វិនិយោគ​។

លោក​សំ ​សឿន​ ប្រធាន​សហព័ន្ធ​សហ​ជីព​ដើម្បី​សិទ្ធិ​ការងារ​ បាន​ឲ្យ​ដឹង​កាល​ពី​ថ្ងៃ​ម្សិល​មិញ​នេះ​ថា ​លោក​នៅតែ​ប្រកាន់​ជំហរ​ដដែល​ពី​ការ​ចោទ​ប្រកាន់​ទៅលើ​មនុស្ស​របស់​រោងចក្រ​ Dayup Global ដែល​បាន​ប្រើហិង្សា​មកលើ​មន្រ្តី​របស់​លោក​ ដែលអ្នក​រង​របួស​ធ្ងន់ម្នាក់​គឺ​ជា​ប្អូន​ប្រុស​បង្កើត​របស់​លោក​ផង​ដែរ​។​​​ លោក​បាន​ថ្លែង​ថា៖​ «ខ្ញុំនៅ​តែប្រកាន់​ជំហរ​របស់​ខ្ញុំ​ជានិច្ច​ថា​អំពើ​ហិង្សា​នេះ​គឺជា​ចេតនា​របស់​រោងចក្រ​​១០០%​។​ ហើយ​នៅថ្ងៃ​ស្អែកនេះ​ យើងនឹង​ធ្វើការ​ដង្ហែ​ក្បួនទៅ​កាន់​​តុលា​ការ​ក្រុង និង​ស្ថានទូត​កូរ៉េ​ដើម្បី​ស្វែ​ង​រក​យុត្តិ​ធម៌»​។

មន្រ្តី​របស់​ក្រុម​ហ៊ុនបាន​និយាយ​ថា ​នឹង​មាន​ការចរ​ចា​មួយនៅ​ថ្ងៃ​ចន្ទនេះ​ជាមួយ​នឹង​សហជីព៕

អត្ថបទគួរចាប់អារម្មណ៍