The Phnom Penh Post Search

Search form

Logo of Phnom Penh Post newspaper Phnom Penh Post - ក្រុម​អ្នក​រត់​ម៉ូតូ​ឌុប​&​ក្រុម​ស្ត្រី​បឹងកក់​ប៉ះ​ទង្គិច​សម្តី​គ្នា

ក្រុម​អ្នក​រត់​ម៉ូតូ​ឌុប​&​ក្រុម​ស្ត្រី​បឹងកក់​ប៉ះ​ទង្គិច​សម្តី​គ្នា

ក្រុម​អ្នក​រត់​ម៉ូតូ​ឌុប​&​ក្រុម​ស្ត្រី​បឹងកក់​ប៉ះ​ទង្គិច​សម្តី​គ្នា

ភ្នំពេញៈ ក្រុម​អ្នក​រត់​ម៉ូតូ​ឌុប និង​ក្រុម​ស្ត្រី​មក​ពី​សហគមន៍​បឹង​កក់ កាល​ពី​ម្សិលមិញ បាន​ប៉ះ​ទង្គិច​ពាក្យ​សម្ដី​គ្នា​នៅ​មុខ​ការិយាល័យ​ឧត្តម​ស្នង​ការ​អង្គការ​សហ​ប្រជាជាតិ​ទទួល​បន្ទុក​សិទ្ធិ​មនុស្ស​ប្រចាំ​កម្ពុជា។

ការ​ប៉ះ​ទង្គិច​ពាក្យ​សម្ដី​គ្នា​នេះ​កើត​ឡើង​ខណៈ​ភាគី​ទាំង​ពីរ​នាំ​គ្នា​ទៅ​ដាក់​ញត្តិ​សុំ​លោក សូរិយា ស៊ូប៊ែរឌី តំណាង​ពិសេស​អគ្គ​លេខាធិការ​អង្គការ​សហ​ប្រជាជាតិ​ជួយ​អន្តរាគមន៍ ជំរុញ​ឲ្យ​រដ្ឋាភិបាល​ផ្ដល់​ដំណោះស្រាយ ប្រកប​ដោយ​ភាព​យុត្តិធម៌។

ក្រុម​អ្នក​រត់​ម៉ូតូ​ឌុប ប្រមាណ​៥០​នាក់ ដឹក​នាំ​ដោយ​លោក ឯ សុភាស់ ប្រធាន​សមាគម​អ្នក​រួប​រួម​ដើម្បី​អភិវឌ្ឍន៍​កម្ពុជា​បាន​ចោទ​ទៅ​លើ​ក្រុម​ស្ត្រី​បឹងកក់​ថា កំពុង​ព្យាយាម​បំភ្លៃ​ការ​ពិត​ជុំវិញ​ករណី​ជម្លោះ​រវាង​អ្នក​ស្រី​យ៉ោម បុប្ផា និង​សមាជិក​ក្រុម​អ្នក​រត់​ម៉ូតូ​ឌុប​ពី​ករណី​បង្ក​ហិង្សា​ដោយ​ចេតនា​ឲ្យ​ទៅ​ជា​ករណី​ដី​ធ្លី​ធ្វើ​ឲ្យ​មតិ​ជាតិ​និង​អន្តរជាតិ​យល់​ច្រឡំ​លើ​ការ​អនុវត្ត​ច្បាប់​របស់​មន្ត្រី​រដ្ឋាភិបាល។

ចំណែក​ក្រុម​ស្ត្រី​នៃ​សហគមន៍​បឹងកក់ ប្រមាណ​ជា​១០​នាក់ ដឹក​នាំ​ដោយ​អ្នក​ស្រី ទេព វន្នី បាន​ចោទ​ក្រុម​អ្នក​រត់​ម៉ូតូ​ឌុប​ថា លក់​ឧត្តមគតិ​ឲ្យ​បុគ្គល​អាក្រក់​មួយ​ចំនួន នៅ​ក្នុង​ជួរ​រដ្ឋាភិបាល មក​មួល​បង្កាច់​និង​ដាក់​កំហុស​លើ​សមាជិក​គាត់​និង​ដាក់​ការ​គំរាម​កំហែង​បន្ថែម​ក្នុង​គោល​បំណង​បង្ខំ​ឲ្យ​បញ្ឈប់​ការ​តវ៉ា​ប្រឆាំង​នឹង​ការ​រំលោភ​សិទ្ធិ​និង​ដីធ្លី​ពួក​គេ។

ក្រោយ​ពី​ដាក់​ញត្តិ​ជូន​លោក សូរិយា ស៊ូប៊ែរឌី ផ្ទាល់​ដៃ​រួច​មក លោក ឯ សុភាស់ បាន​និយាយ​ថា លោក ស៊ូប៊ែរឌី បាន​សន្យា​ថា​នឹង​ពិនិត្យ​សិក្សា​ស្វែង​យល់ ពី​សាវតា​នៃ​វិវាទ​រវាង​ភាគី​អ្នក​រត់​ម៉ូតូ​ឌុប និង​អ្នក​ស្រី​យ៉ោម បុប្ផា។

លោក​ថា​៖​«​ខ្ញុំ​ពិត​ជា​រីករាយ​ដែល​លោក ស៊ូប៊ែរឌី បាន​ទទួល​យក​ញត្តិ​ពី​ខ្ញុំ​ផ្ទាល់​ដៃ​និង​បាន​សន្យា​ពិនិត្យ​លើ​ករណី​នេះ»។

តំណាង ស្ត្រី​នៃ​សហគមន៍​បឹង​កក់ អ្នក​ស្រី​ទេព វន្នី បាន​និយាយ​ថា លោក ស៊ូប៊ែរឌី ក៏​បាន​សន្យា​ថា​នឹង​លើក​យក​បញ្ហា​វិវាទ​ដី​ធ្លី​ទាំង​អស់​នៅ​ប្រទេស​កម្ពុជា​ទៅ​ជំរុញ​ឲ្យ​ប្រមុខ​រដ្ឋាភិបាល​ធ្វើ​ការ​ដោះស្រាយ​ប្រកប​ដោយ​តម្លាភាព និង​សមភាព។

ដោយ​ឡែក​នៅ​មុខ​សាលា​រាជធានី​ភ្នំពេញ ពលរដ្ឋ​ជាង​១០០​នាក់ មក​ពី​សហគមន៍​ក្រីក្រ​ចំនួន ៦ ដែល​មាន​វិវាទ​ដីធ្លី​ដ៏​រ៉ាំ​រ៉ៃ បាន​ផ្ដុំ​គ្នា​សា​ជា​ថ្មី​ជំរុញ​ឲ្យ​អាជ្ញាធរ​ធ្វើ​ការ​ដោះស្រាយ​បញ្ហា​ពួក​គាត់​ឲ្យ​បាន​មុន​ការ​បោះឆ្នោត។

ក្រុម​អ្នក​តវ៉ា​ទាំង​នោះ​ក៏​បាន​ព្រមាន​ថា​នឹង​លើក​គ្នា​មក​បោះតង់​ស្នាក់​នៅ​លើ​ចិញ្ចើម​ផ្លូវ​មុខ​សាលា​ក្រុង​នៅ​សប្តាហ៍​ក្រោយ​នេះ​បើ​អាជ្ញាធរ​មិន​ដោះស្រាយ​តាម​ការ​សន្យា។ ការ​ព្រមាន​នេះ​ធ្វើ​ឡើង​បន្ទាប់​ពី​លោក កើត ឆែ នាយក​រដ្ឋបាល​សាលា​រាជធានី​ចេញ​មក​ទទួល​យក​ញត្តិ​ពី​ពួក​គាត់​និង​សន្យា​ថា នឹង​ផ្ដល់​ព័ត៌មាន​ពី​ការ​សម្រេច​របស់​លោក​អភិបាល​រាជធានី​ទៅ​ពួក​គាត់​នៅ​ក្នុង​សប្តាហ៍​ក្រោយ៕

អត្ថបទគួរចាប់អារម្មណ៍