.jpg)
អង្គការអន្តរជាតិចំនួន ២ ក្រោមការគាំទ្រពីរដ្ឋាភិបាល ប្រកាសដំណើរការកម្មវិធីផ្ដល់អាហារតាមសាលារៀនឡើងវិញ ដើម្បីចូលរួមកាត់បន្ថយភាពអត់ឃ្លាន។ រូបថត សហការី
អង្គការអន្តរជាតិចំនួន ២ ក្រោមការគាំទ្រពីរដ្ឋាភិបាល ប្រកាសដំណើរការកម្មវិធីផ្ដល់អាហារតាមសាលារៀនឡើងវិញ ដើម្បីចូលរួមកាត់បន្ថយភាពអត់ឃ្លាន ដែលជាការលើកទឹកចិត្តដ៏មានឥទ្ធិពលសម្រាប់ឲ្យកុមារវិលត្រឡប់មកសាលារៀនវិញ បន្ទាប់ពីកម្មវិធីនេះ ត្រូវបានអាក់ខានមួយរយៈ ដោយសារជំងឺកូវីដ ១៩។
សេចក្ដីប្រកាសព័ត៌មានរួមរបស់អង្គការយូនីសេហ្វ និងអង្គការកម្មវិធីស្បៀងអាហារពិភពលោក ចេញផ្សាយនៅថ្ងៃទី ៨ កុម្ភៈ បានឲ្យដឹងថា នៅកម្ពុជាកុមារប្រមាណ ២៨ ម៉ឺននាក់ ដែលរៀននៅសាលាចំនួន ១ ១១៣ កន្លែង នៅខេត្តចំនួន ១០ ខកខានពុំបានទទួលអាហារប្រកបដោយអាហារូបត្ថម្ភ ដែលផ្ដល់ដោយមិនគិតថ្លៃឱ្យពួកគេនៅសាលារៀន ក្នុងអំឡុងពេលមានការបិទសាលានៅទូទាំងប្រទេស ដើម្បីទប់ស្កាត់ការឆ្លងរាលដាលជំងឺកូវីដ ១៩។
សេចក្តីប្រកាសបញ្ជាក់ថា៖ «ជាភ័ព្វសំណាង កម្មវិធីផ្ដល់អាហារតាមសាលារៀន បានចាប់ផ្ដើមដំណើរការឡើងវិញ ទន្ទឹមពេលដែលសាលារៀននៅកម្ពុជាបានបើកដំណើរការជាថ្មី កាលពីដើមខែនេះ ដោយកម្មវិធីនេះនឹងត្រូវចាប់ផ្ដើមជាដំណាក់កាលៗ នៅគ្រប់សាលារៀនទាំងអស់ ដែលកំពុងអនុវត្តកម្មវិធីផ្ដល់អាហារ ក្រោមការគាំទ្រពីរាជរដ្ឋាបាល និងកម្មវិធីស្បៀងអាហារពិភពលោកនៅត្រឹមខែមីនា ឆ្នាំ ២០២១»។
លោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំកម្ពុជា ក៏បានលើកឡើងក្នុងសេចក្តីប្រកាសរួមដែរថា បច្ចុប្បន្នសាលារៀនបើកដំណើរការជាថ្មី ដូច្នេះវាជាការសំខាន់ណាស់ ដែលកម្មវិធីគាំទ្រអាហារូបត្ថម្ភនៅតាមសាលារៀន ត្រូវបានដំណើរការឡើងវិញផងដែរ។
ខណៈការអនុវត្តវិធានការកាត់បន្ថយហានិភ័យជំងឺកូវីដ ១៩ គួរតែនៅបន្តធ្វើ លោកស្រីបន្តថា សាលារៀនជាកន្លែងផ្ដល់នូវឱកាសប្រសើរបំផុតសម្រាប់ជួយដល់កុមារ។ ជាពិសេសកុមារតូចៗ ដើម្បីឱ្យពួកគេមានទម្លាប់ញ៉ាំអាហារ ដែលជួយទ្រទ្រង់សុខភាពឱ្យបានមាំមួន ដែលទម្លាប់បែបនេះអាចនៅជាមួយពួកគេពេញមួយជីវិត។
លោកស្រីបញ្ជាក់ថា៖ «ការអប់រំអំពីអាហារូបត្ថម្ភ និងការផ្ដល់អាហារនៅតាមសាលារៀន គឺជាឧបករណ៍ដ៏មានប្រសិទ្ធភាព ដើម្បីជួយឲ្យកុមារមានសុខភាពមាំមួននិងរៀនសូត្រកាន់តែពូកែ»។
ទិន្នន័យបានពីការវាយតម្លៃរួមគ្នាលើតម្រូវការអប់រំក្នុងអំឡុងពេលមានកូវីដ ១៩ នៅកម្ពុជាក្នុងឆ្នាំ ២០២០ ដែលរៀបចំដោយក្រសួងអប់រំយុវជន និងកីឡា និងក្រុមការងារវិស័យអប់រំ បានបង្ហាញថា បច្ចុប្បន្ននេះ កុមារ ៤០% ញុំាអាហារប្រចាំថ្ងៃក្នុងបរិមាណតិចជាងមុន បើធៀបនឹងមុនពេលមានការឆ្លងរាលដាលនៃជំងឺនេះ។ ក្នុងចំណោមកុមារទាំងនេះ មានជាង ៥០% មកពីគ្រួសារមានជីវភាពក្រីក្រ និងជាអ្នកពឹងផ្អែកលើប្រព័ន្ធគាំពារសង្គម។
ដោយឡែក ការសិក្សាវាយតម្លៃលើផលប៉ះពាល់ផ្នែកសង្គមសេដ្ឋកិច្ចបង្កឡើងដោយជំងឺកូវីដ ១៩ នៅកម្ពុជារបស់អង្គការសហប្រជាជាតិក៏បានបង្ហាញដែរថា បើទោះជាភាពអាចមាន ឬរកបានស្បៀង ពុំបានទទួលរងផលប៉ះពាល់ធំដុំក៏ដោយ ក៏ប្រជាពលរដ្ឋជាច្រើននាក់ ត្រូវបានកាលៈទេសៈសេដ្ឋកិច្ចបង្ខំឲ្យប្រើប្រាស់យុទ្ធស្រាស្ត្រទប់ទល់ផ្សេងៗ។ ទាំងនោះ ដូចជាខ្ចីអាហារពីអ្នកដទៃ កាត់បន្ថយបរិមាណអាហារបរិភោគ និងពឹងអាស្រ័យខ្លាំងជាងមុនលើជម្រើសអាហារមានតម្លៃថោក និងមិនសូវមានអាហារូបត្ថម្ភ។
លោកស្រី ក្លែរ ខូណាន់ តំណាង និងជានាយិកាអង្គការស្បៀងអាហារពិភពលោកប្រចាំកម្ពុជាបានកត់សម្គាល់ថា កម្មវិធីសុខភាព និងអាហារូបត្ថម្ភ ដែលអនុវត្តនៅតាមសាលារៀន បានកាត់បន្ថយភាពអត់ឃ្លាន និងជាការលើកទឹកចិត្តដ៏មានឥទ្ធិពល ដើម្បីឱ្យកុមារវិលត្រឡប់មកសាលារៀនវិញ។
លោកស្រីបន្ថែមថា៖ «កម្មវិធីនេះកាន់តែមានលក្ខណៈពិសេសទៅទៀត សម្រាប់កុមារងាយរងគ្រោះ ដែលភាគច្រើនពឹងអាស្រ័យលើអាហារដែលផ្ដល់នៅតាមសាលារៀន និងមានជម្រើសសិក្សានៅផ្ទះតិចតួច»។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា ប្រាប់ ភ្នំពេញ ប៉ុស្តិ៍ នៅថ្ងៃនេះថា ជាទូទៅក្រសួងអប់រំ យល់ឃើញថា ការលើកកម្ពស់អាហារូបត្ថម្ភរបស់សិស្សានុសិស្ស ជាពិសេសសិស្សដែលស្ថិតក្នុងកម្រិតបឋមសិក្សា គឺជាតួនាទីសំខាន់មួយក្នុងការលើកកម្ពស់គុណភាពនៃការអប់រំ។
លោកបន្តថា ក្រសួងគាំទ្រ និងបន្តកិច្ចសហការជាមួយបណ្តាអង្គការពាក់ព័ន្ធ ដើម្បីលើកកម្ពស់អាហារូបត្ថម្ភរបស់សិស្សានុសិស្ស ក្នុងន័យលើកកម្ពស់ការរៀនសូត្ររបស់គាត់។
លោកថ្លែងថា៖ «ជាជំហានបន្តបន្ទាប់ ក្រសួងអប់រំ នឹងបន្តពង្រីកវិសាលភាពក្នុងការផ្គត់ផ្គង់អាហារូបត្ថម្ភ ជូនដល់សិស្សានុសិស្សនៅតាមសាលាគោលដៅជាជំហានបន្តបន្ទាប់។ យើងសូមស្វាគមន៍កិច្ចសហការណ៍បន្តទៀត ពីគ្រប់ភាគីពាក់ព័ន្ធ នៅក្នុងការលើកកម្ពស់គុណភាពអាហារូបត្ថម្ភ ដើម្បីចូលរួមលើកកម្ពស់គុណភាពអប់រំរបស់សិស្ស»។
នៅទូទាំងសកលលោក ការផ្ដល់អាហារនៅតាមសាលារៀនប្រមាណជាង ៣៩ ប៊ីលានដង ត្រូវបានអាក់ខាន ចាប់តាំងពីមានការឆ្លងរាលដាលជាសកលនៃជំងឺកូវីដ ១៩ ព្រោះសាលារៀនត្រូវបិទទ្វារ។
បន្ថែមពីនេះ ចំពោះកុមារ ៣៧០ លាននាក់នៅលើសកលលោក ដែលភាគច្រើនពឹងអាស្រ័យលើអាហារផ្ដល់នៅតាមសាលារៀន សម្រាប់ជាប្រភពអាហារូបត្ថម្ភដ៏សំខាន់ប្រចាំថ្ងៃរបស់ពួកគេ គិតជាមធ្យម បានខកខានពុំបានទទួលអាហារ ៤០% នៃចំនួនអាហារដែលផ្ដល់ឲ្យពួកគេនៅសាលារៀន ដោយសារកត្តារារាំងបង្កដោយជំងឺកូវីដ ១៩ ដែលនាំឱ្យមានការបិទសាលារៀន។
នេះបើតាមរបាយការណ៍ថ្មីមួយដែលចេញផ្សាយដោយការិយាល័យស្រាវជ្រាវ Innocenti របស់យូនីសេហ្វ និងកម្មវិធីស្បៀងអាហារពិភពលោក៕
