.jpg)
ក្រុមអ្នកសារព័ត៌មានកំពុងចុះយកព័ត៌មាននៅក្នុងសន្និសីទកាសែតមួយ កាលពីថ្ងៃទី ២៨ មេសា សប្តាហ៍នេះ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ ក្នុងទិវាសេរីភាពសារព័ត៌មានពិភពលោក ៣ ឧសភា ក្លិបអ្នកកាសែតកម្ពុជា(ក.អ.ក) បានចេញសារលិខិតអំពាវនាវដល់អ្នកសារព័ត៌មានឱ្យបន្តផ្សព្វផ្សាយនូវព័ត៌មានពិតនិងមានវិជ្ជាជីវៈ ដើម្បីបម្រើដល់មហាជន។
សារលិខិតរបស់ ក.អ.ក នៅថ្ងៃទី ២ ខែឧសភា នេះបានលើកឡើងថា៖ «ក.អ.ក សូមជំរុញលើកទឹកចិត្តដល់អ្នកសារព័ត៌មានគ្រប់រូបសូមបន្តបេសកកម្មរបស់ខ្លួន ដើម្បីបម្រើមហាជនបន្តទៀតដោយពាំនាំព័ត៌មានពិត ព័ត៌មានប្រកបដោយវិជ្ជាជីវៈនិងការទទួលខុសត្រូវជូនដល់មហាជន»។
សម្រាប់ទិវាសេរីភាពសារព័ត៌មានពិភពលោកនៅឆ្នាំនេះ បានយកប្រធានបទ «ព័ត៌មានដែលជាប្រយោជន៍សាធារណៈ»ដោយដើរតួនាទីជាការអំពាវនាវ ដើម្បីបញ្ជាក់ពីសារៈសំខាន់នៃគុណតម្លៃព័ត៌មានដែលជាប្រយោជន៍សាធារណៈ និង ការស្វែងរកអ្វីដែលអាចធ្វើបានក្នុងការផលិត ការចែកចាយ និង ការទទួលយកខ្លឹមសារព័ត៌មានដើម្បីពង្រឹងសារព័ត៌មាន និង ដើម្បីលើកកម្ពស់តម្លាភាពនិងការផ្តល់សិទ្ធិអំណាចដោយមិនទុកនរណាម្នាក់ចោល។
ជាមួយនេះដែរ ក.អ.ក អំពាវនាវឱ្យអាជ្ញាធរពាក់ព័ន្ធបន្តនូវកិច្ចសហការល្អនិងការសម្របសម្រួលដើម្បីឱ្យអ្នកសារព័ត៌មានអាចបំពេញការងារបានក្នុងកាលៈទេសៈដ៏លំបាកនៃការរាតត្បាតជំងឺកូវីដ១៩។
ក.អ.ក លើកឡើងថា សារព័ត៌មានពិតជាដើរតួនាទីយ៉ាងសំខាន់នៅក្នុងកាលៈទេសៈ ដ៏លំបាកនេះ។ សារព័ត៌មានមិនត្រឹមតែជាអ្នកនាំសារពីថ្នាក់ដឹកនាំប្រាប់ដល់មហាជននិងពីមហាជនប្រាបដល់ថ្នាក់ដឹកនាំបានយ៉ាងលឿនរហ័សប៉ុណ្ណោះទេ ប៉ុន្តែក៏បានដើរតួនាទីជាអ្នកផ្សព្វផ្សាយសារអប់រំនានាដល់មហាជនក្នុងការបង្ការទប់ស្កាត់ការឆ្លងរាលដាលនៃជំងឺកូវីដ១៩ ផងដែរ។
ក.អ.ក បញ្ជាក់ថា៖ «សារព័ត៌មានក៏បានដើរតួនាទីជាអ្នកបន្សាបព័ត៌មានក្លែងក្លាយដែលកើតមានយ៉ាងច្រើនក្នុងអំឡុងពេលនៃការរាតត្បាតនៃជំងឺកូវីដ១៩»។
អង្គការ យូណេស្កូ និងរដ្ឋាភិបាលនៃប្រទេស ណាមីប៊ី បានរៀបចំសន្និសីទពិភពលោកនៃទិវាសេរីភាពសារព័ត៌មានពិភពលោកនៅទីក្រុង Windhoek ចាប់ពីថ្ងៃទី២៩ ខែមេសាដល់ថ្ងៃទី៣ ឧសភា។
អ្នកសារព័ត៌មានអាជីពនិងអ្នកពាក់ព័ន្ធប្រព័ន្ធផ្សព្វផ្សាយផ្សេងទៀតនៅក្នុងសន្និសីទនេះនឹងអំពាវនាវឱ្យមានវិធានការជាបន្ទាន់ដើម្បីប្រយុទ្ធប្រឆាំងនឹងការគំរាមកំហែងនានាដែលកំពុងធ្វើឱ្យប្រព័ន្ធផ្សព្វផ្សាយព័ត៌មានឯករាជ្យនិងក្នុងស្រុកចុះខ្សោយនៅជុំវិញពិភពលោកដែលជាវិបត្តិញាំញីដោយការរាតត្បាតជំងឺកូវីដ១៩។
ពួកគេនឹងដាក់ចេញនូវដំណោះស្រាយដើម្បីពង្រឹងស្ថិរភាពនៃប្រព័ន្ធផ្សព្វផ្សាយជំរុញឱ្យកាន់តែមានតម្លាភាពពីក្រុមហ៊ុនប្រព័ន្ធផ្សព្វផ្សាយសង្គមនិងវិធានការដើម្បីលើកកម្ពស់សុវត្ថិភាពអ្នកសារព័ត៌មាននិងគាំទ្រប្រព័ន្ធផ្សព្វផ្សាយឯករាជ្យ។
នៅថ្ងៃទី២ ខែឧសភា នេះដែរ សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) ក៏បានចេញសេចក្តីថ្លែងការណ៍មួយផងដែរ ដោយអះអាងថា សេរីភាពព័ត៌មាននិងសិទ្ធិបញ្ចេញមតិ គឺពិតជាមានសារៈសំខាន់ក្នុងដំណើរការប្រជាធិបតេយ្យនិងការអភិវឌ្ឍសង្គមជាតិ។មានសំឡេងខ្លះមិនត្រូវបានឮ។ រីឯបញ្ហាខ្លះត្រូវបានលាក់ឬបិទបាំងដែលទាមទារការចូលរួមផ្សព្វផ្សាយឱ្យថ្នាក់ដឹកនាំបានដឹងនិងដោះស្រាយទាន់ពេលវេលា។
សេចក្តីថ្លែងការណ៍នេះបញ្ជាក់ថា៖ «រាល់សកម្មភាពរបស់យើងក៏ត្រូវតែមានស្មារតីផ្សារភ្ជាប់នឹងក្រមសីលធម៌ សុជីវធម៌ និងការទទួលខុសត្រូវជានិច្ចគឺផ្សាយការពិត តែមិនអុជអាល»។
ស.ស.ស.ក អំពាវនាវដល់អ្នកសារព័ត៌មានជាតិនិងអ្នកនិយមប្រើប្រាស់បណ្តាញសង្គមបន្តអនុវត្តនូវប្រសាសន៍របស់លោកនាយករដ្ឋមន្ត្រី ហ៊ុន សែន គឺ «អ្នកសារព័ត៌មាន៖ កុំបំពានសិទ្ធិអ្នកដទៃ កុំបំភ្លៃការពិត»៕
