ភ្នំពេញៈ កម្មករប្រមាណ ៥០ នាក់នៃការដ្ឋានសាងសង់អគារ D&C Mall ដែលមានទីតាំងនៅមជ្ឈមណ្ឌលទួលគោកចាស់តាមបណ្ដោយផ្លូវ ៣១៣ ក្នុងសង្កាត់បឹងកក់ ២ ខណ្ឌទួលគោក រាជធានីភ្នំពេញ បានតវ៉ាទាមទារប្រាក់ខែ បន្ទាប់ពីក្រុមហ៊ុនអាក់ខាន បើកប្រាក់ខែដល់ពួកគាត់អស់រយៈពេល ៣ ខែកន្លងមក។
លោក រឿន ចាន់ មេការកម្មករនៃការដ្ឋានសំណង់អគារ D&C Mall ដែលចូលរួមក្នុងការតវ៉ានេះប្រាប់ភ្នំពេញប៉ុស្តិ៍ ពីម្សិលមិញថា មុនពេលឈានដល់ផ្ទុះការតវ៉ាទាមទារប្រាក់ខែនេះទាំងកម្មករ និងអ្នកម៉ៅការសាងសង់ បានផ្ដល់ការអនុគ្រោះជាច្រើនលើកដល់ម្ចាស់គម្រោងនៃសំណង់អគារពាណិជ្ជកម្មដ៏ធំមួយនេះ។ ប៉ុន្តែម្ចាស់គម្រោងម្ដងហើយម្ដងទៀតបានយកបញ្ហារីករាលដាលនៃជំងឺកូវីដ១៩ជាលេសក្នុងការពន្យារ ពេលបើកប្រាក់ខែដល់ពួកគាត់។
លោកបញ្ជាក់ថា៖ «១ ខែ ២ ខែកន្លងទៅនេះពួកយើងបានស៊ូទ្រាំធ្វើការងារទាំងស៊ីអត់ស៊ីឃ្លាន ព្រោះតែជឿលើសម្ដីរបស់ម្ចាស់គម្រោងអគារនេះដែលអះអាងថាដោយសាតែបញ្ហាជំងឺកូវីដ ១៩ ក្រុមហ៊ុនបានជួបប្រឈមបញ្ហាហិរញ្ញវត្ថុមួយចំនួនដែលធ្វើឲ្យការបើកប្រាក់បៀវត្សរ៍ដល់កម្មករមានភាពយឺតយ៉ាវ»។
បុរសរូបនេះបន្ថែមថា៖ «ហើយសន្យាថានឹងបើកប្រាក់បៀវត្សរ៍ដល់ពួកយើងក្នុងពេលឆាប់ៗនេះ ប៉ុន្តែមកទល់ពេលនេះគឺរយៈពេល ៣ ខែហើយ ដែលម្ចាស់គម្រោងនៅមិនទាន់បានបើកប្រាក់ខែដល់ពួកយើង សូម្បីតែ ១ រៀល»។
បើតាមលោក រឿន ចាន់ សំណង់ អគារពាណិជ្ជកម្មនេះសាងសង់បាន ៩០ ភាគរយហើយ និងគ្រោងសាងសង់ឲ្យហើយរួចរាល់ក្នុងរយៈពេល ២-៣ ខែខាងមុខនេះ។
អ្នកស្រី ទ្រី អ៊ីនាង តំណាងកម្មករសំណង់នៃការដ្ឋានសាងសង់អគារ ពាណិជ្ជកម្ម D&C Mall ប្រាប់ថា ប្រាក់ឈ្នួលកម្មករធ្វើការក្នុងការដ្ឋាននេះក្នុង ១ ថ្ងៃចន្លោះពី ៩-១៥ ដុល្លារ អាស្រ័យលើជំនាញរបស់កម្មករម្នាក់ៗ លើកលែងតែធ្វើការនៅថ្ងៃឈប់សម្រាក និងថ្ងៃបុណ្យជាតិប្រាក់ឈ្នួលត្រូវគុណនឹង ២។
អ្នកស្រីនិយាយថា៖ «នៅពេលនេះកម្មករភាគច្រើនស្ទើរតែដាច់បាយទៅហើយ ដោយសារតែម្ចាស់គម្រោងសាងសង់អគារនេះ មិនបើកប្រាក់ឲ្យអ្នកម៉ៅការសាងសង់ទៅតាមកិច្ចសន្យាការងារ ដែលធ្វើឲ្យអ្នកម៉ៅការសាងសង់គ្មានប្រាក់បើកឲ្យកម្មករ»។
អ្នកស្រីថា៖ «ឥឡូវនេះបងប្អូនកម្មករយើងគ្រប់ផ្នែកបានឯកភាពគ្នាថា នឹងមិនធ្វើការទេ រហូតមានដំណោះស្រាយបើកប្រាក់ឈ្នួលការងារសម្រាប់ពួកយើងក្នុងរយៈពេល ៣ ខែនេះជាមុនសិន»។
លោក តែ ប៊ុនហ៊ួរ អ្នកគ្រប់គ្រងការដ្ឋានសំណង់អគារ D&C Mall ប្រាប់ថា ភាគីម្ចាស់គម្រោងនៅមិនទាន់ឆ្លើយតបសំណើរបស់កម្មករនៅឡើយទេ។ អាជ្ញាធរខណ្ឌទួលគោកនៅថ្ងៃទី ១៥ មិថុនា បានចុះប្រាប់ឲ្យកម្មករធ្វើពាក្យបណ្ដឹង៕