.jpg)
មណ្ឌលគិរីៈ រដ្ឋបាលខេត្ដមណ្ឌលគិរី បានចេញលិខិតបដិសេធចំពោះព័ត៌មានដែលថាលោកអភិបាលខេត្ដនេះបានអនុញ្ញាតឲ្យមានការដឹកឈើចេញទៅវៀតណាម កាលពីថ្ងៃអង្គារទី ១៤ ខែសីហា បន្ទាប់ឈើប្រមាណជាង ៥០០ ដុំត្រូវបានអាវុធហត្ថខេត្ដក្រចេះសហការជាមួយអាវុធហត្ថលើផ្ទៃប្រទេស បានរកឃើញ កាលពីថ្ងៃទី ១៣ ខែសីហា នៅតំបន់ភ្នំព្រេច ស្រុកកែវសីមា ខេត្ដមណ្ឌលគិរី ជាអ្វីដែលសកម្មជនព្រៃឈើថាជាការពារដល់ឈ្មួញទុច្ចរិត។
លិខិតបដិសេធនេះបានបង្ហាញថា រយៈពេលប៉ុន្មានថ្ងៃនេះមានការផ្សព្វផ្សាយថា លោកអភិបាលខេត្ដមណ្ឌលគិរី អនុញ្ញាតឲ្យមានការចេញឈើទៅប្រទេសវៀតណាមតាមច្រកទ្វារព្រំដែនទ្វេភាគីដាក់ដាំនិងឲ្យឧកញ៉ា៣រូបរៀបចំដឹកឈើតាមរថយន្ដប៉ាកុងក្នុងតំបន់ភ្នំព្រេចដឹកទៅប្រទេសវៀតណាម។
លិខិតនេះបានអះអាងថា៖«អ្នកនាំពាក្យរដ្ឋបាលខេត្ដសូមធ្វើការបដិសេធទាំងស្រុងចំពោះព័ត៌មានមិនពិតនេះ។ រដ្ឋបាលខេត្ដមានអង្គភាពជំនាញជាជំនួយការ ដូច្នេះរាល់បាតុភាពទាំងឡាយដែលកើតមានឡើង ខេត្ដតែងតែដាក់បញ្ជាយ៉ាងម៉ឺងម៉ាត់ដល់កម្លាំងប្រដាប់អាវុធក៏ដូចជាជំនាញពាក់ព័ន្ធចុះប្រតិបត្ដិការជាប្រចាំ មិនអនុញ្ញាតឲ្យមានបទល្មើសកើតឡើងនោះទេ»។
លោក កែវ សុភ័ក្ត្រ ប្រធានមន្ទីរបរិស្ថាន ខេត្តមណ្ឌលគិរី ប្រាប់ភ្នំពេញបុ៉ស្ដិ៍ថា អាវុធហត្ថខេត្ដក្រចេះសហការជាមួយអាវុធហត្ថលើផ្ទៃប្រទេសបានចុះស្រាវជ្រាវបង្ក្រាបបទល្មើសធនធានធម្មជាតិក្នុងដែនជម្រកសត្វព្រៃភ្នំព្រេចស្ថិតក្នុងស្រុកកែវសីមាដែលមានឈើប្រមាណជាង៥០០ដុំ(សុក្រំ កកោះ ស្រឡៅ) ប៉ុន្ដែនៅមិនទាន់អាចកំណត់មុខសញ្ញាជនល្មើសបាននៅឡើយទេ។
លោកបានថ្លែងថា៖«យើងកំពុងពិនិត្យមើល ព្រោះមានឈើមួយចំនួនស្ថិតនៅតាមផ្លូវមិនមានពាក់ព័ន្ធជាមួយក្រុមហ៊ុន ប៉ុន្តែយើងកំពុងពិនិត្យមើលបន្ថែមចំពោះឈើមួយចំនួនទៀតដែលស្ថិតនៅក្នុងទីតាំងណាដើម្បីអាចកំណត់មុខសញ្ញាបាន»។
លោក សាន្ត ប៊ុនថាន មេបញ្ជាការកងរាជអាវុធហត្ថខេត្ដក្រចេះដែលបានសហការចុះស្រាវជ្រាវនិងបង្ក្រាបបទល្មើសនេះបានឲ្យដឹងថា ករណីនេះលោកបាននាំកងកម្លាំងចុះបង្ក្រាបទីតាំងខាងលើតាំងពីល្ងាចថ្ងៃទី១៣ ខែសីហាមកម៉្លេះ។
លោកបន្ថែមថា៖«យើងបង្ក្រាបបានតាំងពីថ្ងៃចន្ទម៉្លេះប៉ុន្ដែខ្ញុំបានបញ្ជូនរបាយការណ៍ទៅអ្នកនាំពាក្យផ្ទៃប្រទេសហើយ»។
លោក អ៊ូច ឡេង សកម្មជនព្រៃឈើដ៏ល្បីបានបង្ហាញនូវក្តីព្រួយបារម្ភយ៉ាងខ្លាំងអំពីវិនាសកម្មព្រៃឈើដែលកាន់តែរីកធំទៅៗដោយលោកជឿថា ប្រាកដជាមានករណីបទល្មើសព្រៃឈើនៅតំបន់ភ្នំព្រេចនិងកំពុងប្រឈមនឹងគម្រោងកម្ទេចទាំងស្រុងរបស់ឧកញ៉ាជាច្រើននាពេលបច្ចុប្បន្ន។
លោកបានអះអាងថា៖«ខ្ញុំហ៊ានអះអាងថាពិតជាមានករណីកាប់ឈើកើតឡើងនៅតំបន់ភ្នំព្រេចនេះមែន ហើយបើតាមខ្ញុំដឹងគេមានគោលនយោបាយដើម្បីកម្ទេចព្រៃនៅតំបន់ភ្នំព្រេចជាង១០ម៉ឺនហិកតានោះឲ្យអស់តែម្ដង។ ដោយមិនមែនមានត្រឹមតែឧកញ៉ា៣ទេគឺមានឧកញ៉ា ៥-៦ ឯនោះកាលពីដើមឡើយ»។
លោកបានបន្ដថា៖«នៅតំបន់ភ្នំព្រេចនេះបើតាមខ្ញុំដឹងក្នុង១ថ្ងៃយ៉ាងហោចណាស់ក៏មានដឹកឈើចេញ៨០-៩០ឡានដែរ នេះបើតាមខ្ញុំដឹង។ ចុះបើនៅកន្លែងយើងមិនដឹងទៀតគិតយ៉ាងម៉េចដែលបានដឹកចេញទៅតាមច្រកផ្សេងៗទៀត អាចមានជាង១០០ឡានអី ក្នុង១ថ្ងៃ ហើយក្នុង១ឡានមានទម្ងន់ជាង១០០តោនឯណោះ»។
ទាក់ទិននឹងការបដិសេធរបស់រដ្ឋបាលខេត្ដមណ្ឌលគិរីចំពោះករណីដឹកឈើយ៉ាងគំហុក នេះ លោក អ៊ូច ឡេង បានថ្លែងថា បើអាជ្ញាធរបដិសេធចំពោះព័ត៌មានដែលកើតឡើងនេះមានន័យថាជាការថ្លែងការណ៍ដើម្បីការពារឈ្នួញឈើទាំងនោះហើយ។
លោកបញ្ជាក់ថា៖«បើខេត្តបដិសេធពីដំណឹងអ៊ីចឹងគឺគាត់ថ្លែងការពារឈ្មួញរកស៊ីឈើទាំងនោះហើយ។ ក្នុងនាមជាខ្មែរដូចគ្នាទោះបីជាអភិបាលខេត្ដឬឧកញ៉ាណាក៏ដោយដើម្បីប្រយោជន៍ជាតិត្រូវតែហ៊ានបង្ហាញនូវការពិត»។
ភ្នំពេញបុស្ដិ៍មិនអាចសុំការបកស្រាយបន្ថែម ពីលោក ស្វាយ សំអៀង អភិបាលខេត្ដមណ្ឌលគិរីបានទេដោយលោកបានលើកទូរស័ព្ទ ហើយប្រាប់ថា កំពុងរវល់ប្រជុំកាលថ្ងៃទី១៥សីហានេះ៕
