.jpg)
ទិដ្ឋភាពកម្សាន្តនៅឆ្នេរកែបកាលពីខែមករាឆ្នាំនេះ។ ហ៊ាន រង្សី
កែបៈ រដ្ឋបាលខេត្តកែបបាននិងកំពុងពន្លឿនការរៀបចំផែនទី និងគម្រោងប្លង់រៀបចំកែលម្អតំបន់ឆ្នេរខ្សាច់កម្សាន្តសាធារណៈរបស់ខេត្តប្រវែងប្រមាណ ៣ ០០០ ម៉ែត្របន្ថែម ដែលស្ថិតនៅភូមិថ្មី សង្កាត់ព្រៃធំ និងសង្កាត់កែប ក្រុងកែប សម្រាប់បម្រើដល់ភ្ញៀវទេសចរជាតិ និងអន្តរជាតិ ខណៈឆ្នេរកម្សាន្តបច្ចុប្បន្ននៅខ្លីមិនទាន់ឆ្លើយតបនឹងកំណើនភ្ញៀវទេសចររៀងរាល់ឆ្នាំ។
លោក សោម ពិសិដ្ឋ អភិបាលខេត្តកែបប្រាប់ ភ្នំពេញ ប៉ុស្ដិ៍ កាលពីថ្ងៃ ១៤ មីនាថា រហូតមកទល់ពេលនេះ ការរៀបចំផែនទី និងប្លង់សម្រេចបានប្រមាណ ៧០ ទៅ ៨០ ភាគរយ ហើយអាចនឹងបញ្ចប់នៅមុនចូលឆ្នាំខ្មែរខាងមុខនេះ។ នៅពេលរៀបចំរួចនឹងដាក់ជូនលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រងរៀបចំដែនដីនគរូបនីយកម្ម និងសំណង់ និងជាប្រធានគណៈកម្មាធិការជាតិអភិវឌ្ឍន៍តំបន់ឆ្នេរកម្ពុជាដើម្បីសម្រេច។
លោក សោម ពិសិដ្ឋ បញ្ជាក់ថា បើទោះបីកម្ពុជាកំពុងប្រឈមនឹងវិបត្តិនៃជំងឺកូវីដ ១៩ ក្តី ក៏មិនអាចបន្ទច់បង្អាក់ការរៀបចំផែនទី និងគម្រោងប្លង់រៀបចំអភិវឌ្ឍន៍តំបន់ឆ្នេររបស់ខេត្តកែបនោះដែរ។ ក្នុងផែនការនេះគឺធ្វើយ៉ាងណារៀបចំឱ្យមានសោភណភាព សម្រាប់ទទួលភ្ញៀវទេសចរជាតិ និងអន្តរជាតិ ។
លោក សោម ពិសិដ្ឋ ថ្លែងថា៖ «នៅពេលដែលមានការរៀបចំរួចរាល់ និងមានការសម្រេចពីឯកឧត្តមឧបនាយករដ្ឋមន្ត្រី ជា សុផារ៉ា រដ្ឋបាលខេត្តនឹងបង្ហាញសាធារណៈ ព្រោះនៅពេលដែលរៀបចំរមែងតែងតែចាក់ដីបំពេញ ឬចាក់ដីលុបកន្លែងណាមួយមិនខាន។ អ៊ីចឹងទេការបង្ហាញសាធារណៈនេះយើងដាក់ប៉ានណូបង្ហាញជាសាធារណៈកុំឱ្យមានការសង្ស័យថា វិស័យឯកជនណាមកចាក់ដី គឺធ្វើនេះសំដៅដល់សក្តានុពលឆ្នេររបស់យើងមានកំណើនភ្ញៀវទេសចរ»។
បើតាមលោក សោម ពិសិដ្ឋ ឆ្នេរកម្សាន្តសាធារណៈក្នុងខេត្តកែបបច្ចុប្បន្នមានប្រវែងត្រឹមតែ ៣០០ ម៉ែត្រប៉ុណ្ណោះដែលមានលក្ខណៈខ្លីមិនទាន់ឆ្លើយតបនឹងកំណើនភ្ញៀវទេសចរដែលមកកម្សាន្តរៀងរាល់ឆ្នាំ ខណៈខេត្តកែបមានឆ្នេរប្រវែងសរុបចំនួនជិត ២៧ គីឡូម៉ែត្រ។
លោកបានបញ្ជាក់ថា៖ «តាមពិតទៅការរៀបចំគម្រោងប្លង់អភិវឌ្ឍន៍តំបន់ឆ្នេរ វាពាក់ព័ន្ធនឹង ២ សង្កាត់ បើទោះបីស្ថិតនៅក្នុងភូមិថ្មី គឺសង្កាត់ព្រៃធំ និងសង្កាត់កែបក្នុងក្រុងកែបដែលមានការចូលកន្ទុយឆ្នេរបន្តិចទៅខាងកែប។ ផែនការដំបូងគឺយើងគិតរៀបចំពី ២ ០០០ ទៅ ៣ ០០០ ម៉ែត្រ ប៉ុន្តែនៅក្នុងផែនការមេ យើងធ្វើយ៉ាងម៉េចឱ្យបានប្រវែង ៣ ០០០ ម៉ែត្រ។
លោក ហូ វណ្ឌី ទីប្រឹក្សាសមាគមទេសចរណ៍កម្ពុជាថ្លែងថា ខេត្តកែប និងខេត្តកំពតមានការអភិវឌ្ឍជាបន្តបន្ទាប់ក្នុងអាណត្តិនីមួយៗរបស់ថា្នក់ដឹកនាំខេត្តដោយធ្វើយ៉ាងណាកែលម្អទៅតាមស្ថានភាពជាក់ស្តែងនៃកំណើនភ្ញៀវទេសចរ។
បើតាមលោក ហូ វណ្ឌី ខេត្តកែបបាននិងកំពុងមានការទាក់ទាញទេសចរយ៉ាងខ្លាំង បន្ទាប់ពីខេត្តព្រះសីហនុ។ ទន្ទឹមគ្នានេះការរៀបចំផែនការមេ ក្នុងការអភិវឌ្ឍខេត្ត គឺមិនអាចខ្វះបាននោះទេ។ បើទោះបីក្នុងអំឡុងពេលវិបត្តិនៃជំងឺកូវីដ១៩នេះក្តី ការរៀបចំផែនការមេ និងផែនទីអភិវឌ្ឍន៍តំបន់ឆ្នេរ ក៏ជារឿងចាំបាច់បំផុតក្នុងការស្រោចស្រង់សេដ្ឋកិច្ចជាតិ។
លោកថ្លែងថា៖ «បើយើងនិយាយពីកែប គឺកែបលំដាប់លេខរៀងទី២ ហើយបងប្អូនជាភ្ញៀវទេសចរ ជ្រើសរើសកែបជាតំបន់ស្នាក់នៅ បន្ទាប់ពីក្រុងព្រះសីហនុ និងតាមបណ្តាកោះផ្សេងៗទៀតច្រើនណាស់។
ការរៀបចំផែនការមេក្នុងការអភិវឌ្ឍតំបន់ឆ្នេរ គឺមិនអាចខ្វះបាន»៕
