កំពតៈ រដ្ឋបាលខេត្តកំពតបានសម្រេចបង្កើតគណៈកម្មការទប់ស្កាត់ និងបង្ក្រាបបទល្មើសជលផលគ្រប់ប្រភេទនៅក្នុងភូមិសាស្ត្រខេត្ត ដើម្បីជាយន្តការមួយសម្រាប់យកមកអនុវត្តលើការគ្រប់គ្រងធនធានជលផល និងការបង្ក្រាបបទល្មើសនេសាទនានាឱ្យរឹតតែមានប្រសិទ្ធភាព។
លោក វិត វឌ្ឍនា អ្នកនាំពាក្យរដ្ឋបាលខេត្តកំពតបានប្រាប់ ភ្នំពេញ ប៉ុស្តិ៍ កាលពីម្សិលមិញថា ការបង្កើតគណៈកម្មការនេះនឹងត្រូវអនុវត្តតែចំពោះបទល្មើសជលផលមួយតែប៉ុណ្ណោះ ខណៈកន្លងមកមន្ត្រីជលផលបានអនុវត្តទៅតាមច្បាប់ជលផល។ ប៉ុន្តែចំពោះគណៈកម្មការនេះ រដ្ឋបាលខេត្តបានយកមកដាក់នៅក្រោមឆត្រនៃគណៈបញ្ជាឯកភាពខេត្ត សម្រាប់ធ្វើការគ្រប់គ្រង និងអនុវត្តឱ្យមានប្រសិទ្ធភាព។
លោកបានពន្យល់ថា គណៈកម្មការនេះនឹងត្រូវអនុវត្តការងារទៅតាមគោលការណ៍សំខាន់ៗចំនួន ៣ គឺទី១- វិធានការផ្សព្វផ្សាយអំពីសម្ភារដែលត្រូវប្រើប្រាស់សម្រាប់នេសាទ និងតំបន់ណាដែលត្រូវហាម (អភិរក្ស) និងអនុញ្ញាត ដើម្បីឱ្យប្រជានេសាទបានយល់។ ទី២- អប់រំណែនាំដល់ប្រជានេសាទណាដែលបានប្រព្រឹត្តផ្ទុយទៅនឹងការណែនាំ និងផ្សព្វផ្សាយព្រមទាំងធ្វើកិច្ចសន្យា និងទី៣- អនុវត្តវិធានការច្បាប់។
លោក វិត វឌ្ឍនា បានបញ្ជាក់ថា៖ «យើងបង្កើតគណៈកម្មការនេះមិនមែនយើងធ្វើតែនៅក្នុងដែនសមុទ្រទេ ក្នុងន័យនេះយើងអនុវត្តទាំងដែនសមុទ្រ និងទឹកសាប ថ្វីបើខេត្តកំពតមិនសូវមានទឹកសាប ប៉ុន្តែក៏នៅមានការប្រើប្រាស់ឧបករណ៍ឆក់នៅតាមបណ្តាបឹង និងស្រុកមួយចំនួនដែលមានទឹកសាប»។
លោក ចាន់ រិទ្ធិ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពត បានឱ្យដឹងដែរថា ការបង្កើតគណៈកម្មការនេះគឺដើម្បីពង្រឹងប្រសិទ្ធភាពលើការទប់ស្កាត់ និងបង្ក្រាបបទល្មើសជលផល។ ម្យ៉ាងទៀតសម្រាប់ជួយដល់កម្លាំងជលផលខេត្ត ខណៈបច្ចុប្បន្នមានមន្ត្រីត្រឹមតែចំនួន ១០ នាក់ ដែលពិបាកចុះទៅទប់ស្កាត់ និងបង្ក្រាបបទល្មើស។
បើតាម លោក ចាន់ រិទ្ធិ ដោយមើលឃើញពីស្ថានភាពនេះ ទើបបានលោក ជាវ តាយ អភិបាលខេត្តកំពតបង្កើតគណៈកម្មការនេះឡើងដោយមានការចូលរួមពីកម្លាំងប្រដាប់អាវុធគ្រប់ប្រភេទ សហការគ្នាចុះទៅទប់ស្កាត់ និងបង្ក្រាបក្នុងករណីមានបទល្មើសជលផលណាមួយកើតឡើង។
លោកបានរំពឹងថា ក្រោមការដឹកនាំរបស់លោក ជាវ តាយ ដែលជាប្រធានគណៈបញ្ជាការឯកភាពខេត្តនឹងពង្រឹងឱ្យមានកិច្ចសហការរវាងនគរបាលជើងទឹក និងនគរបាលលម្ហសមុទ្រដែលមាននៅក្នុងគណៈកម្មការនេះ ដើម្បីរួមគ្នាទប់ស្កាត់បទល្មើសនេសាទ ជាពិសេសនៅក្នុងតំបន់សនៅជិតកោះត្រល់ ដែលតែងមានបទល្មើសជាញឹកញាប់ដោយសារតំបន់នេះមានទឹកជ្រៅ និងសម្បូរត្រីធំៗ ។
លោក ចាន់ រិទ្ធ បានថ្លែងថា៖ «ជនជាតិភាគតិច (ចាម) របស់យើង គាត់ឧស្សាហ៍ទៅនេសាទតំបន់នេះ ហើយវៀតណាមក៏ចូលចិត្តទៅទីនោះដូចគ្នា តែងតែមានការឈ្លោះគ្នានៅក្នុងតំបន់នេះ ហើយបើយើងមានគណៈកម្មការថ្មីនេះនឹងអាចដោះស្រាយបាន»។
យ៉ាងណាក្ដី លោក ចាន់ រិទ្ធ មិនបានបញ្ជាក់ពីចំនួនករណីបទល្មើសនេសាទក្នុងខេត្តនេះដែលមន្ត្រីបានបង្ក្រាប និងទប់ស្កាត់ថា មានប៉ុន្មាននោះទេ សម្រាប់ដើមឆ្នាំនេះ ដោយសារលោកមិនមានរបាយការណ៍នៅក្នុងដៃ។ ប៉ុន្តែលោក វិត វឌ្ឍនា ឱ្យដឹងថា ក្នុងរយៈពេល ៣ ខែដើមឆ្នាំនេះមានការបង្ក្រាបបានខ្ទង់រយករណី។
លោក នាក់ សេន ប្រធានសហគមន៍នេសាទឃុំត្រើយកោះ ស្រុកកំពង់បាយ ខេត្តកំពត ឱ្យដឹងថា បទល្មើសនេសាទក្នុងខេត្តកំពតនៅតែមាន ដោយមិនសូវមានអាជ្ញាធរចុះបង្ក្រាបទេ ជាពិសេសករណីឆក់ ។
លោកបានបន្តថា កន្លងមកអាជ្ញាធរក៏មានការទប់ស្កាត់ និងបង្ក្រាបខ្លះដែរ ប៉ុន្តែត្រូវបានដោះលែងជនល្មើសវិញ ដោយពុំមានការពិន័យ ឬដាក់ទោសទណ្ឌអ្វីទេ ហើយជនល្មើសនៅតែប្រព្រឹត្តធ្វើឡើងវិញដដែល។
ទោះជាយ៉ាងណា លោក នាក់ សេន បានស្វាគមន៍ចំពោះការបង្កើតគណៈកម្មការបង្ក្រាប និងទប់ស្កាត់នូវបទល្មើសជលផលនេះ ដោយរំពឹងថា ការបង្ក្រាបនឹងមានប្រសិទ្ធភាពជាងមុន។ ក៏ប៉ុន្តែលោកថា បើមន្ត្រីថ្នាក់ក្រោមមិនបានយកចិត្តទុកដាក់អនុវត្តទេក៏គ្មានបានផលអ្វីដែរ ។
លោកថា៖ «ថ្នាក់ខេត្ត ដែលមានឯកឧត្តម ជាវ តាយ គួរចុះមកសួរនាំប្រជានេសាទដោយផ្ទាល់ថា តើបទល្មើសនេសាទហ្នឹងមានអត់? ហើយនៅម្តុំណា និងជួបការលំបាកអត់ទើបដោះស្រាយបាន។ ពីមុនអ្នកនេសាទរកចំណូលបានចំនួន ៥ ម៉ឺនរៀល ក្នុង ១ ថ្ងៃ ប៉ុន្តែឥឡូវរកតែ ២ ម៉ឺនរៀលមិនទាំងបានផង ដោយសារតែមានអ្នកនេសាទខុសច្បាប់ច្រើន»។
បើតាមលោក នាក់ សេន បទល្មើសនេសាទខុសច្បាប់ភាគច្រើនកើតឡើង ដោយអ្នកសាទមកពីខេត្តកែប និងមកពីប្រទេសវៀតណាម ដោយពួកគេបានប្រើឧបករណ៍ឆក់ និងអូសគូ ហើយបានចូលមកអូសដល់ព្រំដែនសមុទ្រកម្ពុជាហើយក៏គ្មានការបង្ក្រាបដែរដែលធ្វើឱ្យបទល្មើសមានភាពអនាធិបតេយ្យ៕