ភ្នំពេញៈ ខេត្ដមួយចំនួនដែលកំពុងមានការឆ្លងរីករាលដាលជំងឺកូវីដ១៩ ក្នុងសហគមន៍ នៅបន្តអនុវត្ដវិធានការបិទខ្ទប់ទីតាំងមួយចំនួន ដើម្បីទប់ស្កាត់ និងកាត់ផ្ដាច់ការឆ្លងរាលដាលជំងឺកូវីដ១៩ ចូលក្នុងសហគមន៍។
ជាមួយគ្នានេះ ពលរដ្ឋចំណូលថ្មី ដែលទៅក្នុងភូមិសាស្ដ្រខេត្ដនីមួយៗនឹងត្រូវធ្វើតេស្តតាមរយៈឧបករណ៍ធ្វើតេស្តរហ័សរកមេរោគកូវីដ ហើយបើទៅពីតំបន់ក្រហមនឹងត្រូវធ្វើចត្ដាឡីស័ក។
លោក វ៉ី សំណាង អភិបាលខេត្តកំពង់ស្ពឺនៅថ្ងៃទី ៨ ខែឧសភា បានចេញសេចក្ដី សម្រេចស្ដីពីការបិទខ្ទប់ជាបណ្ដោះអាសន្នផ្នែកខាងត្បូង និងផ្នែកខ្លះនៃផ្លូវចូលភូមិបាំងណា ឃុំជង្រុក ស្រុកគងពិសី ដែលមានការឆ្លងរាលដាលនៃជំងឺកូវីដ១៩។
សេចក្ដីសម្រេចបញ្ជាក់ថា ទីតាំងខាងលើនេះត្រូវបិទខ្ទប់រយៈពេល ២ សប្ដាហ៍ គិតចាប់ពីថ្ងៃទី ៦ ដល់ថ្ងៃទី ២០ ឧសភា ដើម្បីទប់ស្កាត់ការឆ្លងរាលដាលជំងឺកូវីដ១៩ ទៅក្នុងសហគមន៍ និងតំបន់ផ្សេងទៀត។
ក្រៅពីការបិទខ្ទប់ រដ្ឋបាលខេត្តកំពង់ស្ពឺបានកំណត់ឲ្យបុគ្គលគ្រប់រូបមានកាតព្វកិច្ចត្រូវអនុវត្ត វិធានការសុខាភិបាល រួមមានការពាក់ម៉ាស់ និងការរក្សាគម្លាតសុវត្ថិភាព ព្រមទាំងប្រកាន់ឲ្យបានខ្ជាប់ខ្ជួននូវការធ្វើអនាម័យ ដើម្បីសម្លាប់មេរោគ និងការវាស់កម្ដៅ ដើម្បីប្រយុទ្ធប្រឆាំងជំងឺកូវីដ១៩។
លោកអភិបាលខេត្ដឱ្យដឹងថា នៅថ្ងៃទី ៩ ខែឧសភា នេះ ខេត្តកំពង់ស្ពឺមានអ្នកជាសះស្បើយពីជំងឺកូវីដ១៩ ចំនួន ៦ នាក់ក្នុងចំណោមអ្នកវិជ្ជមានសរុប ១០៦ នាក់។
លោកថ្លែងថា៖ «ខ្ញុំសូមសំណូមពរដោយទទូចសូមឱ្យបងប្អូនយើងដែលជាសះ ស្បើយនៅថ្ងៃនេះបន្តធ្វើចត្តាឡីស័កនៅផ្ទះរបស់ខ្លួនឯងរយៈពេល ១៤ ថ្ងៃជាកំហិត និងសូមត្រឡប់មកយកសំណាកវិញនៅថ្ងៃទី ២២ ខែឧសភា ឆ្នាំ ២០២១ នេះម្ដងទៀត»។
ខេត្តសៀមរាបនៅថ្ងៃទី ៨ ខែឧសភា បានរកឃើញអ្នកវិជ្ជមានជំងឺកូវីដ១៩ថ្មី ចំនួន ៤ នាក់ និងអ្នកជាសះស្បើយពីជំងឺនេះចំនួន ៣ នាក់។
រដ្ឋបាលខេត្ដបញ្ជាក់ថា គិតត្រឹមថ្ងៃទី ៨ ខែឧសភា មានអ្នកវិជ្ជមានជំងឺកូវីដ១៩ ចំនួន ៦៨ នាក់ បានព្យាបាលជាសះស្បើយចំនួន ២០ នាក់ ស្លាប់ ១ នាក់ និង ៤៧ នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប។
រដ្ឋបាលខេត្តសៀមរាបកាលពីថ្ងៃទី ៦ ខែឧសភា ក៏បានសម្រេចបិទខ្ទប់ការចេញ-ចូលជាបណ្ដោះអាសន្នតាមកំណាត់ផ្លូវ ១ ខ្សែភ្ជាប់ពីផ្លូវជាតិលេខ ៦ ទៅមុខភោជនីយដ្ឋានរាជិនី ស្ថិតនៅភូមិដកពោធិ៍ ចាប់ពីថ្ងៃទី ៦ ខែឧសភា ឆ្នាំ ២០២១ តទៅ រហូតដល់មានការជូនដំណឹងថ្មីពីរដ្ឋបាលខេត្ដ។
ការបិទខ្ទប់នេះធ្វើឡើងក្រោយពីរយៈពេល ២ ថ្ងៃគឺថ្ងៃ ទី ៤ ដល់ថ្ងៃទី ៥ ខែឧសភា ឆ្នាំ ២០២១ មានអ្នកវិជ្ជមានជំងឺកូវីដ១៩ ចំនួន ៩ នាក់ដែលរស់នៅតាមបណ្ដោយផ្លូវភ្ជាប់ពីផ្លូវជាតិលេខ ៦ ទៅដល់មុខភោជនីយដ្ឋានរាជិនី ក្នុងភូមិដកពោធិ៍ សង្កាត់ស្លក្រាម ក្រុងសៀមរាប។
រដ្ឋបាលខេត្ដបញ្ជាក់ថា អ្នកធ្វើដំណើរចូលភូមិសាស្ត្រខេត្តសៀមរាប ត្រូវចូលរួមពិនិត្យសុខភាពបឋម និងស្រង់ទិន្នន័យក្នុងករណីសង្ស័យថា មានពាក់ព័ន្ធនឹងជំងឺកូវីដ១៩ នឹងត្រូវយកសំណាក ឬធ្វើចត្តាឡីស័ក អាស្រ័យទៅតាមការណែនាំរបស់មន្ត្រីសុខាភិបាល។
នៅឯខេត្តតាកែវ វិញ លោក អ៊ូច ភា អភិបាលខេត្តនេះនៅថ្ងៃទី ៩ ខែឧសភា បានចេញសេចក្ដីសម្រេចឱ្យផ្អាកការលក់ដូរបណ្ដោះអាសន្ននៅផ្សារយាយត្រប់ នៅភូមិថ្មី ឃុំរវៀង ស្រុកសំរោង ដែលជាតំបន់មានអ្នកវិជ្ជមានកូវីដ១៩ បានប៉ះពាល់ផ្ទាល់ និងប្រយោលច្រើននាក់។
ផ្សារនេះត្រូវបានសម្រេចឱ្យបិទដំណើរការជាបណ្ដោះអាសន្នចាប់ពីថ្ងៃទី ៩ ខែឧសភានេះ រហូតដល់មានការជូនដំណឹងជាថ្មី។
រដ្ឋបាលខេត្ដតាកែវបញ្ជាក់ថា អាជីវករលក់ដូរនៅក្នុងផ្សារនេះទាំងអស់មានកាតព្វកិច្ចផ្តល់វត្ថុសំណាកទៅវិភាគរកមេរោគកូវីដ១៩ ដល់មន្ត្រីសុខាភិបាល។ ក្រុមឆ្លើយតបបន្ទាន់នៃមន្ទីរសុខាភិបាលខេត្តនឹងចុះយកសំណាកពីអាជីវករទាំងអស់នៅថ្ងៃទី ៩ ខែឧសភា វេលាម៉ោង ១២:០០ នាទី នៅសាលាដំណាក់ភូមិថ្មី ឃុំរវៀង ស្រុកសំរោង។
ក្នុងករណីពលរដ្ឋខកខានមិនបានទៅផ្តល់វត្ថុសំណាកតាមកាលកំណត់ខាងលើត្រូវទៅផ្តល់សំណាកនៅមណ្ឌលសុខភាព ឬមន្ទីរពេទ្យបង្អែកដែលនៅជិតលំនៅឋានរបស់ខ្លួន។
លោក សឿម ប៊ុនរិទ្ធិ អ្នកនាំពាក្យ រដ្ឋបាលខេត្តបាត់ដំបង ឯណោះវិញ នៅថ្ងៃទី ៩ ខែឧសភានេះបានឱ្យដឹងថាបច្ចុប្បន្នខេត្ដបាត់ដំបងមានការបិទខ្ទប់ទីតាំងឱសថស្ថានឯកជនមួយនៅស្រុកភ្នំព្រឹក។
លោកឱ្យដឹងថា ចាប់តាំងពីមានការផ្ទុកជំងឺកូវីដ១៩ខេត្តបាត់ដំបងមានអ្នកជំងឺកូវីដ១៩ ចំនួន ៤២ នាក់ក្នុងនោះព្យាបាលជាសះស្បើយចំនួន ២៩ នាក់ និងកំពុងសម្រាកព្យាបាលចំនួន ១៣ នាក់ និងពុំមានករណីស្លាប់ឡើយ។
ក្រោយពីការបញ្ចប់ការបិទខ្ទប់រាជធានីភ្នំពេញកាលពីថ្ងៃទី ៦ ខែឧសភា ឈានចូលដល់ថ្ងៃទី ៧ ខែឧសភា មានពលរដ្ឋមកពីរាជធានីភ្នំពេញចូលខេត្ដបាត់ដំបងចំនួន ៥ នាក់ បានរកឃើញវិជ្ជមានជំងឺកូវីដ១៩។
លោកបានថ្លែងថា៖ «បច្ចុប្បន្នយើងបន្តអនុវត្ដវិធានការធ្វើតេស្ដរហ័ស ចំពោះពលរដ្ឋចំណូលថ្មីក្នុងភូមិសាស្ដ្រខេត្ដបាត់ដំបង។ ក្រៅពីនេះយើងបានសហការជាមួយពលរដ្ឋនៅមូលដ្ឋាន។ បើសិនជាទទួលបានដំណឹងអំពីពលរដ្ឋចំណូលថ្មីហើយសង្ស័យមានពាក់ព័ន្ធជំងឺកូវីដ១៩ ត្រូវជូនដំណឹងមកអាជ្ញាធរ ដើម្បីចុះទៅយកសំណាកធ្វើតេស្តរកមេរោគកូវីដ១៩»។
ចំណែក លោក ឈៀង សុវណ្ណរ៉ា អ្នកនាំពាក្យរដ្ឋបាលខេត្ដព្រៃវែងបានឱ្យដឹងថា បច្ចុប្បន្នក្នុងភូមិសាស្ដ្រខេត្ដព្រៃវែងមិនមានទីតាំងដែលត្រូវបិទខ្ទប់ទៀតទេ។
លោកបានឱ្យដឹងថា ចាប់តាំងពីមានករណីរកឃើញវិជ្ជមានជំងឺកូវីដ១៩ ដំបូងចូលខេត្ដកាលពីខែមេសាឆ្នាំ ២០២១ ដល់ថ្ងៃទី ៨ ខែឧសភានេះ ខេត្ដព្រៃវែង មានករណីវិជ្ជមានកូវីដ១៩ ចំនួន ៨៧ នាក់ក្នុងនោះបានព្យាបាលជាសះស្បើយចំនួន ៧៨ នាក់ និងមានករណីស្លាប់ចំនួន ៣ នាក់។
លោកថ្លែងថា៖ «ចំពោះប្រជាពលរដ្ឋដែលឆ្លងកាត់ខេត្តព្រៃវែង គឺឆ្លងកាត់បានធម្មតា ចំពោះប្រជាពលរដ្ឋដែលចូលមកកាន់ទឹកដីខេត្តព្រៃវែង ក៏ចូលមកធម្មតា ដោយត្រូវអនុវត្តតាមវិធានសុខាភិបាល ៣ការពារ ៣កុំ។ ក្នុងករណីបងប្អូនមកពីតំបន់ក្រហម តំបន់ផ្ទុះ ឬបងប្អូនមានរោគសញ្ញាគួរឲ្យសង្ស័យ អាជ្ញាធរនឹងយកបងប្អូនមកធ្វើចត្តាឡីស័ក ១៤ ថ្ងៃ និងពិនិត្យសំណាក»៕