.jpg)
កម្លាំងសមត្ថកិច្ចខេត្តកំពង់ស្ពឺត្រួតពិនិត្យអ្នកធ្វើដំណើរនៅពេលយប់កាលពីថ្ងៃទី ៣ ខែមេសា ឆ្នាំ ២០២១។ រូបថត នគរបាល
ភ្នំពេញៈ ថ្នាក់ដឹកនាំនៃបណ្តាខេត្តជាច្រើនបានចេញសេចក្តីណែនាំពីការអនុវត្តនូវវិធានការរដ្ឋបាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ក្នុងរយៈពេល ២ សប្តាហ៍ដូចគ្នាៗ ហើយក្នុងនោះគ្រប់ខេត្តទាំងអស់គឺហាមការធ្វើដំណើរចេញក្រៅផ្ទះ និងចៀសវាងការធ្វើដំណើរឆ្លងកាត់រាជធានី-ខេត្តបើមិនចាំបាច់ទេនោះ។
រដ្ឋបាលខេត្តព្រៃវែងនឹងចាប់ផ្តើមអនុវត្តវិធានការរដ្ឋបាលចាប់ពីថ្ងៃទី ៦ ដល់ទី ១៨ ខែមេសា តទៅដែលក្នុងនោះថ្នាក់ដឹកនាំខេត្តនេះបានស្នើឱ្យប្រជាពលរដ្ឋទាំងអស់ត្រូវធ្វើការជួបជុំក្រុមគ្រួសារតាមគេហដ្ឋានរៀងៗខ្លួនចៀសវាងធ្វើដំណើរចេញក្រៅបើមិនចាំបាច់ និងការធ្វើដំណើរឆ្លងខេត្តផងដែរ។
លិខិតរបស់រដ្ឋបាលខេត្តព្រៃវែងបានឱ្យដឹងថា៖ «ត្រូវចៀសវាងនូវការធ្វើដំណើរមិនចាំបាច់ទៅកាន់ ឬចេញ-ចូលតំបន់ ឬទីកន្លែងដែលមានហានិភ័យខ្ពស់នៃការឆ្លងរាលដាលជំងឺកូវីដ ១៩ ដែលកំណត់ដោយក្រសួងសុខាភិបាល និងអាជ្ញាធរមានសមត្ថកិច្ចពាក់ព័ន្ធ»។
មួយវិញទៀតប្រជាពលរដ្ឋណាដែលមានសមាជិកមកពីបណ្តារាជធានី-ខេត្ត ដែលកំពុងមានការរីករាលដាលជំងឺកូវីដ ១៩ ត្រូវរាយការណ៍ជូនអាជ្ញាធរមូលដ្ឋានរបស់ខ្លួន ដើម្បីមានវិធានការគ្រប់គ្រង បង្ការ និងទប់ស្កាត់ការរីករាលដាលនៃជំងឺកូវីដ ១៩ នៅក្នុងមូលដ្ឋាន។
ចំណែកអភិបាលខេត្តកំពង់ចាមលោក អ៊ុន ចាន់ដា ក៏បានដាក់កំហិតនូវការអនុវត្តវិធានការរដ្ឋបាលផងដែរ ដោយចាប់អនុវត្តពីថ្ងៃទី ៨ ដល់ថ្ងៃទី ២១ ខែមេសា ដែលក្នុងនោះលោកបានបញ្ជាឱ្យគណៈបញ្ជាការ ឯកភាពរដ្ឋបាលក្រុង-ស្រុក និងឃុំ-សង្កាត់ត្រូវក្តាប់មុខសញ្ញាអ្នកចំណូលស្រុកមកពីតំបន់មានហានិភ័យតម្រូវឱ្យអនុវត្តវិធានការចត្តាឡីស័ករយៈពេល ១៤ ថ្ងៃជាកំហិត។
លោកបានបន្ថែមថា សម្រាប់រមណីយដ្ឋានទេសចរណ៍ធម្មជាតិ និងកែច្នៃទូទាំងខេត្តចាប់ពីថ្ងៃទី ៨ ដល់ទី ២១ មេសាត្រូវផ្អាកជាបណ្តោះអាសន្នរួមទាំងការជួបជុំប្រមូលផ្តុំមនុស្សច្រើនក្នុងពិធីជប់លៀងកម្សាន្តសប្បាយនានានៅតាមគេហដ្ឋាន កន្លែងធ្វើការ និងក្រុមហ៊ុនឯកជនជាដើម។
ដូចគ្នានេះដែរ លោក អ៊ំ រាត្រី អភិបាលខេត្តបន្ទាយមានជ័យមិនបានកំណត់ពីរយៈពេលនៃការអនុវត្តវិធានរដ្ឋបាលទេ ប៉ុន្តែលោកបានចេញសេចក្តីណែនាំដល់ប្រជាពលរដ្ឋទាំងអស់ត្រូវអនុវត្តន៍វិធានការ ៣ ការពារ និង ៣ កុំព្រមជាមួយនឹងវិធានការសុខាភិបាលចាំបាច់ផ្សេងទៀត សំដៅបង្ការ និងទប់ស្កាត់ការឆ្លងរាលដាលនៃជំងឺកូវីដ ១៩ ឱ្យបានខ្ជាប់ខ្ជួន និងគ្រប់ៗគ្នា។
នៅខាងខេត្តព្រះវិហារវិញអភិបាលខេត្តលោក ប្រាក់ សុវណ្ណ ក៏បានដាក់កំហិតចំពោះប្រជាពលរដ្ឋដែលបានធ្វើដំណើរទៅកាន់ ឬចេញចូលតំបន់ ឬទីកន្លែងដែលមានហានិភ័យខ្ពស់នៃការឆ្លងរាលដាលជំងឺនេះដោយអាជ្ញាធរនឹងធ្វើការអនុវត្តចត្តាឡីស័ក ១៤ ថ្ងៃដល់អ្នកទាំងនោះ។
ចំពោះខេត្តស្វាយរៀងវិញ លោកអភិបាលខេត្ត ម៉ែន វិបុល បានកំណត់ការអនុវត្តវិធានរដ្ឋបាលរយៈពេល ១២ ថ្ងៃ គឺចាប់ពីថ្ងៃទី ៧ ដល់ទី ១៨ ខែមេសា ដើម្បីទប់ស្កាត់ការឆ្លងរាលដាលជំងឺកូវីដ ១៩ នៅក្នុងភូមិសាស្ត្រខេត្តនេះ។ លោកថា ថិរវេលានេះអាចត្រូវសម្រេចបន្ត ឬបញ្ចប់មុនថិរវេលាកំណត់តាមការជូនដំណឹងរបស់រដ្ឋបាលខេត្តស្វាយរៀង។
ជាមួយគ្នានេះដែរ លោកស្រី ឱ វណ្ណឌីន អ្នកនាំក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងនៅទូទាំងប្រទេសបានលើកឡើងផងដែរថា លោកស្រីមានការបារម្ភ ពិសេសក្នុងពិធីបុណ្យចូលឆ្នាំខ្មែរខាងមុខដែលនឹងមានប្រជាពលរដ្ឋខ្លះអាចនឹងចល័តពីមួយកន្លែងទៅមួយកន្លែងទៀត។
«នៅពេលឈប់សម្រាកបងប្អូនប្រជាពលរដ្ឋតែងតែជួបជុំគ្នា ពិសេសអ្នកនៅភ្នំពេញនឹងត្រឡប់ទៅកាន់ស្រុកកំណើតដែលខ្ញុំសុំឱ្យមានការពិចារណាឱ្យបានច្បាស់លាស់ក្នុងការសម្រេចចិត្តទៅជួបជុំបងប្អូននៅស្រុកកំណើត»។ អ្វីដែលជាការព្រួយបារម្ភគឺលោកស្រីខ្លាចតែក្រោយការឈប់សម្រាកហើយ ខេត្តដែលមិនទាន់មានការឆ្លងជំងឺកូវីដ ១៩ បែរជាផ្ទុះនូវការឆ្លងវីរុសនេះ៕
វីដេអូ៖
