ភ្នំពេញៈ អាជ្ញាធរខេត្តនៃតំបន់ឆ្នេរសមុទ្រកម្ពុជា បន្តចុះផ្សព្វផ្សាយអប់រំ និងបំផុសចលនាប្រជាពលរដ្ឋក្នុងមូលដ្ឋានឲ្យចូលរួមការពារទប់ស្កាត់ការទន្ទ្រានកាន់កាប់ដីសាធារណៈ ដែលរួមមាន ដីចំណីឆ្នេរ ដីចំណីដៃសមុទ្រ ស្ទឹង ព្រែក និងផ្លូវទឹកដែលតភ្ជាប់ទៅនឹងសមុទ្រដើម្បីឈានទៅរកការលុបបំបាត់បញ្ហាវិវាទដីធ្លី និងដើម្បីធ្វើឲ្យប្រសើរឡើងនូវសោភណភាព បរិស្ថានធម្មជាតិនៃតំបន់ឆ្នេរនៅកម្ពុជា។
យុទ្ធនាការដើម្បីការពារអចលនទ្រព្យសាធារណៈរបស់រដ្ឋខាងលើនេះ បានធ្វើឡើងបន្ទាប់ពីលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ចេញលិខិតមួយច្បាប់ចុះថ្ងៃទី២៥ ខែមករា ឆ្នាំ ២០១៩ ដោយបានជំរុញឲ្យគណៈអភិបាលខេត្តនៃតំបន់ឆ្នេរសមុទ្រកម្ពុជាទាំង ៤ រួមមានខេត្តព្រះសីហនុ កោះកុង កំពត និងខេត្តកែប ត្រូវបង្កើនការងារអនុវត្តសារាចរណែនាំលេខ ០១ របស់រដ្ឋាភិបាលស្ដីពីការអភិវឌ្ឍតំបន់ឆ្នេរសមុទ្រនៃព្រះរាជាណាចក្រកម្ពុជាឲ្យមានប្រសិទ្ធភាពខ្ពស់។
លោក អន ភារៈ អភិបាលរងខេត្តកោះកុង និងជាប្រធានក្រុមការងារអភិវឌ្ឍតំបន់ឆ្នេរសមុទ្រខេត្តកោះកុង បានប្រាប់ភ្នំពេញប៉ុស្តិ៍កាលពីម្សិលមិញថា ដើម្បីលើកកម្ពស់ ប្រសិទ្ធភាពនៃការគ្រប់គ្រង ការពារ និងអភិរក្ស បឹង ស្ទឹង ព្រែក អូរ និងផ្លូវទឹកដែលតភ្ជាប់ទៅនឹងសមុទ្រនៃតំបន់ឆ្នេរសមុទ្រកម្ពុជាប្រកបដោយចីរភាព អាជ្ញាធរខេត្តបានផ្សព្វផ្សាយ និងបំផុសចលនាប្រជាពលរដ្ឋនៅតាមមូលដ្ឋានឲ្យចូលរួមការពារ និងទប់ស្កាត់ នូវរាល់បទល្មើសនៃការទន្ទ្រានកាន់កាប់ដីសាធារណៈរបស់រដ្ឋខាងលើនេះ តាមរយៈការចាក់ដី និងការកាប់បំផ្លាញព្រៃលិចទឹក ក្នុងតំបន់ទាំងនោះ។
លោកថ្លែងថា៖ «សម្រាប់ខេត្តកោះកុងយើង គឺបាននិងកំពុងបំផុសចលនាប្រជាពលរដ្ឋឲ្យចូលរួមការពារ និងទប់ស្កាត់នូវបញ្ហាទាំងនេះ ខណៈមន្ទីរនិងអង្គភាពពាក់ព័ន្ធរួមទាំងអាជ្ញាធរមូលដ្ឋាន បាននិងកំពុងបន្តឃ្លាំមើល និងបង្ក្រាបជាប្រចាំនូវរាល់សកម្មភាពនៃបទល្មើស ពិសេស ការរំលោភបំពានដីរដ្ឋយកធ្វើជាកម្មសិទ្ធិឯកជនដោយខុសច្បាប់ តាមរយៈការកាប់រានដីព្រៃលិចទឹក [ព្រៃកោងកាង] ការចាក់ដីលុបបឹងបួ ស្ទឹង ព្រែក និងប្រព័ន្ធផ្លូវទឹកមួយចំនួនជាប់ដៃសមុទ្រ»។
ដោយឡែកអាជ្ញាធរខេត្តកែបនិងខេត្តកំពតក៏កំពុងមមាញឹកនៅក្នុងយុទ្ធនាការចុះផ្សព្វផ្សាយអប់រំ និងបំផុសចលនាពលរដ្ឋឲ្យចូលរួមនៅក្នុងកិច្ចការពារ និងអភិរក្សនូវធនធានធម្មជាតិក្នុងតំបន់ឆ្នេរ ដោយបានធ្វើការដាំដុះឡើងវិញនូវព្រៃកោងកាងរាប់ពាន់ហិកតា និងជួយការពារទប់ស្កាត់នូវចលនាទន្ទ្រានកាន់កាប់ដីសាធារណៈរបស់រដ្ឋផងដែរ បើទោះជាសកម្មភាពនៃការកាប់ទន្ទ្រានដីព្រៃលិចទឹកជាប់មាត់ឆ្នេរ និងការចាក់ដីរំលោភដីចំណីឆ្នេរសមុទ្រ ឬដីចំណីបឹង ព្រែក ស្ទឹង និងប្រព័ន្ធផ្លូវទឹកនានាជាប់ដៃសមុទ្រដើម្បីយកមកធ្វើជាកម្មសិទ្ធិផ្ទាល់ខ្លួនដោយខុស ច្បាប់ នៅមិនទាន់កើតមានឡើងជាដុំកំភួនក្ដី។
លោក កែន សត្ថា អភិបាលខេត្តកែប ប្រាប់ភ្នំពេញប៉ុស្តិ៍ មិ្សលមិញថា បញ្ហារំលោភបំពានយកដីសាធារណៈមកធ្វើជាកម្មសិទ្ធិឯកជន ភាគច្រើនកើតឡើងតាមរយៈការទិញលក់អចលនទ្រព្យដែលគ្មានប្រវត្តិច្បាស់លាស់ ពោលគឺអ្នកទិញ និងអ្នកលក់ត្រូវរ៉ូវគ្នាលក់ដូរដោយខុសច្បាប់។
កត្តានេះបានបង្កឲ្យមានវិវាទដីធ្លីកើតឡើង និងធ្វើឲ្យមានការបាត់បង់ដីសាធារណៈរបស់រដ្ឋ។ លោកបញ្ជាក់ថា៖ «ដើម្បីលុបបំបាត់នូវបញ្ហាប្រឈមទាំងនេះ អាជ្ញាធរខេត្តយើងបានដាក់ចេញនូវយន្តការជាច្រើនរួមមាន ហាមធ្វើការទិញលក់នូវអចលនទ្រព្យដីដែលគ្មានប្រវត្តិនិងព្រំប្រទល់ច្បាស់លាស់ និងគ្មានការទទួលស្គាល់ពីស្ថាប័នជំនាញ ហាមកាប់ទន្ទ្រានដីព្រៃ ការចាក់លុបដីចំណីបឹង ស្ទឹង ព្រែក សាធារណៈរបស់រដ្ឋដោយគ្មានការអនុញ្ញាត»។
ជាមួយគ្នានេះ លោក ប្រាក់ វិសាល នាយកទីចាត់ការទំនាក់ទំនងសាធារណៈ និងប្រតិបត្តិការអន្តរជាតិនៃសាលាខេត្តព្រះសីហនុ និងជាប្រធានក្រុមការងារគ្រប់គ្រងតំបន់ឆ្នេរខេត្តព្រះសីហនុ ប្រាប់ភ្នំពេញប៉ុស្តិ៍ថា ជាការពិត ក្នុងរយៈកាលកន្លង មកនេះនៅក្នុងខេត្តព្រះសីហនុ មានករណីទន្ទ្រានកាន់កាប់ដីសាធារណៈរបស់រដ្ឋ តាមរយៈការចាក់ដីលុបយកដីចំណីឆ្នេរសមុទ្រ បឹង ព្រែក និងប្រព័ន្ធផ្លូវទឹកជាប់ដៃសមុទ្រ ធ្វើជាកម្មសិទ្ធិឯកជនដោយខុសច្បាប់។ ប៉ុន្តែ អាជ្ញាធរខេត្តបានរួមគ្នាការពារទប់ស្កាត់ និងដោះស្រាយបានជោគជ័យ។
លោកថ្លែងថា៖ «អាជ្ញាធរខេត្តយើងបានប្រឹងប្រែងអនុវត្តច្បាប់ ដោយបានធ្វើការដោះស្រាយទំនាស់ផង ការពារនិងទប់ស្កាត់បទល្មើសផង ព្រមទាំងបានធ្វើការបង្ក្រាបបទល្មើសបានទាន់ពេលវេលាផងពោលគឺក្នុងពេលបច្ចុប្បន្ននេះ ពុំមានបទល្មើសរំលោភបំពានដីរដ្ឋថ្មីទៀតកើតមាននោះទេ ខណៈសំណុំរឿងវិវាទដីរដ្ឋចាស់ៗជាច្រើន ត្រូវបានដោះស្រាយដោយជោគជ័យជាបន្តបន្ទាប់»៕