ពោធិ៍សាត់ៈ ក្រសួងវប្បធម៌ និងវិចិត្រសិល្បៈគ្រោងយកខេត្តពោធិ៍សាត់ជាខេត្តដំបូងក្នុងការធ្វើពិព័រណ៍សារមន្ទីរ ដោយយកសារមន្ទីរខេត្តពោធិ៍សាត់ ដាក់តាំងវត្ថុបុរាណផ្សេងៗដែលអាចប្រមូលមកពីទូទាំងប្រទេសទាក់ទងជំនឿ និងព្រះពុទ្ធសាសនាសម័យកណ្តាលសម្រាប់ធ្វើពិធីតាំងពិព័រណ៍នៅចុងឆ្នាំ ២០២១។
លោក ឡាច ផេងលី ប្រធានមន្ទីរវប្បធម៌ និងវិចិត្រសិល្បៈខេត្តពោធិ៍សាត់ បានឱ្យដឹងថា មន្ត្រីជំនាញមន្ទីរវប្បធម៌ និងមន្ត្រីជំនាញបុរាណវិទ្យានៅសារមន្ទីរជាតិខេត្តពោធិ៍សាត់កំពុងប្រមូលវត្ថុបុរាណចម្រុះដែលមាន ចម្លាក់ថ្ម ចម្លាក់ឈើ ព្រះពុទ្ធរូប និងវត្ថុដែលសេសសល់ពីបុរាណផ្សេងៗទៀតពីទីកន្លែងនានាទូទាំងខេត្ត ដើម្បីរៀបចំយកទៅដាក់ក្នុងសារមន្ទីរខេត្តពោធិ៍សាត់។
លោក ផេងលី ថ្លែងថា៖ «មកដល់ពេលនេះ សម្រាប់ខេត្តពោធិ៍សាត់ យើងយកបានផ្តែ ថ្មភក់ ព្រះពុទ្ធរូប ថ្មសម័យកណ្តាល សម័យអង្គ មុនសម័យអង្គ សរុបបាន ៧០០ ដុំ។ វាមានការបាក់បែកច្រើន ហើយយើងប្រមូលផ្តុំជ្រើសរើសតាមស្រុកផ្សេងៗ ហើយការប្រមូលផ្តុំហ្នឹងធ្វើអស់រយៈពេលជាច្រើនឆ្នាំហើយ»។
លោក មីលីយ៉ា សុវត្ថិធី អនុប្រធានមន្ទីរវប្បធម៌ និងវិចិត្រសិល្បៈទទួលបន្ទុកសារមន្ទីរជាតិ ខេត្តពោធិ៍សាត់ បានឱ្យដឹង ថា វត្ថុបុរាណ និងរូបសមុច្ច័យ ដែលត្រូវត្រៀមសម្រាប់ដាក់តាំងពិព័រណ៍នៅចុងឆ្នាំ ២០២១ គឺភាគច្រើនប្រមូលមកពីតាមបណ្តាវត្តអារាមនានា។ ប៉ុន្តែមុនសម្រេចយកត្រូវរៀបចំបញ្ជីសារពើភណ្ឌដើម្បីបញ្ជាក់ឱ្យច្បាស់ពីទ្រព្យសម្បត្តិរដ្ឋ ឬទ្រព្យសម្បត្តិរបស់វត្តហើយ ទើបប្រមូលយកមកដាក់សារមន្ទីរដើម្បីធ្វើការជួសជុលមុនដាក់តាំងពិព័រណ៍។
លោក សុវត្ថិធី បានថ្លែងថា៖ «វត្ថុបុរាណភាគច្រើននៅក្នុងវត្តដោយសារតែប្រជាពលរដ្ឋ និងលោកគ្រូព្រះចៅអធិការវត្តប្រទះឃើញចៃដន្យ លោកយកមកទុកនៅក្នុងកន្លែងសក្ការៈអ៊ីចឹងទៅ។ យើងអត់ទាន់បានចុះបញ្ជីទេ ហេតុនេះយើងត្រូវរៀបចំធ្វើបញ្ជីសារពើភណ្ឌ និងកំណត់ត្រាថ្មីម្តងទៀត»។
បើតាមលោក សុវត្ថិធី ការដាក់ឱ្យដំណើរការសារមន្ទីរត្រូវការបច្ចេកទេសច្រើន។ ទី១ ត្រូវមានបច្ចេកទេសសម្រាប់ការដាក់តាំងវត្ថុបុរាណដោយត្រូវមានជើងទម្រត្រូវមានផែនទីសម្រាប់ឱ្យទេសចរចូលមើល។ ក្រៅពីនេះក៏ត្រូវមានលក្ខណសម្បត្តិផ្សេងទៀតសម្រាប់ការគាំទ្រដូចជា ការផ្ដល់សេវាកម្មផងដែរ។ លោកក៏បានប្រាប់ថា ព្រះពុទ្ធសាសនាសម័យកណ្តាលគឺចាប់ផ្តើម ក្រោយពីអាណាចក្រអង្គរដួលរលំពោលគឺនៅក្នុងសម័យព្រះបាទត្រសក់ផ្អែមដែលចាប់យកសាសនាព្រះពុទ្ធជាសាសនារបស់រដ្ឋប្តូរចេញពីព្រហ្មញ្ញសាសនា។
លោកថ្លែងថា៖ «កាលមុនប្រទេសយើងយកព្រហ្មញ្ញសាសនាជាសាសនារបស់រដ្ឋ។ ដល់ពេលព្រះពុទ្ធសាសនាទៅជាសាសនារបស់រដ្ឋ វាមានពេលវេលា និងប្រវត្តិសាស្ត្រដែលបានកត់ត្រា តាមរយៈការសាងសង់ជាបដិមា ព្រះវិហារ ការសាងសង់គ្រឿងសក្ការបូជាផ្សេងៗទៀតពាក់ព័ន្ធជាមួយព្រះពុទ្ធសាសនាហ្នឹង»។
ចំណែករឿងជំនឿលោក សុវត្ថិធី បញ្ជាក់ថា កម្ពុជាមានជំនឿច្រើនមិនមែនត្រឹមតែព្រហ្មញ្ញសាសនា និងព្រះពុទ្ធសាសនានោះទេ។ មុនព្រហ្មញ្ញសាសនាចូលមកកម្ពុជាក៏បានកាន់សាសនាផ្សេងៗទៀត ដូចជា ជីវចលសាសនា ជួរសំបួរ ព្រលឹង អារក្ស អ្នកតា មេបា ជាដើម។
លោក ឆាយ វិសុទ្ធ ប្រធាននាយកដ្ឋានសារមន្ទីរជាតិបានឱ្យដឹងថា គម្រោងពិព័រណ៍និយាយពីជំនឿ និងព្រះពុទ្ធសាសនាសម័យកណ្តាលនេះ ដើម្បីញែកវត្ថុបុរាណដាក់តាំងពិព័រណ៍ឱ្យនៅដោយឡែកពីគ្នា ងាយស្រួលសម្រាប់ភ្ញៀវទេសចរទៅទស្សនាបានសម្បូរបែបពីខេត្តមួយទៅខេត្តមួយទៀត កុំឱ្យស្ទួនគ្នា។
លោក វិសុទ្ធ ថ្លែងថា៖ «ដើម្បីទាក់ទាញភ្ញៀវទេសចរជាតិ និងអន្តរជាតិឱ្យចូលទស្សនាតាមគម្រោងយើង [ចង់បាន]។ បើឆ្លងកាត់កំពង់ឆ្នាំងមានសារមន្ទីរមួយដែលប្លែកនិយាយតែរឿងក្អមឆ្នាំងឧទាហរណ៍អ៊ីចឹងទៅ។ ទៅដល់ពោធិ៍សាត់ និយាយតែរឿងសម័យកណ្តាលអ៊ីចឹងទៅ ហើយទៅដល់បន្ទាយមានជ័យបាត់ដំបងមានអីប្លែកពីហ្នឹងទៀតអ៊ីចឹងទៅ» ។
បើតាមលោក ឆាយ វិសុទ្ធ ការចាប់ផ្តើមដំបូងគឺសម្រេចយកខេត្តពោធិ៍សាត់មុនគេក្នុងការដាក់តាំងពិព័រណ៍និយាយពីសម័យកណ្តាល រីឯខេត្តផ្សេងៗទៀតនឹងត្រូវធ្វើការរៀបចំធ្វើតាមក្រោយ។
លោកថ្លែងថា៖ «យើងចង់ចាប់ផ្តើមពីខេត្តពោធិ៍សាត់មុនដោយយើងយល់ថាជាទីតាំងមួយសំខាន់សម្រាប់សម័យកណ្តាល ហើយសម័យកណ្តាលអត់សូវមានព័ត៌មានច្រើនទេសម្រាប់ក្មេងៗជំនាន់ក្រោយ។ ដូច្នេះយើងចង់លើកយកទី១ គឺជំនឿ និងព្រះពុទ្ធសាសនាសម័យកណ្តាលមកនិយាយសិន ទើបគិតពីសក្តានុពលខេត្តផ្សេងៗទៀត»៕