ព្រះវិហារៈ រដ្ឋបាលខេត្ដព្រះវិហារកំពុងរៀបចំរបាយការណ៍ដាក់មកក្រសួងបរិស្ថានដើម្បីស្នើដាក់បញ្ចូលដែនជម្រកសត្វព្រៃព្រះរកា និងដែនជម្រកសត្វព្រៃឆែបជាដែនជម្រកសត្វព្រៃតែ ១ ឈ្មោះថា «ដែនជម្រកសត្វព្រៃ ព្រះរកាឆែប» វិញ ដើម្បីងាយស្រួលក្នុងការគ្រប់គ្រងព្រោះដែនជម្រកនេះសម្បូរដោយធនធានធម្មជាតិសំខាន់ៗដូចជាព្រៃឈើ និងសត្វព្រៃ ជាពិសេសសត្វត្មាតជាដើម។
លោក ស៊ូ សិរី អភិបាលរងខេត្តព្រះវិហារថ្លែងប្រាប់ភ្នំពេញប៉ុស្ដិ៍កាលពីថ្ងៃទី ១១ សីហា ថា ក្រោយពីកិច្ចប្រជុំរួមនៅថ្នាក់ខេត្ដស្តីពីការពិនិត្យការស្នើសុំបញ្ចូលដែនជម្រកសត្វព្រៃព្រះរការ និងដែនជម្រកសត្វព្រៃឆែបទៅជាដែនជម្រកសត្វព្រៃតែ ១ ជាឈ្មោះ «ដែនជម្រកសត្វព្រៃ ព្រះរកាឆែប» កាលពីថ្ងៃទី ១០ ខែសីហា ក្រុមការងារបានឯកភាពទាំងស្រុងលើការច្របាច់បញ្ចូលគ្នា តំបន់ការពារទាំង ២ នេះមកជាតំបន់ការពារធម្មជាតិតែមួយ។
លោកថ្លែងថា៖ «កន្លងទៅការគ្រប់គ្រងតំបន់ដែនជម្រកសត្វព្រៃទាំង ២ នេះហាក់បីដូចជានៅដាច់ដោយឡែកពីគ្នា ហើយធនធានមនុស្សយើងនៅក្នុងខេត្ដក៏មានតិចដូច្នេះជាគោលការណ៍ ដើម្បីកាត់បន្ថយការចំណាយទាំងធនធានមនុស្ស និងធនធានថវិកា ការដាក់បញ្ចូលគ្នាបែបនេះគឺជាការល្អក្នុងការគ្រប់គ្រង»។
លោក ស៊ូ សិរី បានឱ្យដឹងថា តំបន់ដែនជម្រកសត្វព្រៃទាំង ២ នេះមានទំហំសរុបជាង ២៨ ម៉ឺនហិកតា និងមានមន្ដ្រីឧទ្យានុរក្សតែជាង ២០ នាក់ប៉ុណ្ណោះ កំពុងការពារនៅតំបន់នេះ។
ដែនជម្រកសត្វព្រៃទាំងនេះ សម្បូរទៅដោយធនធានធម្មជាតិ និងសត្វព្រៃ។ ពលរដ្ឋរស់នៅក្នុងសហគមន៍នៃតំបន់នេះបានប្រកបរបរចិញ្ចឹមជីវិតពីការប្រមូលអនុផលព្រៃឈើផ្សេងៗពីដែនជម្រកសត្វព្រៃទាំង ២ នេះ។
លោកបន្ថែមថា តំបន់ទាំង ២ នេះនៅពេលមិនទាន់ដាក់បញ្ចូលជាតំបន់តែ ១ មន្ដ្រីឧទ្យានុរក្សការពារតំបន់នេះបានកំណត់តំបន់ការពារដាច់ដោយឡែកពីគ្នាដែលមានការលំបាកក្នុងការគ្រប់គ្រង។ ប៉ុន្ដែបើមានការដាក់បញ្ចូលគ្នាតែ ១ មន្ដ្រីឧទ្យានុរក្សនឹងអាចគ្រប់គ្រងតំបន់នេះរួមគ្នាបានល្អឡើងវិញ។
លោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារបានថ្លែងកាលពីថ្ងៃទី ១១ សីហា ថា បច្ចុប្បន្នក្រុមការងារកំពុងបន្ដចុះវាស់វែងកំណត់ទីតាំងតំបន់ដែនជម្រកទាំង ២ ឱ្យបានច្បាស់លាស់ថែមទៀត ទើបធ្វើការបូកសរុបរបាយការណ៍ដាក់មកក្រសួងបរិស្ថាន ដើម្បីស្នើរដ្ឋាភិបាលដាក់បញ្ចូលតំបន់នេះមកជាតំបន់តែ ១។
លោកថ្លែងថា៖ «យើងកំពុងបន្តប្រមូលព័ត៌មានបន្ថែមទៀតនៅចំណុចមួយចំនួនក្នុងតំបន់ដែនជម្រកសត្វព្រៃឆែប ដែលក្នុងតំបន់នេះចំណុចមួយចំនួនមិនទាន់មានព័ត៌មានច្បាស់លាស់នៅឡើយ។ ដូច្នេះការងារនេះ យើងធ្វើឱ្យច្បាស់ដើម្បីកុំឱ្យមានការបាត់បង់»។
បើតាមលោក ច័ន្ទសុជាតិ តំបន់ដែនជម្រកសត្វព្រៃទាំង ២ នេះសម្បូរទៅដោយព្រៃឈើ សត្វព្រៃ និងជីវចម្រុះជាច្រើនដែលមានសក្ដានុពលផ្នែកវិស័យទេសចរណ៍ជាពិសេសមានសត្វត្មាតដ៏កម្រ និងពពួកសត្វព្រៃផ្សេងៗទៀត៕