ព្រះវិហារៈ អាជ្ញាធរខេត្តព្រះវិហារបានប្រកាសជ្រើសរើសអ្នកស័្មគ្រចិត្តចូលធ្វើជាប្រជាការពារភូមិបន្ថែមទៀត ដើម្បីបង្កើនចំនួនប្រជាការពារភូមិឱ្យបាន ៤ ពាន់នាក់ សម្រាប់ជួយការងាររបស់នគរបាល ក្នុងការការពារសុខសុវត្ថិភាពជូនពលរដ្ឋ។ មន្ត្រីសង្គមស៊ីវិលបង្ហាញការគាំទ្រ ប៉ុន្តែស្នើឱ្យការ ជ្រើសរើសប្រជាការពារភូមិនោះត្រូវស្វែងរកអ្នកមានឆន្ទៈពិត និងមានចរិតសុភាពរាបសា។
លោក អ៊ុន ចាន់ដា អភិបាលខេត្តព្រះវិហារប្រាប់ភ្នំពេញប៉ុស្ដិ៍ម្សិលមិញថា បច្ចុប្បន្ននៅខេត្តព្រះវិហារ មានប្រជាការពារភូមិជិត ៣ ពាន់ហើយ។ ប៉ុន្តែឥឡូវត្រូវការជ្រើសរើសបន្ថែមទៀតឱ្យបាន ៤ ពាន់នាក់ ដើម្បីអាចដាក់ពង្រាយឱ្យបានគ្រប់ភូមិទាំងអស់ ដែលក្នុងមួយភូមិត្រូវមានប្រជាការពារភូមិយ៉ាងតិចចំនួន ១២ នាក់ ស្របតាមគោលការណ៍ណែនាំរបស់ក្រសួងមហាផ្ទៃ។
លោកបញ្ជាក់ថា ការជ្រើសរើសប្រជាការពារភូមិបន្ថែមនេះ គឺធ្វើឡើងដោយការស្ម័គ្រចិត្ត ហើយពុំអាចទទួលបានប្រាក់ខែដូចមន្ត្រីប៉ូលិសឡើយ ដែលការជ្រើសរើសនេះ មិនមែនជាការជ្រើសរើសទាហាននោះទេ។
លោក អ៊ុន ចាន់ដា បន្ថែមថា៖ «ឥឡូវហ្នឹងកំពុងដាក់ផែនការឱ្យអភិបាលស្រុកនិងអធិការស្រុក ពិនិត្យមើលភូមិណាដែលមិនទាន់មាន ត្រូវបង្កើតឱ្យមាន ហើយបំពាក់ឯកសណ្ឋានជូនគាត់ ហើយនិង [ឱ្យប្រជាការពារនោះ] ពង្រឹងការងារសហការជាមួយនឹងកម្លាំងសមត្ថកិច្ចនគរបាលយុត្តិធម៌»។
បើតាមអភិបាលខេត្តរូបនេះ គឺប្រជាការពារភូមិ ដែលកំពុងមានស្រាប់នៅក្នុងខេត្តព្រះវិហារ បានជួយសម្រួលការងាររបស់សមត្ថកិច្ច ដូចជាជួយរៀបចំសណ្ដាប់ធ្នាប់តាមដងផ្លូវ និងការទប់ស្កាត់កុំឱ្យមានក្មេងទំនើងវាយតប់គ្នា នៅពេលក្នុងភូមិត្រូវរៀបចំពិធីបុណ្យទានឬមង្គលការ។ កន្លងមក នៅពេលភូមិណាមួយត្រូវរៀបចំកម្មវិធីបុណ្យនិងមង្គលការចាប់ពី ២ ទៅ ៣ កន្លែងក្នុងពេលតែមួយ គឺភូមិនោះតែងខ្វះខាតកម្លាំងប៉ូលិសដើម្បីដាក់ពង្រាយការពារសណ្ដាប់ធ្នាប់ និងសុវត្ថិភាព។
លោកថ្លែងថា៖ «គាត់អត់អាចមានសិទ្ធិទៅចាប់ចងអីគេទេគឺថាគាត់ចូលរួមសហការជាកម្លាំងរៀបចំសន្ដិសុខសណ្ដាប់ធ្នាប់សាធារណៈ ហើយនិងផ្ដល់ព័ត៌មានមកអាជ្ញាធរមានសមត្ថកិច្ច ដើម្បីឱ្យអាជ្ញាធរមានសមត្ថកិច្ចមានវិធានការតាមផ្លូវច្បាប់ នៅពេលមានបទល្មើសឬបញ្ហាអ្វីមួយនៅមូលដ្ឋាន»។
ក្រសួងមហាផ្ទៃបានបង្កើតឱ្យមានក្រុមប្រជាការពារភូមិកាលពីឆ្នាំ ២០១០ ដើម្បីពង្រឹងសន្ដិសុខ និងសណ្ដាប់ធ្នាប់សាធារណៈឱ្យមានភាពគត់មត់ល្អគ្រប់ច្រកល្ហកនៅទូទាំងប្រទេស ក្នុងបំណងធ្វើឱ្យភូមិឃុំមាន សុវត្ថិភាព គ្មានសកម្មភាព លួច ឆក់ ប្លន់គ្រប់ប្រភេទ។ គ្មានការផលិត ការចែកចាយ និងប្រើប្រាស់គ្រឿង ញៀនខុសច្បាប់។ គ្មានអំពើអនាចារ ការជួញដូរស្ដ្រី និងកុមារ និងអំពើហិង្សាក្នុងគ្រួសារ គ្មានក្មេងទំនើង និងគ្មានការលេងល្បែងស៊ីសងគ្រប់ប្រភេទ ការប្រើប្រាស់អាវុធខុសច្បាប់ និងបទល្មើសផ្សេងៗ។
ទោះជាយ៉ាងណា កន្លងមកធ្លាប់មានការរិះគន់ជាបន្តបន្ទាប់ ស្របពេលគេមើលឃើញថា សមត្ថកិច្ចតែងប្រើប្រាស់កម្លាំងប្រជាការពារភូមិ ចេញធ្វើសកម្មភាពបង្ក្រាបដោយហិង្សា នៅពេលមានក្រុមអ្នកតវ៉ាជុំវិញរឿងដីធ្លី។
លោក ឡោ ចាន់ មន្ត្រីសម្របសម្រួលសមាគមការពារសិទ្ធិមនុស្ស (អាដហុក) ប្រចាំខេត្តរតនគិរី គាំទ្រចំពោះការបង្កើតកម្លាំងប្រជាការពារភូមិបន្ថែមនៅក្នុងព្រះវិហារនេះ។ ប៉ុន្តែលោកស្នើសុំឱ្យការជ្រើសរើសយកប្រជាការពារភូមិ គឺត្រូវសម្រិតសម្រាំងយកអ្នកណាដែលមានឆន្ទៈពិតប្រាកដ ជាពិសេសអ្នកដែលធ្លាប់ចូលរួមធ្វើកិច្ចការងារក្នុងសង្គម។
លោកថា៖ «ដូចដែលខ្ញុំបានបញ្ជាក់អ៊ីចឹង បើមានការឆ្លងកាត់ការប្រកួតប្រជែង ឬត្រូវជ្រើសរើសរកអ្នកមានឆន្ទៈឬអ្នកមានចំណេះដឹងគ្រប់គ្រាន់នោះ គឺជារឿងមួយល្អប្រសើរ ហើយខ្ញុំក៏គាំទ្រក្នុងការជ្រើសរើសនោះដែរ»។
ប៉ុន្តែលោកព្រួយបារម្ភថា ប្រសិនបើការជ្រើសរើសប្រជាការពារភូមិ ប៉ះចំអ្នកដែលមានចរិតឆេវឆាវនិងគ្មានការអប់រំគ្រប់គ្រាន់ គឺអាចនាំឱ្យមានអសន្តិសុខក្នុងភូមិទៅវិញទេ ព្រោះនៅពេលមានរឿងរ៉ាវកើតឡើងហើយប្រើពាក្យសម្ដីធ្ងន់ៗជាមួយប្រជាពលរដ្ឋ គឺជននោះអាចនឹងឈានទៅប្រើប្រាស់អំពើហិង្សា៕