សីហនុៈ រដ្ឋបាលខេត្ដព្រះសីហនុកំពុងមានកិច្ចសហប្រតិបត្ដិការគ្រប់ជ្រុងជ្រោយ (MOU) ជាមួយខេត្ដ-ក្រុងរបស់ចិនចំនួន ១៦ ដើម្បីជំរុញ និងលើកទឹកចិត្ដលើការវិនិយោគ ទេសចរណ៍ វប្បធម៌ អប់រំ និងកីឡារវាងប្រទេសទាំង ២ បើទោះបីជាចាប់តាំងពីមានការផ្ទុះរាលដាលនៃជំងឺកូវីដ ១៩ មក ជនជាតិចិនដែលមកស្នាក់នៅ និងមកទេសចរណ៍ក្នុងខេត្តជាប់មាត់សមុទ្រមួយនេះមានការធ្លាក់ចុះយ៉ាងខ្លាំងយ៉ាងណាក្តី។
នេះបើតាមលោក គួច ចំរើន អភិបាលខេត្ដព្រះសីហនុថ្លែងក្នុងសន្និសីទសារព័ត៌មានស្តីពីវឌ្ឍនភាព និងទិសដៅការងារបន្តរបស់រដ្ឋបាលខេត្តព្រះសីហនុនៅទីស្តីការគណៈរដ្ឋមន្ត្រីកាលពីថ្ងៃអង្គារ។ លោកថ្លែងថា៖ «កិច្ចសហប្រតិបត្ដិការរបស់រដ្ឋបាលខេត្ដព្រះសីហនុជាមួយនឹងរដ្ឋាភិបាលចិន នាពេលកន្លងទៅស្របទៅតាមគោលការណ៍កិច្ចសហប្រតិបត្ដិការរបស់កម្ពុជា និងកិច្ចសហប្រតិបត្ដិការគ្រប់ជ្រុងជ្រោយនៃខេត្ដរបស់យើងក៏បានធ្វើកិច្ចព្រមព្រៀង (MOU) ខេត្ដ-ក្រុងបងប្អូន ឬក៏ខេត្ដក្រុងសម្ព័ន្ធមេត្រីភាព។ យើងមាន ១៦ ខេត្ដ-ក្រុងដែលបានភ្ជាប់ទំនាក់ទំនងជាមួយនឹងរដ្ឋបាលខេត្ដព្រះសីហនុរបស់យើងរួចមកហើយ»។
លោក ចំរើន ថ្លែងថា នេះគឺជាទំនាក់ទំនង ដើម្បីជំរុញ និងលើកទឹកចិត្ដសម្រាប់ការវិនិយោគ ទេសចរណ៍ វប្បធម៌ កីឡា អប់រំ ដែលជាគោលការណ៍គ្រឹះនៃកិច្ចសហប្រតិបត្ដិការរបស់កម្ពុជាក៏ដូចជារដ្ឋបាលខេត្ដព្រះសីហនុក្នុងការភ្ជាប់លក្ខខណ្ឌចែករំលែកគ្នាទៅវិញទៅមក។
លោកថ្លែងថា៖ «គេមានអ្វីទាក់ទងនឹងបញ្ហាទាំងអស់នេះ (ការវិនិយោគ ទេសចរណ៍ វប្បធម៌ កីឡា អប់រំ) អាចចែករំលែកយើងបាន។ យើងមានអ្វីទាក់ទងនឹងបញ្ហាទាំងអស់នោះយើងក៏អាចចែករំលែកទៅគេវិញបាន នេះជាគោលការណ៍នៃខេត្ដ-ក្រុងបងប្អូន ព្រមជាមួយនឹងការអនាម័យ បរិស្ថាន ការអភិវឌ្ឍទីក្រុងគឺយើងតែងតែបានផ្សារភ្ជាប់គ្នាយ៉ាងដូច្នេះ»។
លោក គួច ចំរើន បានឲ្យដឹងថា តាមរយៈកិច្ចសហប្រតិបត្ដិការបែបនេះហើយ បានជាខេត្ដព្រះសីហនុមានឱកាសទទួលបាននូវសម្ភារ និងឧបករណ៍ប្រើប្រាស់មួយចំនួនដែលខេត្ដដៃគូរបស់ចិនបានផ្ដល់ឲ្យ។ លោកបញ្ជាក់ថា សម្ភារឧបករណ៍ដែលខេត្ដព្រះសីហនុទទួលបានមានដូចជាថ្នាំពេទ្យសម្ភារពេទ្យដើម្បីទប់ទល់ និងប្រើប្រាស់ប្រឆាំងនឹងជំងឺកូវីដ១៩ និងភាគីខេត្ដដៃគូ ក៏បានផ្ដល់គ្រូពេទ្យស្ម័គ្រចិត្ដជាបន្តបន្ទាប់មកកាន់ខេត្ដព្រះសីហនុផងដែរ។
បើតាមលោក ចំរើន ក្រៅពីនោះខេត្ដ-ក្រុងជាដៃគូទាំង ១៦ និងខេត្ដព្រះសីហនុក៏មានការលើកទឹកចិត្ដ និងការគាំពារទៅលើការវិនិយោគលើវិស័យទេសចរណ៍ ដើម្បីឲ្យអ្នកទេសចរចិនមកលេងខេត្ដព្រះសីហនុ និងកម្ពុជាទៅលេងខេត្ដ-ក្រុងនៅប្រទេសចិនវិញ។
លោកបញ្ជាក់ថា៖ «ប៉ុន្ដែចំពោះមុខប្រជាជនក្នុងខេត្ដព្រះសីហនុទៅលេងប្រទេសចិនមានតិចទេតែប្រជាជនចិនមកលេងខេត្ដព្រះសីហនុច្រើន ហើយការមកនេះគឺចិនបានរួមចំណែកសម្រាប់សកម្មភាពសេដ្ឋកិច្ចរបស់ខេត្ដព្រះសីហនុក៏ដូចជាជួយជំរុញកំណើនសេដ្ឋកិច្ចប្រទេសកម្ពុជាបានជាច្រើនផងដែរ»។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងក្នុងសន្និសីទនេះដែរថា ខេត្ដព្រះសីហនុគឺជាខេត្ដពហុវិស័យដែលរាជរដ្ឋាភិបាលបានកំណត់ជាប៉ូលសេដ្ឋកិច្ចពិសេសពហុបំណងទី ៣ របស់ប្រទេសកម្ពុជា។ ក្នុងនោះរាជរដ្ឋាភិបាលក៏មានចក្ខុវិស័យទៅមុខទៀតក្នុងការអភិវឌ្ឍខេត្ដនេះផងដែរ។
លោកថា៖ «ម្សិលមិញ (ទី ៨ ខែមិថុនា) លោកឧបនាយករដ្ឋមន្ដ្រី ហោ ណាំហុង បានដឹកនាំកិច្ចប្រជុំផ្ទៃក្នុង គណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ដែលនេះជាសារមួយដ៏ល្អស្ដីពីភាពជាដៃគូយុទ្ធសាស្ដ្រ គ្រប់ជ្រុងជ្រោយ និងសហគមន៍វាសនារួមរវាងកម្ពុជា និងចិន»។
បើតាមលោក គួច ចំរើន បច្ចុប្បន្នជនជាតិចិនមកលេងខេត្ដព្រះសីហនុមានការថយចុះក្នុងដំណាក់កាលនៃការរីករាលដាលជំងឺកូវីដ ១៩ ដោយបច្ចុប្បន្នមានជនជាតិចិនប្រហែល ១៥ ០០០ នាក់ កំពុងស្នាក់នៅក្នុងខេត្ដជាប់មាត់សមុទ្រមួយនេះ ខណៈកាលពីមុនការរីករាលដាលជំងឺកូវីដ ១៩ មានជនជាតិចិនទាំងស្នាក់នៅ និងទេសចរជាង ២ លាននាក់។
លោកបញ្ជាក់ថា៖ «អ៊ីចឹងក្នុងពេល (មានការផ្ទុះជំងឺកូវីដ ១៩) នោះប្រជាជនចិននៅក្នុងខេត្ដព្រះសីហនុភាគច្រើនបានធ្វើដំណើរទៅស្រុកកំណើតរបស់គាត់ដើម្បីចូលរួមកម្មវិធីចូលឆ្នាំចិន។ ឯអ្នកដែលបន្តរស់នៅគឺជាអ្នកដែលមានការពាក់ព័ន្ធទាក់ទងជាមួយនឹងទ្រព្យសម្បត្ដិ ការគ្រប់គ្រងក្រុមហ៊ុនផ្សេងៗជាដើមដែលមានចំនួនតិចប៉ុណ្ណោះជាអ្នកមានភារកិច្ច។ អ៊ីចឹងឥឡូវនេះ បើនិយាយពីចំនួនប្រជាជនចិននៅសល់ដែលកំពុងរស់នៅប្រហែលជា ១៥ ០០០ នាក់»៕