ទិដ្ឋភាពក្រុងព្រះសីហនុកាលពីខែធ្នូ ឆ្នាំ ២០២០។ ហុង មិនា
ព្រះសីហនុៈ រដ្ឋបាលខេត្តព្រះសីហនុបានប្រកាសផ្អាកការធ្វើដំណើរចេញ-ចូលខេត្តនេះជាបណ្តោះអាសន្ន ដោយលើកលែងតែរថយន្តដឹកទំនិញ និងរថយន្តសង្គ្រោះបន្ទាន់ ដែលការផ្អាកនេះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន អំពាវនាវឱ្យប្រជាពលរដ្ឋក្នុងខេត្តព្រះសីហនុកុំចល័តចេញក្រៅខេត្ត ឬក្រុង បើសិនមិនមានការចាំបាច់ និងអ្នកនៅខេត្តផ្សេងក៏កុំចូលទៅក្នុងខេត្តនេះផងដែរ។
យោងតាមរដ្ឋបាលខេត្តព្រះសីហនុឱ្យដឹងពីម្សិលមិញថា ក្នុងរយៈពេលប៉ុន្មានថ្ងៃកន្លងមកនេះពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ មានករណីឆ្លងជំងឺកូវីដ ១៩ ដល់មនុស្សដែលកំពុងរស់នៅ ធ្វើការ និងប្រកបអាជីវកម្មនៅខេត្តព្រះសីហនុក្នុងចំនួនមួយគួរឱ្យព្រួយបារម្ភ។
ដើម្បីទប់ស្កាត់ការឆ្លងរាលដាលជំងឺកូវីដ ១៩ ទៅក្នុងសហគមន៍ រដ្ឋបាលខេត្តសូមផ្អាកការធ្វើដំណើរចេញ-ចូលខេត្តព្រះសីហនុជាបណ្តោះអាសន្នលើកលែងតែរថយន្តដឹកទំនិញ និងសង្គ្រោះបន្ទាន់។ ការផ្អាកនេះគឺដើម្បីទុកលទ្ធភាពឱ្យរដ្ឋបាលខេត្តគ្រប់គ្រងបាននូវអ្នកឆ្លងជំងឺកូវីដ ១៩ អ្នកមានការពាក់ព័ន្ធជាមួយនឹងអ្នកជំងឺ និងទីតាំង ដែលមានការពាក់ព័ន្ធដើម្បីកំណត់ជាមណ្ឌលចត្តាឡីស័កឱ្យបានចប់សព្វគ្រប់សិន។
លោក ហ៊ុន សែន បានថ្លែងតាមរយៈសារជាសំឡេងកាលពីយប់ថ្ងៃទី ០៣ ខែមីនា ដោយលោកបានស្នើឱ្យអាជ្ញាធរខេត្តព្រះសីហនុធ្វើការពិនិត្យទៅលើផែនការមួយចំនួន បន្ទាប់ពីមានការកើនឡើងនូវអ្នកវិជ្ជមានកូវីដ ១៩ នៅក្នុងខេត្តនេះ។
លោកថ្លែងថា៖ «ផែនការបន្ទាន់ដែលត្រូវធ្វើគឺការបិទចរាចរណ៍មនុស្សចេញពីខេត្តព្រះសីហនុទៅកាន់ខេត្តផ្សេង ដោយខិតខំកាត់បន្ថយចំនួនមនុស្សកុំឱ្យចេញក្រៅ ដើម្បីទប់ស្កាត់ការរីករាលដាលទៅកាន់ខេត្តផ្សេង។ ដូចនេះសុំឱ្យប្រជាពលរដ្ឋស្នាក់នៅក្នុងខេត្ត កុំចេញមកក្រៅ»។
លោក ហ៊ុន សែន បន្តថា ផែនការទី២ គឺការចាក់វ៉ាក់សាំងកូវីដ ១៩ ស៊ីណូហ្វាមសម្រាប់អ្នកដែលមានអាយុពី ៥៩ ឆ្នាំចុះក្រោម និងអ្នកដែលមានអាយុពី ៦០ ឆ្នាំឡើងទៅសម្រាប់វ៉ាក់សាំង AstraZeneca ទាំងប្រជាពលរដ្ឋ និងមន្ត្រីមូលដ្ឋានដែលក្រសួងបានបញ្ជូនវ៉ាក់សាំងទាំង ២ ប្រភេទនេះទៅកាន់ខេត្តព្រះសីហនុរួចរាល់ហើយនៅថ្ងៃទី ៤ ខែមីនា។
ជាមួយគ្នានេះដែរលោក ហ៊ុន សែន បានថ្លែងកាលពីថ្ងៃម្សិលមិញក្នុងសន្និសីទសារព័ត៌មាននៅមន្ទីរពេទ្យកាល់ម៉ែត ដោយលោកបានអំពាវនាវទៅដល់ប្រជាពលរដ្ឋនៅក្នុងខេត្តព្រះសីហនុសុំឱ្យនៅទីនោះ និងកុំចល័តចេញក្រៅប្រសិនបើមិនមានការចាំបាច់ណាមួយ។
លោកបញ្ជាក់ថា៖ «យើងមិនអាចបិទក្រុងព្រះសីហនុបានទេ ដោយសារជាទីក្រុងមួយមានកំពង់ផែ ដឹកទំនិញចេញ-ចូល ក៏ប៉ុន្តែសុំឱ្យប្រយ័ត្នប្រយែង។ ខ្ញុំសុំអំពាវនាវដល់ប្រជាពលរដ្ឋ បើគ្មានការចាំបាច់ កុំធ្វើដំណើរទៅខេត្តព្រះសីហនុ ឯអ្នកនៅខេត្តព្រះសីហនុ សុំកុំអាលចាកចេញមកកាន់កន្លែងផ្សេង ព្រោះវាអាចធ្វើឱ្យមានការចម្លងមកតាមផ្លូវជាតិលេខ ៤ អាចឆ្លងទៅខេត្តកែប និងខេត្តកំពត។ សុំឱ្យរក្សាភាពស្ងប់ស្ងាត់នៅទីនោះសិន»។
លោក ហ៊ុន សែន បញ្ជាក់ទៀតថា សម្រាប់នៅទីក្រុងភ្នំពេញ ពិតមែនតែអាជ្ញាធរមានការត្រួតត្រាសភាពការណ៍ ក៏ប៉ុន្តែប្រជាពលរដ្ឋប្រសិនបើគ្មានការចាំបាច់ គួរតែស្ថិតនៅក្នុងផ្ទះសិន ពីព្រោះនៅពេលដែលផ្ទុះឡើងក្នុងសហគមន៍ចំនួនអ្នកឆ្លងក្នុងសហគមន៍បានកើនឡើងរហូតជាង ៤០០ នាក់ក្នុងរយៈពេលខ្លីតែប៉ុណ្ណោះ។
«ជំងឺនេះឆ្លងលឿន ឆ្លងរហ័ស ដែលសុំឱ្យប្រជាពលរដ្ឋយើងមានការប្រយ័ត្នប្រយែង ដើម្បីយើងអាចត្រួតត្រា និងបិទបញ្ចប់ព្រឹត្តិការណ៍នេះ។ យើងមិនបិទក្នុងក្របខ័ណ្ឌទូទាំងប្រទេសទេ ប៉ុន្តែសុំអំពាវនាវសម្រាប់អ្នកនៅក្នុងទីក្រុងភ្នំពេញ ខេត្តកណ្តាល និងខេត្តព្រះសីហនុ ត្រូវចៀសវាងឱ្យបាននូវការចល័តមនុស្ស»។
គិតត្រឹមថ្ងៃទី ៤ ខែ មីនា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ ចំនួន ៩០៩ នាក់ក្នុងនោះអ្នកព្យាបាលជាសះស្បើយចំនួន ៤៨៤ នាក់ និងអ្នកកំពុងសម្រាកព្យាបាលមាន ៤២៥ នាក់៕
វីដេអូ៖
.jpg)
