.jpg)
ទិដ្ឋភាពនៅខេត្តព្រះសីហនុនាពេលបច្ចុប្បន្ន។ រូប សាលាក្រុងព្រះសីហនុ
ព្រះសីហនុៈ ក្រោយមានការរិះគន់ជាបន្តបន្ទាប់ពីតម្លៃស្នាក់នៅតាមសណ្ឋាគារ និងផ្ទះសំណាក់ រដ្ឋបាលខេត្ដព្រះសីហនុបានផ្ដើមបង្គាប់ក្រុមការងារឱ្យចុះទៅស្រង់ស្ថិតិ និងតម្លៃបន្ទប់ដែលអាចឈានទៅកំណត់តម្លៃណាមួយឡើងវិញ។
តាមលិខិតបង្គាប់ការរបស់រដ្ឋបាលខេត្ដព្រះសីហនុចុះទី ២៨ ខែវិច្ឆិកា ឆ្នាំនេះដោយបានដាក់ថា ជាការចាំបាច់បានចាត់តាំងមន្ត្រីឲ្យចុះស្រង់ស្ថិតិ និងតម្លៃបន្ទប់សណ្ឋាគារ ផ្ទះសំណាក់ បឹងហ្គាឡូ រីសត នានា ក្នុងខេត្ដព្រះសីហនុចាប់ពីថ្ងៃទី ២៨ ខែវិច្ឆិកា ដល់ថ្ងៃទី ៣១ ខែធ្នូ ដើម្បីប្រមូលព័ត៌មានសរុបដាក់ទៅថ្នាក់ខេត្ដដើម្បីពិនិត្យ និងសម្រេច។
តាមលិខិតនេះបានបង្គាប់ឲ្យលោក ឱ សារឿន អ្នកនាំពាក្យសាលាខេត្ដព្រះសីហនុ និងជាប្រធានមន្ទីរព័ត៌មានខេត្ដព្រះសីហនុធ្វើជាប្រធានក្រុម រីឯលោក ឆោម វិទូ អនុប្រធានការិយាល័យឧស្សាហកម្មទេសចរណ៍ និងលោក គឹម សម្បត្ដិ មន្ដ្រីក្រុមគេហទំព័រខេត្ដព្រះសីហនុជាសមាជិក។
លោក ឱ សារឿន ប្រធានក្រុមការងារស្រង់ស្ថិតិ និងតម្លៃនេះបានប្រាប់ភ្នំពេញប៉ុស្ដិ៍កាលពីម្សិលមិញថា លោកកំពុងប្រជុំក្រុមការងារថ្មីរបស់លោក ដើម្បីចុះទៅអនុវត្ដផែនការដែលរដ្ឋបាលខេត្ដបានកំណត់។
លោកបន្ដថា៖ «យើងមិនទាន់ដឹងថានឹងទទួលបានលទ្ធផលយ៉ាងណាចំពោះការអនុវត្ដការងារនេះទេ ប៉ុន្ដែពេលនេះយើងកំពុងពិភាក្សាចំពោះការដាក់ផែនការចុះទៅអនុវត្ដ។ បន្ទាប់ពីចុះអនុវត្ដក្រុមការងារយើងនឹងបញ្ចូនលទ្ធផលទៅថ្នាក់ខេត្ដដែលជាអ្នកសម្រេច»។
បើតាមលោក សារឿន ការចុះទៅប្រមូលស្ថិតិ និងតម្លៃតាមសណ្ឋាគារ ផ្ទះសំណាក់នេះ ក្រុមការងារលោកនឹងចាប់ផ្ដើមអនុវត្ដពីសណ្ឋាគារ និងផ្ទះសំណាក់មុនគេ ព្រោះភាគច្រើនជាកន្លែងទេសចរមកស្នាក់នៅ។
ទាក់ទងនឹងសំណួរដែលថាតើបន្ទាប់ពីប្រមូលស្ថិតិរួចខេត្តនឹងមានវិធានការចំពោះតម្លៃឡើងវិញដើម្បីទាក់ទាញភ្ញៀវទេសចរឬយ៉ាងណានោះលោក សារឿន បានឆ្លើយថានេះគ្រាន់តែជាការចុះស្រង់ស្ថិតិរួចបញ្ជូនទៅខេត្ត ឯជំហានបន្ទាប់មិនទាន់ដឹងទេ។
លោកបញ្ជាក់ថា៖ «ក្រុមការងារយើងគ្រាន់តែចុះទៅយកទិន្នន័យដើម្បីដាក់ជូនគណៈអភិបាលជាអ្នកសម្រេចថា តើគួរអនុវត្ដជំហានអ្វីទៅមុខទៀត»។
លោកបន្ថែមថា៖ «ជារឿងពិតណាស់ ពេលខេត្ដមានមូលដ្ឋានច្បាស់លាស់ មានទិន្នន័យប្រាកដ លោកចាំបាច់ត្រូវតែកំណត់តម្លៃណាមួយចេញជាគោលការណ៍ដើម្បីចៀសវាងនូវអាជីវករដែលពួកគាត់ចង់ដំឡើងចង់បញ្ចុះសេរីត្រូវតែមានហើយ»។
បើតាមលោក សារឿន ក្រុមការងារនេះនឹងចុះទៅប្រមូលស្ថិតិនៅក្នុងទីតាំងក្រុងមួយ និងស្រុក ៣ រួមមាន ក្រុងព្រះសីហនុ ស្រុកព្រៃនប់ ស្រុកកំពង់សិលា និងស្រុកស្ទឹងហាវដោយផ្ដើមប្រមូលចាប់ពីកម្រិតតូចទៅមុនគឺផ្ទះសំណាក់ និងសណ្ឋាគារ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងពីសភាពការណ៍ទេសចរណ៍ និងតម្លៃបន្ទប់ស្នាក់នៅសណ្ឋាគារ និងផ្ទះសំណាក់នៅខេត្តព្រះសីហនុកាលពីម្សិលមិញដែរថាការដំឡើងថ្លៃបែបនេះមកពីបញ្ហាកង្វះសណ្ឋាគារ និងផ្ទះសំណាក់ ប៉ុន្តែលោកថាវានឹងកើតឡើងថ្មីនៅឆ្នាំ ២០១៩។
លោកបានថ្លែងថា៖ «សណ្ឋាគារថ្មីៗនឹងកើតឡើងជាង ២ ពាន់បន្ទប់ទៀតនៅខេត្ដព្រះសីហនុក្នុងឆ្នាំ ២០១៩ ខាងមុខនេះមានសណ្ឋាគារផ្កាយបី ១ ផ្កាយបួន ២ និងផ្កាយ ៥ ដល់ទៅ ៧។ អ៊ីចឹងក្នុងឆ្នាំ ២០១៩ យើងមានសណ្ឋាគារ ២៥០០ បន្ទប់ទៀតហើយនឹងមានសណ្ឋាគារច្រើននៅឆ្នាំ ២០២០។ ដូច្នេះចាប់ពីឆ្នាំ ២០១៩ យើងមិនភ័យខ្លាចខ្វះសណ្ឋាគារទៀតទេ»។
ទាក់ទងនឹងបញ្ហាតម្លៃឈ្នួលសណ្ឋាគារនៅខេត្ដកើនឡើងនោះលោក ថោង ខុន បានឲ្យដឹងថាក្រុមការងារអន្ដរក្រសួងកំពុងមានវិធានការដើម្បីដោះស្រាយបញ្ហានេះហើយ។
ដោយបានបកស្រាយតាមកិច្ចសម្ភាសន៍ជាវីដូអូឃ្លីបចំពោះការធ្លាក់ចុះចំនួនភ្ញៀវទេសចរ និងការកើនឡើងស្នាក់នៅនេះលោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ ថ្លែងថាការគ្រប់គ្រងវិស័យទេសចរណ៍ក្នុងខេត្ដព្រះសីហនុអាចនឹងមានបញ្ហាខ្លះដែរ ប៉ុន្ដែមន្ទីរមិនអាចគ្រប់គ្រងបាន ១០០ ភាគរយនៅឡើយ។
លោកបន្តថា៖ «មិនមែនយើងគ្រប់គ្រងមិនបានទេ យើងធ្វើបច្ចុប្បន្នភាពរាល់សប្តាហ៍ ជាពិសេសរបាយការណ៍ប្រចាំខែ និងការចុះត្រួតពិនិត្យប្រចាំថ្ងៃរបស់យើង»។ ប៉ុន្តែលោកបានទទួលស្គាល់ពីការឡើងថ្លៃនៅប៉ុន្មានឆ្នាំចុងក្រោយនេះ។
លោកថ្លែងថា៖ «... ២ឆ្នាំចុងក្រោយនេះយើងទទួលស្គាល់ថា តម្លៃពិតជាមានការកើនឡើងចន្លោះពី ២៥-៣៥ ដុល្លារ សព្វថ្ងៃនេះតម្លៃផ្ទះសំណាក់»។
ដោយឡែកចំពោះតម្លៃជួលសណ្ឋាគារលោកថា គឺអាស្រ័យទៅតាមស្ដង់ដារនៃសណ្ឋាគារនីមួយៗទៅតាមកម្រិត។
លោកថា៖ «តម្លៃវាអាស្រ័យទៅលើស្ដង់ដារផ្កាយពីផ្កាយ ១ ទៅដល់ផ្កាយ ៥ អ៊ីចឹងដែលមានតម្លៃចន្លោះពី ៤០ ដុល្លារតម្លៃទាបបំផុតទៅដល់តម្លៃ ៥០០ ដុល្លារ។ ពេលបុណ្យទាន...តម្លៃសណ្ឋាគារគឺមានការកើនឡើងតម្លៃមិនខ្ពស់ទេ ព្រោះថាតម្លៃស្ដង់ដារសណ្ឋាគារគឺថា ខ្ពស់ស្រាប់ហើយ អ៊ីចឹងគាត់មិនឡើងអីខ្ពស់ទៅដល់ ២០-៣០ ភាគរយអីទេ តែបើផ្ទះសំណាក់គាត់អាចឡើងពី ២០ រហូតទៅដល់ ៦០-៧០ ភាគរយ ប៉ុន្ដែក៏មានផ្ទះសំណាក់ខ្លះគេឡើងថ្លៃតិចតួចពី ១០ ទៅ ២០ ភាគរយដែរ»៕
