ព្រះសីហនុៈ រដ្ឋបាលខេត្ដព្រះសីហនុបានចាប់ផ្ដើមបិទប្រឡាយទឹកកខ្វក់មួយកន្លែងនៅចំណុចឆ្នេរសុខាដើម្បីកុំឲ្យបង្ហូរទឹកកខ្វក់ចូលសមុទ្រដោយផ្ទាល់បន្ដទៀត តែត្រូវបង្វែរឲ្យធ្លាក់ទៅស្ថានីយចម្រោះជាមុនសិនទើបអាចបង្ហូរចូលសមុទ្របាន ខណៈស្ថានីយ ប្រព្រឹត្ដិកម្មចម្រោះទឹកកខ្វក់ ចំនួន ៤ ក្នុងខេត្ដនេះ បានសាងសង់រួចរាល់និងកំពុងដំណើរការសាកល្បង។
ការសម្រេចបិទប្រឡាយទឹកកខ្វក់នេះធ្វើឡើងកាលពីថ្ងៃអង្គារបន្ទាប់ពីស្ថានីយបូមឆ្នេរសុខាបានបំពាក់ម៉ាស៊ីនបូមទឹកកខ្វក់ដើម្បីបង្ហូរទៅស្ថានីយប្រព្រឹត្តិកម្មទឹកកខ្វក់នៅអូរឈើទាលវិញខណៈទើបសាងរួច។
លោក ជាវ វិជ្ជាក់ អភិបាលរង និងជាប្រធានគណៈកម្មការគ្រប់គ្រងប្រព័ន្ធលូប្រឡាយ អូរ ខេត្ដព្រះសីហនុ បានថ្លែងថា៖ «ការសម្រេចបិទទំនប់បង្ហូរទឹកកខ្វក់នៅចំណុចឆ្នេរសុខានេះដើម្បីស្ទាក់ទឹកកខ្វក់តាមប្រឡាយទម្លាក់ទៅស្ថានីយបូមទឹកកខ្វក់ទី ៣ ដោយបូមបញ្ចូលទៅស្ថានីយចម្រោះនៅអូរឈើទាលដើម្បីច្រោះទឹកកខ្វក់មុនឲ្យបង្ហូរទៅសមុទ្រ ព្រោះថា ស្ថានីយបូមទឹកកខ្វក់ទើបសាងសង់រួច និងកំពុងដំណើរការសាកល្បងផងដែរ»។
លោកថា ៖ «គោលបំណងសំខាន់ក្នុងកិច្ចការងារនេះគឺធ្វើយ៉ាងណាឈានទៅកាត់បន្ថយបរិមាណទឹកកខ្វក់ ដែលកន្លងមកបានហូរចូលសមុទ្រផ្ទាល់ឲ្យបានជាអតិបរមាចៀសវាងប៉ះពាល់ដល់ឆ្នេរ និងទឹកសមុទ្រ»។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុបានថ្លែងកាលពីម្សិលមិញថា រដ្ឋបាលខេត្ដបានរំពឹងថា ទៅអនាគតបញ្ហាទឹកកខ្វក់នៅខេត្តព្រះសីហនុនឹងត្រូវដោះស្រាយបាន។
លោកបានបញ្ជាក់ថា ការរៀបចំប្រព័ន្ធគ្រប់គ្រងសំណល់រាវនេះ ត្រូវបានរាជរដ្ឋាភិបាលយកចិត្តទុកដាក់បំផុត ដោយបង្កើតគណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាដឹកនាំដោយឧបនាយករដ្ឋមន្ត្រី លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដើម្បីជួយដោះស្រាយបញ្ហាទឹកកខ្វក់នេះ។
លោកថា៖ «គណៈកម្មាធិការនេះខិតខំប្រឹងប្រែង និងសហការគ្នាល្អជាមួយរដ្ឋបាលខេត្តព្រះសីហនុដោយបានបង្កើតឡើងស្ថានីយបូមទឹកកខ្វក់ចំនួន ៨ ហើយស្ថានីយចំនួន ៤ ត្រូវបានសាងសង់រួច និងមានស្ថានីយចំនួនមួយដែលទើបភ្ជាប់ទុយោរួចកំពុងដំណើការសាកល្បង»។
លោក យស់ ឆោមណារ៉ាឌី អនុរដ្ឋលេខាធិការក្រសួងរៀបចំដែនដីនគរូបនីយកម្មនិងសំណង់ និងជាអ្នកដឹកនាំក្រុមការងារសាងសង់ស្ថានីយបូមទឹកកខ្វក់ទាំងនេះបានប្រាប់ភ្នំពេញប៉ុស្ដិ៍កាលពីពេលថ្មីៗនេះថា ស្ថានីយទាំង ៤ ដែលសាងសង់រួចប្រើសម្រាប់បង្ហូរទឹកកខ្វក់ទៅទម្លាក់ក្នុងអាងចម្រោះដែលមានទំហំ ១៦ ហិកតា។
លោកបានថ្លែងថា៖ «ការបូមចម្រោះទឹកកខ្វក់នេះ គឺដើម្បីធ្វើយ៉ាងណាឱ្យទឹកសមុទ្រនៅខេត្តព្រះសីហនុប្រែជាស្អាតឡើងវិញដើម្បីស្វាគមន៍ដំណើរកម្សាន្តរបស់ពលរដ្ឋក្នុងឱកាសពិធីបុណ្យចូលឆ្នាំថ្មីខាងមុខនេះ»។
ស្ថានីយទាំង ៤ ទីតាំងនេះដែលទើបសង់រួចនេះគឺស្ថិតនៅឆ្នេរឯករាជ្យ ឆ្នេរសុខា អូរស្អាត និងឆ្នេរអូរឈើទាលដោយស្ថានីយទី១ មានទំហំ ១១ ម៉ែត្រ គុណ ១៥ ម៉ែត្រ និងជម្រៅ ៥ ម៉ែត្រ, ស្ថានីយទី២ មានទំហំ ៨ ម៉ែត្រគុណ ១៨ ម៉ែត្រនិងជម្រៅ ៥,៥ ម៉ែត្រ,ស្ថានីយទី៣ មានទំហំ ១០ ម៉ែត្រគុណ ២០ ម៉ែត្រ និងជម្រៅ ៥,៥ ម៉ែត្រ និងស្ថានីយទី៤ មានទំហំ ១១ ម៉ែត្រគុណ ១៥ ម៉ែត្រ និងមានជម្រៅ ៥,២ ម៉ែត្រ។
លោក សុខ សុខុម ប្រធានអង្គការស្រាវជ្រាវជាតិកម្ពុជាប្រចាំខេត្តព្រះសីហនុបានសាទរចំពោះកិច្ចខិតខំប្រឹងប្រែងរបស់ក្រុមកាងារចម្រុះដែលបានខិតខំកែច្នៃ និងពន្លឿន ការសាងសង់ស្ថានីយបូមទឹក និងចម្រោះទឹកកខ្វក់ឲ្យបានរួចរាល់នេះ។
លោកបានបញ្ជាក់ថា៖ «បញ្ហាទឹកកខ្វក់បង្ហូរចូលសមុទ្រដែលជាបញ្ហាស្មុគស្មាញនាពេលកន្លងមកពេលនេះត្រូវបានក្រុមការងារខេត្ដព្រះសីហនុ និងស្ថាប័នពាក់ព័ន្ធទាំងថ្នាក់ជាតិនិងថ្នាក់ក្រោមជាតិប្រឹងប្រែងកែច្នៃបានល្អស្អាតឡើងវិញលែងមានទឹកកខ្វក់ហូរចូលសមុទ្រដូចមុនទៀតហើយនេះជាការខិតខំប្រឹងប្រែងដោះស្រាយបានទាន់ពេល»។
លោកបន្ដថា៖ «បច្ចុប្បន្នទឹកសមុទ្រមានសភាពល្អស្អាតវិញហើយ ដែលអាចឲ្យភ្ញៀវទេសចរមកងូតលេងបានដូចធម្មតាដូច្នេះភ្ញៀវអាចមកលេងកម្សាន្ដដោយសប្បាយរីករាយនាឱកាសបុណ្យចូលឆ្នាំខ្មែរខាងមុខនេះ»៕