.jpg)
អាជ្ញាធរខេត្តរតនគិរី ពេលចុះទៅដំឡើងឧបករណ៍ DTV ចំនួន ១១ គ្រឿង នៅតាមតំបន់ដាច់ស្រយាល ដើម្បីឲ្យសិស្សានុសិស្សប្រមាណជាង ៣ ពាន់នាក់ មានឱកាសសិក្សាពីចម្ងាយ។ រូបថត សហការី
រតនគិរី: អាជ្ញាធរខេត្តរតនគិរីបានដំឡើងឧបករណ៍ DTV ចំនួន ១១ គ្រឿង នៅតាមតំបន់ដាច់ស្រយាល ដើម្បីឲ្យសិស្សានុសិស្សប្រមាណជាង ៣ ពាន់នាក់ មានឱកាសសិក្សាពីចម្ងាយតាមរយៈប្រព័ន្ធផ្សព្វផ្សាយ ឬតាមអ៊ីនធឺណិត ខណៈមន្ត្រីគ្រោងបំពាក់ចំនួនជាង ៤០ គ្រឿងបន្ថែមទៀត នៅតាមតំបន់ដែលមានភាពចាំបាច់បំផុត។
លោក ខាត់ សាម៉ាល់ ប្រធានមន្ទីរអប់រំ យុវជន និងកីឡាខេត្តរតនគិរី បានថ្លែងពីម្សិលមិញថា ការដំឡើងឧបករណ៍ DTV នេះ គឺជាជំហានទី ១ដែលមានចំនួន ១១ ឈុត (ថាសតេជោធីវី+ទូរទស្សន៍ ៣២ អ៊ិញ) សម្រាប់បំពាក់ ១១ កន្លែង ក្នុងស្រុកចំនួន ៦ ដើម្បីឲ្យសិស្សានុសិស្សចំនួន ៣ ១០៤ នាក់ បានសិក្សាពីចម្ងាយតាមទូរទស្សន៍ខ្សែកាប និងប្រព័ន្ធអ៊ីនធឺណិត។ លើសពីនេះ លោកគ្រោងបំពាក់បន្ថែម ៤១ គ្រឿងទៀតនៅតាមតំបន់ដាច់ស្រយាលផ្សេងៗ។
លោកបញ្ជាក់ថា៖ «ការផ្តល់ជូនឧបករណ៍សម្ភារសិក្សាពីចម្ងាយនេះ គឺជាការឆ្លើយតបការបិទសាលាបណ្តោះអាសន្នទាំងរដ្ឋ និងទាំងឯកជនដោយសារតែជំងឺកូវីដ ១៩។ ដូច្នេះនេះជាឱកាសល្អសម្រាប់សិស្សានុសិស្ស ដែលទទួលបានការអប់រំពីចម្ងាយដែលក្រសួងបានបង្កើតកម្មវិធីបង្រៀនតាមបែបឌីជីថល។ ការសិក្សាពីចម្ងាយតាមរយៈប្រព័ន្ធអេឡិចត្រូនិកនេះ ដើម្បីលើកកម្ពស់គុណភាពវិស័យអប់រំតាមប្រព័ន្ធអនឡាញ»។
លោកបន្ដថា នៅទូទាំងខេត្តរតនគិរីមានសាលាចំនួន ២២២ ដោយមានសិស្សសរុបចំនួន ៤០ ៩៣០ នាក់ (ស្រី ១ ០៤៧ នាក់) សិស្សដែលឪពុក-ម្ដាយមានស្មាតហ្វូនចំនួន ៩ ៧៨៧ នាក់ សិស្សដែលឪពុកម្ដាយមានហ្វេសប៊ុក ចំនួន ៨ ៩៩៨ នាក់ និងសិស្សដែលឪពុក-ម្ដាយមាន Telegram ឬWhatsapp ចំនួន ២៤៥ នាក់។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានឲ្យដឹងពីម្សិលមិញថា ក្រសួងអប់រំ ស្វាគមន៍ និងថ្លែងអំណរគុណចំពោះការចូលរួមអនុវត្តដោយការទទួលខុសត្រូវខ្ពស់ពីគណ:អភិបាលខេត្តរតនគិរី និងខេត្តនានា ព្រមទាំងភាគីពាក់ព័ន្ធចំពោះការគាំទ្រដល់ការសិក្សាពីចម្ងាយដែលតម្រូវឲ្យមានការចូលរួមពីគ្រប់តួអង្គពាក់ព័ន្ធតាមស្មារតីលិខិតលេខ ២៣ ចុះថ្ងៃទី ២៤ ខែ មេសា ឆ្នាំ ២០២០ របស់ក្រសួងអប់រំយុវជន និងកីឡា។
យ៉ាងណាក្ដី លោក សុវាចា មិនបានបញ្ជាក់ពីចំនួនបណ្ដាខេត្តផ្សេងៗទៀតដែលនឹងអនុវត្តតាមខេត្តរតនគិរីនោះទេ ដោយលោកបង្វែរឲ្យយោងតាមស្មារតីនៃលិខិតលេខ ២៣ ចុះថ្ងៃទី ២៤ ខែមេសា វិញ។
តាមលិខិតលេខ ២៣ នៃសេចក្ដីណែនាំអំពីការសិក្សាពីចម្ងាយ និងការសិក្សាតាមប្រព័ន្ធអេឡិចត្រូនិក របស់ក្រសួងអប់រំឲ្យដឹងថា ដើម្បីធានាថា សិស្សអាចបន្តរៀនបាននៅតាមផ្ទះ ក្រោមការសម្របសម្រួលពីមាតាបិតា អ្នកអាណាព្យាបាលសិស្ស លោកគ្រូ អ្នកគ្រូ និងគណៈគ្រប់គ្រងសាលារៀន ក្រសួងអប់រំនៅតែបន្តផលិតវីដេអូសម្រាប់ការបង្រៀនពីចម្ងាយ និងតាមប្រព័ន្ធអេឡិចត្រូនិក (E-Learning) សម្រាប់សិស្សរៀននៅតាមផ្ទះ ចាប់ពីមត្តេយ្យសិក្សា បឋមសិក្សា ដល់មធ្យមសិក្សាទុតិយភូមិ និងផ្សព្វផ្សាយឲ្យបានទូលំទូលាយជាងមុន។
សេចក្ដីណែនាំបន្តថា អាសយដ្ឋាន គេហទំព័រ ទំព័រហ្វេសប៊ុក និងទូរទស្សន៍សម្រាប់បម្រើឲ្យការបង្រៀនពីចម្ងាយរួមមានទូរទស្សន៍ជាតិកម្ពុជាទី ២ ទទក ២ ឬTVK2 ដែលជាប៉ុស្ដិ៍ទូរទស្សន៍ទើបតែបង្កើតថ្មីសម្រាប់ការអប់រំ ទូរទស្សន៍ផ្កាយរណបតេជោឌីធីវី (Decho DTV ប៉ុស្ដិ៍ ២២) ទូរទស្សន៍អប្សរា ទូរទស្សន៍ Wiki TV ទូរទស្សន៍ One TV បណ្ដាញ You Tube ផ្លូវការរបស់ក្រសួងគឺ WWW.youtube.com/moeys និងគេហទំព័រជាច្រើនផ្សេងទៀត។
តាមរបាយការណ៍របស់រដ្ឋបាលខេត្តរតនគិរីបានឲ្យដឹងកាលពីថ្ងៃទី ១៣ ឧសភា ថា រដ្ឋបាលខេត្តបានប្រគល់ថាសតេជោធីវី និងក្បាលទូរទស្សន៍ជូនដល់ស្រុកចំនួន ៦ រួមមាន ស្រុកលំផាត់ ៣ គ្រឿង ស្រុកវើនសៃ ២ គ្រឿង ស្រុកបកែវ ២ គ្រឿង ស្រុកអណ្ដូងមាស ១ គ្រឿង ស្រុកតាវែង ២ គ្រឿង និងស្រុកអូរយ៉ាដាវ ១ គ្រឿង សម្រាប់យកទៅបំពាក់នៅតាមសាលាឲ្យសិស្សតាមសហគមន៍បានសិក្សារៀនសូត្រពីចម្ងាយ៕
វីដេអូ៖
