ឧត្តរមានជ័យៈ មន្ត្រីឧទ្យានុរក្សនៅក្នុងស្នាក់ការអូរផាលនៃដែនជម្រកសត្វព្រៃសង្ឃរុក្ខវ័នខេត្តឧត្តរមានជ័យ កំពុងបណ្ដុះកូនឈើប្រណីតឱ្យបាន ១ ម៉ឺនដើម ក្នុងឆ្នាំ ២០២០ ស្របពេលដែលមន្ទីរបរិស្ថានបានដាក់ចេញផែនការដាំកូនឈើ ដើម្បីស្ដារព្រៃឈើឡើងវិញឱ្យបានទំហំ ៣ ហិកតាក្នុង ១ ឆ្នាំៗ។
លោក ភួង លីណា ប្រធានមន្ទីរបរិស្ថានខេត្តឧត្តរមានជ័យបានប្រាប់ភ្នំពេញប៉ុស្តិ៍កាលពីថ្ងៃទី ១៩ ខែមេសា ថា ឆ្នាំ ២០២០ នេះជាឆ្នាំទី ១ ដែលមន្ទីរបរិស្ថានខេត្តចាប់ផ្ដើមបណ្ដុះកូនឈើប្រណីតដោយខ្លួនឯងឱ្យបាន ១ ម៉ឺនដើមក្រោយពីបង្កើតឱ្យមានផែនការដាំកូនឈើក្នុង ១ ឆ្នាំៗឱ្យបានទំហំ ៣ ហិកតា។
លោកបន្តថា កាលពីឆ្នាំមុន មន្ទីរបានទទួលកូនឈើពីក្រសួងបរិស្ថាន ដើម្បីយកទៅដាំនៅលើផ្ទៃដី ៣ ហិកតាមានជាង ៤ ពាន់ដើម ដើម្បីស្ដារព្រៃឈើឡើងវិញក្នុងតំបន់ដែលមានកាប់បំផ្លាញព្រៃឈើនៃដែនជម្រកសត្វព្រៃសង្ឃរុក្ខវ័ន។
លោកបញ្ជាក់ថា កូនឈើជាង ៤ ពាន់ដើមទៀតនឹងត្រូវយកទៅដាំដោយមន្ទីរបរិស្ថាននៅក្នុងដែនជម្រកសត្វព្រៃនេះនៅក្នុងចុងឆ្នាំនេះ ហើយនៅសេសសល់នឹងទុកសម្រាប់លក់ទៅខាងក្រៅ និងមួយចំនួនទៀតនឹងផ្ដល់ទៅខាងសាលារៀនសហគមន៍ព្រៃសង្ឃរុក្ខវ័ន វត្តអារាម និងទៅតាមមន្ទីរស្ថាប័នរដ្ឋាភិបាលមួយចំនួនដោយមិនគិតថ្លៃ។
លោកថា៖ «ក្រៅពីមានផែនការដាំខ្លួនឯងយើងក៏អាចលក់ ព្រោះយើងត្រូវការថវិកាជាច្រើនដែរ ដើម្បីគាំទ្រគម្រោងនេះឱ្យមាននិរន្តរភាព ព្រោះយើងមានផែនការធំ គឺនឹងដាំកូនឈើជារៀងរាល់ឆ្នាំ»។ លោកថា កូនឈើប្រណីតទាំង ១ ម៉ឺនដើម ដែលកំពុងបណ្ដុះនោះគឺភាគច្រើនបំផុតជាប្រភេទឈើគ្រញូង រីឯឈើប្រភេទនាងនួន និងធ្នង់គឺមានប្រហែល ១០ ភាគរយប៉ុណ្ណោះ និងបណ្ដុះជិតគ្រប់ចំនួនហើយ ដោយមន្ត្រីឧទ្យានុរក្ស និងក្រុមយុវជនស្ម័គ្រចិត្តខាងបរិស្ថាន។
កាលពីថ្ងៃទី ១៨ មេសា មន្ទីរបរិស្ថានខេត្តឧត្តរមានជ័យបានដឹកនាំយុវជនបរិស្ថានមួយក្រុមមានគ្នា ១១ នាក់ចុះទៅបណ្ដុះកូនឈើ ១ ១០០ ថង់ នៅស្នាក់ការអូរផាល។
លោក ភួង លីណា លើកឡើងថា កូនឈើដែលត្រូវបានដាំកាលពីឆ្នាំមុន គឺត្រូវបានថែទាំដោយយកចិត្តទុកដាក់បំផុតទើបអាចលូតលាស់ល្អដោយត្រូវសម្អាតស្មៅជាប្រចាំ ធ្វើប្រព័ន្ធការពារពីករណីភ្លើងឆេះព្រៃ។ លោកថា មកទល់ពេលនេះកូនឈើដែលបានដាំទាំងនោះគឺបានលូតលាស់ឡើងជាង ៩០ ភាគរយ ដែលមានកម្ពស់ជាង ១ ម៉ែត្រ។
លោកថា៖ «អ្វីដែលយើងបានដាំនៅលើផ្ទៃដី ៣ ហិកតាកន្លងមកនេះ គឺមានផលវិបាកខ្លាំងមែនទែន ទី១ កន្លែងដែលយើងដាំប៉ះពាល់ជាមួយសត្វពាហនៈរបស់ប្រជាជន ហើយសំខាន់បំផុតគឺភ្លើងឆេះព្រៃ ដែលយើងទាមទារឱ្យធ្វើប្រព័ន្ធការពារភ្លើងឆេះព្រៃហ្នឹង និងកាត់ស្មៅជាប្រចាំ ហើយបើអាចមានលទ្ធភាពទៀតគឺអាចមានប្រព័ន្ធសម្រាប់ការដាំដុះផង និងសម្រាប់ពន្លត់ភ្លើងឆេះព្រៃផង»។
ព្រះតេជព្រះគុណ ប៊ុន សាលួត ប្រធានសហគមន៍ព្រៃសង្ឃរុក្ខវ័នមានថេរដីកាថា នៅក្នុងព្រៃសហគមន៍សង្ឃរុក្ខវ័នត្រូវបានបែងចែកជា ៣ សណ្ឋានគឺព្រៃរបោះមានប្រហែល ៦០ ភាគរយ ព្រៃពាក់កណ្ដាលព្រៃស្រោង ២០ ភាគរយ និងព្រៃស្រោង ១០ ភាគរយ។ ព្រះអង្គឲ្យដឹងថាឆ្នាំមុនខាងសហគមន៍ដែលទទួលបានកូនឈើពីមន្ទីរបរិស្ថាន គឺបានយកទៅដាំលើផ្ទៃដីជាង ៤ ហិកតា ក្នុងតំបន់ព្រៃរបោះ និងដាំកូនត្នោតជាង ១ ម៉ឺនគ្រាប់ថែមទៀត។
ព្រះអង្គបញ្ជាក់ថា៖ «ដោយសារខាងអាត្មាធ្វើសកម្មភាពខ្លាំងជាងមន្ទីរដូចជា សកម្មភាពចុះល្បាតអីហ្នឹង អ៊ីចឹង! យើងអត់មានពេលបណ្ដុះទេ។ ខាងមន្ទីរបណ្ដុះខាងយើងបានតែដាំទេ»។ ព្រះតេជព្រះគុណបន្តថានៅក្នុងឆ្នាំនេះ ព្រះអង្គមានផែនការដាំកូនត្នោត គ្រញូង និងដើមធ្នង់នៅលើដីប្រហែល ៣ ហិកតាបន្ថែមទៀត។ កូនឈើទាំងនេះនឹងអាចដុះឡើងប្រសិនបើមានការការពារកុំឱ្យមានភ្លើងឆេះព្រៃ។ ព្រះអង្គបន្តថា នៅក្នុងរដូវប្រាំងនេះកូនឈើដែលដាំទើបមានអាយុ ៥ ឆ្នាំ ប្រហែល ១ ម៉ឺនដើមត្រូវបានបំផ្លាញដោយសារមានអ្នកលួចដុតព្រៃ៕