ភ្នំពេញៈ អភិបាលខេត្ដកំពត កំពង់ស្ពឺ តាកែវ និងកែប បានឯកភាពគ្នាបង្កើតក្រុមការងារបច្ចេកទេសអន្តរខេត្ដ ដើម្បីសិក្សាស្រាវជ្រាវកំណត់ព្រំប្រទល់រដ្ឋបាលភូមិ ឃុំ ស្រុក ខេត្ដឱ្យបានច្បាស់លាស់ ដើម្បីងាយស្រួលក្នុងការដោះស្រាយបញ្ហាប្រឈមនានាជូនពលរដ្ឋ ស្របតាមការណែនាំរបស់ក្រសួងមហាផ្ទៃកាលពីខែវិច្ឆិកា ឆ្នាំ ២០២០។
ការឯកភាពគ្នាបង្កើតក្រុមការងារបច្ចេកទេសនេះធ្វើឡើងក្រោយកិច្ចប្រជុំរួម រវាងអភិបាលខេត្តទាំង ៤ កាលពីថ្ងៃទី ៦ ខែមករា នៅសាលាខេត្ដកំពត ដើម្បីពិភាក្សាលើការងារកែសម្រួលព្រំប្រទល់រដ្ឋបាលអន្តរខេត្តទាំងនេះ។ ក្នុងកិច្ចប្រជុំនេះក៏មានការចូលរួមពីអភិបាលរងខេត្ត នាយករដ្ឋបាលសាលាខេត្ត ប្រធានមន្ទីរ អភិបាលស្រុក និងមន្ត្រីជំនាញនៃខេត្តទាំង ៤ សរុប ៦៧ នាក់។
សេចក្ដីជូនព័ត៌មានស្ដីពីលទ្ធផលនៃកិច្ចប្រជុំរបស់ខេត្ដទាំង ៤ បញ្ជាក់ថា៖ «អង្គប្រជុំឯកភាពបង្កើតក្រុមការងារបច្ចេកទេសអន្តរខេត្តនៃខេត្តទាំង ៤ ក្នុងការកំណត់ព្រំប្រទល់រដ្ឋបាល ដើម្បីជាមូលដ្ឋានក្នុងការស្រង់ទិន្នន័យមួយច្បាស់លាស់របស់ខ្លួន ដោយផ្អែកតាមកត្តាភូមិសាស្ត្រ និងប្រជាសាស្ត្រ»។
អភិបាលខេត្ដទាំង ៤ ក៏បានឯកភាពឱ្យក្រុមការងារបច្ចេកទេសអន្តរខេត្ត ធ្វើការងារនេះស្របតាមគោលការណ៍ និងនីតិវិធីរួមសម្រាប់ការសិក្សាស្រាវជ្រាវ កែសម្រួលព្រំប្រទល់រដ្ឋបាលមូលដ្ឋានដោយដោះស្រាយឯកភាព គ្នាជារួមដោយតម្កល់ផលប្រយោជន៍ជាតិ និងសង្គមទាំងមូល។
ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃលោក ស ខេង កាលពីថ្ងៃទី ១៣ វិច្ឆិកា ឆ្នាំ ២០២០ បានស្នើឲ្យអភិបាលរាជធានី-ខេត្តកំណត់ព្រំប្រទល់រដ្ឋបាលរបស់ខ្លួនឲ្យបានច្បាស់លាស់ ដើម្បីដោះស្រាយបញ្ហាប្រឈមនានា ពិសេសពាក់ព័ន្ធនឹងការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្ដិទី ៥ ខាងមុខ។
លោក ស ខេង បញ្ជាក់ថា ភាពមិនច្បាស់លាស់នៃព្រំប្រទល់រដ្ឋបាលខេត្ដនាំឱ្យមានការប្រទាញប្រទង់ដណ្តើមសមត្ថកិច្ចគ្នាក្នុងការគ្រប់គ្រង ជះឥទ្ធិពលមិនល្អដល់ការផ្តល់សេវាសាធារណៈជូនប្រជាពលរដ្ឋ ការរៀបចំផែនការអភិវឌ្ឍន៍ ការការពារសន្តិសុខ សណ្តាប់ធ្នាប់ និងកិច្ចការផ្សេងៗទៀតនៅតំបន់ទាំងនោះ។
លោក វ៉ី សំណាង អភិបាលខេត្តកំពង់ស្ពឺដែលបានចូលរួមក្នុងកិច្ចប្រជុំពិនិត្យពិភាក្សាលើការកំណត់ និងកែសម្រួលព្រំប្រទល់រដ្ឋបាលខេត្តទាំង ៤ នេះប្រាប់ភ្នំពេញប៉ុស្ដិ៍ពីម្សិលមិញថា ការកំណត់ព្រំប្រទល់រដ្ឋបាលភូមិ ឃុំ ស្រុក ខេត្ដ គឺដើម្បីឱ្យមានភាពងាយស្រួលក្នុងការផ្ដល់សេវាសាធារណៈរៀបចំសន្តិសុខសណ្ដាប់ធ្នាប់។ ការកំណត់ព្រំប្រទល់បែបនេះ ក៏ដើម្បីរកដំណោះស្រាយបញ្ហាប្រឈមនានាជូនពលរដ្ឋឲ្យមានប្រសិទ្ធភាព រហ័ស ងាយស្រួល។
លោកថ្លែងថា៖ «យើងបានបង្កើតក្រុមការងារបច្ចេកទេសអន្តរខេត្ដរួចហើយ។ ខេត្ដនីមួយៗនឹងទំនាក់ទំនងរវាងក្រុមការងាររបស់ខេត្ដទាំង ៤ ដើម្បីធ្វើយ៉ាងណាចុះទៅកំណត់ព្រំប្រទល់ឱ្យបានច្បាស់លាស់ និងឯកភាពគ្នា»។
លោក អំ សំអាត នាយករងអង្គការការពារសិទ្ធិមនុស្ស លីកាដូ ថ្លែងថាបញ្ហាកំណត់ព្រំប្រទល់រដ្ឋបាលរាជធានី-ខេត្ដ-ក្រុង-ស្រុកខណ្ឌ និងឃុំ-សង្កាត់ មិនទាន់មានភាពច្បាស់លាស់នាំឱ្យមានបញ្ហាកើតឡើងច្រើនដល់ពលរដ្ឋ។ ជាពិសេសនៅពេលមានបញ្ហាដីធ្លីកើតឡើង រដ្ឋបាលរាជធានី-ខេត្ដតែងតែរុញបញ្ហាដាក់គ្នា។
លោកថា៖ «ការមិនកំណត់ព្រំប្រទល់របស់រដ្ឋបាលរាជធានី-ខេត្ដ បានច្បាស់លាស់នាំឲ្យមានបញ្ហាច្រើនដល់ពលរដ្ឋ ដូចជាការបញ្ជាក់ អត្តសញ្ញាណ និងស្នើសុំសេវាសាធាណៈរបស់រដ្ឋបាលភូមិ ឃុំ ជាដើម»៕