.jpg)
យុទ្ធនាការបាញ់ថ្នាំសម្លាប់មូសនៅខេត្តរតនគិរីដើមឆ្នាំ ២០១៩។ រូបថត សហការី
ភ្នំពេញៈ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានអំពាវនាវឱ្យអាជ្ញាធរពាក់ព័ន្ធគ្រប់ខេត្តទាំងអស់ត្រូវអនុវត្តផែនការយុទ្ធសាស្ដ្រជាតិលុបបំបាត់ជំងឺគ្រុនចាញ់ឱ្យមានប្រសិទ្ធភាពខ្ពស់ ស្របពេលខេត្តចំនួន ៧ នៅតែប្រឈមនឹងការកើតមានករណីជំងឺគ្រុនចាញ់ខ្ពស់នៅឡើយ។ ការអំពាវនាវនេះស្របពេលមានការព្រួយបារម្ភថា ផែនការលុបបំបាត់ជំងឺគ្រុនចាញ់ប្រភេទហ្វាស៊ីប៉ារ៉ូមឱ្យអស់ត្រឹមឆ្នាំ ២០២០ នឹងមិនអាចទទួលបានជោគជ័យនោះទេ។
លោក ម៉ម ប៊ុនហេង បានលើកឡើងនៅក្នុងកិច្ចប្រជុំប្រឹក្សាយោបល់លើវឌ្ឍនភាពការងាររបស់ក្រុមការងារពិសេសថ្នាក់ខេត្តសម្រាប់លុបបំបាត់ជំងឺគ្រុនចាញ់ និងយុទ្ធសាស្ដ្រលុបបំបាត់ជំងឺគ្រុនចាញ់នៅថ្ងៃម្សិលមិញថា ជំងឺគ្រុនចាញ់មិនត្រឹមតែបានធ្វើឱ្យប៉ះពាល់សុខភាព លុយកាក់ ការងារ ផលិតភាព និងអាយុជីវិតនោះទេ ប៉ុន្តែវាក៏បង្កផលប៉ះពាល់អវិជ្ជមានដល់ការអភិវឌ្ឍសង្គម និងសេដ្ឋកិច្ចធ្ងន់ធ្ងរដែរ។
លោក ប៊ុនហេង ថ្លែងថាខេត្តទាំងអស់ត្រូវរួមសហការគ្នា ជាពិសេសមន្ទីរសុខាភិបាលខេត្ត អាជ្ញាធរដែនដី និងអង្គការដៃគូសុខាភិបាលនៅក្នុងខេត្តនីមួយៗចាំបាច់ត្រូវអនុវត្តផែនការយុទ្ធសាស្ដ្រជាតិលុបបំបាត់ជំងឺគ្រុនចាញ់ឱ្យមានប្រសិទ្ធភាពខ្ពស់ ដើម្បីឈានទៅលុបបំបាត់គ្រុនចាញ់គ្រប់ប្រភេទឱ្យបានជោគជ័យតាមផែនការ។
មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ដ្រ និងបាណកសាស្ដ្របានអះអាងថា បច្ចុប្បន្នតំបន់ដែលកើតមានករណីជំងឺគ្រុនចាញ់ខ្ពស់គឺស្ថិតក្នុងខេត្តចំនួន ៧ ដូចជា ខេត្តពោធិ៍សាត់ កំពង់ស្ពឺ ខេត្តស្ទឹងត្រែង ខេត្តមណ្ឌលគិរី ខេត្តព្រះវិហារ ខេត្តក្រចេះ និងខេត្តរតនគិរី និងបានជំរុញឱ្យខេត្តទាំងនេះអនុវត្តតាមអនុសាសន៍របស់លោក ម៉ម ប៊ុនហេង ដូចជា ការរុករកធ្វើតេស្ដ ការព្យាបាល និងការផ្ដល់ប្រឹក្សាអប់រំសុខភាពពីជំងឺគ្រុនចាញ់ដល់ប្រជាពលរដ្ឋក្នុងខេត្តរបស់ខ្លួន។
លោក ឈ្នាង សុវត្ថា ប្រធានមន្ទីរសុខាភិបាលខេត្តក្រចេះបានឱ្យដឹងថា ក្រចេះគឺជាខេត្តមួយដែលមានប្រជាពលរដ្ឋមកពីខេត្តផ្សេងច្រើនដែលចូលទៅរស់នៅតំបន់ព្រៃដើម្បីប្រកបមុខរបរធ្វើស្រែចម្ការ និងស្វែងរកអនុផលព្រៃឈើ។ ពលរដ្ឋចំណូលស្រុកថ្មីទាំងនោះគឺមិនទាន់យល់ដឹងអំពីវិធីបង្ការជំងឺគ្រុនចាញ់នៅឡើយទេ ហើយម្យ៉ាងទៀតការរស់នៅក្នុងតំបន់ព្រៃបែបនេះគឺធ្វើឱ្យពិបាកដល់អាជ្ញាធរពាក់ព័ន្ធចុះទៅផ្ដល់ការអប់រំសុខភាពដល់ពួកគាត់ដែរ។
លោក សុវត្ថា ថ្លែងថា៖ «អ៊ីចឹង! វាធ្វើឱ្យស្ថានភាពជំងឺពិបាកនឹងថយចុះ ហើយមួយទៀតគាត់ចំណូលថ្មី គាត់អត់ទាន់ដឹងថា សេវាសុខាភិបាលយើងនៅកន្លែងណា ហើយអ្នកណាជាអ្នកស្ម័គ្រចិត្តគ្រុនចាញ់ដែលយើងបានបង្កើតឡើង។ ប៉ុន្តែបើនិយាយពីវិធានការគឺយើងបានខិតខំប្រឹងប្រែងដោយសហការជាមួយអង្គការដៃគូក្រៅរដ្ឋាភិបាល ដើម្បីរុករកពួកគាត់ ហើយចែកមុងជូនគាត់ អប់រំពន្យល់គាត់ ឱ្យចេះវិធានការការពារជំងឺគ្រុនចាញ់ និងណែនាំឱ្យគាត់រត់ទៅរកពេទ្យនៅពេលឈឺ»។
លោក សុវត្ថា ថ្លែងថាកាលពីឆ្នាំ ២០១៨ ក្នុងខេត្តក្រចេះមានអ្នកឈឺដោយសារជំងឺគ្រុនចាញ់ចំនួន ២ ៩៩២ នាក់ ខណៈក្នុងត្រីមាសទី ៣ ឆ្នាំ ២០១៩ នេះមានអ្នកឈឺតែចំនួន ១ ១៧៦ នាក់ដែលជាចំនួនច្រើននៅឡើយ និងជាចំនួនដ៏ព្រួយបារម្ភមួយដែលធ្វើឱ្យផែនការលុបបំបាត់ជំងឺគ្រុនចាញ់ប្រភេទហ្វាស៊ីប៉ារ៉ូមត្រឹមឆ្នាំ ២០២០ របស់រដ្ឋាភិបាលមិនអាចអនុវត្តបានជោគជ័យ។
ស្ថិតិក្រសួងសុខាភិបាលបានបង្ហាញថា ករណីឈឺដោយសារគ្រុនចាញ់បានថយចុះពី ៥១ ២៦២ ករណីក្នុងឆ្នាំ ២០១៥ មកត្រឹម ២៣ ៦២៧ ករណីក្នុងឆ្នាំ ២០១៦ ប៉ុន្តែមកដល់ឆ្នាំ ២០១៧ អ្នកឈឺដោយគ្រុនចាញ់បានកើនឡើងវិញដល់ចំនួន ៤៥ ៩៩១ ករណី និងកើនដល់ ៦៥ ១១៤ ករណីក្នុងឆ្នាំ ២០១៨។ ទោះជាយ៉ាងណា ករណីស្លាប់ដោយសារគ្រុនចាញ់មានចំនួន ៩៣ នាក់ នៅឆ្នាំ ២០១១ និងថយចុះរហូតមកដល់ ១ នាក់ នៅឆ្នាំ ២០១៦ និងឆ្នាំ ២០១៧ និងក្នុងឆ្នាំ ២០១៨ គឺពុំមានអ្នកស្លាប់នោះទេ។ រដ្ឋាភិបាលមានផែនការលុបបំបាត់ជំងឺគ្រុនចាញ់ប្រភេទហ្វាស៊ីប៉ារ៉ូមនៅឆ្នាំ ២០២០ និងឈានទៅលុបបំបាត់ជំងឺគ្រុនចាញ់គ្រប់ប្រភេទឲ្យអស់នៅឆ្នាំ ២០២៥។
អ្នកស្រី លឹម សាមាន ប្រធានមន្ទីរសុខាភិបាលខេត្តព្រះសីហនុបានបញ្ជាក់ថា ក្នុងរយៈពេល ៩ ខែឆ្នាំ ២០១៩ មានករណីគ្រុនចាញ់ចំនួន ១១៧ ករណី ហើយប្រៀបធៀបនឹងរយៈពេលដូចគ្នាកាលពីឆ្នាំ ២០១៨ គឺថយចុះចំនួន ៤០២ ករណី។ រាល់ករណីជំងឺគ្រុនចាញ់នាំចូលពីខេត្តផ្សេង៕
