The Phnom Penh Post Search

Search form




Logo of Phnom Penh Post newspaper Phnom Penh Post - ខ្មែរ​នៅ USA នៅ​តែ​ប្រកាន់​ជំហរ​ធ្វើ​បាតុកម្ម​ប្រឆាំង​លោក ហ៊ុន សែន

ខ្មែរ​នៅ USA នៅ​តែ​ប្រកាន់​ជំហរ​ធ្វើ​បាតុកម្ម​ប្រឆាំង​លោក ហ៊ុន សែន

Content image - Phnom Penh Post
ខ្មែរ​នៅ USA ធ្លាប់តវ៉ាប្រឆាំង​នឹង​លោក​នាយក​រដ្ឋមន្ត្រី ហ៊ុន សែន កាល​ពី​ឆ្នាំ ២០១៣។ រូបថត សហការី

ខ្មែរ​នៅ USA នៅ​តែ​ប្រកាន់​ជំហរ​ធ្វើ​បាតុកម្ម​ប្រឆាំង​លោក ហ៊ុន សែន

ភ្នំពេញៈ ពលរដ្ឋ​ខ្មែរ​ដែល​រស់នៅ​សហរដ្ឋ​អាមេរិក​នៅ​តែ​រក្សា​ជំហរ​ធ្វើ​បាតុកម្ម​ប្រឆាំង​លោក​នាយក​រដ្ឋមន្ត្រី ហ៊ុន សែន ខណៈ​ពេល​ដែល​ថ្នាក់ដឹកនាំ​កម្ពុជា​គ្រោង​ទៅ​បំពេញ​ទស្សនកិច្ច​នៅ​ប្រទេស​មហាអំណាច​មួយ​នេះ​បើ​ទោះ​លោក សម រង្ស៊ី បាន​ព្រមាន​ និង​អំពាវនាវ​ដល់​អ្នក​គាំទ្រ​ និង​ពលរដ្ឋ​ខ្មែរ​កុំ​ឲ្យ​ធ្វើ​បាតុកម្ម​ក៏ដោយ។

តាម​គម្រោង​លោក​នាយក​រដ្ឋមន្ត្រី ហ៊ុន សែន នឹង​ដឹកនាំ​គណៈប្រតិភូ​កម្ពុជា​ទៅ​ចូលរួម​កិច្ចប្រជុំ​កំពូល​ពិសេស​អាស៊ាន-សហរដ្ឋ​អាមេរិក​ដែល​នឹង​ប្រព្រឹត្ត​ទៅ​នៅ​ថ្ងៃ​ទី​ ១៥ ​និង ១៦ ខែ​កុម្ភៈ​ឆ្នាំ ២០១៦ នៅ​រដ្ឋ​កាលីហ្វ័រនីញ៉ា​តាម​ការ​អញ្ជើញ​របស់​លោក បារ៉ាក់ អូបាម៉ា។

លោក​នាយក​រដ្ឋមន្ត្រី ហ៊ុន សែន ក៏​នឹង​សំណេះ​សំណាល​ជាមួយ​ជន​រួមជាតិ​​កម្ពុជា​រាប់រយ​នាក់​មកពី​គ្រប់​ទីកន្លែង​​នៅ​អាមេរិក​ផង​ដែរ។ ចំណែក​ប្រតិភូ​អម​ដំណើរ​រួមមាន​លោក ហោ ណាំហុង លោក ស៊ុន ចាន់ថុល លោក អូន ព័ន្ធមុនីរ័ត្ន និង​លោក ហង់ ជួនណារ៉ុន។ នេះ​បើ​តាម​សេចក្តី​ជូន​ដំណឹង​របស់​ក្រសួង​ការបរទេស​កម្ពុជា​ចេញ​កាលពី​ម្សិលមិញ។

យ៉ាង​ណា​ក៏ដោយ​សេចក្តី​ថ្លែងការណ៍​របស់​ប្រធាន​អង្គការ​សម្ព័ន្ធ​មិត្តភាព​ខ្មែរ​-អាមេរិក​លោក ទូច វិបុល ចុះ​ថ្ងៃ​ទី ៧ កុម្ភៈ​បាន​លើក​ឡើង​ថា​ថ្មីៗ​នេះ​មេដឹកនាំ​គណបក្ស​នយោបាយ​នានា​បាន​វាយប្រហារ​ និង​ចោទប្រកាន់​គ្នា​ទៅ​វិញ​ទៅ​មក​ក្នុង​ន័យ​បង្ក​ការ​រារាំង​ និង​បំបែក​ទំនុក​ចិត្ត​ពលរដ្ឋ​ខ្មែរ​អាមេរិកាំង​ឲ្យ​ដក​ថយ​ការ​តាំង​ចិត្ត​ចូលរួម​ធ្វើ​បាតុកម្ម​ប្រឆាំង​លោក ហ៊ុន សែន។

តែ​ក្នុង​សេចក្តី​ថ្លែងការណ៍​បញ្ជាក់​ថា៖ ​«ការ​ធ្វើ​បាតុកម្ម​នឹង​ប្រព្រឹត្ត​ទៅ​​តាម​​ការ​គ្រោង​ទុក​ដោយ​ពុំ​មាន​ការ​​អាក់​ខាន​ឡើយ​ហើយ​សូម​បញ្ជាក់​ថា​អង្គការ​យើង​ខ្ញុំ​ជា​អង្គការ​​ឯករាជ្យ​មិន​ពាក់ព័ន្ធ​គណបក្ស​នយោបាយ​ឡើយ»។

សេចក្តី​ថ្លែងការណ៍​បន្ត​ថា​​កម្មវិធី​បាតុកម្ម​នឹង​មាន​សេចក្តី​ថ្លែងការណ៍​របស់​អ្នក​ចូលរួម​ញត្តិ​ស្តីពី​ការ​រំលោភ​សិទ្ធិ​មនុស្ស និង​ការ​ចាប់​ដាក់​គុក​នូវ​ក្រុម​សកម្មជន​ប្រជាធិបតេយ្យ​ជា​ដើម។

សេចក្តី​ថ្លែងការណ៍​សង្កត់​ធ្ងន់​ថា៖ «ប្រាកដ​ណាស់​ជាង​ ៣០ ​ឆ្នាំ​ក្រោម​ការ​គ្រប់គ្រង​របស់​លោក ហ៊ុន សែន បាន​ធ្វើ​ខ្លួន​ជា​ជន​មិន​គួរ​ឲ្យ​ទុក​ចិត្ត​បាន​សម្រាប់​ពលរដ្ឋ​ខ្មែរ ។

លោក ហ៊ុន សែន ជា​ជនគ្រោះថ្នាក់​បំផុត​ដល់​សង្គម​កម្ពុជា​ជាពិសេស​ជា​ជនគ្រោះថ្នាក់​ដល់​សន្តិសុខ​ក្នុង​តំបន់ ASEAN ដែល​យើង​ទាំងអស់​គ្នា​មិន​ត្រូវការ​មេដឹកនាំ​រូប​នេះ​ទៀត​ឡើយ»។

កាលពី​ថ្ងៃ​សៅរ៍​វីដេអូ​មួយ​បាន​ផ្សព្វផ្សាយ​ក្នុង​ប្រព័ន្ធ​ផ្សព្វផ្សាយ​ថា​ប្រធាន​គណបក្ស​សង្គ្រោះ​ជាតិ​លោក សម រង្ស៊ី ថ្លែង​ទៅ​កាន់​អ្នក​គាំទ្រ​នៅ​ទីក្រុង​វ៉ាស៊ីនតោន​ដោយ​អំពាវនាវ​ទៅ​អ្នក​គាំទ្រ​នៅ​អាមេរិក​មិន​ឲ្យ​ធ្វើ​ការ​តវ៉ា​នយោបាយ​នៅ​រដ្ឋ​កាលីហ្វ័រនីញ៉ា​ទេ។

លោក សម រង្ស៊ី ថ្លែង​ថា៖ «បាតុកម្ម​នេះ​ឥឡូវ​នេះ​មិន​ល្អ​ទេ​វា​ធ្វើ​ឲ្យ​ខូច​ការងារ​គណបក្ស​សង្គ្រោះ​ជាតិ»។ លោក​ថា​គណបក្ស​សង្គ្រោះ​ជាតិ​មិន​ទទួល​ស្គាល់​អ្នក​ដែល​ចូលរួម​ការ​តវ៉ា​នេះ​ទេ​ហើយ​បាន​អំពាវនាវ​ឲ្យ​មាន​ការ «ស្ងប់​ស្ងៀម» និង «ភាព​អំណត់​អត់​ធ្មត់» ខណៈ​គណបក្ស​ស្វែងរក​ការ​សម្រេច​គោលដៅ​នយោបាយ​របស់​ខ្លួន។

ចំណែក​កាលពី​ម្សិលមិញ​មន្ត្រី​ជាន់ខ្ពស់​គណបក្ស​សង្គ្រោះ​ជាតិ​លោក​ យ៉ែម បុញ្ញឫទ្ធិ បញ្ជាក់​ថ្មី​ថា​គណបក្ស​របស់​លោក​ពុំ​មាន​គោលការណ៍​រៀបចំ​ធ្វើ​បាតុកម្ម​ប្រឆាំង​លោក​នាយក​រដ្ឋមន្ត្រី​ ហ៊ុន សែន ទេ។ លោក​ថា «យើង​មាន​ការ​សោកស្តាយ​ដោយសារ​ចែក​គ្នា​មិន​ដាច់​ថា​អ្វី​ទៅ​ជា​ស្ថាប័ន​ហើយ​អ្វី​ទៅ​ជា​បុគ្គល​ដូច្នេះ​យើង​ចង់​ឲ្យ​មាន​ការ​យល់​ដឹង​ពី​លក្ខណៈ​ជា​ស្ថាប័ន និង​ជា​បុគ្គល​ឲ្យ​បាន​ពិតប្រាកដ»។

«ជា​គោលការណ៍​គណបក្ស​សង្គ្រោះ​ជាតិ​ឥត​មាន​រៀបចំ​ធ្វើ​បាតុកម្ម​ទេ​តែ​ការ​ធ្វើ​បាតុកម្ម​ជា​សិទ្ធិ​សេរី​របស់​បុគ្គល​ទាំង​នោះ​អាហ្នឹង​ជា​រឿង​មួយ​ដាច់​ដោយ​ឡែក»។

បើ​ទោះ​ជា​មាន​ការ​អត្ថាធិប្បាយ​ពី​បក្ស​ប្រឆាំង​ថា​មិន​ជាប់​ពាក់ព័ន្ធ​នឹង​ការ​ធ្វើ​បាតុកម្ម​ក្តី​ក៏​អ្នក​នាំ​ពាក្យ​គណបក្ស​ប្រជាជន​កម្ពុជា​លោក សុខ ឥសាន ប្រាប់​ភ្នំពេញ​ប៉ុស្តិ៍​ពី​ម្សិលមិញ​ថា​លោក​មិន​ចោទ​ប្រកាន់​ដោយ​គ្មាន​មូលដ្ឋាន​នោះ​ទេ​តែ​បើ​រកឃើញ​ថា​បក្ស​សង្គ្រោះ​ជាតិ​នៅ​ពី​ក្រោយ​នៃ​ការ​ធ្វើ​បាតុកម្ម​នេះ ឬ​ផ្តល់​ជា​មធ្យាបាយ​ណា​មួយ​គឺ​គង់​តែ​ដឹង​ទេ។

លោក​បញ្ជាក់​ថា «បើ​អ្នក​ផ្សេង​អាច​ធ្វើ​បាតុកម្ម​បាន​អ្នក​គាំទ្រ​គណបក្ស​ប្រជាជន​អាច​ធ្វើ​បាតុកម្ម​បាន​ដូច​គ្នា​ព្រោះ​ពលរដ្ឋ​មាន​សិទ្ធិ​ស្មើភាព​គ្នា! នៅ​ពេល​​សួរ​ថា​ហេតុការណ៍​នោះ​អាច​​កើត​ឡើង​ដូច​ករណី​បាតុកម្ម​ប្រឆាំង​លោក​ថា កឹម សុខា ទេ? លោក សុខ ឥសាន បាន​ឆ្លើយ​ថា បាទ»!

សូម​រំឭក​ថា​កាលពី​ចុង​ឆ្នាំ ២០១៥ នៅ​ពេល​ពលរដ្ឋ​ខ្មែរ​ធ្វើ​បាតុកម្ម​ប្រឆាំង​លោក​នាយក​​រដ្ឋមន្ត្រី​ ហ៊ុន សែន នៅ​បារាំង​នោះ​មិន​បាន​ប៉ុន្មាន​ថ្ងៃ​ផង​ស្រាប់​តែ​នៅក្នុង​ស្រុក​វិញ​អ្នក​គាំទ្រ​គណបក្ស​ប្រជាជន​កម្ពុជា​រាប់​ពាន់​នាក់​បាន​ធ្វើ​បាតុកម្ម​ទាមទារ​ឲ្យ​ទម្លាក់​លោក កឹម សុខា ពី​អនុប្រធាន​ទី ១ រដ្ឋសភា​ដែល​គ្រា​នោះ​បណ្តាល​ឲ្យ​តំណាងរាស្ត្រ​បក្ស​ប្រឆាំង​ពីរ​នាក់​រង​ការ​វាយដំ​ឲ្យ​របួស​យ៉ាង​ដំណំ៕

អត្ថបទគួរចាប់អារម្មណ៍