The Phnom Penh Post Search

Search form




Logo of Phnom Penh Post newspaper Phnom Penh Post - ខ្មែរ​អាមេរិក​ម្នាក់​ត្រូវ​បាន​ឃាត់​ខ្លួន​ពី​បទ​ឆបោក​ពលរដ្ឋ នៅ​ចំការ​មន




ខ្មែរ​អាមេរិក​ម្នាក់​ត្រូវ​បាន​ឃាត់​ខ្លួន​ពី​បទ​ឆបោក​ពលរដ្ឋ នៅ​ចំការ​មន

ខ្មែរ​អាមេរិក​ម្នាក់​ត្រូវ​បាន​ឃាត់​ខ្លួន​ពី​បទ​ឆបោក​ពលរដ្ឋ នៅ​ចំការ​មន

ភ្នំពេញៈ ខ្មែរ-អាមេរិក​ម្នាក់​ត្រូវ​កម្លាំង​សមត្ថកិច្ច​នគរបាល​ខណ្ឌ​ចាប់​ឃាត់​ខ្លួន​តាម​ពាក្យ​បណ្តឹង​របស់​ប្រជាពលរដ្ឋ ១២​គ្រួសារ ពី​បទ​ឆបោក​ប្រាក់​ជាង​៣​ពាន់​ដុល្លារ និង​ត្រូវ​នាំ​ខ្លួន​ពី​ខណ្ឌ​ពោធិ៍​សែន​ជ័យ មក​ឃុំ​នៅ​អធិការ​ដ្ឋាន​នគរបាល​ខណ្ឌ​ចំការ​មន ដើម្បី​ធ្វើ​ការ​ស៊ើប​សួរ។

លោក អ៊ុច សុខុន អធិការ​ខណ្ឌ​ចំការ​មន​បាន​ប្រាប់​ឲ្យ​ដឹង​ពី​ម្សិល​មិញ​ថា ការ​ឃាត់​ខ្លួន​អាណិក​ជន​ម្នាក់​នេះ គឺ​ធ្វើ​តាម​ពាក្យ​បណ្តឹង​របស់​ប្រជាពលរដ្ឋ ១២ គ្រួសារ ពាក់​ព័ន្ធ​នឹង​ករណី​ឆបោក​ប្រាក់។

លោក​បាន​ឲ្យ​ដឹង​ថា ៖ «ជន​សង្ស័យ​កំពុង​ត្រូវ​ឃុំ​ខ្លួន​នៅ​អធិការ​ខណ្ឌ​នៅ​ឡើយ​ដើម្បី​ស៊ើប​សួរ​និង​កសាង​សំណុំ​រឿង​បញ្ជូន​ទៅ​តុលាការ​តាម​នីតិវិធី»។

មន្រ្តី​នគរបាល​ខណ្ឌ​បាន​ឲ្យ​ដឹង​កាល​ពី​ម្សិល​មិញ​ថា ជន​សង្ស័យ​ជា​អាណិក​ជន​ខ្មែរ​រស់​នៅ​សហរដ្ឋ​អាមេរិក​ត្រូវ​កម្លាំង​នគរបាល​ខណ្ឌ​ចំការ​មន ចុះ​ឃាត់​ខ្លួន​នៅ​ចំណុច​ផ្ទះ​ជួល ក្នុង​សង្កាត់​កាកាប ខណ្ឌ​ពោធិ៍​សែន​ជ័យ និង​បញ្ជូន​មក​ខណ្ឌ​ចំការ​មន កាល​ពី​ល្ងាច​ថ្ងៃ​ទី​០៩ ខែ​មករា។

តាម​សម្តី​ប្រជាពលរដ្ឋ​ថា ជន​សង្ស័យ​ជា​អាណិក​ជន ដែល​ត្រូវ​ឃាត់​ខ្លួន​នេះ ឈ្មោះ ឆាយ ប៊ុនរ៉ា ហៅ កែន សុវណ្ណរ៉ា អាយុ ៥១ ឆ្នាំ ស្នាក់​នៅ​បន្ទប់​ជួល ក្នុង​សង្កាត់​កាកាប ខណ្ឌ​ពោធិ៍​សែន​ជ័យ។

មន្រ្តី​នគរបាល​ខណ្ឌ​អះ​អាង​ថា តាម​ពាក្យ​បណ្តឹង​ប្រជាពលរដ្ឋ​ចោទ​ថា ឈ្មោះ ឆាយ ប៊ុនរ៉ា បាន​កាន់​ប្លង់​សាង​សង់​ផ្សារ​មួយ នៅ​ខណ្ឌ​សែន​សុខ មក​បង្ហាញ​ពួក​គាត់​និង​សួរ​នាំ​ថា តើ​មាន​អ្នក​ណា​ត្រូវ​ការ​ទិញ​តូប​ទុក​លក់​ដូរ​រក​ស៊ី​ឬ​ចង់​បាន​កន្លែង​ផ្ញើ​កង់​ម៉ូតូ​អីទេ​? បើ​អ្នក​ណា​ចង់​បាន តម្លៃ​តូប​ទាប​បំផុត​ពី​៤០០​ដុល្លារ​និង​ខ្ពស់​ត្រឹម​៣៥០០​ដុល្លារ​ទេ។ ក្នុង​បណ្តឹង​បន្ត​ថា ក្រោយ​មក​ពលរដ្ឋ​ទាំង​១២​គ្រួសារ​(ដើម​បណ្តឹង) បាន​នាំ​គ្នា​យក​លុយ​ទៅ​កក់​តិច​ច្រើន​ទៅ​តាម​ឈ្មោះ សរុប​ប្រាក់​កក់​ទាំង​១២ គ្រួសារ មាន​ចំនួន ៣.៥៤០​ដុល្លារ ហើយ​នាំ​គ្នា​រង់​ចាំ​ថ្ងៃ​កំណត់​និង​នាំ​គ្នា​ចាំ​រហូត​មក​ដល់​ហួស​ថ្ងៃ​សន្យា មិន​ឃើញ​ឈ្មោះ ឆាយ ប៊ុនរ៉ា មក​នាំ​ទៅ​មើល​តូប​គាត់​ទិញ​នោះ​សោះ ទើប​ពួក​គាត់​សម្រេច​ចិត្ត​នាំ​គ្នា​មក​ដាក់​ពាក្យ​បណ្តឹង សុំ​ឲ្យ​សមត្ថកិច្ច​អន្តរាគមន៍ ឃាត់​ខ្លួន ឈ្មោះ ឆាយ ប៊ុនរ៉ា ដើម្បី​ទាម​ទារ​យក​ប្រាក់​កក់​របស់​ពួក​គាត់​វិញ៕

អត្ថបទគួរចាប់អារម្មណ៍