.jpg)
គំនរឈើ ដែលសមត្ថកិច្ចបង្កា្របានក្នុងខេត្តមណ្ឌលគិរី នាពេលកន្លងមក។ GRK News
មណ្ឌលគិរីៈ សាលាដំបូងខេត្តមណ្ឌលគិរី ពីម្សិលមិញ បានសម្រេចឃុំខ្លួនជនជាប់ចោទខ្មែរ និងចិនចំនួន ៦ នាក់ ក្នុងនោះមានមន្ដ្រីរដ្ឋបាលព្រៃឈើ ២ នាក់ និងមន្ត្រីបរិស្ថានម្នាក់ ដោយចោទក្នុងករណីផ្សេងគ្នា បន្ទាប់ពីកម្លាំងគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានឃាត់ខ្លួនកាលពីថ្ងៃទី ២៦-២៧ កក្កដា ដែលពាក់ព័ន្ធនឹងបទល្មើសព្រៃឈើ។
លោក មាស ប្រុស អ្នកនាំពាក្យសាលាដំបូងខេត្តមណ្ឌលគិរី ប្រាប់ភ្នំពេញប៉ុស្ដិ៍ម្សិលមិញថា បន្ទាប់ពីទទួលជនសង្ស័យទាំង ៦ នាក់ ពីសមត្ថកិច្ចបញ្ជូនមក កាលពីថ្ងៃទី ២៨ កក្កដា លោកបានបញ្ជូនបន្តទៅតំណាងអយ្យការនៃសាលាដំបូងខេត្ត។ នៅថ្ងៃទី ២៩ កក្កដា តុលាការបានសម្រេចឃុំខ្លួន អ្នកទាំង ៦ នាក់ រួចរាល់ហើយ ក្រោមបទចោទផ្សេងៗគ្នា។
លោកបន្តថា ជនជាប់ចោទជាមន្ត្រីរដ្ឋបាលព្រៃឈើ ២ នាក់ ត្រូវបានតុលាការចោទពីបទ «ផ្ដល់ការអនុញ្ញាតណាមួយ ដែលផ្ទុយនឹងបទប្បញ្ញត្តិ និងច្បាប់ស្ដីពីព្រៃឈើ អនុគ្រោះចំពោះបទល្មើសព្រៃឈើ» តាមមាត្រា ១១១ ស្ដីពីច្បាប់ព្រៃឈើ។
ឯមន្ត្រីបរិស្ថានម្នាក់ ត្រូវបានតុលាការសម្រេចចោទប្រកាន់ពីបទ «សមគំនិតក្នុងអំពើប្រមូលផលអនុផលព្រៃឈើ ដែលគ្មានលិខិតអនុញ្ញាត» តាមមាត្រា ៦៤ នៃច្បាប់ស្ដីពីតំបន់ការពារធម្មជាតិ» តាមមាត្រា ៩៨ ចាត់ចូលក្នុងច្បាប់ស្ដីពីព្រៃឈើ និងមាត្រា ២៩ នៃច្បាប់ព្រហ្មទណ្ឌ។
លោកបន្តថា៖ «ចំពោះជនជាតិចិនចំនួន ២ នាក់ ត្រូវបានចោទប្រកាន់ពីបទ «កំហែងយកមានស្ថានទម្ងន់ទោសដោយប្រើប្រាស់អាវុធ» តាមមាត្រា ៣៦៣ និង ៣៦៦ នៃក្រម ព្រហ្មទណ្ឌ និងជនជាតិចិនម្នាក់ទៀតត្រូវចោទពីបទ «សមគំនិត ក្នុងអំពើកំហែងយកមានស្ថានទម្ងន់ទោសដោយប្រើប្រាស់អាវុធ» តាមមាត្រា២៩, ៣៦៣ និង ៣៦៦ ផងដែរ»។
មន្ដ្រី៣រូប ដែលត្រូវបានឃុំខ្លួន រួមមាន ទី១ លោក ហាន សាខន ជានាយកដែនជម្រកសត្វព្រៃភ្នំព្រេច ស្រុកលំផាត់ ទី២ លោក សារ៉ូ រតនា នាយករងរដ្ឋបាលព្រៃឈើ និងទី៣ លោក ហ៊ុន វណ្ណេ នាយសង្កាត់រដ្ឋបាលព្រៃឈើរយ៉ ក្នុងស្រុកលំផាត់។ ពួកគេត្រូវបានរកឃើញជាប់ពាក់ព័ន្ធបទល្មើសព្រៃឈើជាមួយក្រុមហ៊ុនប៉ាស៊ីហ្វិក ដែលក្នុងនោះជាប់ពាក់ព័ន្ធជាមួយក្រុមជនជាតិវៀតណាម ដែលត្រូវតុលាការសម្រេចឃុំខ្លួនរួចមកហើយកាលពីដើមខែកក្កដា។
ជនជាតិចិនទាំង ៣ នាក់នោះ រួមមាន ឈ្មោះ ចូវ លិហុង, កើ អីកឡុង និង ស៊ូ ជីងហ័រ។ ពួកគេទាំង ៣ នាក់នេះ ក៏ជាប់ពាក់ព័ន្ធទៅនឹងការគំរាមកំហែងជនជាតិចិនម្នាក់ផ្សេងទៀត ដើម្បីយកទីតាំងប្រព្រឹត្តបទល្មើសព្រៃឈើនៅចំណុចក្រុមហ៊ុន ថាច់វូដ។
លោក អេង ហ៊ី អ្នកនាំពាក្យគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ប្រាប់ភ្នំពេញប៉ុស្ដិ៍ ម្សិលមិញថា នៅថ្ងៃទី ២៨ កក្កដា ក្រុមការងារបង្ក្រាបបទល្មើសធនធានធម្មជាតិ បានចុះត្រួតពិនិត្យរោងសន្និធិ សួន គឹមហេង នៅក្នុងស្រុកកែវសីមា ខេត្តមណ្ឌលគិរី ដោយបានរកឃើញឈើខុសច្បាប់ចំនួន ៩៨ ម៉ែត្រគុប។
លោកថា៖ «ខ្ញុំទទួលបានព័ត៌មានតែប៉ុណ្ណឹងទេ ព្រោះសមត្ថកិច្ចកំពុងធ្វើការស្រាវជ្រាវបន្ថែមទៀត ហើយព័ត៌មានក្រៅពីនេះគឺព័ត៌មានមិនច្បាស់លាស់ទេ។
ហ្វេសប៊ុកកងរាជអាវុធហត្ថលើផ្ទៃប្រទេស បង្ហាញពីម្សិលមិញថា នៅថ្ងៃទី ២៨ កក្កដា ក្រុមការងារបង្ក្រាបបទល្មើសធនធានធម្មជាតិ បានចុះត្រួតពិនិត្យរោងសន្និធិ និងច្រកព្រំដែនជាលទ្ធផល បានត្រួតពិនិត្យច្រកឡាប៉ាខេនិងច្រកដាក់ដាំ ក្នុងខេត្តមណ្ឌលគិរី មានសភាពស្ងប់ស្ងាត់ ដោយបានត្រួតពិនិត្យរោងសន្និធិចំនួន ២ កន្លែង។ ក្នុងនោះ ទី១ រោងសន្និធិស្ថិតក្នុងស្រុកកែវសីមា ចម្ងាយពីព្រំដែន ច្រកឡាប៉ាខេប្រហែល ៣ គីឡូម៉ែត្រ រោងសន្និធិនេះ មានច្បាប់អនុញ្ញាត ប៉ុន្តែមិនទាន់ដំណើរការទេ។
ចំណែកទី ២ រោងសន្និធិឈ្មោះ សួន គឹមហេង នៅក្នុងស្រុកកែវសីមា ចម្ងាយពីច្រកឡាប៉ាខេ ប្រហែលជាង ៧ គីឡូម៉ែត្រ មានស្តុកឈើចំនួន ៩៨ ម៉ែត្រគុប។ ឈើនេះជំនាញរដ្ឋបាលព្រៃឈើបានចុះពិនិត្យឃើញឈើល្មើសលើសចំនួន ៦២ ម៉ែត្រគុបដឹកពីក្រុមហ៊ុនថាច់វូដ ក្រុមការងារសន្មតថា ឈើនេះខុសច្បាប់៕
