ភ្នំពេញ: ពលរដ្ឋកម្ពុជា ១៦ នាក់មកពីខេត្តបាត់ដំបងកំពុងត្រូវបានថៃចាប់ឃុំខ្លួននៅពន្ធនាគារមួយនៅក្នុងខេត្តសាកែវ ប្រទេសថៃបន្ទាប់ពីការចាប់ខ្លួនកាលពីថ្ងៃចន្ទពីបទកាប់ឈើខុសច្បាប់។ នេះបើតាមការប្រកាសរបស់ក្រសួងការបរទេសកាលពីថ្ងៃពុធ។
ការចាប់ខ្លួននេះបានបង្ហាញនូវអ្វីដែលអាចជាការផ្លាស់ប្តូរថ្មីមួយនៅក្នុងរបៀបដោះស្រាយករណីទាំងនេះដោយរដ្ឋាភិបាលថៃដោយសារប្រវត្តិកំណត់ត្រាទាហានថៃបាញ់សម្លាប់ពលរដ្ឋកម្ពុជាដែលចូលទៅកាប់ឈើ ដែលកើតមានរយៈពេលជាច្រើនឆ្នាំកាលពីអតីតកាល។
អ្នកនាំពាក្យក្រសួងការបរទេស លោក ជុំ សុន្ទរី មិនបានឆ្លើយតបទៅនឹងសំណើសុំអត្ថាធិប្បាយទេ ប៉ុន្តែបើតាមសេចក្តីប្រកាសព័ត៌មានបានឲ្យដឹងថារដ្ឋបាលព្រៃឈើថៃរួមជាមួយអាជ្ញាធរមូលដ្ឋានកំពុងល្បាតឧទ្យានជាតិប៉ាងស៊ីដា (Pang Sida) នៅក្នុងខេត្តសាកែវនៅពេលពួកគេបានឃើញពលរដ្ឋកម្ពុជា ២១ នាក់កំពុងកាប់ឈើប្រណីត។ ជនសង្ស័យ ៥ នាក់បានរត់គេចខ្លួនរួច។
សេចក្តីប្រកាសព័ត៌មាននេះបន្តថា៖ «នៅថ្ងៃទី ២៣ ឧសភា នគរបាលថៃបានបញ្ជូនមនុស្ស ១៦ នាក់ទៅដាក់ពន្ធនាគារនៅក្នុងខេត្តសាកែវ»។
នគរបាលថៃបានរឹបអូសរណារ កាំភ្លើង និងទូរស័ព្ទចំនួន ៩។ អាយុជនសង្ស័យមានចាប់ពី ១៦ ឆ្នាំរហូតដល់ ៥៥ ឆ្នាំ។ មន្ត្រីថៃមិនបានឆ្លើយតបនឹងសំណើសុំអត្ថាធិប្បាយនោះទេ។
អ្នកនាំពាក្យនគរបាលជាតិលោក គៀត ច័ន្ទថារិទ្ធ បានថ្លែងថាបើតាមស្ថិតិនគរបាលជាតិ ពលរដ្ឋកម្ពុជាចំនួន ៦៩ នាក់ត្រូវបានបាញ់សម្លាប់ដោយទាហានថៃបន្ទាប់ពីឆ្លងព្រំដែនក្នុងឆ្នាំ ២០១៣ និង ៩ នាក់ក្នុងឆ្នាំ ២០១៤ និង ៥ នាក់ក្នុងឆ្នាំ ២០១៥ និង ២ នាក់ក្នុងឆ្នាំ ២០១៦ និងក្នុងឆ្នាំនេះរហូតមកដល់ពេលនេះមិនមានការរាយការណ៍អំពីករណីបាញ់សម្លាប់ទេ។
លោកបានថ្លែងថា៖ «នៅស្ទើរគ្រប់ពេលជួបជាមួយអាជ្ញាធរថៃ យើងតែងតែស្នើពួកគេសូមកុំបាញ់ពួកគេ»។
«ប្រសិនបើពួកគេធ្វើខុសត្រូវតែផ្តន្ទាទោសតាមច្បាប់»។
លោក ច័ន្ទថារិទ្ធ បានថ្លែងថាអាជ្ញាធរថៃបានទទួលយកអនុសាសន៍ ប៉ុន្តែការពិត «យើងមិនដឹងថា តើពួកគេធ្វើអ្វីខ្លះទេ»។
លោកបន្តថា៖ «ប៉ុន្តែចំនួននៃការបាញ់បានថយចុះ»។ លោក ថារិទ្ធ ស្វាគមន៍ចំណាត់ការចាប់ខ្លួននេះហើយសង្ឃឹមថាការអនុវត្តបែបនេះនឹងបន្តធ្វើទៀត។
លោកជំរុញអាជ្ញាធរថៃ និងអាជ្ញាធរកម្ពុជាដូចគ្នាឲ្យគោរពតាមច្បាប់មនុស្សធម៌អន្តរជាតិ។
លោកបន្តថា៖ «ភាគីទាំងពីរគួរគោរពច្បាប់មនុស្សធម៌ជាជាងការបាញ់មនុស្សដូចសត្វ»៕ PS
