The Phnom Penh Post Search

Search form




Logo of Phnom Penh Post newspaper Phnom Penh Post - ខ្មែរ.អាមេរិក​ប្រើ​កាំភ្លើង​ជ័រ​ទៅ​ប្លន់​​ត្រូវ​ចាប់​ខ្លួន

ខ្មែរ.អាមេរិក​ប្រើ​កាំភ្លើង​ជ័រ​ទៅ​ប្លន់​​ត្រូវ​ចាប់​ខ្លួន

ខ្មែរ.អាមេរិក​ប្រើ​កាំភ្លើង​ជ័រ​ទៅ​ប្លន់​​ត្រូវ​ចាប់​ខ្លួន

ភ្នំពេញៈ បុរស​ខ្មែរ​អាមេរិកាំង​ម្នាក់​ត្រូវ​សមត្ថកិច្ច​ចាប់​ខ្លួន​បញ្ជូន​ទៅ​សាលា​ដំបូង​រាជធានី​ភ្នំពេញ​នៅ​ថ្ងៃ​អង្គារ​នេះ បន្ទាប់​ពី​យក​កាំភ្លើង​ជ័រ​ទៅ​វាយ​ប្លន់​អ្នក​ដូរ​លុយ​និង​វេរ​ប្រាក់​នៅ​ផ្សារ​អូឡាំពិក ហើយ​បែក​ស្នាប់​កាំភ្លើង ត្រូវ​បែក​ការណ៍ កាលពី​ថ្ងៃទី​២ ខែ​ធ្នូ។

លោក ហ៊ាង ថារ៉េត អធិការរង​នគរបាល​ខណ្ឌ​ចំការមន​ប្រាប់​ឲ្យ​ដឹង​ថា ជន​សង្ស័យ​ជា​អាណិកជន​ខ្មែរ​នៅ​អាមេរិក ត្រូវ​បាន​ចាប់​ខ្លួន​បន្ទាប់ពី​ធ្វើ​សកម្មភាព​ប្លន់​អ្នក​ដូរ​លុយ​និង​វេរ​ប្រាក់​នៅ​ម្តុំ​ផ្សារ​អូឡាំពិក​មិន​បាន​សម្រេច កាលពី​ថ្ងៃ​អាទិត្យ​កន្លង​ទៅ។

លោក បន្ត​ថា ៖ «យើង​រៀបចំ​ឯកសារ​រួច​ហើយ​ដោយ​បាន​ចោទ​ប្រកាន់​ជន​នេះ​ពី​បទ​ប្លន់ ហើយ​នឹង​បញ្ជូន​គេ​ទៅ​តុលាការ​នៅ​ថ្ងៃ​អង្គារ​នេះ»។

លោក ពៅ ពិដោរ នាយប៉ុស្តិ៍​នគរបាល​សង្កាត់​ទួលស្វាយព្រៃ​ទី១ បាន​ឲ្យ​ដឹង​ថា ជន​សង្ស័យ​ឈ្មោះ ខេម រ៉ា នង អាយុ ៤១ ឆ្នាំ ស្នាក់​នៅ​សង្កាត់​ចោមចៅ ខណ្ឌ​ពោធិ៍សែនជ័យ​ជា​អាណិកជន​ខ្មែរ​នៅ​សហរដ្ឋ​អាមេរិក​ធ្វើ​សកម្មភាព​ប្លន់​កាលពី​ព្រឹក​ថ្ងៃ​អាទិត្យ​នៅ​ផ្ទះ​លេខ​១២ ផ្លូវ​២៩៨ ខាង​ត្បូង​ផ្សារ​អូឡាំពិក ស្ថិត​ក្នុង​សង្កាត់​ទួលស្វាយព្រៃ១ ខណ្ឌ​ចំការមន ប៉ុន្តែ ប្លន់​មិន​បាន​សម្រេច​ទេ។ ចំណែក​ស្ត្រី​រងគ្រោះ​ឈ្មោះ ឡោ លីឆេង អាយុ ២៣​ឆ្នាំ ជា​និស្សិត​ស្នាក់​នៅ សង្កាត់​ទួលស្វាយព្រៃ​ទី១ ក្នុង​ខណ្ឌ​ចំការមន​នេះ​ដែរ។

ជនជាប់​ចោទ​សារ​ភាព​ប្រាប់​សមត្ថកិច្ច​ថា មុន​ធ្វើ​សកម្មភាព​រូប​គេ​បាន​ស្លៀកពាក់​ជា​អ្នក​មាន​លុយ​និង​បាន​ជិះ​ម៉ូតូ​ទៅ​ឈប់​មុខ​ផ្ទះ​កើត​ហេតុ រួច​ដើរ​ចូល​ទៅ​ក្នុង​ផ្ទះ​នោះ​ហើយ​ដក​កាំភ្លើង​និង​កាំបិត ភ្ជង់​គំរាម​ម្ចាស់​ផ្ទះ និង​ស្រែក​បញ្ជា​ឲ្យ​ប្រមូល​ប្រាក់​មក​ឲ្យ​ខ្លួន និង​បាន​វាយ​ក្បាល​នារី​ម្ចាស់​ផ្ទះ​មួយ​ស្នាប់​កាំភ្លើង​ជ័រ​នោះ។ ប៉ុន្តែ​ពេល​វាយ​ក្បាល​ជន​រងគ្រោះ​កាំភ្លើង​ជ័រ​នោះ​បាន​បែក ពេល​ដឹង​ថា​ជា​កាំភ្លើង​ជ័រ ស្ត្រី​រងគ្រោះ​ក៏​បាន​ស្ទុះ​រត់​ចេញ​មក​ខាង​ក្រៅ​ផ្ទះ ហើយ​ស្រែក​ឆោ​ឡោឡើង​ភ្លាមៗ​ឲ្យ​គេ​ជួយ។ លោក​បន្ត​ថា ប៉ុន្តែ​ជន​សង្ស័យ​ភ្លាមៗ បាន​រត់​គេច​ទៅ​តាម​ផ្លូវ​លេខ ៣១០ រួច​ឡើង​ទៅ​លើ​ផ្ទះ​លេខ​១៧ ជាន់​ទី៤ ចូល​ទៅ​ក្នុង​ផ្ទះ​គេ រួច​កឹប​សោ​គំរាម​ម្ចាស់​ផ្ទះ​មិន​ឲ្យ​ស្រែក។

លោក​បន្តថា ជន​នេះ​ជា​អ្នក​ញៀន​និង​ចាញ់​ល្បែង​អស់​ប្រាក់​ពី​ខ្លួន ក៏​បែក​គំនិត ទិញ​កាំភ្លើង​ជ័រ​ទៅ​ធ្វើ​សកម្មភាព​ភ្ជង់​ប្លន់​លុយ​ពី​អ្នក​ដូរ​លុយ​និង​វេរ​ប្រាក់​មួយ​នេះ ព្រោះ​រាល់​ខែ​ប្រពន្ធ ផ្ញើ​លុយ​មក​ឲ្យ​តាម​ផ្ទះ​វេរ​ប្រាក់​នេះ ដែល​ធ្វើ​ដូច​ខ្លួន​ស្គាល់​ផ្ទះ​នេះ​ច្បាស់។

លោក​ឲ្យ​ដឹង​ថា៖«ជន​សង្ស័យ​មិន​បាន​បង្ក​របួសស្នាម​ដល់​ម្ចាស់​ផ្ទះ​ដែល​គេ​លាក់​ខ្លួន​នោះ​ទេ ប៉ុន្តែ គេ​បាន​បញ្ជា​ឲ្យ​ខ្ញុំ​ធ្វើ​លិខិត​ធានា​ថា​មិន​យក​ទោស​រូប​គេ​ហើយ​ខ្ញុំ ក៏​ធ្វើ​តាម ទើប​ចាប់​គេ​បាន»។

លោក​មេ​ប៉ុស្តិ៍ ថា ជន​សង្ស័យ​អះអាង​ថា រូប​គេ​ជា​អាណិកជន​មក​ពី​អាមេរិក ដែល​ត្រូវ​អាជ្ញាធរ​អាមេរិក​ចាប់​បញ្ជូន​ខ្លួន​មក​ស្រុក​ខ្មែរ​វិញ​ទើប​តែ​បាន​៣​ខែ ដោយ​សារ​បង្ក​បទល្មើស​ច្រើន​ដង និង​បាន​ដុត​ឡាន​គេ​នៅ​អាមេរិក​ផង។

ស្ត្រី​រង​គ្រោះ ឡោ លីឆេង បាន​រៀបរាប់​ថា ថ្វី​បើ​ផ្ទះ​នាង​បើក​អាជីវកម្ម​ប្តូរ​និង​វេរ​ប្រាក់​តែ​មិន​បើក​ជា​ចំហ​ទេ។ នាង​ថា ជនល្មើស​បាន​ពាក់​មួក​កាតឹប​និង​ពាក់​ម៉ាស់ បាន​រុញ​ទា្វរ​ដើរ​ចូល​មក​រួច​គំរាម​នាង​និង​អ្នក​ផ្ទះ​បីនាក់​ទៀត​ឲ្យ​យក​លុយ​ឲ្យ​ទៅ​គេ។ តែ​នាង​ថា គ្មាន​លុយ​ទេ និង​ទាញ​ថតតុ​ឲ្យ​គេ​មើល​ទៀត។ នាង​ថា៖ «ខ្ញុំ​មិន​ដឹង​ថា ជន​សង្ស័យ​មាន​កាំបិត​ចុង​ស្រួច​ខណៈ​គេ​វាយ​ក្បាល​ខ្ញុំ​ទេ ខ្ញុំ​ក៏​ស្រែក​ឡើង​ទៅ»។ នាង​បន្តថា​ពីថ្ងៃ​ទី​២៥ វិច្ឆិកា ជន​នេះ​ធ្លាប់​មក​ដក​ប្រាក់១ ពាន់​ដុល្លារ​ដែល​ប្រពន្ធ​ផ្ញើមក​ម្តង​ដែរ៕

អត្ថបទគួរចាប់អារម្មណ៍