.jpg)
មន្រ្តីកាកបាទក្រហមកម្ពុជាចុះត្រួតពិនិត្យទីតាំងរងគ្រោះដោយសារខ្យល់កន្ត្រាក់នៅខេត្តបាត់ដំបង កាលពីថ្ងៃទី ៣ មីនា។ រូបថត CRC
ភ្នំពេញៈ យ៉ាងហោចណាស់មានមនុស្ស ៧ នាក់ បានរងរបួស ខណៈផ្ទះពលរដ្ឋរួមទាំងតូបលក់ដូរ សាលារៀន និងរោងម៉ាស៊ីនកិនស្រូវ សរុបជិត ៤០០ ខ្នង បានរងការខូចខាត ដោយសារបាតុភូតខ្យល់កន្ត្រាក់ក្នុងរយៈពេល ២ ខែដើមឆ្នាំនេះ។ នេះបើតាមទិន្នន័យរបស់គណៈកម្មាធិការជាតិគ្រប់គ្រងគ្រោះមហន្តរាយពីម្សិលមិញ តែមិនទាន់រាប់បញ្ចូលករណីថ្មីៗចុងក្រោយទេ។
លោក សៀក វិចិត្រ អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ ភ្នំពេញ ប៉ុស្តិ៍ថា ២ ខែ ដើមឆ្នាំនេះ បាតុភូតខ្យល់កន្ត្រាក់បានកើតឡើង ១១ លើកដោយបានបង្កឱ្យមនុស្ស ៧ នាក់ រងរបួស និងបង្កខូចខាតផ្ទះពលរដ្ឋ ក្នុងខេត្តបាត់ដំបង ស្វាយរៀង បន្ទាយមានជ័យ ឧត្តរមានជ័យ ព្រះវិហារ កណ្ដាល និងខេត្តព្រះសីហនុសរុប ៣៨៨ ខ្នង ក្នុងនោះផ្ទះ ៩ ខ្នងរងការខូចខាតទាំងស្រុង និងខូចខាតរោងម៉ាស៊ីនកិនស្រូវចំនួន ២ សាលារៀន ១ ខ្នងព្រមទាំងទូកនេសាទសមុទ្រចំនួន ១ ។
លោកថ្លែងថា៖ «ជាទូទៅបាតុភូតខ្យល់កន្ត្រាក់ ច្រើនចាប់ផ្ដើមកើតមានពីខែឧសភា ដល់ដំណាច់ខែវិច្ឆិកា ប៉ុន្តែនៅឆ្នាំនេះ វាបានប្រែប្រួលខុសពីធម្មតា ដោយបានកើតមានតាំងពីចុងខែមករាមក។ ខេត្តដែលកើតញឹកញាប់ជាងគេ គឺខេត្តបាត់ដំបង»។
បើតាមលោក វិចិត្រ ភាព ប្រែប្រួលនៃអាកាសធាតុបានជំរុញឱ្យមានបាតុភូតនេះខុសប្រក្រតី។
ជាពិសេសពេលនេះ ប្រទេសកម្ពុជា កំពុងស្ថិតក្នុងអន្តរកាលនៃការផ្លាស់ប្ដូររដូវរំហើយមកជារដូវប្រាំង ដែលធ្វើឱ្យតំបន់មួយចំនួននឹងមានភ្លៀងធ្លាក់ពីតិចទៅមធ្យមដោយមានលាយឡំខ្យល់កន្ត្រាក់ និងផ្គររន្ទះផងដែរ។
ជាមួយគ្នានេះលោកបានអំពាវនាវដល់ពលរដ្ឋដែលរស់នៅក្នុងតំបន់ងាយរងគ្រោះពីបាតុភូតនេះត្រូវបង្កើនការប្រុងប្រយ័ត្នពីសុវត្ថិភាពផ្ទាល់ខ្លួន និងក្រុមគ្រួសារដោយត្រូវដាំដើមឈើធំៗជុំវិញផ្ទះ ដើម្បីជួយទប់ខ្យល់ និងមិនត្រូវប្រើឧបករណ៍អេឡិចត្រូនិកដែលជាប្រភពចម្លងអគ្គិសនីពេលមានភ្លៀងផ្គរនោះទេ ។
ជុំវិញបាតុភូតខ្យល់កន្ត្រាក់នេះលោក គាត ហ៊ុល អភិបាលក្រុងប៉ោយប៉ែត បានប្រាប់ ភ្នំពេញ ប៉ុស្តិ៍ ដែរថា ផ្ទះពលរដ្ឋ ២៦ ខ្នងធ្វើពីឈើប្រក់ស័ង្កសីនៅសង្កាត់ប៉ោយប៉ែត និងសង្កាត់ផ្សារកណ្ដាលបានដួលរលំ និងប៉ើងដំបូលខូចខាតយ៉ាងដំណំ បន្ទាប់ពីមានភ្លៀង និងខ្យល់កន្ត្រាក់កាលពីរសៀលថ្ងៃទី ៣ មីនា ឆ្នាំ ២០២១។
លោកថា៖ «ភ្លៀងខ្យល់កាលពីរសៀលថ្ងៃពុធនោះ គឺពិតជាគួរឱ្យខ្លាចណាស់គឺវាធ្លាក់មកប្រាវៗហើយបក់បោកផ្ដួលរំលំផ្ទះពលរដ្ឋអស់ ១០ ខ្នង និង ១៦ ខ្នងទៀតប៉ើងរបើកអស់ដំបូល»។
បើតាមលោក ហ៊ុល គណៈបញ្ជាការកងឯកភាពក្រុងប៉ោយប៉ែតជាង ២០០ នាក់ បានចុះអន្តរាគមន៍ជួយជួសជុលផ្ទះឡើងវិញ ជូនគ្រួសារក្រីក្ររងគ្រោះដោយខ្យល់កន្ត្រាក់ទាំងនោះ ព្រមទាំងចែកស្បៀងសង្គ្រោះបឋមក្នុង ១ គ្រួសារបានអង្ករ ២៥ គីឡូ ទឹកត្រី ៦ ដប ទឹកស៊ីអ៊ីវ ៦ ដប និងមី ១ កេស។
លោកបានបញ្ជាក់ថា៖ «គិតត្រឹមម៉ោង ៣ រសៀលថ្ងៃព្រហស្បតិ៍ [ម្សិលមិញ] នេះក្រុមការងារយើងបានជួយជួសជុលផ្ទះអ្នកភូមិដែលខូចខាតដោយខ្យល់កន្ត្រាក់បានចំនួន ១៥ ខ្នងផ្ទះហើយ។ យ៉ាងយូរនៅព្រឹកស្អែក [ថ្ងៃសុក្រ] នេះយើងនឹងបន្តជួយជួសជុលជូនពួកគាត់ឱ្យបានរួចរាល់ទាំងអស់តែម្ដង»។
ចំណែកផ្ទះពលរដ្ឋចំនួន ៤០ ខ្នងនៅឃុំចំនួន ៣ ក្នុងស្រុករុក្ខគិរីខេត្តបាត់ដំបង បានរងការខូចខាតយ៉ាងដំណំផងដែរ បន្ទាប់ពីមានភ្លៀង ១ មេធំកើតឡើងលាយឡំខ្យល់កន្ត្រាក់បក់បោកខ្លាំងកាលពីរសៀលថ្ងៃ ២ មីនាឆ្នាំ ២០២១។ នេះបើតាមសម្ដីលោក ឆែ ម៉ាប់ អធិការស្រុករុក្ខគិរីកាលពីម្សិលមិញ។
លោកថ្លែងថា ក្រោយពីមានភ្លៀង និងខ្យល់បក់បោកខ្លាំងនារសៀលថ្ងៃអង្គារនោះ សមត្ថកិច្ចបានចុះស្រង់ស្ថិតិខ្នងផ្ទះប្រជាពលរដ្ឋដែលខូចខាតក្នុងនោះនៅឃុំស្តុកប្រវឹក សមត្ថកិច្ចបានរកឃើញផ្ទះពលរដ្ឋចំនួន ២២ ខ្នង ប៉ើងរបើកដំបូល ខណៈនៅឃុំព្រៃត្រឡាច រកឃើញមាន ១៣ ខ្នងផ្ទះ ប៉ើងរបើកដំបូល និងនៅឃុំមុខរាហ៍ ដួលរលំផ្ទះ ៥ ខ្នង និងរោងម៉ាស៊ីនកិនស្រូវចំនួន ១ ។ ប៉ុន្តែគ្មាននរណាម្នាក់រងរបួស ឬស្លាប់នៅក្នុងហេតុការណ៍នោះទេ៕
