.jpg)
ខ្សែវីដេអូគំនូរជីវចលផ្តោតលើជំងឺកូវីដឈ្នះជយលាភី។ រូប Save the Children
ភ្នំពេញៈ ខ្សែវីដេអូគំនូរជីវចលមួយដែលមានចំណងជើងថា «គ្រួសាររីករាយ» ដែលផ្តោតលើការផ្លាស់ប្តូរឥរិយាបថសង្គមផ្តល់សកម្មភាពផ្សេងៗពីហានិភ័យ នៃការប្រាស្រ័យទាក់ទងស្តីពីជំងឺកូវីដ ១៩ នៅប្រទេសកម្ពុជា ត្រូវបានជ្រើសរើស ឬឈ្នះសម្រាប់ការប្រកួតប្រជែងជយលាភីចំនួន ២ ពីពានរង្វាន់បែបច្នៃប្រឌិតនៅតំបន់អាស៊ីឆ្នាំ ២០២០ កាលពីសប្តាហ៍មុន។
យោងតាមសេចក្តីប្រកាសព័ត៌មានរួមរបស់ក្រសួងអប់រំ យុវជន និងកីឡា អង្គការ USAID អង្គការ Save the Children អង្គការ UNICEF និង Breakthrough-ACTION កាលពីថ្ងៃទី ២៦ តុលា ឱ្យដឹងថា «គ្រួសាររីករាយ» ដែលជាវីដេអូគំនូរជីវចលភាគសម្រាប់កុមារបានឈ្នះការប្រកួតប្រជែងកម្រិតថ្នាក់ប្រទេសសម្រាប់ពានរង្វាន់បែបច្នៃប្រឌិតនៅតំបន់អាស៊ីឆ្នាំ ២០២០ គឺជាពានរង្វាន់ដែលល្អបំផុតសម្រាប់កម្មវិធីមត្តេយ្យសិក្សា និងពានរង្វាន់ដែលល្អបំផុតសម្រាប់កម្មវិធីគំនូរជីវចល។
តាមរយៈសេចក្តីប្រកាសព័ត៌មានរួមខាងលើក៏បានលើកយកសាររបស់អគ្គនាយិកាពានរង្វាន់បែបច្នៃប្រឌិតនៅតំបន់អាស៊ី លោកស្រី Fiona McKay ដែលបានសាទរចំពោះការឈ្នះការប្រកួតជុំថ្នាក់ជាតិនេះ។
លោកស្រីមានប្រសាសន៍ថា៖ «តាងនាមឱ្យពានរង្វាន់បែបច្នៃប្រឌិតនៅតំបន់អាស៊ី ខ្ញុំសូមអបអរសាទរ ដែលអ្នកបានឈ្នះការប្រកួតប្រជែងជុំថ្នាក់ជាតិ។ មានន័យថា គណៈកម្មាធិការបានវាយតម្លៃថា វីដេអូរបស់អ្នកគឺល្អបំផុតនៅក្នុងប្រទេសរបស់អ្នក»។
ខ្សែវីដេអូភាគនេះត្រូវបានផលិតឡើងដើម្បីចែករំលែកពីសារដែលទាក់ទងនឹងការការពារពីជំងឺកូវីដ ១៩ ជាមួយកុមារ និងអាណាព្យាបាល។ ខ្សែវីដេអូនេះ ផ្តល់ជំនាញពេញ ១ ជីវិតដល់កុមារ និងអ្នកថែទាំអំពីវិធីការពារខ្លួនពីវីរុសកូវីដ១៩ក៏ដូចជាវិធីទប់ទល់ជាមួយរោគរាតត្បាត និងបញ្ឈប់ការរាតត្បាតរបស់វា។ អ្នកចូលរួមជាច្រើនមកពីប្រទេសផ្សេងគ្នាក្នុងតំបន់អាស៊ីបានចូលរួមក្នុងការប្រកួតប្រជែងពានរង្វាន់នេះ និងគណៈកម្មាធិការសរុបច្រើនជាង ៣០០ នាក់បានពិនិត្យ និងឱ្យពិន្ទុ។
បើតាមសេចក្តីប្រកាសព័ត៌មានដដែលខ្សែវីដេអូភាគដែលមានលក្ខណៈសប្បាយក្នុងន័យអប់រំនេះ ផលិតឡើងសម្រាប់កុមារដែលមានអាយុចាប់ពី ៥ ដល់ ១០ ឆ្នាំហើយមានគ្រួសារទន្សាយជាតួអង្គ។ ដំណើរ និងសារ មានដូចជាការលាងដៃ ការរក្សាគម្លាតសុវត្ថិភាពសង្គម ស្វ័យសិក្សានៅផ្ទះ សុខុមាលភាពផ្លូវចិត្ត និងផ្លូវកាយ និងការរើសអើង។ វគ្គនីមួយៗមាន លក្ខណៈប្លែកៗពីគ្នា និងទាក់ទាញសម្រាប់ឪពុកម្តាយ និងអ្នកថែទាំកុមារផ្សេងទៀតដែលនឹងរៀនជាមួយកូនៗផងដែរពីវិធីអនុវត្តវិធានការការពារពីជំងឺកូវីដ១៩។
លោកស្រី សាយ សុខភាព ប្រធានគ្រប់គ្រងផ្នែកទំនាក់ទំនងនៃអង្គការ Save the Children ប្រាប់ភ្នំពេញប៉ុស្តិ៍ពីថ្ងៃទី ២៦ តុលា ថា អង្គការ Save the Children មានសេចក្តីរំភើបជាខ្លាំងដែលវីដេអូនេះត្រូវបានជ្រើសរើសសម្រាប់ការប្រកួតប្រជែងថ្នាក់ជាតិនៅប្រទេសកម្ពុជា សម្រាប់ពានរង្វាន់បែបច្នៃប្រឌិតអាស៊ីចំនួន ២ សម្រាប់កម្មវិធីមត្តេយ្យសិក្សាល្អបំផុត និងកម្មវិធីជីវចលល្អបំផុត។ វីដេអូនេះត្រូវបានពិនិត្យ និងដាក់ពិន្ទុដោយចៅក្រមជាង ៣០០ នាក់។
លោកស្រីបញ្ជាក់ថា៖ «ខ្សែវីដេអូ ភាគដែលមានលក្ខណៈសប្បាយក្នុងន័យអប់រំនេះ ផលិតឡើងសម្រាប់កុមារដែលមានអាយុចាប់ពី ៥ ដល់ ១០ ឆ្នាំ។ វីដេអូនេះបង្រៀនក្មេងៗអំពីការលាងដៃការរក្សាគម្លាតសង្គម ការរៀនសូត្រពីផ្ទះ សុខុមាលភាពផ្លូវចិត្ត និងរាងកាយ និងការមាក់ងាយ និងការរើសអើងក្នុងអំឡុងពេលនៃការរីករាលដាលជំងឺកូវីដ ១៩»។
លោកស្រី សុខភាព ថ្លែងថា វគ្គនីមួយៗមានលក្ខណៈប្លែក និងធ្វើឡើងដើម្បីអំពាវនាវដល់ឪពុកម្តាយ និងអ្នកមើលថែក្មេងៗដទៃទៀតរៀនពីវិធីអនុវត្តបច្ចេកទេសបង្ការពីកូវីដ១៩។ វីដេអូនេះនឹងបង្កើនឱកាសឱ្យកុមារអាចរៀន និងអនុវត្តតាមបាន។
លោកស្រីបន្ថែមថា៖ «លទ្ធផលចុងក្រោយគឺនៅដើមខែធ្នូ ឆ្នាំ ២០២០ ខាងមុខនេះ ហើយយើងសង្ឃឹមថា យើងអាចឈ្នះពានរង្វាន់នេះ»។
បើតាមលោកស្រី អេលីហ្សាប៊ែត ភៀស នាយិកាអង្គការ Save the Children ប្រចាំប្រទេសកម្ពុជា គឺអង្គការរបស់លោកស្រីក៏បានថ្លែងអំណរគុណដល់ស្ថាប័នពាក់ព័ន្ធដូចជាក្រសួង អប់រំ យុវជន និងកីឡា និងអង្គការ យូនីសេហ្វ ចំពោះការគាំទ្រ និងសហការក្នុងការទទួលបានលទ្ធផលដ៏អស្ចារ្យនេះជាមួយគ្នា។
លោកស្រីថ្លែងថា៖ «យើងសូមថ្លែងអំណរគុណដល់ប្អូនកុមារ និងយុវជន ដែលបានចូលរួមក្នុងការផ្តល់ព័ត៌មានត្រឡប់មុននឹងបញ្ចប់វីដេអូទាំងនេះ»។
អ្នកឈ្នះចុងក្រោយក្នុងប្រភេទវីដេអូនីមួយៗនឹងទទួលបានពានរង្វាន់កិត្តិយសជាមាសដែលមានឈ្មោះថា «Goddess of Creativity» ដែលជារូបចម្លាក់រចនា និងផលិតដោយក្រុមហ៊ុនដែលទទួលខុសត្រូវដូចជា Emmy និង Golden Globes។ នេះបើតាមសេចក្តីប្រកាសព័ត៌មានរួមខាងលើ។
គួរបញ្ជាក់ផងដែរថា ខ្សែវីដេអូជីវចលភាគ «គ្រួសាររីករាយ» នេះបានធ្វើការចាក់ផ្សាយនៅស្ថានីយទូរទស្សន៍មួយចំនួន និងលើបណ្តាញទំនាក់ទំនងសង្គមផ្លូវការរបស់ក្រសួងអប់រំ យុវជន និងកីឡា អង្គការ Save the Children និងអង្គការ UNICEF កាលពី ខែឧសភា រហូតដល់ចុងខែតុលា ឆ្នាំ ២០២០ នេះ៕
