The Phnom Penh Post Search

Search form




Logo of Phnom Penh Post newspaper Phnom Penh Post - ខ្សែ​រថយន្ត​ក្រុង ទី២-ទី៣ មិន​ទាន់​ពេញ​និយម​អតិថិជន

ខ្សែ​រថយន្ត​ក្រុង ទី២-ទី៣ មិន​ទាន់​ពេញ​និយម​អតិថិជន

រថយន្ត​ក្រុង​ដែល​ដាក់​ដំណើរ​ការ​ក្នុង​រាជធានី​ភ្នំពេញ។
រថយន្ត​ក្រុង​ដែល​ដាក់​ដំណើរ​ការ​ក្នុង​រាជធានី​ភ្នំពេញ។ ផា លីណា

ខ្សែ​រថយន្ត​ក្រុង ទី២-ទី៣ មិន​ទាន់​ពេញ​និយម​អតិថិជន

ភ្នំពេញៈ នៅ​ចំណត​រថយន្ត​ក្រុង​ខ្សែ​ទីពីរ​និង ទី៣ ថ្មី​នៅ​ផ្សារ​រាត្រី ក្នុង​រាជធានី​ភ្នំពេញ រថយន្ត​ពីរ​គ្រឿង​បាន​ចាប់​ផ្តើម​ចេញ​ដំណើរ​លើ​ផ្លូវ​រថ​ថ្មី​របស់​ខ្លួន ហើយ​ដែល​នៅ​នឹង​ចំណត​រថយន្ត​ក្រុង​នេះ​គឺ​មាន​លក្ខណៈ​ធម្មតា ប៉ុន្តែ​គ្រាន់​តែ​មាន​ពេល​ខ្លះ រថយន្ត​ធ្វើ​ដំណើរ​ទៅ​តាម​ទិស​ដៅ​របស់​ខ្លួន​ដោយ​គ្មាន​អ្នក​ដំណើរ​ជិះ​ឡើយ។

អ្នក​បើកបរ​រថយន្ត​ក្រុង​ខ្សែ ទី២ លោក ក្រី សឺជា បាន​ឲ្យ​ដឹង​ថា មាន​ពេល​ខ្លះ​លោក​បើក​រថយន្ត​ក្រុង​ចេញ​ពី​ផ្សារ​រាត្រី​ទៅ ក្រុង​តាខ្មៅ ខេត្ត​កណ្តាល ដោយ​គ្មាន​អ្នក​ដំណើរ​ជិះ​និង​ត្រឡប់​មក​វិញ​ដោយ​មាន​អ្នក​ដំណើរ​តែ ៦-៧ នាក់​ប៉ុណ្ណោះ។

លោក​បន្ត​ថា៖ «នេះ​ដោយ​សារ​តែ​មាន​ចំនួន​រថយន្ត​ក្រុង​ច្រើន​ពេក»។

ពិត​ណាស់​មួយ​ខែ​បន្ទាប់​ពី​ការ​បើក​ខ្សែ​រថយន្ត​ក្រុង ទី២ ថ្មី​នេះ គឺ​មាន​អ្នក​ដំណើរ​ទៅ​មក​តែ​ពីរ​ទៅ​បី​នាក់។ នេះ​បើ​តាម​អ្នក​បើក​បរ​រថយន្ត​ក្រុង​និង​អ្នក​ដំណើរ​អះអាង បើ​ទោះ​បី​ជា​ខ្សែ​រថយន្ត​ក្រុង ទី៣ ដែល​រត់​ពី​ផ្សារ​រាត្រី​ទៅ​ម្តុំ ចោមចៅ ខណ្ឌ​ពោធិ៍​សែន​ជ័យ មាន​ប្រជាប្រិយ​ភាព​ជាង​ក៏​ដោយ។

នៅ​ពេល​លោក សឺជា ចាប់​ផ្តើម​ធ្វើ​ការ​នៅ​ខ្សែ ទី៣ ដំបូង​គាត់​បាន​សង្កេត​ឃើញ​មាន​អតិថិជន​មាន​ចំនួន​ច្រើន​ជាង ប៉ុន្តែ រហូត​មក​ដល់​ពេល​នេះ មិន​ទាន់​មាន​រថយន្ត​ក្រុង​មាន​អ្នក​ដំណើរ​ពេញ ឬ​ជាង​ពាក់​កណ្តាល​ជិះ​នៅ​ឡើយ»។

ប៉ុន្តែ​ទោះ​យ៉ាង​ណា​ក្តី អ្នក​នាំ​ពាក្យ​នៃ​សាលា​រាជធានី​ភ្នំពេញ លោក ឡុង ឌីម៉ង់ បាន​ថ្លែង​ថា លោក​មាន​មោទនភាព​ណាស់​ចំពោះ​ដំណើរ​ការ​នៃ​ខ្សែ​រថយន្ត​ក្រុង​ថ្មី​ទាំង​ពីរ​ខ្សែ​នេះ។

លោក​អះអាង​ថា៖ «សូម​កុំ​ស្តាប់​អ្នក​បើក​រថយន្ត​សូម​អ្នក​ស្តាប់​ខ្ញុំ​វិញ»។

បើ​តាម​មន្ត្រី​សាលា​រាជធានី​ភ្នំពេញ ខ្សែ​រថយន្ត​ក្រុង ទី១ ដែល​រត់​តាម​បណ្តោយ​មហា​វិថី​ព្រះ​មុនីវង្ស បច្ចុប្បន្ន​មាន​អ្នក​ដំណើរ​ប្រចាំ​ថ្ងៃ ១ ១៧១ នាក់​ហើយ​ខ្សែ ទី២ មាន​អ្នក​ដំណើរ​ចំនួន ៩៣៨ នាក់​ចំណែក​ខ្សែ ទី៣ មាន​អ្នក​ដំណើរ​ចំនួន ១ ៦២៥ នាក់។

ទោះ​ជា​យ៉ាង​ដូច្នេះ​ក្តី ក៏​នៅ​មាន​អ្នក​ខ្លះ​មាន​សុទិដ្ឋិ​និយម​ដែរ​ថា ចំនួន​នេះ​នឹង​បន្ត​កើន​ឡើង​ខណៈ​ប្រជាជន​កាន់​តែ​ច្រើន​ឡើងៗ ចាប់​ផ្តើម​យល់​ដឹង​អំពី​ខ្សែ​រថយន្ត​ក្រុង​នេះ។

បើ​ទោះ​ជា​មាន​អ្នក​ធ្វើ​ដំណើរ​តែ ១០ នាក់​ជិះ​នៅ​លើ​រថយន្ត​ក្រុង​របស់​លោក​ក្តី លោក នាង សុភា អាយុ ៣០​ឆ្នាំ ដែល​ជា​អ្នក​បើក​រថយន្ត​ក្រុង​ខ្សែ ទី២ បាន​និយាយ​ដែរ​ថា៖ «​ចំនួន​នេះ​នឹង​កើន​ឡើង​នា​ពេល​ខាង​មុខ» ខណៈ​អ្នក​លក់​សំបុត្រ​រថយន្ត​ក្រុង​មួយ​រូប​គឺ​អ្នក​នាង សូត សុភាព អាយុ ២១​ឆ្នាំ បាន​កត់​សម្គាល់​ថា ចរាចរណ៍​រថយន្ត​ក្រុង​មាន​អ្នក​ដំណើរ​ច្រើន​នៅ​ពេល​ល្ងាច។

ទោះ​យ៉ាង​ណា​ក្តី អ្នក​ខ្លះ​មាន​ក្តី​បារម្ភ​ខ្លាច​ថា គម្រោង​រថយន្ត​ក្រុង​នេះ​នឹង​លែង​ដំណើរ​ការ​វិញ ដូច​ជា គម្រោង​សាក​ល្បង​កាល ឆ្នាំ​២០០១ ប៉ុន្តែ លោក ឡុង ឌីម៉ង់ បាន​ថ្លែង​បញ្ជាក់​កន្លង​មក​ហើយ​ថា រថយន្ត​ក្រុង​ចំនួន ១៨ ខែ្ស​នឹង​ត្រូវ​បង្កើត​ឡើង​នៅ​ត្រឹម ឆ្នាំ​២០៣៥។

លោក អិត សាមុន អាយុ ៣០​ឆ្នាំ ដែល​ជា​អ្នក​ប្រើ​ប្រាស់​សេវា​រថយន្ត​ក្រុង​ជា​រៀង​រាល់​ថ្ងៃ​ម្នាក់ បាន​ថ្លែង​ថា គាត់​ចូល​ចិត្ត​ជិះ​រថយន្ត​ក្រុង ពីព្រោះ​វា​មាន​តម្លៃ​សមរម្យ ប៉ុន្តែ​លោក​បារម្ភ​ថា មិន​ដឹង​ជា​យ៉ាង​ម៉េច​ទេ នៅ​ពេល​ខាង​មុខ​ទៀត។

លោក​បាន​និយាយ​ថា៖ «ខ្ញុំ​បារម្ភ​ថា សាលា​ក្រុង​មិន​អាច​មាន​សមត្ថភាព​ផ្តល់​សេវា​នេះ ខណៈ​ខ្ញុំ​ស៊ាំ​នឹង​ការ​ប្រើ​ប្រាស់​រថយន្ត​ក្រុង»៕

អត្ថបទគួរចាប់អារម្មណ៍