.jpg)
លោក គន់ គីម (ឆ្វេង ដៃចង្អុលផែនទី) នៅក្នុងពិធីប្រកាសដាក់ឲ្យប្រើប្រាស់ប្រព័ន្ធព័ត៌មានទាន់ហេតុការណ៍កាលពីថ្ងៃម្សិលមិញ។ ហុង មិនា
ភ្នំពេញៈ គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) និងកម្មវិធីស្បៀងអាហារពិភពលោក (WFP) ពីម្សិលមិញបានប្រកាសដាក់ឱ្យប្រើប្រាស់នូវប្រព័ន្ធព័ត៌មានទាន់ហេតុការណ៍ និងតាមដានសភាពការណ៍ (PRISM) ដើម្បីគ្រប់គ្រងវិបត្ដិ និងកាត់បន្ថយហានិភ័យគ្រោះមហន្តរាយក្នុងប្រទេសកម្ពុជា។
ការប្រកាសដាក់ឱ្យប្រើប្រាស់ប្រព័ន្ធព័ត៌មានទាន់ហេតុការណ៍ និងតាមដានសភាពការណ៍ Platform for Real-time Impact and Situation Monitoring (PRISM) ពីម្សិលមិញនៅសណ្ឋាគារសុខាភ្នំពេញនេះធ្វើឡើងក្រោមអធិបតីភាពលោក គន់ គីម ទេសរដ្ឋមន្ដ្រី និងជាអនុប្រធានទី ១ គ.ជ.គ.ម. និងលោកស្រី Francesca Erdelmann នាយិកា WFP ប្រចាំកម្ពុជារួមនឹងក្រុមការងារមកពីស្ថាប័នទាំង ២ ប្រមាណ ១៨០ នាក់ទៀត។
លោក គន់ គីម ថ្លែងក្នុងពិធីដាក់ឱ្យប្រើប្រាស់ប្រព័ន្ធ PRISM ថាប្រព័ន្ធព័ត៌មានទាន់ហេតុការណ៍ និងតាមដានសភាពការណ៍ហៅកាត់ថា ព្រីស៊ឹម (PRISM) នេះគឺផ្ដើមចេញពីកិច្ចព្រមព្រៀងរវាង គ.ជ.គ.ម. និង WFP ស្ដីពីការអនុវត្ដសកម្មភាពរួមគ្នាដើម្បីគ្រប់គ្រងវិបត្ដិ និងកាត់បន្ថយហានិភ័យគ្រោះមហន្តរាយក្នុងប្រទេសកម្ពុជាដែលបានចុះហត្ថលេខាកាលពីថ្ងៃទី ២០ ខែវិច្ឆិកា ឆ្នាំ ២០១៩។
លោកថ្លែងថា៖ «កិច្ចព្រមព្រៀងនេះបង្កើតក្របខ័ណ្ឌការងារកិច្ចសហប្រតិបត្ដិការក្នុងការត្រៀមខ្លួនជាស្រេចដើម្បីឆ្លើយតបទៅនឹងហានិភ័យគ្រោះមហន្តរាយដែលកើតមានឡើង ដោយបានអភិវឌ្ឍសមត្ថភាពមន្ដ្រីថ្នាក់ជាតិ និងថ្នាក់ក្រោមជាតិ»។
លោក គន់ គីម មានប្រសាសន៍ថា៖ «តាមរយៈការប្ដេជ្ញាចិត្ដរបស់យើងទាំងអស់គ្នាគឺយើងបានធ្វើការបណ្ដុះបណ្ដាលជូនមន្ដ្រី គ.ជ.គ.ម ថ្នាក់ជាតិ និងថ្នាក់ក្រោមជាតិដោយឱ្យទទួលបាននូវបទពិសោធពីការអនុវត្ដផ្ទាល់ក្នុងការប្រើប្រាស់ឧបករណ៍ ថេប្ល៊ិត ក្នុងការបញ្ចូលទិន្នន័យការប៉ះពាល់ ការខូចខាត ការបាត់បង់ដោយគ្រោះមហន្តរាយ»។
លោកថ្លែងអំណរគុណចំពោះលោកស្រីប្រធាន WFP ប្រចាំកម្ពុជាដែលបានខិតខំជួយឱ្យដំណើរការសហការរវាង គ.ជ.គ.ម. និង WFP សម្រេចបានលទ្ធផលរហូតឈានដល់ការប្រកាសឱ្យប្រើប្រាស់ជាផ្លូវការនៅពេលនេះ។
លោកថា WFP ជាភ្នាក់ងារមនុស្សធម៌ក្នុងការប្រយុទ្ធប្រឆាំងនឹងភាពអត់ឃ្លានលើពិភពលោក និងបានធ្វើការជាមួយរដ្ឋាភិបាលកម្ពុជាចាប់តាំងពីឆ្នាំ ១៩៧៩ ក្នុងការលើកកម្ពស់សន្ដិសុខស្បៀងដល់សហគមន៍ងាយរងគ្រោះ។
លោក គន់ គីម និងលោកស្រីប្រធាន WFP ក្នុងពិធីប្រកាសឲ្យប្រើ Prism ពីម្សិល។ហុង មិនា
លោកស្រី Francesca Erdelmann បានថ្លែងក្នុងពិធីនេះដែរថា WFP និង គ.ជ.គ.ម. បានធ្វើការយ៉ាងជិតស្និទ្ធជាមួយគ្នាតាំងពីឆ្នាំ ២០០៤ ដោយបានកសាង និងបំពេញសមត្ថភាពឱ្យគ្នាទៅវិញទៅមកដើម្បីផ្ដល់ការគាំទ្រសង្គ្រោះអាយុជីវិតប្រជាជនកម្ពុជានៅពេលដែលប្រឈមនឹងគ្រោះមហន្តរាយធម្មជាតិ។
លោកស្រីថ្លែងថា៖ «PRISM ជាវេទិកាដែលបង្ហាញអំពីព័ត៌មានប៉ះពាល់ជាក់ស្តែង និង ជាវេទិកាបង្ហាញពីព្រឹត្តិការណ៍កន្លងទៅដែលអាចឱ្យអ្នកប្រើប្រាស់ វិភាគ និងវាយតម្លៃពីហានិភ័យ និងផលប៉ះពាល់នៃគ្រោះធម្មជាតិ និងឧបទ្ទវហេតុផ្សេងៗទៅលើសហគមន៍ដែលងាយរងគ្រោះ»។
លោកស្រីបន្ថែមថា PRISM គឺជាការរួមបញ្ចូលព័ត៌មានពីផ្កាយរណប និងប្រភពព័ត៌មានពីចម្ងាយព័ត៌មានប៉ាន់ប្រមាណពីទីវាល និងប្រព័ន្ធផ្តល់ដំណឹងជាមុនជាមួយទិន្នន័យអំពីភាពងាយរងគ្រោះខាងសេដ្ឋកិច្ចសង្គម ដើម្បីបង្កើតបានជាព័ត៌មានដែលអាចផ្តល់ជាជំនួយសម្រាប់កំណត់ចំនួនអ្នកដែលត្រូវការជំនួយពិតប្រាកដ។
លោក គន់ គីម បានឱ្យដឹងផងដែរថា តាមការព្យាកររបស់ក្រសួងធនធានទឹក និងឧតុនិយមរដូវវស្សាឆ្នាំនេះនឹងចូលមកលឿនជាងឆ្នាំ ២០១៩។ ក្នុងខែសីហា និងខែកញ្ញា ឆ្នាំ ២០២០ នេះភ្លៀងនឹងអាចធ្លាក់រាយប៉ាយបានល្អនៅលើផ្ទៃប្រទេស បរិមាណទឹកភ្លៀងពីមធ្យមទៅច្រើនក្នុងនោះនឹងអាចបណ្ដាលឱ្យខេត្ដមួយចំនួនមានភូមិសាស្ដ្រនៅទីទំនាប ក្បែរ ជួរភ្នំ ខ្ពង់រាប និងតំបន់ជាប់នឹងផ្លូវទឹកត្រូវប្រឈមខ្ពស់ទៅនឹងជំនន់ទឹកភ្លៀង៕
