ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) គ្រោងនឹងរៀបចំការបោះឆ្នោតសាកល្បង នៅថ្ងៃទី ២៣ ខែ ឧសភា ឆ្នាំ ២០២១ ដើម្បីពិនិត្យលើសុក្រិតភាពនៃបញ្ជីឈ្មោះគណបក្សនយោបាយ បញ្ជីបេក្ខជនឈរឈ្មោះបោះឆ្នោត បញ្ជីឈ្មោះអ្នកមានសិទ្ធិបោះឆ្នោត និងលទ្ធផលនៃការរាប់សន្លឹកឆ្នោត តាមប្រព័ន្ធបច្ចេកវិទ្យាព័ត៌មានវិទ្យា ដើម្បីអនុវត្តសម្រាប់ការបោះឆ្នោតក្រុមប្រឹក្សាឃុំ-សង្កាត់ និងបោះឆ្នោតជ្រើសតាំងតំណាងរាស្ត្រក្នុងឆ្នាំ ២០២២ និង ២០២៣។
លោក សោម សូរិដា អគ្គលេខាធិការរង គ.ជ.ប ប្រាប់ ភ្នំពេញ ប៉ុស្តិ៍ នៅថ្ងៃនេះថា សម្រាប់ការបោះឆ្នោត សាកល្បងនាពេលខាងមុខនេះ គ.ជ.ប បានកំណត់ការិយាល័យបោះឆ្នោត ចំនួន២ នៅក្នុងឃុំ-សង្កាត់ ១ ដែលត្រូវបានជ្រើសរើសនៅក្នុងរាជធានី-ខេត្ត នីមួយៗ ដែលនឹងត្រូវមានការបោះឆ្នោតនៅក្នុងឃុំ-សង្កាត់សរុបចំនួនចំនួន ២៥ នៅទូទាំងប្រទេសនឹងមានករិយាល័យបោះឆ្នោតចំនួន ៥០ ការិយាល័យ។
លោក សោម សូរិដា ថ្លែងថា៖ «គ.ជ.ប នឹងយកឈ្មោះ ប្រជាពលរដ្ឋដែលបានចុះឈ្មោះនៅក្នុងឃុំសង្កាត់នេះ ទំាងអស់ដើម្បី បង្កើតជាបញ្ជីបោះឆ្នោតសាកល្បង។ ការបោះឆ្នោតលើកនេះ គ.ជ.ប នឹងបញ្ចូលទិន្ន័យទៅក្នុងប្រព័ន្ធកុំព្យូទ័រឱ្យកុំព្យូទ័រ គណនាការបូកសរុបលទ្ធផលដោយខ្លួនឯង ចាប់តាំងពីថ្នាក់ឃុំសង្កាត់រហូតដល់ គ.ជ.ប»។
ទោះយ៉ាងណាក៏ដោយ គ.ជ.ប មិនទាន់អាចបញ្ជាក់បានថាតើនឹងមានគណបក្សយនយោបាយប៉ុន្មាននឹងចូលរួមការបោះឆ្នោតសាកល្បងនេះនៅឡើយទេ៕