.jpg)
លោក ស៊ិក ប៊ុនហុក ប្រធាន គណៈកម្មាធិការជាតិរៀបចំការបោះឆ្នោត (គ.ជ.ប)។ រូបថត គ.ជ.ប
ភ្នំពេញ: គណៈកម្មាធិការជាតិរៀបចំការបោះឆ្នោត (គ.ជ.ប) បានកំពុងបន្តរៀបចំធ្វើទំនើបកម្មនៃដំណើរការរៀបចំការបោះឆ្នោត ដើម្បីធានាឲ្យបាននូវប្រសិទ្ធភាព និងគុណភាពក្នុងការចុះបញ្ជីឈ្មោះអ្នកបោះឆ្នោត ការចុះបញ្ជីគណបក្សនយោបាយ និងការប្រកាសលទ្ធផលនៃការបោះឆ្នោតដោយបានធ្វើការបណ្ដុះបណ្ដាលជំនាញប្រព័ន្ធបច្ចេកវិទ្យាទំនើបដល់មន្ត្រីមកពីគ្រប់ផ្នែកនៃស្ថាប័ននេះ។
តាមសេចក្តីប្រកាសព័ត៌មានរបស់ គ.ជ.ប ចុះថ្ងៃទី ៧ ខែមីនា ដែលភ្នំពេញប៉ុស្ដិ៍ទទួលបានកាលពីម្សិលមិញបានឲ្យដឹងថា ដើម្បីធ្វើទំនើបកម្មនៃដំណើរការរៀបចំបោះឆ្នោតនេះ គ.ជ.ប បានរៀបចំបើកវគ្គបណ្តុះបណ្តាលមួយស្តីពីការពង្រឹងសមត្ថភាពមន្ត្រីរាជការ គ.ជ.ប សរុប ២៧២ នាក់ដែលប្រើរយ:ពេល ៣ ថ្ងៃចាប់ពីថ្ងៃទី ៥ ដល់ថ្ងៃទី ៧ ខែមីនានេះ។
វគ្គបណ្តុះបណ្តាលនេះធ្វើឡើងដើម្បីរៀបចំធ្វើទំនើបកម្មនៃដំណើរការរៀបចំបោះឆ្នោតនៅអាណត្តិបន្តបន្ទាប់ខាងមុខ ដោយត្រូវតែពង្រឹងសមត្ថភាព ការងាររដ្ឋបាល ការគ្រប់គ្រងអង្គភាព និងប្រព័ន្ធរដ្ឋបាលដោយផ្តោតទៅលើការគ្រប់គ្រងដឹកនាំ ត្រួតពិនិត្យ និងចាត់ចែងប្រើប្រាស់ធនធានមនុស្សសម្ភារ ទ្រព្យសម្បត្តិ ឯកសាររបៀបរបបការងារ ចរន្តការងារ វិជ្ជាជីវៈតាមបទពិសោធ និងតាមប្រព័ន្ធបច្ចេកវិទ្យា។
សេចក្តីប្រកាសព័ត៌មានបន្ថែមថា លើសពីនេះមន្ត្រីត្រូវធ្វើការឲ្យស៊ីចង្វាក់គ្នាឆ្ពោះទៅរកការអភិវឌ្ឍប្រសើរជាងមុនស្របតាមបរិបទនៃការរីកចម្រើននវានុវត្តន៍របស់ស្ថាប័នឆ្លើយតបនឹងបរិបទនៃការកែទម្រង់រដ្ឋបាល និងកំណែទម្រង់ការបោះឆ្នោត។ មិនតែប៉ុណ្ណោះវគ្គបណ្ដុះបណ្ដាលនេះក៏បានពង្រឹងសកម្មភាពការងារប្រតិបត្តិការ ការងារគ្រប់គ្រងទិន្នន័យ និងបញ្ជីបោះឆ្នោត ការងារហិរញ្ញវត្ថុ ការងារសវនកម្ម ការងារអង្គភាពលទ្ធកម្ម និងការងារលេខាធិការដ្ឋាន គ.ជ.ប ផងដែរ។
លោក ស៊ិក ប៊ុនហុក ប្រធាន គ.ជ.ប បានថ្លែងក្នុងសេចក្តីប្រកាសព័ត៌មាននេះថា ដើម្បីឲ្យប្រព័ន្ធនៃការបោះឆ្នោតនៅក្នុងប្រទេសកម្ពុជាកាន់តែទទួលបានភាពជឿជាក់ និងមានការគាំទ្រមកលើស្ថាប័ន គ.ជ.ប កាន់តែខ្លាំងថែមទៀត គ.ជ.ប បានរៀបចំផែនការកំណែទម្រង់ការបោះឆ្នោតតាមប្រព័ន្ធបច្ចេកវិទ្យាទំនើប ដើម្បីធានាបាននូវប្រសិទ្ធភាព និងគុណភាពចុះបញ្ជីបោះឆ្នោតការចុះបញ្ជីគណបក្សនយោបាយ និងការប្រកាសលទ្ធផលនៃការបោះឆ្នោត។
លោកបន្តថា ការកែទម្រង់ទាំងនោះមានគោលដៅ និងចក្ខុវិស័យអំពីការចុះឈ្មោះបោះឆ្នោត និងការរៀបចំបញ្ជីបោះឆ្នោតតាមប្រព័ន្ធកុំព្យូទ័រ។ លោកបន្តថាចាប់ពីឆ្នាំ ២០១៦ មក គ.ជ.ប បានដាក់ឲ្យអនុវត្តការចុះឈ្មោះបោះឆ្នោត និងរៀបចំបញ្ជីបោះឆ្នោតតាមប្រព័ន្ធកុំព្យូទ័រដែលជាប្រព័ន្ធទំនើប ហើយកម្មវិធីនេះទទួលបានតម្លាភាព ប្រសិទ្ធភាព និងមានផលវិជ្ជមាន។
លោកបញ្ជាក់ថា៖ «តាមការអនុវត្តកន្លងមកការចុះបញ្ជីគណបក្សនយោបាយ និងបេក្ខភាពឈរឈ្មោះបោះឆ្នោតបានចុះដោយដៃគ្មានប្រព័ន្ធត្រួតពិនិត្យត្រឹមត្រូវធ្វើឲ្យ គ.ជ.ប ជួបប្រទះបញ្ហាប្រឈមជាច្រើន ហេតុនេះសម្រាប់ការបោះឆ្នោតនៅពេលខាងមុខ គ.ជ.ប នឹងរៀបចំឲ្យមានការចុះបញ្ជីគណបក្សនយោបាយតាមប្រព័ន្ធអនឡាញ»។
លោក ស៊ិក ប៊ុនហុក បន្ថែមថា ការធ្វើទំនើបកម្មនេះនឹងធ្វើឲ្យចំណេញពេលវេលាទាំងគណបក្សនយោបាយ និងមន្ត្រីរៀបចំការបោះឆ្នោត ងាយស្រួលក្នុងការត្រួតពិនិត្យ ផ្ទៀងផ្ទាត់ និងការគ្រប់គ្រងបញ្ជីបេក្ខជនឈរឈ្មោះបោះឆ្នោត ហើយធានាថា ឈ្មោះ និងទិន្នន័យរបស់បេក្ខជនពិតជាត្រឹមត្រូវ ក៏ដូចជាធានាថា បេក្ខជនម្នាក់ៗមិនអាចឈរឈ្មោះលើសពីមួយមណ្ឌលបោះឆ្នោតបានទេ។
លោក ហង្ស ពុទ្ធា អ្នកនាំពាក្យ គ.ជ.ប បានថ្លែងពីម្សិលមិញថា ការធ្វើទំនើបកម្មនេះក៏ជួយរាល់ការកែតម្រូវទិន្នន័យត្រូវបានរក្សាទុកជាឯកសារដោយស្វ័យប្រវត្តិ។ ចំពោះការផ្សព្វផ្សាយលទ្ធផលបោះឆ្នោតមានទូលំទូលាយ ទាន់ពេលវេលានៅលើគេហទំព័រផ្លូវការ គ.ជ.ប ប្រព័ន្ធផ្សព្វផ្សាយរបស់រដ្ឋ និងបណ្តាញសង្គមនានាដែលត្រូវបានអនុញ្ញាតដោយ គ.ជ.ប ក៏ដូចជាកាត់បន្ថយបណ្ដឹងច្រើនដែលអាចកើតមានឡើង។
លោកបញ្ជាក់ថា៖ «នៅពេលយើងបណ្ដុះបណ្ដាលមន្ត្រីគឺមានន័យថា យើងកំពុងធ្វើទំនើបកម្ម ដើម្បីឲ្យមន្ត្រីមានចំណេះដឹងខាងផ្នែកដែលគាត់ទទួលខុសត្រូវតែម្ដង។ ម្យ៉ាងវិញទៀតយើងជំរុញឲ្យមន្ត្រីយើងតាមរាជធានី ខេត្តមានសមត្ថភាពអាចប្រើប្រាស់សម្ភារទំនើបៗព្រមទាំងរាយការណ៍ សរសេររបាយការណ៍ និងទំនាក់ទំនងគ្នាតាមប្រព័ន្ធទំនើប»។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជាហៅកាត់ និកហ្វិក បានថ្លែងថា លោកគាំទ្រឲ្យមានការបណ្ដុះបណ្ដាលមន្ត្រីឲ្យមានជំនាញ និងចំណេះដឹងបែបនេះ ប៉ុន្ដែការបណ្ដុះបណ្ដាលនេះត្រូវតែស៊ីជម្រៅ ដោយចៀសវាងប្រព្រឹត្តកំហុសដូចជា បាត់ឈ្មោះ ឬបង្កើតឲ្យមានបណ្ដឹងច្រើនជាដើម។ «ខ្ញុំគិតថា ការបណ្ដុះបណ្ដាលមន្ត្រីនេះល្អហើយ ប៉ុន្ដែខ្ញុំនៅបារម្ភថា មន្ត្រី គ.ជ.ប តាមបណ្ដាខេត្តភាគច្រើនគឺគាត់ធ្វើក្នុងរយៈពេលខ្លី មានន័យថា គាត់ធ្វើការនៅ គ.ជ.ប តែអំឡុងពេលបោះឆ្នោតប៉ុណ្ណោះ ហើយក្រៅពីរដូវកាលបោះឆ្នោត គាត់ទៅប្រកបការងារផ្សេងទៀត។ អ៊ីចឹង គាត់អត់មានជំនាញខាងការងារបោះឆ្នោតហ្នឹងច្បាស់លាស់ទេ។ អ៊ីចឹងបើចង់ឲ្យគាត់មានជំនាញគឺទាល់តែគាត់ចូលប្រឡូកក្នុងវិស័យបោះឆ្នោតហ្នឹងតែម្ដង»៕
