ភ្នំពេញ: គណៈកម្មាធិការជាតិរៀបចំការបោះឆ្នោត (គ.ជ.ប) កំណត់យកថ្ងៃទី១ដល់១៨ ខែតុលាខាងមុខ ធ្វើបច្ចុប្បន្នភាពបញ្ជីឈ្មោះបោះឆ្នោតថ្មីដោយគ្រោងនឹងចុះឈ្មោះឲ្យបានជាង៤០ម៉ឺននាក់។ នេះបើតាមលោក ហង្ស ពុទ្ធា អ្នកនាំពាក្យ(គ.ជ.ប)កាលពីម្សិលមិញ។
លោក ហង្ស ពុទ្ធា បានថ្លែងថា គ.ជ.ប គ្រោងចាប់ផ្ដើមធ្វើបច្ចុប្បន្នភាពបញ្ជីឈ្មោះបោះឆ្នោតចាប់ពីដើមខែតុលាខាងមុខនេះ ដោយគ្រោងស្រង់ឈ្មោះពលរដ្ឋឲ្យបានជាង៤០ម៉ឺននាក់។
លោកថា គ.ជ.ប ធ្វើតាមកាតព្វកិច្ចក្នុងការការពារសិទ្ធិពលរដ្ឋដែលមានឈ្មោះបោះឆ្នោតទើបគ.ជ.បត្រូវធ្វើបញ្ជីបោះឆ្នោតថ្មីនិងត្រឹមត្រូវ។
លោកបន្តថាបញ្ជីនេះ ត្រូវធ្វើបច្ចុប្បន្នភាពជារៀងរាល់ឆ្នាំដើម្បីឲ្យមានឈ្មោះគ្រប់ៗគ្នានិងលុបឈ្មោះចេញពីបញ្ជីចំពោះអ្នកទទួលមរណភាព អ្នកដែលច្បាប់បានព្យួរទោសមិនឲ្យបោះឆ្នោតនិងអ្នកផ្លាស់ប្ដូរលំនៅថ្មី។
លោក ពុទ្ធា បន្តថា៖«គោលដៅធ្វើបច្ចុប្បន្នភាពឈ្មោះបោះឆ្នោតនេះ ឧទារហណ៍ថា មានអ្នកខ្លះស្នើសុំអាជ្ញាធរសុំដូរឈ្មោះឬនាមត្រកូលឬនៅក្នុងអត្តសញ្ញាណប័ណ្ណអាចមានខុសអក្ខរាវិរុទ្ធឬខុសខែឆ្នាំកំណើត។ អ៊ីចឹង សាមីខ្លួនអាចស្នើភ្ជាប់ជាមួយនឹងឯកសារត្រឹមត្រូវ គេនឹងកែឲ្យគាត់ហើយហើយគ.ជ.បនឹងត្រូវការកែតម្រូវដែរ»។
បន្ថែមលើនេះលោកបានបញ្ជាក់ថា៖«យើងធ្វើត្រឹមអំឡុងខែតុលា ហើយផ្អាកធ្វើសិន ទាល់តែឆ្នាំក្រោយ ទើបធ្វើម្ដងទៀត ហើយថ្ងៃទី២៦ ខែវិច្ឆិកាខាងមុខនេះ យើងនឹងផ្សាយបញ្ជីឈ្មោះបោះឆ្នោតដំបូងនិងបញ្ជីឈ្មោះអ្នកដែលត្រូវលុបចេញពីបញ្ជីផងដែរ»។
តាមសេចក្ដីជូនដំណឹងរបស់ គ.ជ.ប កាលពីថ្ងៃទី៧ កញ្ញា បានបង្ហាញថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០១៨ មានគោលដៅធានាឲ្យបញ្ជីបោះឆ្នោតមានភាពពេញលេញ ភាពត្រឹមត្រូវ និងមានបច្ចុប្បន្នភាពប្រកបដោយសុវត្ថិភាពតាមរយៈ ការស្រង់ និងលុបឈ្មោះអ្នកបោះឆ្នោតដែលទទួលមរណភាព អ្នកត្រូវដកហូតសិទ្ធិបោះឆ្នោតជាបណ្ដោះអាសន្ន និងអ្នកផ្លាស់លំនៅឋានឬចាកចេញទៅនៅឃុំ សង្កាត់ផ្សេងដោយមានឯកសារសំអាងត្រឹមត្រូវនិងច្បាស់លាស់ដើម្បីលុបចេញពីបញ្ជីបោះឆ្នោត៕