ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) គ្រោងនឹងរៀបចំការបោះឆ្នោតសាកល្បង នៅថ្ងៃទី ២៣ ខែ ឧសភា ឆ្នាំ ២០២១ ដើម្បីពិនិត្យលើសុក្រឹតភាពនៃបញ្ជីឈ្មោះគណបក្សនយោបាយ បញ្ជីបេក្ខជនឈរឈ្មោះបោះឆ្នោតបញ្ជីឈ្មោះអ្នកមានសិទ្ធិបោះឆ្នោត និងលទ្ធផលនៃការរាប់សន្លឹកឆ្នោតតាមប្រព័ន្ធបច្ចេកវិទ្យាព័ត៌មានវិទ្យា ដើម្បីអនុវត្តសម្រាប់ការបោះឆ្នោតក្រុមប្រឹក្សាឃុំ-សង្កាត់ និងបោះឆ្នោតជ្រើសតាំងតំណាងរាស្ត្រក្នុងឆ្នាំ ២០២២ និង ២០២៣។
លោក សោម សូរិដា អគ្គលេខាធិការរង គ.ជ.ប បានប្រាប់ភ្នំពេញប៉ុស្តិ៍ឱ្យដឹងថា សម្រាប់ការបោះឆ្នោតសាកល្បងនាពេលខាងមុខនេះ គ.ជ.ប បានកំណត់ការិយាល័យបោះឆ្នោតចំនួន ២ នៅក្នុងឃុំ-សង្កាត់ ១ ដែលត្រូវបានជ្រើសរើសនៅក្នុងរាជធានី-ខេត្តនីមួយៗ ដែលនឹងត្រូវមានការបោះឆ្នោតនៅក្នុងឃុំ-សង្កាត់ សរុបចំនួន ២៥ នៅទូទាំងប្រទេសនឹងមានការិយាល័យបោះឆ្នោតចំនួន ៥០ ការិយាល័យ។
លោក សោម សូរិដា ថ្លែងថា៖ «គ.ជ.ប នឹងយកឈ្មោះ ប្រជាពលរដ្ឋដែលបានចុះឈ្មោះនៅក្នុងឃុំសង្កាត់នេះទាំងអស់ដើម្បីបង្កើតជាបញ្ជីបោះឆ្នោតសាកល្បង។ ការបោះឆ្នោតលើកនេះ គ.ជ.ប នឹងបញ្ចូលទិន្នន័យទៅក្នុងប្រព័ន្ធកុំព្យូទ័រឱ្យកុំព្យូទ័រ គណនាការបូកសរុបលទ្ធផលដោយខ្លួនឯងចាប់តាំងពីថ្នាក់ឃុំ សង្កាត់ រហូតដល់ គ.ជ.ប»។
ទោះយ៉ាងណាក៏ដោយ គ.ជ.ប មិនទាន់អាចបញ្ជាក់បានថាតើនឹងមានគណបក្សនយោបាយប៉ុន្មាននឹងចូលរួមការបោះឆ្នោតសាកល្បងនេះនៅឡើយទេ។
លោក សោម សូរិដា បានថ្លែងថា គោលបំណងនៃការបោះឆ្នោតសាកល្បងនេះនឹងប្រើប្រាស់កម្មវិធីចុះឈ្មោះរបស់គណបក្សនយោបាយ និងបញ្ជីបេក្ខជនឈរឈ្មោះបោះឆ្នោតតាមប្រព័ន្ធបច្ចេកវិទ្យាព័ត៌មានវិទ្យា ដែលមានន័យថា ការរៀបចំបោះឆ្នោតលើកក្រោយនេះមិនមែនជាការរៀបចំដោយដៃនោះទេ ។
លោកថា ការបោះឆ្នោតសាកល្បងលើកនេះក៏នឹងត្រួតពិនិត្យ បូកសរុបលទ្ធផលបោះឆ្នោតតាមប្រព័ន្ធកុំព្យូទ័រដែលកាលពីមុន គ.ជ.ប ស្រង់ដោយដៃទាំងអស់ ប៉ុន្តែការបោះឆ្នោតសាកល្បងនេះ គ.ជ.ប នឹងបញ្ចូលទិន្នន័យទៅក្នុងប្រព័ន្ធកុំព្យូទ័រឱ្យកុំព្យូទ័រគណនាការបូកសរុបលទ្ធផលដោយខ្លួនឯង ចាប់តាំងពីថ្នាក់ឃុំសង្កាត់រហូតដល់ គ.ជ.ប ។
ក្រៅពីនេះ គ.ជ.ប ចង់ដឹងពីប្រសិទ្ធភាពនៃការប្រើប្រាស់ត្រាគំនូសគាំទ្រដល់គណបក្សនយោបាយនៅលើសន្លឹកឆ្នោតជំនួសឱ្យប៊ិកសម្រាប់គូសសញ្ញាគាំទ្រដល់គណបក្សនយោបាយ ដោយសារកន្លងមកនេះការគូសសញ្ញាគាំទ្រដល់គណបក្សនយោបាយនេះ បានធ្វើឱ្យជជែកគ្នា ឬ មន្ទិលទៅលើភាពសម្ងាត់លើការបោះឆ្នោត។
ម្យ៉ាងវិញទៀត ការបោះឆ្នោតសាកល្បងនេះស្ថិតនៅក្នុងដំណាក់កាលនៃការផ្ទុះឡើងនូវជំងឺកូវីដ១៩ ដែល គ.ជ.ប បានត្រៀម បង្ការ និងទប់ស្កាត់នៅក្នុងការិយាល័យបោះឆ្នោត ពីព្រោះ គ.ជ.ប មើលឃើញថា ឥទ្ធិពលនៃការឆ្លងនូវជំងឺកូវីដ ១៩ នេះមិនអាចបញ្ចប់ក្នុងរយៈពេលដ៏ខ្លីខាងមុខនេះទេ ដែលឥទ្ធិពលរបស់វាអាចនឹងបន្តរហូតដល់ ឆ្នាំ ២០២២ ដែលជាឆ្នាំដែលបោះឆ្នោត ជ្រើសរើសក្រុមប្រឹក្សាឃុំសង្កាត់ អាណត្តិទី៥ ហើយក៏អាចនឹងរាលដាលដល់ឆ្នាំ ២០២៣ ដែលជាឆ្នាំបោះឆ្នោតជ្រើសតាំងតំណាងរាស្ត្រអាណត្តិទី ៧ ដែលនេះ គ.ជ.ប ត្រូវតែត្រៀមទុកជាមុន។
លោក សោម សូរិដា ថ្លែងថា៖ «នេះគឺជាការល្អមួយនៅក្នុងបរិបទកូវីដ១៩ នេះ យើងក៏ឃើញនៅក្នុងប្រទេសឥណ្ឌាដែរកាលពីឆ្នាំ ២០២០ គឺឥណ្ឌាមានការបោះឆ្នោតនៅក្នុងបរិបទកូវីដ១៩ យើងបានបទពិសោធពីគេផង និងធ្វើខ្លួនឯងផងរួមជាមួយនឹងវិធានការ និងទប់ស្កាត់នៅក្នុងការិយាល័យបោះឆ្នោតដើម្បីយកទៅអនុវត្តការបោះឆ្នោតនាពេលខាងមុខ»។
ទោះជាយ៉ាងណាក៏ដោយលោក សោម សូរិដា មើលឃើញពីជំហររបស់រាជរដ្ឋាភិបាលមិនបង្អាក់ការបោះឆ្នោតនៅឆ្នាំ ២០២២ ទេ ដូច្នេះ គ.ជ.ប ដាក់ចេញវិធានការសមស្របមួយដោយធ្វើយ៉ាងណា សម្រេចឱ្យបាននូវលទ្ធផលបោះឆ្នោតដ៏ល្អ សម្រាប់ការបោះឆ្នោតសាកល្បងនេះរួមជាមួយនឹងវិធានការទប់ស្កាត់ការឆ្លងនូវជំងឺកូវីដ ១៩។
លោក ពេជ្យ ស្រស់ ប្រធានគណបក្សយុវជនកម្ពុជាថ្លែងថា រហូតមកដល់ពេលនេះ គណបក្សរបស់លោកមិនទាន់ទទួលបានព័ត៌មានពីការបោះឆ្នោតសាកល្បងនេះទេ ប៉ុន្តែទោះជាយ៉ាងណា គណបក្សរបស់លោកនឹងចូលរួមបោះឆ្នោតនេះផងដែរ។
លោកថ្លែងថា៖ «នេះគឺការល្អមួយដែល គ.ជ.ប បានរៀបចំឱ្យមានការបោះឆ្នោតសាកល្បងនេះដើម្បីដើរឱ្យទាន់សភាពការណ៍ និងសម័យឌីជីថល បើអាចធ្វើបានយើងធ្វើ ព្រោះវាមានសុក្រឹតភាព និងមិនមានអ្នកបន្លំហើយយើងនឹងត្រៀមខ្លួនក្នុងការចូលរួមបោះឆ្នោតនេះ»។
លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិនៃអង្គការ ខុមហ្វ្រែល បានថ្លែង ដោយបង្ហាញឆន្ទៈ គាំទ្រចំពោះការរៀបចំការបោះឆ្នោតសាកល្បងចំពោះការប្រើប្រាស់ប្រព័ន្ធបច្ចេកវិទ្យា និងការត្រួតពិនិត្យលើលទ្ធផលនៃការបោះឆ្នោតនាពេលខាងមុខនេះគឺជាការល្អប្រសើរថ្មីមួយ និងទាន់សភាពការណ៍ជាក់ស្តែង។
ទោះបីជាយ៉ាងណាលោក កន សាវាង្ស ថ្លែងថា៖ «ខ្ញុំយល់ឃើញថា គ.ជ.ប គួរតែមានការបើកចំហឱ្យមានការចូលរួម ជជែក និងផ្តល់ជាយោបល់ព្រមទាំងប្រមូលធាតុចូលពីភាគីពាក់ព័ន្ធឱ្យបានទូលំទូលាយបន្ថែមទៀត ដើម្បីឱ្យមានភាពជឿជាក់បន្ថែមទៀតចំពោះដំណើរការនៃការបោះឆ្នោតសាកល្បងនេះ៕