ភ្នំពេញៈ គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប. កាលពីម្សិលមិញបានចាប់ផ្ដើមបំផ្លាញសន្លឹកឆ្នោតចាស់ៗជាង ២២ លានសន្លឹកដោយត្រូវប្រើពេល ៦ ថ្ងៃទៅលើសន្លឹកឆ្នោតដែលត្រូវបានប្រើប្រាស់រួចសម្រាប់ការបោះឆ្នោតឆ្នាំ ២០១២ ឆ្នាំ ២០១៣ ឆ្នាំ ២០១៤ និងឆ្នាំ ២០១៧ បន្ទាប់ពីបានរក្សាទុកតាមច្បាប់កំណត់។
លោក ទេព នីថា អគ្គលេខាធិការ គ.ជ.ប. បានថ្លែងថា នេះជាលើកទី ៤ ហើយដែល គ.ជ.ប. បំផ្លាញសន្លឹកឆ្នោតចាស់ៗដែលបានប្រើរួចហើយគិតចាប់ពីឆ្នាំ ១៩៩៨ មក។ ការបំផ្លាញលើកទី ១ ធ្វើឡើងនៅឆ្នាំ ២០០៥ ដែលជាសន្លឹកឆ្នោតបានប្រើសម្រាប់ការបោះឆ្នោតជ្រើសតាំងតំណាងរាស្ត្រឆ្នាំ ១៩៩៨ និងបោះឆ្នោតឃុំ-សង្កាត់ឆ្នាំ ២០០២។
ការបំផ្លាញសន្លឹកឆ្នោតលើកទី ២ ធ្វើឡើងនៅឆ្នាំ ២០០៩ ទៅលើសន្លឹកឆ្នោតដែលបានប្រើសម្រាប់ការបោះឆ្នោតជ្រើសតាំងតំណាងរាស្ត្រឆ្នាំ ២០០៣ និងបោះឆ្នោតឃុំ សង្កាត់ ឆ្នាំ ២០០៧។ ចំណែកការបំផ្លាញលើកទី ៣ ធ្វើនៅឆ្នាំ ២០១៤ ដែលមានសន្លឹកឆ្នោតនៃការបោះឆ្នោតជ្រើសតាំងតំណាងរាស្ត្រឆ្នាំ ២០០៨ និងបោះឆ្នោត ឃុំសង្កាត់ ឆ្នាំ ២០១២។
លោកបានបន្តថា ការបំផ្លាញសន្លឹកឆ្នោតចាស់ៗនេះធ្វើឡើងតាមច្បាប់ស្ដីពីការរៀបចំ និងការប្រព្រឹត្តទៅនៃ គ.ជ.ប. មាត្រា ៤២ ចំណុច ២៧ ដែលត្រូវឲ្យ គ.ជ.ប. បំផ្លាញសន្លឹកឆ្នោតចោល បន្ទាប់ពីបានរក្សាទុកត្រឹមត្រូវរយៈពេល ៦ ឆ្នាំ សម្រាប់ការបោះឆ្នោតជ្រើសតាំងតំណាងរាស្ត្រ និង ៣ ឆ្នាំសម្រាប់ការបោះឆ្នោតឃុំសង្កាត់។ ការបំផ្លាញនេះធ្វើឡើងដោយការកាត់ហើយវាត្រូវការរយៈពេល ៦ ថ្ងៃគិតចាប់ពីថ្ងៃពុធម្សិលមិញតទៅ។
លោក ទេព នីថា បានបញ្ជាក់ថា៖ «ពិតណាស់ការបំផ្លាញសន្លឹកឆ្នោតដែលប្រើប្រាស់ហើយ គឺជាការអនុវត្តតាមការកំណត់នៃច្បាប់ និងនីតិវិធីដែលកំណត់ដោយ គ.ជ.ប. ហើយព្រមជាមួយនេះក៏ជាការរួមចំណែកផងដែរ ក្នុងការសន្សំសំចៃថវិកាចំណាយសម្រាប់ការថែរក្សា ការពារព្រោះថា គ.ជ.ប. ត្រូវបន្តថែរក្សាការពារសន្លឹកឆ្នោតដែលប្រើរួចក្នុងការបោះឆ្នោតឆ្នាំ ២០១៨ និងឆ្នាំ ២០១៩ បន្តទៀត»។
លោក នុត សុខុម អនុប្រធាន គ.ជ.ប. បានថ្លែងក្នុងពិធីបំផ្លាញសន្លឹកឆ្នោតថា គ.ជ.ប. កំពុងបន្តប្រឹងប្រែងធ្វើការដើម្បីធ្វើឲ្យប្រសើរឡើងដល់ការពិនិត្យ និងចុះបញ្ជីបោះឆ្នោតសម្រាប់អ្នកដែលមានឈ្មោះក្នុងបញ្ជីបោះឆ្នោតជាង ៨ លាននាក់ និងអ្នកគ្រប់អាយុ ១៨ ឆ្នាំដែលត្រូវចុះឈ្មោះបោះឆ្នោតថ្មី។
លោកថ្លែងថា៖ «ខំប្រឹងធ្វើការបោះឆ្នោតឲ្យមានតម្លាភាព សេរី យុត្តិធម៌ ឲ្យទទួលយកបានជាការប្រសើរ។
អ្វីដែលខំធ្វើទាំងអស់គ្នារបស់ភាគីពាក់ព័ន្ធគឺចំណុចនេះ»។
កាលពីពេលថ្មីៗនេះ អង្គការខុមហ្វ្រែលដែលឃ្លាំមើលការបោះឆ្នោតនៅកម្ពុជាបានចេញសេចក្ដីប្រកាសព័ត៌មានអំពីការឃ្លាំមើលការចុះបញ្ជីបោះឆ្នោត និងស្នើដល់ គ.ជ.ប. ពិនិត្យលទ្ធភាពចុះឈ្មោះបោះឆ្នោតសម្រាប់ពលករកម្ពុជាដែលធ្វើការនៅក្រៅប្រទេស។
ក៏ប៉ុន្តែលោក នុត សុខុម ថ្លែងថាកិច្ចការនេះមិនទាន់អាចធ្វើបានទេ ហើយ គ.ជ.ប. ដែលជាស្ថាប័នអនុវត្តច្បាប់ បំពេញសកម្មភាពនានាតែតាមច្បាប់កំណត់ប៉ុណ្ណោះ។
លោកបានបន្តទៀតថា កិច្ចការដែល គ.ជ.ប កំពុងធ្វើគឺធ្វើយ៉ាងណាមិនឲ្យមានបាតុភាពក្រោយពេលបោះឆ្នោត។ ដើម្បីធ្វើឲ្យប្រសើរឡើងដល់ដំណើរការចុះឈ្មោះបោះឆ្នោតនេះ លោកស្នើដល់ប្រទេសជប៉ុនតាមរយៈអង្គការ JICA ឲ្យជួយដល់ គ.ជ.ប. បន្ថែមទៀត។
មន្ត្រី គ.ជ.ប. ថ្លែងថា បើទោះបីជាការបោះឆ្នោតអាណត្តិ ក្រោយនៅវែងឆ្ងាយហើយស្ថាប័នរៀបចំការបោះឆ្នោតហាក់ដូចជា ស្ងប់ស្ងាត់ក៏ដោយ ក៏ គ.ជ.ប. កំពុងប្រឹងប្រែងលើការងារស្នូលជាច្រើនទាំងផ្ទៃក្នុង និងការចុះឈ្មោះបោះឆ្នោតដែលបានពន្យារពេលដោយសារបញ្ហាកូវីដ ១៩ ប៉ុន្តែនឹងចាប់ផ្ដើមឡើងវិញនៅខែតុលាដល់ខែធ្នូ៕