The Phnom Penh Post Search

Search form

Logo of Phnom Penh Post newspaper Phnom Penh Post - គ.ជ.ប ចេញ​ក្រម​ឲ្យ​​យោធា និង​កង​កម្លាំង​ប្រដាប់​អាវុធ​ «អព្យាក្រិត្យ»

គ.ជ.ប ចេញ​ក្រម​ឲ្យ​​យោធា និង​កង​កម្លាំង​ប្រដាប់​អាវុធ​ «អព្យាក្រិត្យ»

Content image - Phnom Penh Post
កងកម្លាំង​សន្តិសុខ​កំពុង​តែ​យាម​កាម​នៅ​មណ្ឌល​បោះឆ្នោត​មួយ​នៅ​ខេត្តកណ្តាល​កាល​ពី​ឆ្នាំ ២០១៣។ សហការី

គ.ជ.ប ចេញ​ក្រម​ឲ្យ​​យោធា និង​កង​កម្លាំង​ប្រដាប់​អាវុធ​ «អព្យាក្រិត្យ»

ភ្នំពេញៈ កង​កម្លាំង​ប្រដាប់​អាវុធ និង​សមត្ថកិច្ច​របស់​កម្ពុជា ត្រូវ​ប្រកាន់​ភាព «អព្យាក្រិត្យ» និង​មិន​ត្រូវ​ប្រើ​ប្រាស់​ «ឥទ្ធិពល» និង​ «អំណាចនៃ​តួនាទី» ទៅ​គំរាម​កំហែង ឬ​បំភិត​បំភ័យ​នរណា​ម្នាក់នោះ​ឡើយ នៅ​អំឡុង​យុទ្ធនាការ​ឃោសនា​រក​សម្លេង​ឆ្នោត និង​នៅ​ថ្ងៃ​បោះ​ឆ្នោត​ដែល​នឹង​ប្រព្រឹត្ត​នៅ​ថ្ងៃ​ទី ៤ ខែ​មិថុនា​ខាង​មុខ​នេះ។ នេះ​បើ​តាម​ក្រម​ប្រតិបត្តិមួយ​ដែល​ចេញ​ដោយ​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​នៅ​សប្តាហ៍​នេះ។

ក្រម​ប្រតិបត្តិ​នេះ​ ទំនង​ជា​ពាក់​ព័ន្ធទៅ​នឹង​ការ​ដែល​ក្រុមមន្រ្តី​​ការពារសន្តិសុខ ​សណ្តាប​ធ្នាប់​ជាន់​ខ្ពស់បាន​ថ្លែង​សារ​គំរាម​កំហែង​ដោយ​ប្រើ​ហិង្សា​ត្រង់ៗ​ចំពោះក្រុម​តវ៉ា​ដែល​គាំទ្រ​បក្ស​ប្រឆាំង និង​ធ្វើ​ការ​ប្តេជ្ញាប្រឆាំង​នូវ​ការ​ធ្វើ​ «បដិវត្ត​ពណ៌» ដែល​ក្រុម​មន្រ្តី​ទាំង​នោះ​បាន​អះអាងថា មាន​ការ​ទាក់​ទង​នឹង​បណ្តា​អង្គការ​គាំទ្រ​ប្រជាធិបតេយ្យ ក្នុង​ប៉ុន្មាន​សប្តាហ៍​កន្លង​មកនេះ។

បើ​ទោះ​ជា​មាន​ក្រម​ប្រតិបត្តិ​នេះ​យ៉ាងណា​ក្តី ទាំង​ក្រុម​អ្នក​អង្កេត​ការណ៍ និង​ខាង​គណបក្ស​ប្រឆាំង​កាល​ពី​​ម្សិលមិញ នៅ​តែ​សម្តែង​​ភាព​មន្ទិល​សង្ស័យ​ចំពោះឯករាជ្យ​ភាពរបស់​ក្រុម​កម្លាំង​ប្រដាប់​អាវុធ ​ដោយ​បាន​លើក​ឡើង​នូវការ​ប្រព្រឹត្ត​កន្លង​មក​របស់​ពួក​គេ។

ក្រម​ប្រតិបត្តិ​សម្រាប់​យោធា នគរបាល​ជាតិ និង​ភ្នាក់​ងារ​សន្តិសុខ​បោះឆ្នោត ដែលមាន​កម្រាស់ ១៥ ទំព័រ ត្រូវ​បាន​អនុម័ត​កាល​ពី​ខែ​កញ្ញា​ឆ្នាំ​មុន និង​មាន​សុពល​ភាព​សម្រាប់​ការ​បោះ​ឆ្នោត​ ​ឆ្នាំ​នេះ។

អ្នក​នាំ​ពាក្យ​ និង​សមាជិក​មួយ​រូបរបស់​ គ.ជ.ប លោក ហង្ស ពុទ្ធា​ បាន​ឲ្យដឹងថា ក្រមប្រតិបត្តិថ្មី ដែល​ប្រើ​ប្រាស់​ព័ត៌មាន​ខ្លះៗ​ពី​ក្រម​​មុន មាន​លក្ខណៈ​ខុស​គ្នា​ភាគ​ច្រើន​ធៀប​នឹង​ក្រម​ប្រតិបត្តិកាល​ពី​មុន ដោយ​ចែង​ច្បាស់​ពី​តួនាទី​របស់​ស្ថាប័ន​ពាក់​ព័ន្ធ ព្រម​ទាំង​កំណត់​ដាក់​ទោស​សម្រាប់​ការ​រំលោភ​បំពាន​ផង​ដែរ។

ក្រម​ប្រតិបត្តិ​បាន​ឲ្យដឹងថា៖​«កង​កម្លាំង​ត្រូវ​តែ​ប្រកាន់​ភាព​អព្យាក្រិត្យ មិន​លម្អៀង ហើយ​មិន​អាច​បង្ហាញ​នូវ​ការ​គាំទ្រ​ទៅលើ ឬ​ប្រឆាំង​ចំពោះ​គណបក្ស​នយោបាយ ឬ​ បេក្ខ​ជន​ឈរ​ឈ្មោះ​រូប​ណានោះ​ឡើយ»។

បន្ថែម​ទៅ​លើ​ការ​រឹត​បន្តឹង​ជា​ច្រើន​ចំពោះ​ការ​អនុវត្ត​ក្នុង​ការ​ធ្វើ​យុទ្ធ​នាការ ក្រុម​មន្រ្តី​សន្តិសុខ​ត្រូវ​បាន​ហាម​ឃាត់​មិន​ឲ្យ «វាយ​តប់​លើ​បុគ្គល​ណាម្នាក់» ប្រើ «ការ​រំលោភ​ដោយ​ពាក្យ​សម្តីថា នឹង​ធ្វើ​ទុក្ខ​ទោស​ដល់​រាងកាយ» និង​«បណ្តើរ ឬ​បង្ខាំងជន​ណាម្នាក់​ដោយ​បង្ខំ ដែល​ធ្វើ​ឲ្យ​អារម្មណ៍​របស់​ជន​នោះ​មាន​ការ​ភ័យ​ខ្លាច ឬ​ធ្វើ​ឲ្យ​ខ្លាច​ចំពោះ​សុវត្ថិភាព​ផ្ទាល់​ខ្លួន ឬ​សុវត្ថិភាព​គ្រួសារ​របស់​គេ»។

ជន​ទាំង​ឡាយ​ណាដែល​​ល្មើស​នឹង​ក្រម​​នេះ នឹង​ត្រូវ​ប្រឈម​នឹង​ការ​ផាក​ពីន័យ​ពី ៥ លានរៀល​ទៅ ២០ លាន​រៀល ព្រម​ទាំង​មាន​ទោស​ទណ្ឌ​ដទៃ​ទៀត។

ទាក់ទិន​នឹង​ពាក្យ​សម្តី «វ៉ៃបាក់ធ្មេញ» ដែល​រដ្ឋ​មន្រ្តី​ក្រសួង​ការពារ​ជាតិ លោក ទៀ បាញ់ បាន​លើក​ឡើងនោះ លោក ហង់​ពុទ្ធា បាន​និយាយ​ថា ការ​លើក​ឡើង​នេះ​ត្រូវ​បាន​ធ្វើ​ឡើង​មុន​ពេល​យុទ្ធនាការ​ឃោសនារក​សម្លេង​ឆ្នោត​ត្រូវ​ចាប់​ផ្តើម​ឡើង ដូច្នេះ គ.ជ.ប មិន​អាច​ធ្វើ​ការ​លើ​បញ្ហា​នេះ​បានទេ។

អ្នក​ស្រី​ ចក់ សុភាព នាយក​ប្រតិបត្តិ​របស់​មជ្ឈម​ណ្ឌល​សិទ្ធិ​មនុស្ស​កម្ពុជា បាន​ថ្លែងថា៖ «បើ​មើល​ទៅ​លើ​ការ​លើក​ឡើង​បង្កប់​ទៅ​ដោយបញ្ហា​របស់​ក្រុម​មន្រ្តី​រដ្ឋាភិបាល និង​យោធា កាល​ពី​ពេល​ថ្មីៗនេះ ដែល​បាន​ចោទ​ជា​សំនួរ​ទៅ​លើ​ឯករាជ្យ​ភាព​របស់​កង​កម្លាំង​ប្រដាប់​អាវុធ​ ចំណាត់​ការ​របស់​ គ.ជ.ប គួរ​តែ​ត្រូវ​បាន​ស្វាគមន៍»។

ក៏ប៉ុន្តែ អ្នក​ជំនាញ​ផ្នែក​ច្បាប់ លោក សុខ សំអឿន បាន​លើក​ឡើង​ថា ទោះ​បី​ជា​ក្រម​នេះ​អាច​នឹង​ជួយ​កាត់​បន្ថយ​ការ​ធ្វើ​អន្តរាគមន៍​ក្នុង​ការ​បោះ​ឆ្នោតក៏​ដោយ​ក្តី គណបក្ស​កាន់​អំណាច​ កាល​ពី​ពេល​ថ្មីៗ​នេះ បាន​អំពាវនាវ​ឲ្យ​កងកម្លាំង​យោធា​ធ្វើ​ការ​គាំទ្រ​គណបក្ស​របស់​ខ្លួន។
លោក​និយាយថា៖​«បេះដូង​របស់​ពួក​គេ ​ពិត​ជាមិន​មែន​អព្យាក្រិត្យ​នោះ​ឡើយ»។

លោក Phil Robertson ​នាយក​រង​របស់​អង្គការ​ឃ្លាំ​មើល​សិទ្ធិមនុស្ស បាន​ឲ្យដឹងថា ក្រម​​នេះ​អាច​នឹង​ដូច​​បទ​បញ្ញត្តិ​ដទៃ​ទៀត​ដែរ ដែល​ត្រូវ​បាន​ទាត់​ចោល​ដោយ​ក្រុម​យោធា​និង​សមត្ថកិច្ច​ដែល​ទទួល​បញ្ជា​រពី​ «ចៅហ្វាយ​នយោបាយ​» របស់​ពួក​គេ​ក្នុង​គណបក្ស​ប្រជាជន​កម្ពុជា។

អ្នក​នាំពាក្យ​របស់​គណបក្ស​ប្រជាជន​កម្ពុជា លោក សុខ ឥសាន បានអះអាងថា កង​កម្លាំង​ប្រដាប់​អាវុធ​មាន​ភាព​អព្យាក្រិត្យ​ទៅ​លើ​តែ​គណបក្ស​នយោបាយ​តែ​ប៉ុណ្ណោះ តែ​មិន​អព្យាក្រិត្យ​រវាង​គណបក្ស​នយោបាយ​ និង​រដ្ឋាភិបាល​នោះ​ឡើយ។​

លោក​បន្តថា៖ «ដូច្នេះ ក្នុង​ករណី​ដែល​មាន​សកម្មភាព​អនាធិបតេយ្យ​កើត​ឡើង ដើម្បី​ផ្តួល​រដ្ឋាភិបាល កងកម្លាំង​ជាតិ​ត្រូវ​តែ​បំពេញតួ​នាទី​ដើម្បី​ការពារ​ជាតិ»៕TN

អត្ថបទគួរចាប់អារម្មណ៍