.jpg)
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គជប)។ ហេង ជីវ័ន
ភ្នំពេញៈ គណៈកម្មាធិការជាតិរៀបចំការបោះឆ្នោត (គជប) ដាក់ឱ្យដំណើរការប្រព័ន្ធផ្លាស់ប្ដូរឯកសារចុះឈ្មោះបោះឆ្នោតពីចម្ងាយលើកដំបូង ដើម្បីបង្កលក្ខណៈងាយស្រួលឱ្យអ្នកមានឈ្មោះក្នុងបញ្ជីបោះឆ្នោតចុងក្រោយឆ្នាំ ២០១៩ ដែលបានប្រើប្រាស់ឯកសារចុះឈ្មោះបោះឆ្នោតដូចជា អត្តសញ្ញាណប័ណ្ណសញ្ជាតិខ្មែរប្រភេទ ១ និងប្រភេទ ២ អស់សុពលភាពបានផ្លាស់ប្ដូរឯកសាររបស់ខ្លួន។
លោក ហង្ស ពុទ្ធា អ្នកនាំពាក្យ គ.ជ.ប. ថ្លែងនៅថ្ងៃទី ៣១ សីហា ថា ការដាក់ឱ្យដំណើរការប្រព័ន្ធផ្លាស់ប្ដូរឯកសារចុះឈ្មោះបោះឆ្នោតពីចម្ងាយ [អនឡាញ] នេះ ព្រោះឯកសារចុះឈ្មោះបោះឆ្នោត ២ របស់អ្នកចុះឈ្មោះបោះឆ្នោតពីមុនមក ជាឯកសារដែលអស់សុពលភាព។
លោកថ្លែងថា៖ «កាលពីមុន គ.ជ.ប. បានទទួលយកឯកសារចុះឈ្មោះបោះឆ្នោតរួមមាន ឯកសារ ដូចជា អត្តសញ្ញាណប័ណ្ណសញ្ជាតិខ្មែរប្រភេទ ១ និងប្រភេទ ២ ដែលជាឯកសារអស់សុពលភាពប្រើប្រាស់ ហើយយោងតាមប្រកាសរបស់ក្រសួងមហាផ្ទៃ។ ដូច្នេះអ្នកមានឈ្មោះបោះឆ្នោតចុងក្រោយឆ្នាំ ២០១៩ ត្រូវយកអត្តសញ្ញាណប័ណ្ណថ្មីដែលមានឈីប (Chip) ដែលហៅថា អត្តសញ្ញាណប័ណ្ណប្រភេទទី ៣ នេះមកប្ដូរ»។
លោក ហង្ស ពុទ្ធា ពន្យល់ថា ការផ្លាស់ប្ដូរឯកសារចុះឈ្មោះបោះឆ្នោតនេះ ផ្អែកទៅលើច្បាប់ដែលបានតម្រូវឱ្យអ្នកចុះឈ្មោះបោះឆ្នោតត្រូវប្រើអត្តសញ្ញាណប័ណ្ណសញ្ជាតិខ្មែរ និងពេលទៅបោះឆ្នោតក៏ត្រូវប្រើអត្តសញ្ញាណប័ណ្ណសញ្ជាតិខ្មែរដែរ។ ការធ្វើបែបនេះដើម្បីជាការឯកភាពគ្នាទូទាំងប្រទេស និងស្របទៅតាមច្បាប់ផងដែរ។
លោក ពុទ្ធា ឲ្យដឹងថា ប្រព័ន្ធផ្លាស់ប្ដូរឯកសារចុះឈ្មោះបោះឆ្នោតពីចម្ងាយនេះ ប្រជាពលរដ្ឋទាំងនៅក្នុងប្រទេសកម្ពុជា និងនៅក្រៅប្រទេសមិនចាំបាច់ទៅផ្លាស់ប្ដូរឯកសារនៅការិយាល័យដោយផ្ទាល់ក៏បាន។ ប៉ុន្ដែមានលក្ខខណ្ឌ គឺអ្នកមានឈ្មោះនៅក្នុងអត្តសញ្ញាណប័ណ្ណដែលខ្លួនមានត្រឹមត្រូវ ១០០ ភាគរយទៅនឹងឈ្មោះដែលមាននៅក្នុងបញ្ជីបោះឆ្នោតនោះ ទើបអាចផ្លាស់ប្ដូរបានតាមរយៈអនឡាញនេះ។
លោកថា៖ «គ.ជ.ប. គឺសំដៅធ្វើឱ្យកាន់តែមានភាពល្អប្រសើរមានភាពត្រឹមត្រូវ និងមានបច្ចុប្បន្នភាពចំពោះបញ្ជីចុះឈ្មោះបោះឆ្នោត»។
គ.ជ.ប. កាលពីថ្ងៃទី ២៧ សីហា បានជូនដំណឹងពីដំណើរការ ប្រព័ន្ធផ្លាស់ប្ដូរឯកសារចុះឈ្មោះបោះឆ្នោតពីចម្ងាយនេះថា ការដាក់ឱ្យដំណើរការប្រព័ន្ធផ្លាស់ប្តូរឯកសារចុះឈ្មោះបោះឆ្នោតពីចម្ងាយលើកដំបូង ដើម្បីបង្កលក្ខណៈងាយស្រួលឱ្យអ្នកមានឈ្មោះក្នុងបញ្ជីបោះឆ្នោតចុងក្រោយឆ្នាំ ២០១៩ ដែលប្រើឯកសារចុះឈ្មោះ បោះឆ្នោត ដូចជា អត្តសញ្ញាណប័ណ្ណសញ្ជាតិខ្មែរប្រភេទ ១ និងប្រភេទ ២ អស់សុពលភាព ឬឯកសារបញ្ជាក់អត្តសញ្ញាណបម្រើឱ្យការចុះឈ្មោះបោះឆ្នោត បានផ្លាស់ប្តូរឯកសារចុះឈ្មោះបោះឆ្នោតរបស់ខ្លួនគ្រប់ៗគ្នាសំដៅធ្វើឱ្យបញ្ជីបោះឆ្នោតកាន់តែមានភាពពេញលេញ ត្រឹមត្រូវ និងមានបច្ចុប្បន្នភាពសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២០ នេះ។
គ.ជ.ប. ប្រាប់ថា ប្រព័ន្ធផ្លាស់ប្តូរឯកសារនេះនឹងដំណើរការតាមគេហទំព័រ voterlist.nec.gov.kh ចាប់ពីថ្ងៃទី ២៨ សីហា ដល់ថ្ងៃទី ១៩ តុលា ឆ្នាំ ២០២០។ អ្នកមានឈ្មោះ និងទិន្នន័យក្នុង អ.ខ. [អត្តសញ្ញាណប័ណ្ណសញ្ជាតិខ្មែរ] ប្រភេទថ្មីមានឈីប (Chip) ដូចគ្នាទៅនឹងឈ្មោះ និងទិន្នន័យក្នុងបញ្ជីបោះឆ្នោតចុងក្រោយឆ្នាំ ២០១៩ អាចស្នើសុំផ្លាស់ប្តូរអត្ដសញ្ញាណប័ណ្ណសញ្ជាតិខ្មែរប្រភេទថ្មីរបស់ខ្លួនតាមអនឡាញចាប់ពីថ្ងៃទី ២៨ ខែសីហា ដល់ថ្ងៃទី ១៩ ខែតុលា ឆ្នាំ ២០២០។
លោក ហង្ស ពុទ្ធា បានបញ្ជាក់ថា អ្នកមានឈ្មោះឬ/ និងទិន្នន័យក្នុងអត្តសញ្ញាណប័ណ្ណ ប្រភេទថ្មីមានឈីបខុសគ្នាទៅនឹងឈ្មោះ ឬ/ និងទិន្នន័យក្នុងបញ្ជីបោះឆ្នោតចុងក្រោយ ឆ្នាំ ២០១៩ ត្រូវទៅជួបជាមួយក្រុមចុះឈ្មោះបោះឆ្នោតក្នុងឃុំ សង្កាត់ដែលខ្លួនកំពុងរស់នៅ ដើម្បីស្នើសុំកែតម្រូវឈ្មោះ ឬ/ និងទិន្នន័យក្នុងបញ្ជីបោះឆ្នោតឱ្យដូចគ្នាទៅនឹងឈ្មោះ ឬ/ និងទិន្នន័យក្នុង អត្តសញ្ញាណប័ណ្ណសញ្ជាតិខ្មែរប្រភេទថ្មីរបស់ខ្លួនក្នុងអំឡុងពេលពិនិត្យបញ្ជីឈ្មោះ និងការចុះឈ្មោះបោះឆ្នោតចាប់ពីថ្ងៃទី ១ ដល់ថ្ងៃទី ១៩ ខែតុលា ឆ្នាំ ២០២០៕
