.jpg)
ផ្លូវទៅកាន់ឧទ្យានជាតិភ្នំបូកគោក្នុងខេត្តកំពតដែលត្រូវបានបង្កើតជាក្រុង។ រូបថត សហការី
កំពតៈ គណៈកម្មាធិការជាតិរៀបចំការបោះឆ្នោត (គ.ជ.ប) ត្រៀមរៀបចំការបោះឆ្នោតជ្រើសរើសក្រុមប្រឹក្សា ក្រុងបូកគោ ក្នុងអាណត្តិទី៣ ឡើងវិញ នៅពេលខាងមុខ បន្ទាប់ពីរាជរដ្ឋាភិបាលបានសម្រេចបង្កើតរមណីយដ្ឋានបូកគោជាក្រុងថ្មី។ នេះបើយោងតាមសេចក្តីប្រកាសព័ត៌មានរបស់ គជប កាលពីថ្ងៃទី ២ ខែមេសា។
រាជរដ្ឋាភិបាលបានចេញអនុក្រឹត្យលេខ ៣៨ អនក្រ .បក ចុះថ្ងៃទី ១៦ ខែ មីនា ឆ្នាំ ២០២១ ដោយសម្រេចបង្កើតក្រុងបូកគោដែលក្រុងនេះមានសង្កាត់ចំនួន ៣ គឺ សង្កាត់បឹងទូក សង្កាត់កោះតូច និងសង្កាត់ព្រែកត្នោត។
មាត្រា ៧៨ នៃច្បាប់ស្តីពីការបោះឆ្នោតជ្រើសរើសក្រុមប្រឹក្សា និងច្បាប់ស្តីពីវិសោធនកម្មនៃច្បាប់នេះការរៀបចំ ការបោះឆ្នោតឡើងវិញ ដើម្បីជ្រើសរើសក្រុមប្រឹក្សាខេត្តក្រុងស្រុកខណ្ឌដែលបង្កើតថ្មីត្រូវធ្វើឡើងក្នុងរយៈពេលយ៉ាងយូរ ២៤០ ថ្ងៃ បន្ទាប់ពីការបង្កើតខេត្ត ក្រុង ស្រុក ខណ្ឌនោះ ។
លោក សោម សូរីដា អគ្គលេខាធិការរង គ.ជ.ប ប្រាប់ភ្នំពេញប៉ុស្តិ៍ពីម្សិលមិញថា សម្រាប់ក្រុងបូកគោដែលទើបបង្កើតថ្មីនេះ គ.ជ.ប ត្រូវរៀបចំការបោះឆ្នោតឡើងវិញតាមកាលបរិច្ឆេទដែលកំណត់ដោយនាយករដ្ឋមន្ត្រីតាមសំណើរបស់រដ្ឋមន្ត្រីក្រសួងមហាផ្ទៃ។ ទោះជាយ៉ាងណាមកដល់ពេលនេះ គ.ជ.ប មិនទាន់បានទទួលសំណើ ឬ ការកំណត់កាលបរិច្ឆេទរបស់លោកនាយករដ្ឋមន្ត្រី ហ៊ុន សែន នៅឡើយទេ។
លោក សោម សូរីដា ពន្យល់ថា ការបោះឆ្នោតនេះនឹងប្រព្រឹត្តទៅស្ថិតនៅក្នុងក្របខ័ណ្ឌនៃក្រុងបូកគោប៉ុណ្ណោះហើយគណបក្សនយោបាយ ដែលបានចុះបញ្ជីនៅក្នុងក្រសួងមហាផ្ទៃមានសិទ្ធិក្នុងការចុះឈ្មោះគណបក្ស ឬបេក្ខជនឈរឈ្មោះរបស់ខ្លួនសម្រាប់ការបោះឆ្នោត ក្រុមប្រឹក្សាក្រុងបូកគោនេះ។
សម្រាប់អង្គបោះឆ្នោតមានតែក្រុមប្រឹក្សាឃុំសង្កាត់នៅក្នុងមុខតំណែងប៉ុណ្ណោះ។ លោកបញ្ជាក់ថា៖ «អ៊ីចឹងនៅក្នុងក្រុងបូកគោនេះមានសង្កាត់ចំនួន ៣ ហើយសមាជិកក្រុមប្រឹក្សានៅក្នុងឃុំសង្កាត់ទាំង ៣ នេះគឺជាអង្គបោះឆ្នោតជ្រើសរើសក្រុមប្រឹក្សាក្រុងបូកគោ ហើយគណបក្សនយោបាយនីមួយៗប្រាកដជាដឹងហើយថា គណបក្សនយោបាយណាមានអាសនៈនៅក្នុងសង្កាត់ទាំង ៣ នៃក្រុងបូកគោនេះ»។
លោក ខៀវ សុភ័គ អ្នកនាំពាក្យក្រសួងមហាផ្ទៃមិនអាចទាក់ទងសុំធ្វើអត្ថាធិប្បាយទេពីម្សិលមិញ។ ប៉ុន្តែលោក ផៃ ស៊ីផាន អ្នកនាំពាក្យរបស់រាជរដ្ឋាភិបាលថ្លែងថា នៅក្នុងអំឡុងពេលនេះគឺស្ថិតក្នុងស្ថានភាពនៃការរង់ចាំ សម្រាប់ការបោះឆ្នោតជ្រើសរើសក្រុមប្រឹក្សាក្រុងបូកគោនេះ ព្រោះរាជដ្ឋាភិបាលបាននិងកំពុងប្រយុទ្ធប្រឆាំងទៅនឹងជំងឺកូវីដ១៩។
ទោះយ៉ាងណាលោក ផៃ ស៊ីផាន ថា នៅពេលដែលស្ថានភាពមានដំណើរការល្អប្រសើរឡើងវិញគឺអាចចាប់ផ្តើមរៀបចំការបោះឆ្នោតនេះបានហើយ ពីព្រោះនាពេលនេះគឺរដ្ឋាភិបាលមិនឱ្យមានការជួបជុំគ្នានោះទេដូច្នេះការរៀបចំការបោះឆ្នោត ពិបាកក្នុងការធ្វើ។
លោក ផៃ ស៊ីផាន បានថ្លែងថា៖ «យើងមើលស្ថានភាពសព្វថ្ងៃនេះ វាមានបញ្ហាអ្វីខ្លះ ទី១ ត្រូវរកវិធានថ្មីនៃការបោះឆ្នោតតាមរយៈការបោះឆ្នោត តាមអនឡាញ ឬតាមណាមួយសមស្រប វាអាស្រ័យលើ គ.ជ.ប គួរតែពិនិត្យមើលបញ្ហានេះ»។
លោក កន សាវាង្សអ្នកសម្របសម្រួលផ្នែកអង្កេត និងតស៊ូមតិនៃអង្គការ Comfrel ថ្លែងថា រាល់ការបោះឆ្នោតត្រូវតែមានការប្រកួតប្រជែងពីគណបក្សនយោបាយ។ លោកបានបន្តថា៖ «វាមិនមែនការគ្រប់គ្រងទៅលើកន្លែងដែលបង្កើតថ្មី ហើយមិនមានការប្រកួតប្រជែងតាមរយៈការឆ្លងកាត់ពីគណបក្សនយោបាយនោះទេ ពីឃុំសង្កាត់ ទើបដល់ក្រុង»។
លោក សាវាង្ស ផ្តល់ជាយោបល់ថា ការបោះឆ្នោតនីមួយៗត្រូវតែមានការចូលរួមពីគណបក្សនយោបាយ ប៉ុន្តែបើមិនមានទេ គួរតែពិនិត្យសារឡើងវិញ ដើម្បីឱ្យការគ្រប់គ្រងទីក្រុងបូកគោថ្មីនេះស្របតាមគោលការណ៍លទ្ធិប្រជាធិបតេយ្យ។
យោងតាមមាត្រា ១៤ នៃច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និង ច្បាប់ស្តីពីវិសោធនកម្មនៃច្បាប់នេះ រាជធានី ខេត្ត ក្រុង ស្រុក ខណ្ឌ ត្រូវមានក្រុមប្រឹក្សារបស់ខ្លួនដែលត្រូវបានជ្រើសរើសឡើងតាមរយៈការបោះឆ្នោតអសកល ស្របតាមនីតិវិធីដែលកំណត់ដោយច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌដែលហៅកាត់ថា «ក្រុមប្រឹក្សា»៕
